| Library / Tipiṭaka / ติปิฎก • Tipiṭaka / สารตฺถทีปนี-ฎีกา • Sāratthadīpanī-ṭīkā |
นิคมนกถา
Nigamanakathā
เอตฺตาวตา จ –
Ettāvatā ca –
วินเย ปาฎวตฺถาย, สาสนสฺส จ วุฑฺฒิยา;
Vinaye pāṭavatthāya, sāsanassa ca vuḍḍhiyā;
วณฺณนา ยา สมารทฺธา, วินยฎฺฐกถาย สาฯ
Vaṇṇanā yā samāraddhā, vinayaṭṭhakathāya sā.
สารตฺถทีปนี นาม, สพฺพโส ปรินิฎฺฐิตา;
Sāratthadīpanī nāma, sabbaso pariniṭṭhitā;
ติํสสหสฺสมเตฺตหิ, คเนฺถหิ ปริมาณโตฯ
Tiṃsasahassamattehi, ganthehi parimāṇato.
อเชฺฌสิโต นริเนฺทน, โสหํ ปรกฺกมพาหุนา;
Ajjhesito narindena, sohaṃ parakkamabāhunā;
สทฺธมฺมฎฺฐิติกาเมน, สาสนุโชฺชตการินาฯ
Saddhammaṭṭhitikāmena, sāsanujjotakārinā.
เตเนว การิเต รเมฺม, ปาสาทสตมณฺฑิเต;
Teneva kārite ramme, pāsādasatamaṇḍite;
นานาทุมคณากิเณฺณ, ภาวนาภิรตาลเยฯ
Nānādumagaṇākiṇṇe, bhāvanābhiratālaye.
สีตลูทกสมฺปเนฺน, วสํ เชตวเน อิมํ;
Sītalūdakasampanne, vasaṃ jetavane imaṃ;
อตฺถพฺยญฺชนสมฺปนฺนํ, อกาสิํ สุวินิจฺฉยํฯ
Atthabyañjanasampannaṃ, akāsiṃ suvinicchayaṃ.
ยํ สิทฺธํ อิมินา ปุญฺญํ, ยํ จญฺญํ ปสุตํ มยา;
Yaṃ siddhaṃ iminā puññaṃ, yaṃ caññaṃ pasutaṃ mayā;
เอเตน ปุญฺญกเมฺมน, ทุติเย อตฺตสมฺภเวฯ
Etena puññakammena, dutiye attasambhave.
ตาวติํเส ปโมเทโนฺต, สีลาจารคุเณ รโต;
Tāvatiṃse pamodento, sīlācāraguṇe rato;
อลโคฺค ปญฺจกาเมสุ, ปตฺวาน ปฐมํ ผลํฯ
Alaggo pañcakāmesu, patvāna paṭhamaṃ phalaṃ.
อนฺติเม อตฺตภาวมฺหิ, เมเตฺตยฺยํ มุนิปุงฺควํ;
Antime attabhāvamhi, metteyyaṃ munipuṅgavaṃ;
โลกคฺคปุคฺคลํ นาถํ, สพฺพสตฺตหิเต รตํฯ
Lokaggapuggalaṃ nāthaṃ, sabbasattahite rataṃ.
ทิสฺวาน ตสฺส ธีรสฺส, สุตฺวา สทฺธมฺมเทสนํ;
Disvāna tassa dhīrassa, sutvā saddhammadesanaṃ;
อธิคนฺตฺวา ผลํ อคฺคํ, โสเภยฺยํ ชินสาสนํฯ
Adhigantvā phalaṃ aggaṃ, sobheyyaṃ jinasāsanaṃ.
สทา รกฺขนฺตุ ราชาโน, ธเมฺมเนว อิมํ ปชํ;
Sadā rakkhantu rājāno, dhammeneva imaṃ pajaṃ;
นิรตา ปุญฺญกเมฺมสุ, โชเตนฺตุ ชินสาสนํฯ
Niratā puññakammesu, jotentu jinasāsanaṃ.
อิเม จ ปาณิโน สเพฺพ, สพฺพทา นิรุปทฺทวา;
Ime ca pāṇino sabbe, sabbadā nirupaddavā;
นิจฺจํ กลฺยาณสงฺกปฺปา, ปโปฺปนฺตุ อมตํ ปทนฺติฯ
Niccaṃ kalyāṇasaṅkappā, pappontu amataṃ padanti.
สารตฺถทีปนี นาม วินยฎีกา นิฎฺฐิตาฯ
Sāratthadīpanī nāma vinayaṭīkā niṭṭhitā.
