| Library / Tipiṭaka / ติปิฎก • Tipiṭaka / เปตวตฺถุ-อฎฺฐกถา • Petavatthu-aṭṭhakathā |
นิคมนกถา
Nigamanakathā
เอตฺตาวตา จ –
Ettāvatā ca –
เย เต เปเตสุ นิพฺพตฺตา, สตฺตา ทุกฺกฎการิโน;
Ye te petesu nibbattā, sattā dukkaṭakārino;
เยหิ กเมฺมหิ เตสํ ตํ, ปาปกํ กฎุกปฺผลํฯ
Yehi kammehi tesaṃ taṃ, pāpakaṃ kaṭukapphalaṃ.
ปจฺจกฺขโต วิภาเวนฺตี, ปุจฺฉาวิสฺสชฺชเนหิ จ;
Paccakkhato vibhāventī, pucchāvissajjanehi ca;
ยา เทสนานิยาเมน, สตํ สํเวควฑฺฒนีฯ
Yā desanāniyāmena, sataṃ saṃvegavaḍḍhanī.
ยํ กถาวตฺถุกุสลา, สุปริญฺญาตวตฺถุกา;
Yaṃ kathāvatthukusalā, supariññātavatthukā;
เปตวตฺถูติ นาเมน, สงฺคายิํสุ มเหสโยฯ
Petavatthūti nāmena, saṅgāyiṃsu mahesayo.
ตสฺส อตฺถํ ปกาเสตุํ, โปราณฎฺฐกถานยํ;
Tassa atthaṃ pakāsetuṃ, porāṇaṭṭhakathānayaṃ;
นิสฺสาย ยา สมารทฺธา, อตฺถสํวณฺณนา มยาฯ
Nissāya yā samāraddhā, atthasaṃvaṇṇanā mayā.
ยา ตตฺถ ปรมตฺถานํ, ตตฺถ ตตฺถ ยถารหํ;
Yā tattha paramatthānaṃ, tattha tattha yathārahaṃ;
ปกาสนา ปรมตฺถ-ทีปนี นาม นามโตฯ
Pakāsanā paramattha-dīpanī nāma nāmato.
สมฺปตฺตา ปรินิฎฺฐานํ, อนากุลวินิจฺฉยา;
Sampattā pariniṭṭhānaṃ, anākulavinicchayā;
สา ปนฺนรสมตฺตาย, ปาฬิยา ภาณวารโตฯ
Sā pannarasamattāya, pāḷiyā bhāṇavārato.
อิติ ตํ สงฺขโรเนฺตน, ยํ ตํ อธิคตํ มยา;
Iti taṃ saṅkharontena, yaṃ taṃ adhigataṃ mayā;
ปุญฺญํ ตสฺสานุภาเวน, โลกนาถสฺส สาสนํฯ
Puññaṃ tassānubhāvena, lokanāthassa sāsanaṃ.
โอคาเหตฺวา วิสุทฺธาย, สีลาทิปฎิปตฺติยา;
Ogāhetvā visuddhāya, sīlādipaṭipattiyā;
สเพฺพปิ เทหิโน โหนฺตุ, วิมุตฺติรสภาคิโนฯ
Sabbepi dehino hontu, vimuttirasabhāgino.
จิรํ ติฎฺฐตุ โลกสฺมิํ, สมฺมาสมฺพุทฺธสาสนํ;
Ciraṃ tiṭṭhatu lokasmiṃ, sammāsambuddhasāsanaṃ;
ตสฺมิํ สคารวา นิจฺจํ, โหนฺตุ สเพฺพปิ ปาณิโนฯ
Tasmiṃ sagāravā niccaṃ, hontu sabbepi pāṇino.
สมฺมา วสฺสตุ กาเลน, เทโวปิ ชคตีปติ;
Sammā vassatu kālena, devopi jagatīpati;
สทฺธมฺมนิรโต โลกํ, ธเมฺมเนว ปสาสตูติฯ
Saddhammanirato lokaṃ, dhammeneva pasāsatūti.
อิติ พทรติตฺถวิหารวาสินา มุนิวรยตินา
Iti badaratitthavihāravāsinā munivarayatinā
ภทเนฺตน อาจริยธมฺมปาเลน กตา เปตวตฺถุอตฺถสํวณฺณนา นิฎฺฐิตาฯ
Bhadantena ācariyadhammapālena katā petavatthuatthasaṃvaṇṇanā niṭṭhitā.
เปตวตฺถุ-อฎฺฐกถา สมตฺตาฯ
Petavatthu-aṭṭhakathā samattā.
