| Library / Tipiṭaka / तिपिटक • Tipiṭaka / पेतवत्थु-अट्ठकथा • Petavatthu-aṭṭhakathā |
निगमनकथा
Nigamanakathā
एत्तावता च –
Ettāvatā ca –
ये ते पेतेसु निब्बत्ता, सत्ता दुक्कटकारिनो।
Ye te petesu nibbattā, sattā dukkaṭakārino;
येहि कम्मेहि तेसं तं, पापकं कटुकप्फलं॥
Yehi kammehi tesaṃ taṃ, pāpakaṃ kaṭukapphalaṃ.
पच्चक्खतो विभावेन्ती, पुच्छाविस्सज्जनेहि च।
Paccakkhato vibhāventī, pucchāvissajjanehi ca;
या देसनानियामेन, सतं संवेगवड्ढनी॥
Yā desanāniyāmena, sataṃ saṃvegavaḍḍhanī.
यं कथावत्थुकुसला, सुपरिञ्ञातवत्थुका।
Yaṃ kathāvatthukusalā, supariññātavatthukā;
पेतवत्थूति नामेन, सङ्गायिंसु महेसयो॥
Petavatthūti nāmena, saṅgāyiṃsu mahesayo.
तस्स अत्थं पकासेतुं, पोराणट्ठकथानयं।
Tassa atthaṃ pakāsetuṃ, porāṇaṭṭhakathānayaṃ;
निस्साय या समारद्धा, अत्थसंवण्णना मया॥
Nissāya yā samāraddhā, atthasaṃvaṇṇanā mayā.
या तत्थ परमत्थानं, तत्थ तत्थ यथारहं।
Yā tattha paramatthānaṃ, tattha tattha yathārahaṃ;
पकासना परमत्थ-दीपनी नाम नामतो॥
Pakāsanā paramattha-dīpanī nāma nāmato.
सम्पत्ता परिनिट्ठानं, अनाकुलविनिच्छया।
Sampattā pariniṭṭhānaṃ, anākulavinicchayā;
सा पन्नरसमत्ताय, पाळिया भाणवारतो॥
Sā pannarasamattāya, pāḷiyā bhāṇavārato.
इति तं सङ्खरोन्तेन, यं तं अधिगतं मया।
Iti taṃ saṅkharontena, yaṃ taṃ adhigataṃ mayā;
पुञ्ञं तस्सानुभावेन, लोकनाथस्स सासनं॥
Puññaṃ tassānubhāvena, lokanāthassa sāsanaṃ.
ओगाहेत्वा विसुद्धाय, सीलादिपटिपत्तिया।
Ogāhetvā visuddhāya, sīlādipaṭipattiyā;
सब्बेपि देहिनो होन्तु, विमुत्तिरसभागिनो॥
Sabbepi dehino hontu, vimuttirasabhāgino.
चिरं तिट्ठतु लोकस्मिं, सम्मासम्बुद्धसासनं।
Ciraṃ tiṭṭhatu lokasmiṃ, sammāsambuddhasāsanaṃ;
तस्मिं सगारवा निच्चं, होन्तु सब्बेपि पाणिनो॥
Tasmiṃ sagāravā niccaṃ, hontu sabbepi pāṇino.
सम्मा वस्सतु कालेन, देवोपि जगतीपति।
Sammā vassatu kālena, devopi jagatīpati;
सद्धम्मनिरतो लोकं, धम्मेनेव पसासतूति॥
Saddhammanirato lokaṃ, dhammeneva pasāsatūti.
इति बदरतित्थविहारवासिना मुनिवरयतिना
Iti badaratitthavihāravāsinā munivarayatinā
भदन्तेन आचरियधम्मपालेन कता पेतवत्थुअत्थसंवण्णना निट्ठिता।
Bhadantena ācariyadhammapālena katā petavatthuatthasaṃvaṇṇanā niṭṭhitā.
पेतवत्थु-अट्ठकथा समत्ता।
Petavatthu-aṭṭhakathā samattā.
