| Library / Tipiṭaka / तिपिटक • Tipiṭaka / उदान-अट्ठकथा • Udāna-aṭṭhakathā |
निगमनकथा
Nigamanakathā
एत्तावता च –
Ettāvatāca –
सुविमुत्तभवादानो, देवदानवमानितो।
Suvimuttabhavādāno, devadānavamānito;
पच्छिन्नतण्हासन्तानो, पीतिसंवेगदीपनो॥
Pacchinnataṇhāsantāno, pītisaṃvegadīpano.
सद्धम्मदाननिरतो, उपादानक्खयावहो।
Saddhammadānanirato, upādānakkhayāvaho;
तत्थ तत्थ उदाने ये, उदानेसि विनायको॥
Tattha tattha udāne ye, udānesi vināyako.
ते सब्बे एकतो कत्वा, आरोपेन्तेहि सङ्गहं।
Te sabbe ekato katvā, āropentehi saṅgahaṃ;
उदानमिति सङ्गीतं, धम्मसङ्गाहकेहि यं॥
Udānamiti saṅgītaṃ, dhammasaṅgāhakehi yaṃ.
तस्स अत्थं पकासेतुं, पोराणट्ठकथानयं।
Tassa atthaṃ pakāsetuṃ, porāṇaṭṭhakathānayaṃ;
निस्साय या समारद्धा, अत्थसंवण्णना मया॥
Nissāya yā samāraddhā, atthasaṃvaṇṇanā mayā.
सा तत्थ परमत्थानं, सुत्तन्तेसु यथारहं।
Sā tattha paramatthānaṃ, suttantesu yathārahaṃ;
पकासना परमत्थदीपनी नाम नामतो॥
Pakāsanā paramatthadīpanī nāma nāmato.
सम्पत्ता परिनिट्ठानं, अनाकुलविनिच्छया।
Sampattā pariniṭṭhānaṃ, anākulavinicchayā;
चतुत्तिंसप्पमाणाय, पाळिया भाणवारतो॥
Catuttiṃsappamāṇāya, pāḷiyā bhāṇavārato.
इति तं सङ्खरोन्तेन, यं तं अधिगतं मया।
Iti taṃ saṅkharontena, yaṃ taṃ adhigataṃ mayā;
पुञ्ञं तस्सानुभावेन, लोकनाथस्स सासनं॥
Puññaṃ tassānubhāvena, lokanāthassa sāsanaṃ.
ओगाहित्वा विसुद्धाय, सीलादिपटिपत्तिया।
Ogāhitvā visuddhāya, sīlādipaṭipattiyā;
सब्बेपि देहिनो होन्तु, विमुत्तिरसभागिनो॥
Sabbepi dehino hontu, vimuttirasabhāgino.
चिरं तिट्ठतु लोकस्मिं, सम्मासम्बुद्धसासनं।
Ciraṃ tiṭṭhatu lokasmiṃ, sammāsambuddhasāsanaṃ;
तस्मिं सगारवा निच्चं, होन्तु सब्बेपि पाणिनो॥
Tasmiṃ sagāravā niccaṃ, hontu sabbepi pāṇino.
सम्मा वस्सतु कालेन, देवोपि जगतीपति।
Sammā vassatu kālena, devopi jagatīpati;
सद्धम्मनिरतो लोकं, धम्मेनेव पसासतूति॥
Saddhammanirato lokaṃ, dhammeneva pasāsatūti.
बदरतित्थविहारवासिना आचरियधम्मपालत्थेरेन
Badaratitthavihāravāsinā ācariyadhammapālattherena
कताउदानस्स अट्ठकथा समत्ता।
Katāudānassa aṭṭhakathā samattā.
