| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
निगमनकथा
Nigamanakathā
एत्तावता च –
Ettāvatā ca –
यं वे पुग्गलपञ्ञत्तिं, लोके अप्पटिपुग्गलो।
Yaṃ ve puggalapaññattiṃ, loke appaṭipuggalo;
नातिसङ्खेपतो सत्था, देसेसि तिदसालये॥
Nātisaṅkhepato satthā, desesi tidasālaye.
तस्सा अट्ठकथञ्चेव, दीपभासाय सङ्खतं।
Tassā aṭṭhakathañceva, dīpabhāsāya saṅkhataṃ;
आगमट्ठकथायो च, ओगाहेत्वा असेसतो॥
Āgamaṭṭhakathāyo ca, ogāhetvā asesato.
सुविभत्तो असंकिण्णो, यो यो अत्थो यहिं यहिं।
Suvibhatto asaṃkiṇṇo, yo yo attho yahiṃ yahiṃ;
ततो ततो तं गहेत्वा, पहाय अतिवित्थारं॥
Tato tato taṃ gahetvā, pahāya ativitthāraṃ.
विसुद्धिमग्गे यं वुत्तं, तं अनादाय सङ्खता।
Visuddhimagge yaṃ vuttaṃ, taṃ anādāya saṅkhatā;
नातिसङ्खेपवित्थार-नयेनट्ठकथा अयं॥
Nātisaṅkhepavitthāra-nayenaṭṭhakathā ayaṃ.
तं एतं सत्तमत्तेहि, भाणवारेहि तन्तिया।
Taṃ etaṃ sattamattehi, bhāṇavārehi tantiyā;
चिरट्ठितत्थं धम्मस्स, सङ्खरोन्तेन यं मया॥
Ciraṭṭhitatthaṃ dhammassa, saṅkharontena yaṃ mayā.
सम्पत्तं कुसलं तेन, सद्धम्मं सुखुमं सिवं।
Sampattaṃ kusalaṃ tena, saddhammaṃ sukhumaṃ sivaṃ;
ओलोकेन्तु विसुद्धेन, पाणयो धम्मचक्खुनाति॥
Olokentu visuddhena, pāṇayo dhammacakkhunāti.
पुग्गलपञ्ञत्ति-अट्ठकथा निट्ठिता।
Puggalapaññatti-aṭṭhakathā niṭṭhitā.
