| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
និគមនកថា
Nigamanakathā
ឯត្តាវតា ច –
Ettāvatā ca –
១.
1.
លង្កិស្សរោ យោ វិជិតារិរាជោ;
Laṅkissaro yo vijitārirājo;
រាជា បរក្កន្តភុជោ យសស្សី;
Rājā parakkantabhujo yasassī;
តិធាគតំ សីហឡមេករជ្ជំ;
Tidhāgataṃ sīhaḷamekarajjaṃ;
អកា និកាយញ្ច តថា សមគ្គំ។
Akā nikāyañca tathā samaggaṃ.
២.
2.
បុរេ បុលត្ថិម្ហិ វរេ បុរានំ;
Pure pulatthimhi vare purānaṃ;
មជ្ឈម្ហិ នានារតនាករានំ;
Majjhamhi nānāratanākarānaṃ;
អនន្តសម្បត្តិភរាភិរាមេ;
Anantasampattibharābhirāme;
វរាចលុត្តង្គឃរាភិរាមេ។
Varācaluttaṅgagharābhirāme.
៣.
3.
អភេជ្ជបាការសុគោបុរស្មិំ ;
Abhejjapākārasugopurasmiṃ ;
និរាកុលានេកកុលាកុលស្មិំ;
Nirākulānekakulākulasmiṃ;
មុនិន្ទទាឋង្កុរវាសភូតេ;
Munindadāṭhaṅkuravāsabhūte;
យោ លោចនានន្ទវហេ វសន្តោ។
Yo locanānandavahe vasanto.
៤.
4.
សុផុល្លិតព្ភោរុហសាទុសីត
Suphullitabbhoruhasādusīta
បសន្ននីរេហិ ជលាសយេហិ;
Pasannanīrehi jalāsayehi;
សុបុប្ផិតានេកកទម្ពជម្ពុ-
Supupphitānekakadambajambu-
បុន្នាគនាគាទិហិ វាភិរម្មេ។
Punnāganāgādihi vābhiramme.
៥.
5.
សុធាវទាតេហិ មនោហរេហិ;
Sudhāvadātehi manoharehi;
បាការបន្តីហិ ច គោបុរេហិ;
Pākārapantīhi ca gopurehi;
វិកិណ្ណមុត្តាផលសន្និភេហិ;
Vikiṇṇamuttāphalasannibhehi;
វិលោកនីយេហិ សុធាតលេហិ។
Vilokanīyehi sudhātalehi.
៦.
6.
កត្វាន បាសាទសហស្សរម្មេ;
Katvāna pāsādasahassaramme;
តហិំ តហិំ បីតិករេ វិហារេ;
Tahiṃ tahiṃ pītikare vihāre;
មហាទយោ ជេតវនាទយោបិ;
Mahādayo jetavanādayopi;
សុសំយមានំ យតិនំ អទាសិ។
Susaṃyamānaṃ yatinaṃ adāsi.
៧.
7.
យោ សាទុភូតំ ចតុបច្ចយញ្ច;
Yo sādubhūtaṃ catupaccayañca;
គុណប្បសន្នោ សមណេសុ តេសុ;
Guṇappasanno samaṇesu tesu;
និច្ចំ មហោឃំ វិយ វត្តយន្តោ;
Niccaṃ mahoghaṃ viya vattayanto;
យោជេតិ តេ គន្ថវិបស្សនាសុ។
Yojeti te ganthavipassanāsu.
៨.
8.
ការិតេសុ វិហារេសុ, តេន តេសុ យសស្សិនា;
Kāritesu vihāresu, tena tesu yasassinā;
រម្មោ យោ បច្ឆិមារាមោ, បុប្ផារាមាទិសោភិតោ។
Rammo yo pacchimārāmo, pupphārāmādisobhito.
៩.
9.
បរិវេណម្ហិ នាមេន, តហិំ ចោឡកុលន្តិកេ;
Pariveṇamhi nāmena, tahiṃ coḷakulantike;
បាសាទេ ទស្សនីយម្ហិ, វសន្តោ ករុណាបរោ។
Pāsāde dassanīyamhi, vasanto karuṇāparo.
១០.
10.
សិស្សោ សសីករស្វច្ឆ-សីលាចារស្ស ធីមតោ;
Sisso sasīkarasvaccha-sīlācārassa dhīmato;
សារិបុត្តមហាថេរ-មហាសាមិស្ស តាទិនោ។
Sāriputtamahāthera-mahāsāmissa tādino.
១១.
11.
ធីរានេកគុណោឃេន, ថេរេន សុចិវុត្តិនា;
Dhīrānekaguṇoghena, therena sucivuttinā;
វិនយដ្ឋិតិកាមេន, សុមេធេនាភិយាចិតោ។
Vinayaṭṭhitikāmena, sumedhenābhiyācito.
១២.
12.
សោ ពុទ្ធនាគត្ថេរោហំ, ភិក្ខូនំ បរមំ ហិតំ;
So buddhanāgattherohaṃ, bhikkhūnaṃ paramaṃ hitaṃ;
មហាវិហារវាសីនំ, យតីនំ សមយានុគំ។
Mahāvihāravāsīnaṃ, yatīnaṃ samayānugaṃ.
១៣.
13.
វិនយត្ថាទិមញ្ជូសំ , លីនត្ថស្ស បកាសនិំ;
Vinayatthādimañjūsaṃ , līnatthassa pakāsaniṃ;
មាតិកដ្ឋកថាយេមំ, អកាសិំ សាធុ វណ្ណនំ។
Mātikaṭṭhakathāyemaṃ, akāsiṃ sādhu vaṇṇanaṃ.
១៤.
14.
សាយំ សុពោធា ពុធវណ្ណនីយា;
Sāyaṃ subodhā budhavaṇṇanīyā;
សំវណ្ណនា សត្តសហស្សមត្តា;
Saṃvaṇṇanā sattasahassamattā;
និរាករោន្តី វិនយម្ហិ មោហំ;
Nirākarontī vinayamhi mohaṃ;
តមំ ចរន្តី សសិ ខេវ ភាតុ។
Tamaṃ carantī sasi kheva bhātu.
១៥.
15.
អាកង្ខមានេន បរត្ថមិដ្ឋំ;
Ākaṅkhamānena paratthamiṭṭhaṃ;
មហត្ថសារំ សុវិនិច្ឆយញ្ច;
Mahatthasāraṃ suvinicchayañca;
សំវណ្ណនំ សាធុ បកុព្ពតា យំ;
Saṃvaṇṇanaṃ sādhu pakubbatā yaṃ;
ចិតំ មយា បុញ្ញមនប្បភូតំ។
Citaṃ mayā puññamanappabhūtaṃ.
១៦.
16.
បុញ្ញេន តេនាចិតទានសីល-
Puññena tenācitadānasīla-
មយាទិនានេកវិធេន ចេវ;
Mayādinānekavidhena ceva;
សត្តា អនីឃា សុខិនោ អវេរា;
Sattā anīghā sukhino averā;
បប្បោន្តុ សព្ពេ សុគតិំ សិវញ្ច។
Pappontu sabbe sugatiṃ sivañca.
១៧.
17.
សទ្ធិំ យថោបទ្ទវមន្តរេន;
Saddhiṃ yathopaddavamantarena;
គតា ហិ លីនត្ថបទីបនីយំ;
Gatā hi līnatthapadīpanīyaṃ;
តថា ជនានំ អបិ ធម្មយុត្តា;
Tathā janānaṃ api dhammayuttā;
មនោរថា សិទ្ធិមុបេន្តុ និច្ចំ។
Manorathā siddhimupentu niccaṃ.
១៨.
18.
កាលេ បវស្សន្តុ សទា បយោទា;
Kāle pavassantu sadā payodā;
ធម្មេន បាលេន្តុ មហិំ មហិន្ទា;
Dhammena pālentu mahiṃ mahindā;
សត្តា បសន្នា រតនត្តយស្មិំ;
Sattā pasannā ratanattayasmiṃ;
ទានាទិបុញ្ញាភិរតា ភវន្តូតិ។
Dānādipuññābhiratā bhavantūti.
វិនយត្ថមញ្ជូសា លីនត្ថប្បកាសនីនាមិកាកង្ខាវិតរណីអភិនវដីកា និដ្ឋិតា។
Vinayatthamañjūsā līnatthappakāsanīnāmikākaṅkhāvitaraṇīabhinavaṭīkā niṭṭhitā.
