| Library / Tipiṭaka / तिपिटक • Tipiṭaka / इतिवुत्तक-अट्ठकथा • Itivuttaka-aṭṭhakathā |
निगमनकथा
Nigamanakathā
एत्तावता च –
Ettāvatā ca –
धम्मिस्सरेन जगतो, धम्मालोकविधायिना।
Dhammissarena jagato, dhammālokavidhāyinā;
धम्मानं बोधनेय्यानं, जानता देसनाविधिं॥
Dhammānaṃ bodhaneyyānaṃ, jānatā desanāvidhiṃ.
तं तं निदानमागम्म, सब्बलोकहितेसिना।
Taṃ taṃ nidānamāgamma, sabbalokahitesinā;
एककादिप्पभेदेन, देसितानि महेसिना॥
Ekakādippabhedena, desitāni mahesinā.
दसुत्तरसतं द्वे च, सुत्तानि इतिवुत्तकं।
Dasuttarasataṃ dve ca, suttāni itivuttakaṃ;
इतिवुत्तप्पभेदेन, सङ्गायिंसु महेसयो॥
Itivuttappabhedena, saṅgāyiṃsu mahesayo.
छळभिञ्ञा वसिप्पत्ता, पभिन्नपटिसम्भिदा।
Chaḷabhiññā vasippattā, pabhinnapaṭisambhidā;
यं तं सासनधोरय्हा, धम्मसङ्गाहका पुरे॥
Yaṃ taṃ sāsanadhorayhā, dhammasaṅgāhakā pure.
तस्स अत्थं पकासेतुं, पोराणट्ठकथानयं।
Tassa atthaṃ pakāsetuṃ, porāṇaṭṭhakathānayaṃ;
निस्साय या समारद्धा, अत्थसंवण्णना मया॥
Nissāya yā samāraddhā, atthasaṃvaṇṇanā mayā.
सा तत्थ परमत्थानं, सुत्तन्तेसु यथारहं।
Sā tattha paramatthānaṃ, suttantesu yathārahaṃ;
पकासना परमत्थ-दीपनी नाम नामतो॥
Pakāsanā paramattha-dīpanī nāma nāmato.
सम्पत्ता परिनिट्ठानं, अनाकुलविनिच्छया।
Sampattā pariniṭṭhānaṃ, anākulavinicchayā;
अट्ठत्तिंसप्पमाणाय, पाळिया भाणवारतो॥
Aṭṭhattiṃsappamāṇāya, pāḷiyā bhāṇavārato.
इति तं सङ्खरोन्तेन, यं तं अधिगतं मया।
Iti taṃ saṅkharontena, yaṃ taṃ adhigataṃ mayā;
पुञ्ञं तस्सानुभावेन, लोकनाथस्स सासनं॥
Puññaṃ tassānubhāvena, lokanāthassa sāsanaṃ.
ओगाहेत्वा विसुद्धाय, सीलादिपटिपत्तिया।
Ogāhetvā visuddhāya, sīlādipaṭipattiyā;
सब्बेपि पाणिनो होन्तु, विमुत्तिरसभागिनो॥
Sabbepi pāṇino hontu, vimuttirasabhāgino.
चिरं तिट्ठतु लोकस्मिं, सम्मासम्बुद्धसासनं।
Ciraṃ tiṭṭhatu lokasmiṃ, sammāsambuddhasāsanaṃ;
तस्मिं सगारवा निच्चं, होन्तु सब्बेपि पाणिनो॥
Tasmiṃ sagāravā niccaṃ, hontu sabbepi pāṇino.
सम्मा वस्सतु कालेन, देवोपि जगतिप्पति।
Sammā vassatu kālena, devopi jagatippati;
सद्धम्मनिरतो लोकं, धम्मेनेव पसासतूति॥
Saddhammanirato lokaṃ, dhammeneva pasāsatūti.
इति बदरतित्थविहारवासिना आचरियधम्मपालेन कता
Iti badaratitthavihāravāsinā ācariyadhammapālena katā
इतिवुत्तकस्स अट्ठकथा निट्ठिता।
Itivuttakassa aṭṭhakathā niṭṭhitā.
