| Library / Tipiṭaka / तिपिटक • Tipiṭaka / सारत्थदीपनी-टीका • Sāratthadīpanī-ṭīkā |
निगमनकथा
Nigamanakathā
एत्तावता च –
Ettāvatā ca –
विनये पाटवत्थाय, सासनस्स च वुड्ढिया।
Vinaye pāṭavatthāya, sāsanassa ca vuḍḍhiyā;
वण्णना या समारद्धा, विनयट्ठकथाय सा॥
Vaṇṇanā yā samāraddhā, vinayaṭṭhakathāya sā.
सारत्थदीपनी नाम, सब्बसो परिनिट्ठिता।
Sāratthadīpanī nāma, sabbaso pariniṭṭhitā;
तिंससहस्समत्तेहि, गन्थेहि परिमाणतो॥
Tiṃsasahassamattehi, ganthehi parimāṇato.
अज्झेसितो नरिन्देन, सोहं परक्कमबाहुना।
Ajjhesito narindena, sohaṃ parakkamabāhunā;
सद्धम्मट्ठितिकामेन, सासनुज्जोतकारिना॥
Saddhammaṭṭhitikāmena, sāsanujjotakārinā.
तेनेव कारिते रम्मे, पासादसतमण्डिते।
Teneva kārite ramme, pāsādasatamaṇḍite;
नानादुमगणाकिण्णे, भावनाभिरतालये॥
Nānādumagaṇākiṇṇe, bhāvanābhiratālaye.
सीतलूदकसम्पन्ने, वसं जेतवने इमं।
Sītalūdakasampanne, vasaṃ jetavane imaṃ;
अत्थब्यञ्जनसम्पन्नं, अकासिं सुविनिच्छयं॥
Atthabyañjanasampannaṃ, akāsiṃ suvinicchayaṃ.
यं सिद्धं इमिना पुञ्ञं, यं चञ्ञं पसुतं मया।
Yaṃ siddhaṃ iminā puññaṃ, yaṃ caññaṃ pasutaṃ mayā;
एतेन पुञ्ञकम्मेन, दुतिये अत्तसम्भवे॥
Etena puññakammena, dutiye attasambhave.
तावतिंसे पमोदेन्तो, सीलाचारगुणे रतो।
Tāvatiṃse pamodento, sīlācāraguṇe rato;
अलग्गो पञ्चकामेसु, पत्वान पठमं फलं॥
Alaggo pañcakāmesu, patvāna paṭhamaṃ phalaṃ.
अन्तिमे अत्तभावम्हि, मेत्तेय्यं मुनिपुङ्गवं।
Antime attabhāvamhi, metteyyaṃ munipuṅgavaṃ;
लोकग्गपुग्गलं नाथं, सब्बसत्तहिते रतं॥
Lokaggapuggalaṃ nāthaṃ, sabbasattahite rataṃ.
दिस्वान तस्स धीरस्स, सुत्वा सद्धम्मदेसनं।
Disvāna tassa dhīrassa, sutvā saddhammadesanaṃ;
अधिगन्त्वा फलं अग्गं, सोभेय्यं जिनसासनं॥
Adhigantvā phalaṃ aggaṃ, sobheyyaṃ jinasāsanaṃ.
सदा रक्खन्तु राजानो, धम्मेनेव इमं पजं।
Sadā rakkhantu rājāno, dhammeneva imaṃ pajaṃ;
निरता पुञ्ञकम्मेसु, जोतेन्तु जिनसासनं॥
Niratā puññakammesu, jotentu jinasāsanaṃ.
इमे च पाणिनो सब्बे, सब्बदा निरुपद्दवा।
Ime ca pāṇino sabbe, sabbadā nirupaddavā;
निच्चं कल्याणसङ्कप्पा, पप्पोन्तु अमतं पदन्ति॥
Niccaṃ kalyāṇasaṅkappā, pappontu amataṃ padanti.
सारत्थदीपनी नाम विनयटीका निट्ठिता।
Sāratthadīpanī nāma vinayaṭīkā niṭṭhitā.
