| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
নিগমনকথা
Nigamanakathā
এত্তাৰতা চ –
Ettāvatā ca –
ৰিনযে পাটৰত্থায, সাসনস্স চ ৰুড্ঢিযা।
Vinaye pāṭavatthāya, sāsanassa ca vuḍḍhiyā;
ৰণ্ণনা যা সমারদ্ধা, ৰিনযট্ঠকথায সা॥
Vaṇṇanā yā samāraddhā, vinayaṭṭhakathāya sā.
সারত্থদীপনী নাম, সব্বসো পরিনিট্ঠিতা।
Sāratthadīpanī nāma, sabbaso pariniṭṭhitā;
তিংসসহস্সমত্তেহি, গন্থেহি পরিমাণতো॥
Tiṃsasahassamattehi, ganthehi parimāṇato.
অজ্ঝেসিতো নরিন্দেন, সোহং পরক্কমবাহুনা।
Ajjhesito narindena, sohaṃ parakkamabāhunā;
সদ্ধম্মট্ঠিতিকামেন, সাসনুজ্জোতকারিনা॥
Saddhammaṭṭhitikāmena, sāsanujjotakārinā.
তেনেৰ কারিতে রম্মে, পাসাদসতমণ্ডিতে।
Teneva kārite ramme, pāsādasatamaṇḍite;
নানাদুমগণাকিণ্ণে, ভাৰনাভিরতালযে॥
Nānādumagaṇākiṇṇe, bhāvanābhiratālaye.
সীতলূদকসম্পন্নে, ৰসং জেতৰনে ইমং।
Sītalūdakasampanne, vasaṃ jetavane imaṃ;
অত্থব্যঞ্জনসম্পন্নং, অকাসিং সুৰিনিচ্ছযং॥
Atthabyañjanasampannaṃ, akāsiṃ suvinicchayaṃ.
যং সিদ্ধং ইমিনা পুঞ্ঞং, যং চঞ্ঞং পসুতং মযা।
Yaṃ siddhaṃ iminā puññaṃ, yaṃ caññaṃ pasutaṃ mayā;
এতেন পুঞ্ঞকম্মেন, দুতিযে অত্তসম্ভৰে॥
Etena puññakammena, dutiye attasambhave.
তাৰতিংসে পমোদেন্তো, সীলাচারগুণে রতো।
Tāvatiṃse pamodento, sīlācāraguṇe rato;
অলগ্গো পঞ্চকামেসু, পত্ৰান পঠমং ফলং॥
Alaggo pañcakāmesu, patvāna paṭhamaṃ phalaṃ.
অন্তিমে অত্তভাৰম্হি, মেত্তেয্যং মুনিপুঙ্গৰং।
Antime attabhāvamhi, metteyyaṃ munipuṅgavaṃ;
লোকগ্গপুগ্গলং নাথং, সব্বসত্তহিতে রতং॥
Lokaggapuggalaṃ nāthaṃ, sabbasattahite rataṃ.
দিস্ৰান তস্স ধীরস্স, সুত্ৰা সদ্ধম্মদেসনং।
Disvāna tassa dhīrassa, sutvā saddhammadesanaṃ;
অধিগন্ত্ৰা ফলং অগ্গং, সোভেয্যং জিনসাসনং॥
Adhigantvā phalaṃ aggaṃ, sobheyyaṃ jinasāsanaṃ.
সদা রক্খন্তু রাজানো, ধম্মেনেৰ ইমং পজং।
Sadā rakkhantu rājāno, dhammeneva imaṃ pajaṃ;
নিরতা পুঞ্ঞকম্মেসু, জোতেন্তু জিনসাসনং॥
Niratā puññakammesu, jotentu jinasāsanaṃ.
ইমে চ পাণিনো সব্বে, সব্বদা নিরুপদ্দৰা।
Ime ca pāṇino sabbe, sabbadā nirupaddavā;
নিচ্চং কল্যাণসঙ্কপ্পা, পপ্পোন্তু অমতং পদন্তি॥
Niccaṃ kalyāṇasaṅkappā, pappontu amataṃ padanti.
সারত্থদীপনী নাম ৰিনযটীকা নিট্ঠিতা।
Sāratthadīpanī nāma vinayaṭīkā niṭṭhitā.
