| Library / Tipiṭaka / तिपिटक • Tipiṭaka / चूळनिद्देस-अट्ठकथा • Cūḷaniddesa-aṭṭhakathā |
निगमनकथा
Nigamanakathā
यो सो सुगतपुत्तानं, अधिपतिभूतेन हितरतिना।
Yo so sugataputtānaṃ, adhipatibhūtena hitaratinā;
थेरेन थिरगुणवता, सुविभत्तो महानिद्देसो॥
Therena thiraguṇavatā, suvibhatto mahāniddeso.
तस्सत्थवण्णना या, पुब्बट्ठकथानयं तथा।
Tassatthavaṇṇanā yā, pubbaṭṭhakathānayaṃ tathā;
युत्तिं निस्साय मयारद्धा, निट्ठानमुपगता एसा॥
Yuttiṃ nissāya mayāraddhā, niṭṭhānamupagatā esā.
यं पुरं पुरुत्तमं, अनुराधपुरव्हयं।
Yaṃ puraṃ puruttamaṃ, anurādhapuravhayaṃ;
यो तस्स दक्खिणे भागे, महाविहारो पतिट्ठितो॥
Yo tassa dakkhiṇe bhāge, mahāvihāro patiṭṭhito.
यो तस्स तिलको भूतो, महाथूपो सिलुच्चयो।
Yo tassa tilako bhūto, mahāthūpo siluccayo;
यं तस्स पच्छिमे भागे, लेखो कथिकसञ्ञितो॥
Yaṃ tassa pacchime bhāge, lekho kathikasaññito.
कित्तिसेनोति नामेन, सजीवो राजसम्मतो।
Kittisenoti nāmena, sajīvo rājasammato;
सुचिचारित्तसम्पन्नो, लेखो कुसलकम्मिको॥
Sucicārittasampanno, lekho kusalakammiko.
सीतच्छायतरुपेतं, सलिलासयसम्पदं।
Sītacchāyatarupetaṃ, salilāsayasampadaṃ;
चारुपाकारसञ्चितं, परिवेणमकारयि॥
Cārupākārasañcitaṃ, pariveṇamakārayi.
उपसेनो महाथेरो, महापरिवेणवासियो।
Upaseno mahāthero, mahāpariveṇavāsiyo;
तस्सादासि परिवेणं, लेखो कुसलकम्मिको॥
Tassādāsi pariveṇaṃ, lekho kusalakammiko.
वसन्तेनेत्थ थेरेन, थिरसीलेन तादिना।
Vasantenettha therena, thirasīlena tādinā;
उपसेनव्हयेन सा, कता सद्धम्मजोतिका॥
Upasenavhayena sā, katā saddhammajotikā.
रञ्ञो सिरिनिवासस्स, सिरिसङ्घस्स बोधिनो।
Rañño sirinivāsassa, sirisaṅghassa bodhino;
छब्बीसतिम्हि वस्सम्हि, निट्ठिता निद्देसवण्णना॥
Chabbīsatimhi vassamhi, niṭṭhitā niddesavaṇṇanā.
समयं अनुलोमेन्ती, थेरानं थेरवंसदीपानं।
Samayaṃ anulomentī, therānaṃ theravaṃsadīpānaṃ;
निट्ठं गता यथायं, अट्ठकथा लोकहितजननी॥
Niṭṭhaṃ gatā yathāyaṃ, aṭṭhakathā lokahitajananī.
सद्धम्मं अनुलोमेन्ता, अत्तहितं परहितञ्च साधेन्ता।
Saddhammaṃ anulomentā, attahitaṃ parahitañca sādhentā;
निट्ठं गच्छन्तु तथा, मनोरथा सब्बसत्तानं॥
Niṭṭhaṃ gacchantu tathā, manorathā sabbasattānaṃ.
सद्धम्मप्पज्जोतिकाय, अट्ठकथायेत्थ गणितकुसलेहि।
Saddhammappajjotikāya, aṭṭhakathāyettha gaṇitakusalehi;
गणिता तु भाणवारा, ञेय्यातिरेकचत्तारिसा॥
Gaṇitā tu bhāṇavārā, ñeyyātirekacattārisā.
आनुट्ठुभेन अस्सा, छन्दो बद्धेन गणियमाना तु।
Ānuṭṭhubhena assā, chando baddhena gaṇiyamānā tu;
अतिरेकदससहस्स-सङ्खा गाथाति विञ्ञेय्या॥
Atirekadasasahassa-saṅkhā gāthāti viññeyyā.
सासनचिरट्ठितत्थं, लोकहितत्थञ्च सादरेन मया।
Sāsanaciraṭṭhitatthaṃ, lokahitatthañca sādarena mayā;
पुञ्ञं इमं रचयता, यं पत्तमनप्पकं विपुलं॥
Puññaṃ imaṃ racayatā, yaṃ pattamanappakaṃ vipulaṃ.
पुञ्ञेन तेन लोको, सद्धम्मरसायनं दसबलस्स।
Puññena tena loko, saddhammarasāyanaṃ dasabalassa;
उपभुञ्जित्वा विमलं, पप्पोतु सुखं सुखेनेवाति॥
Upabhuñjitvā vimalaṃ, pappotu sukhaṃ sukhenevāti.
सद्धम्मप्पज्जोतिका नाम
Saddhammappajjotikā nāma
चूळनिद्देस-अट्ठकथा निट्ठिता।
Cūḷaniddesa-aṭṭhakathā niṭṭhitā.
