| Library / Tipiṭaka / តិបិដក • Tipiṭaka / សុត្តនិបាត-អដ្ឋកថា • Suttanipāta-aṭṭhakathā |
និគមនកថា
Nigamanakathā
ឯត្តាវតា ច យំ វុត្តំ –
Ettāvatā ca yaṃ vuttaṃ –
‘‘ឧត្តមំ វន្ទនេយ្យានំ, វន្ទិត្វា រតនត្តយំ;
‘‘Uttamaṃ vandaneyyānaṃ, vanditvā ratanattayaṃ;
យោ ខុទ្ទកនិកាយម្ហិ, ខុទ្ទាចារប្បហាយិនា។
Yo khuddakanikāyamhi, khuddācārappahāyinā.
‘‘ទេសិតោ លោកនាថេន, លោកនិត្ថរណេសិនា;
‘‘Desito lokanāthena, lokanittharaṇesinā;
តស្ស សុត្តនិបាតស្ស, ករិស្សាមត្ថវណ្ណន’’ន្តិ។
Tassa suttanipātassa, karissāmatthavaṇṇana’’nti.
ឯត្ថ ឧរគវគ្គាទិបញ្ចវគ្គសង្គហិតស្ស ឧរគសុត្តាទិសត្តតិសុត្តប្បភេទស្ស សុត្តនិបាតស្ស អត្ថវណ្ណនា កតា ហោតិ។ តេនេតំ វុច្ចតិ –
Ettha uragavaggādipañcavaggasaṅgahitassa uragasuttādisattatisuttappabhedassa suttanipātassa atthavaṇṇanā katā hoti. Tenetaṃ vuccati –
‘‘ឥមំ សុត្តនិបាតស្ស, ករោន្តេនត្ថវណ្ណនំ;
‘‘Imaṃ suttanipātassa, karontenatthavaṇṇanaṃ;
សទ្ធម្មដ្ឋិតិកាមេន, យំ បត្តំ កុសលំ មយា។
Saddhammaṭṭhitikāmena, yaṃ pattaṃ kusalaṃ mayā.
‘‘តស្សានុភាវតោ ខិប្បំ, ធម្មេ អរិយប្បវេទិតេ;
‘‘Tassānubhāvato khippaṃ, dhamme ariyappavedite;
វុឌ្ឍិំ វិរូឡ្ហិំ វេបុល្លំ, បាបុណាតុ អយំ ជនោ’’តិ។
Vuḍḍhiṃ virūḷhiṃ vepullaṃ, pāpuṇātu ayaṃ jano’’ti.
(បរិយត្តិប្បមាណតោ ចតុចត្តាលីសមត្តា ភាណវារា។)
(Pariyattippamāṇato catucattālīsamattā bhāṇavārā.)
បរមវិសុទ្ធសទ្ធាពុទ្ធិវីរិយប្បដិមណ្ឌិតេន សីលាចារជ្ជវមទ្ទវាទិគុណសមុទយសមុទិតេន សកសមយសមយន្តរគហនជ្ឈោគាហណសមត្ថេន បញ្ញាវេយ្យត្តិយសមន្នាគតេន តិបិដកបរិយត្តិប្បភេទេ សាដ្ឋកថេ សត្ថុសាសនេ អប្បដិហតញាណប្បភាវេន មហាវេយ្យាករណេន ករណសម្បត្តិជនិតសុខវិនិគ្គតមធុរោទារវចនលាវណ្ណយុត្តេន យុត្តមុត្តវាទិនា វាទីវរេន មហាកវិនា ឆឡភិញ្ញាបដិសម្ភិទាទិប្បភេទគុណបដិមណ្ឌិតេ ឧត្តរិមនុស្សធម្មេ សុប្បតិដ្ឋិតពុទ្ធីនំ ថេរវំសប្បទីបានំ ថេរានំ មហាវិហារវាសីនំ វំសាលង្ការភូតេន វិបុលវិសុទ្ធពុទ្ធិនា ពុទ្ធឃោសោតិ គរូហិ គហិតនាមធេយ្យេន ថេរេន កតា អយំ បរមត្ថជោតិកា នាម សុត្តនិបាត-អដ្ឋកថា –
Paramavisuddhasaddhābuddhivīriyappaṭimaṇḍitena sīlācārajjavamaddavādiguṇasamudayasamuditena sakasamayasamayantaragahanajjhogāhaṇasamatthena paññāveyyattiyasamannāgatena tipiṭakapariyattippabhede sāṭṭhakathe satthusāsane appaṭihatañāṇappabhāvena mahāveyyākaraṇena karaṇasampattijanitasukhaviniggatamadhurodāravacanalāvaṇṇayuttena yuttamuttavādinā vādīvarena mahākavinā chaḷabhiññāpaṭisambhidādippabhedaguṇapaṭimaṇḍite uttarimanussadhamme suppatiṭṭhitabuddhīnaṃ theravaṃsappadīpānaṃ therānaṃ mahāvihāravāsīnaṃ vaṃsālaṅkārabhūtena vipulavisuddhabuddhinā buddhaghosoti garūhi gahitanāmadheyyena therena katā ayaṃ paramatthajotikā nāma suttanipāta-aṭṭhakathā –
តាវ តិដ្ឋតុ លោកស្មិំ, លោកនិត្ថរណេសិនំ;
Tāva tiṭṭhatu lokasmiṃ, lokanittharaṇesinaṃ;
ទស្សេន្តី កុលបុត្តានំ, នយំ បញ្ញាវិសុទ្ធិយា។
Dassentī kulaputtānaṃ, nayaṃ paññāvisuddhiyā.
យាវ ពុទ្ធោតិ នាមម្បិ, សុទ្ធចិត្តស្ស តាទិនោ;
Yāva buddhoti nāmampi, suddhacittassa tādino;
លោកម្ហិ លោកជេដ្ឋស្ស, បវត្តតិ មហេសិនោតិ។
Lokamhi lokajeṭṭhassa, pavattati mahesinoti.
សុត្តនិបាត-អត្ថវណ្ណនា និដ្ឋិតា។
Suttanipāta-atthavaṇṇanā niṭṭhitā.
