| Library / Tipiṭaka / তিপিটক • Tipiṭaka / ৰিনযালঙ্কার-টীকা • Vinayālaṅkāra-ṭīkā |
নিগমনকথা
Nigamanakathā
১.
1.
জম্বুদীপতলে রম্মে, মরম্মৰিসযে সুতে।
Jambudīpatale ramme, marammavisaye sute;
তম্বদীপরট্ঠে ঠিতং, পুরং রতননামকং॥
Tambadīparaṭṭhe ṭhitaṃ, puraṃ ratananāmakaṃ.
২.
2.
জিনসাসনপজ্জোতং , অনেকরতনাকরং।
Jinasāsanapajjotaṃ , anekaratanākaraṃ;
সাধুজ্জনানমাৰাসং, সোণ্ণপাসাদলঙ্কতং॥
Sādhujjanānamāvāsaṃ, soṇṇapāsādalaṅkataṃ.
৩.
3.
তস্মিং রতনপুরম্হি, রাজানেকরট্ঠিস্সরো।
Tasmiṃ ratanapuramhi, rājānekaraṭṭhissaro;
সিরীসুধম্মরাজাতি, মহাঅধিপতীতি চ॥
Sirīsudhammarājāti, mahāadhipatīti ca.
৪.
4.
এৰংনামো মহাতেজো, রজ্জং কারেসি ধম্মতো।
Evaṃnāmo mahātejo, rajjaṃ kāresi dhammato;
কারাপেসি রাজা মণি-চূল়ং মহন্তচেতিযং॥
Kārāpesi rājā maṇi-cūḷaṃ mahantacetiyaṃ.
৫.
5.
তস্স কালে ব্রহারঞ্ঞে, তিরিযো নাম পব্বতো।
Tassa kāle brahāraññe, tiriyo nāma pabbato;
পুব্বকারঞ্ঞৰাসীনং, নিৰাসো ভাৰনারহো॥
Pubbakāraññavāsīnaṃ, nivāso bhāvanāraho.
৬.
6.
অট্ঠারসহি দোসেহি, মুত্তো পঞ্চঙ্গুপাগতো।
Aṭṭhārasahi dosehi, mutto pañcaṅgupāgato;
অরঞ্ঞলক্খণং পত্তো, বদ্ধসীমাযলঙ্কতো॥
Araññalakkhaṇaṃ patto, baddhasīmāyalaṅkato.
৭.
7.
তস্মিং পব্বতে ৰসন্তো, মহাথেরো সুপাকটো।
Tasmiṃ pabbate vasanto, mahāthero supākaṭo;
তিপেটকালঙ্কারোতি, দ্ৰিক্খত্তুং লদ্ধলঞ্ছনো॥
Tipeṭakālaṅkāroti, dvikkhattuṃ laddhalañchano.
৮.
8.
তেভাতুকনরিন্দানং, গরুভূতো সুপেসলো।
Tebhātukanarindānaṃ, garubhūto supesalo;
কুসলো পরিযত্তিম্হি, পটিপত্তিম্হি কারকো॥
Kusalo pariyattimhi, paṭipattimhi kārako.
৯.
9.
সোহং লজ্জীপেসলেহি, ভিক্খূহি অভিযাচিতো।
Sohaṃ lajjīpesalehi, bhikkhūhi abhiyācito;
সাসনস্সোপকারায, অকাসিং সীলৰড্ঢনং॥
Sāsanassopakārāya, akāsiṃ sīlavaḍḍhanaṃ.
১০.
10.
ৰিনযালঙ্কারং নাম, লজ্জীনং উপকারকং।
Vinayālaṅkāraṃ nāma, lajjīnaṃ upakārakaṃ;
সুট্ঠু ৰিনযসঙ্গহ-ৰণ্ণনং সাধুসেৰিতং॥
Suṭṭhu vinayasaṅgaha-vaṇṇanaṃ sādhusevitaṃ.
১১.
11.
রূপছিদ্দনাসকণ্ণে , সম্পত্তে জিনসাসনে।
Rūpachiddanāsakaṇṇe , sampatte jinasāsane;
ছিদ্দসুঞ্ঞসুঞ্ঞরূপে, কলিযুগম্হি আগতে॥
Chiddasuññasuññarūpe, kaliyugamhi āgate.
১২.
12.
নিট্ঠাপিতা অযং টীকা, মযা সাসনকারণা।
Niṭṭhāpitā ayaṃ ṭīkā, mayā sāsanakāraṇā;
দ্ৰীসু সোণ্ণৰিহারেসু, দ্ৰিক্খত্তুং লদ্ধকেতুনা॥
Dvīsu soṇṇavihāresu, dvikkhattuṃ laddhaketunā.
১৩.
13.
ইমিনা পুঞ্ঞকম্মেন, অঞ্ঞেন কুসলেন চ।
Iminā puññakammena, aññena kusalena ca;
ইতো চুতাহং দুতিযে, অত্তভাৰম্হি আগতে॥
Ito cutāhaṃ dutiye, attabhāvamhi āgate.
১৪.
14.
হিমৰন্তপদেসম্হি, পব্বতে গন্ধমাদনে।
Himavantapadesamhi, pabbate gandhamādane;
আসন্নে মণিগুহায, মঞ্জূসকদুমস্স চ॥
Āsanne maṇiguhāya, mañjūsakadumassa ca.
১৫.
15.
তস্মিং হেস্সং ভুম্মদেৰো, অতিদীঘাযুকো ৰরো।
Tasmiṃ hessaṃ bhummadevo, atidīghāyuko varo;
পঞ্ঞাৰীরিযসম্পন্নো, বুদ্ধসাসনমামকো॥
Paññāvīriyasampanno, buddhasāsanamāmako.
১৬.
16.
যাৰ তিট্ঠতি সাসনং, তাৰ চেতিযৰন্দনং।
Yāva tiṭṭhati sāsanaṃ, tāva cetiyavandanaṃ;
বোধিপূজং সঙ্ঘপূজং, করেয্যং তুট্ঠমানসো॥
Bodhipūjaṃ saṅghapūjaṃ, kareyyaṃ tuṭṭhamānaso.
১৭.
17.
ভিক্খূনং পটিপন্নানং, ৰেয্যাৰচ্চং করেয্যহং।
Bhikkhūnaṃ paṭipannānaṃ, veyyāvaccaṃ kareyyahaṃ;
পরিযত্তাভিযুত্তানং, কঙ্খাৰিনোদযেয্যহং॥
Pariyattābhiyuttānaṃ, kaṅkhāvinodayeyyahaṃ.
১৮.
18.
সাসনং পগ্গণ্হন্তানং, রাজূনং সহাযো অস্সং।
Sāsanaṃ paggaṇhantānaṃ, rājūnaṃ sahāyo assaṃ;
সাসনং নিগ্গণ্হন্তানং, ৰারেতুং সমত্থো অস্সং॥
Sāsanaṃ niggaṇhantānaṃ, vāretuṃ samattho assaṃ.
১৯.
19.
সাসনন্তরধানে তু, মঞ্জূসং রুক্খমুত্তমং।
Sāsanantaradhāne tu, mañjūsaṃ rukkhamuttamaṃ;
নন্দমূলঞ্চ পব্ভারং, নিচ্চং পূজং করেয্যহং॥
Nandamūlañca pabbhāraṃ, niccaṃ pūjaṃ kareyyahaṃ.
২০.
20.
যদা তু পচ্চেকবুদ্ধা, উপ্পজ্জন্তি মহাযসা।
Yadā tu paccekabuddhā, uppajjanti mahāyasā;
তদা তেসং নিচ্চকপ্পং, উপট্ঠানং করেয্যহং॥
Tadā tesaṃ niccakappaṃ, upaṭṭhānaṃ kareyyahaṃ.
২১.
21.
তেনেৰ অত্তভাৰেন, যাৰ বুদ্ধুপ্পাদা অহং।
Teneva attabhāvena, yāva buddhuppādā ahaṃ;
তিট্ঠন্তো বুদ্ধুপ্পাদম্হি, মনুস্সেসু ভৰামহং॥
Tiṭṭhanto buddhuppādamhi, manussesu bhavāmahaṃ.
২২.
22.
মেত্তেয্যস্স ভগৰতো, পব্বজিত্ৰান সাসনে।
Metteyyassa bhagavato, pabbajitvāna sāsane;
তোসযিত্ৰান জিনং তং, লভে ব্যাকরণুত্তমং॥
Tosayitvāna jinaṃ taṃ, labhe byākaraṇuttamaṃ.
২৩.
23.
ব্যাকরণং লভিত্ৰান, পূরেত্ৰা সব্বপারমী।
Byākaraṇaṃ labhitvāna, pūretvā sabbapāramī;
অনাগতম্হি অদ্ধানে, বুদ্ধো হেস্সং সদেৰকেতি॥
Anāgatamhi addhāne, buddho hessaṃ sadevaketi.
ৰিনযালঙ্কারটীকা সমত্তা।
Vinayālaṅkāraṭīkā samattā.
