| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
นิคมนกถา
Nigamanakathā
การาปิเตติรุจิเร ปวเร วิหาเร;
Kārāpitetirucire pavare vihāre;
มานาธิการิปุรินา ครุนา คุเณน;
Mānādhikāripurinā garunā guṇena;
วสฺสํ วสํ ทมิฬโส วิธหํ อกาสิํ;
Vassaṃ vasaṃ damiḷaso vidhahaṃ akāsiṃ;
อากงฺขฎีก ชินสาสนสมฺปวุทฺธิํฯ
Ākaṅkhaṭīka jinasāsanasampavuddhiṃ.
ปุเญฺญน สตฺถรจนาชนิเตน เตน;
Puññena sattharacanājanitena tena;
สมฺพุทฺธสาสนวโรทยการเณน;
Sambuddhasāsanavarodayakāraṇena;
โลกามิเสสุ ปน เม สมยํ อลโคฺค;
Lokāmisesu pana me samayaṃ alaggo;
สมฺพุทฺธสาสนวโรทยมาจเรยฺยํฯ
Sambuddhasāsanavarodayamācareyyaṃ.
อเตฺถสุ อกฺขรปเทสุ วินิจฺฉเยสุ;
Atthesu akkharapadesu vinicchayesu;
ปุพฺพาปเรสุ ลิขิตํ ขลิตํ ยทตฺถิ;
Pubbāparesu likhitaṃ khalitaṃ yadatthi;
โอหาย ขนฺตุมรหนฺติ วทนฺตุ สนฺตา;
Ohāya khantumarahanti vadantu santā;
ทิฎฺฐาปราธมถ วา กิมุลาลเนนฯ
Diṭṭhāparādhamatha vā kimulālanena.
เยนนฺตตนฺตรตนากรมนฺถเนน;
Yenantatantaratanākaramanthanena;
มนฺถาจโลลฺลสิตญาณวเรน ลทฺธา;
Manthācalollasitañāṇavarena laddhā;
สารามตาติสุขิตา สุขยนฺติ จเญฺญ;
Sārāmatātisukhitā sukhayanti caññe;
เต เม ชยนฺติ ครโว ครโว คุเณหิฯ
Te me jayanti garavo garavo guṇehi.
ปรตฺถสมฺปาทนโต, ปุเญฺญนาธิคเตนหํ;
Paratthasampādanato, puññenādhigatenahaṃ;
ปรตฺถสมฺปาทนโก, ภเวยฺยํ ชาติชาติยํฯ
Paratthasampādanako, bhaveyyaṃ jātijātiyaṃ.
สิโสฺส อาห –
Sisso āha –
ปรมปฺปิจฺฉตาเนกสโนฺตโสปสเมสินํ;
Paramappicchatānekasantosopasamesinaṃ;
สุจิสเลฺลขวุตฺตีนํ, สทารญฺญนิวาสินํฯ
Sucisallekhavuttīnaṃ, sadāraññanivāsinaṃ.
สาสนุโชฺชตการีนํ, อาเจรตฺตมุปาคตํ;
Sāsanujjotakārīnaṃ, ācerattamupāgataṃ;
อุทุมฺพรคิริขฺยาตยตีนํ ยติปุงฺควํฯ
Udumbaragirikhyātayatīnaṃ yatipuṅgavaṃ.
เมธงฺกร อิติ ขฺยาตนามเธยฺยํ ตโปธนํ;
Medhaṅkara iti khyātanāmadheyyaṃ tapodhanaṃ;
เถรํ ถิรทยาเมธานิธานํ สาธุปูชิตํฯ
Theraṃ thiradayāmedhānidhānaṃ sādhupūjitaṃ.
สิสฺสํ สหายมาคมฺม, กลฺยาณมิตฺตมตฺตโน;
Sissaṃ sahāyamāgamma, kalyāṇamittamattano;
โสเธตุํ สาสนํ สตฺถุ, ปรกฺกมมกาสิ โยฯ
Sodhetuṃ sāsanaṃ satthu, parakkamamakāsi yo.
สุสทฺทสิทฺธิํ โย โยคนิจฺฉยํ สพฺภิ วณฺณิตํ;
Susaddasiddhiṃ yo yoganicchayaṃ sabbhi vaṇṇitaṃ;
อกา สุโพธาลงฺการํ, วุโตฺตทยมนากุลํฯ
Akā subodhālaṅkāraṃ, vuttodayamanākulaṃ.
สงฺฆรกฺขิตนาเมน, มหาเถเรน ธีมตา;
Saṅgharakkhitanāmena, mahātherena dhīmatā;
นิวาสภูเตนาเนกคุณานปฺปิจฺฉตาทินํฯ
Nivāsabhūtenānekaguṇānappicchatādinaṃ.
เตเนว รจิตา สาธุ, สาสโนทยการินา;
Teneva racitā sādhu, sāsanodayakārinā;
ขุทฺทสิกฺขาย ฎีกาปิ, สุมงฺคลปฺปสาทนีฯ
Khuddasikkhāya ṭīkāpi, sumaṅgalappasādanī.
นิคมนกถา นิฎฺฐิตาฯ
Nigamanakathā niṭṭhitā.
อิติ สุมงฺคลปฺปสาทนี นาม
Iti sumaṅgalappasādanī nāma
ขุทฺทสิกฺขา-อภินวฎีกา สมตฺตาฯ
Khuddasikkhā-abhinavaṭīkā samattā.
