| Library / Tipiṭaka / তিপিটক • Tipiṭaka / উদান-অট্ঠকথা • Udāna-aṭṭhakathā |
নিগমনকথা
Nigamanakathā
এত্তাৰতা চ –
Ettāvatāca –
সুৰিমুত্তভৰাদানো, দেৰদানৰমানিতো।
Suvimuttabhavādāno, devadānavamānito;
পচ্ছিন্নতণ্হাসন্তানো, পীতিসংৰেগদীপনো॥
Pacchinnataṇhāsantāno, pītisaṃvegadīpano.
সদ্ধম্মদাননিরতো, উপাদানক্খযাৰহো।
Saddhammadānanirato, upādānakkhayāvaho;
তত্থ তত্থ উদানে যে, উদানেসি ৰিনাযকো॥
Tattha tattha udāne ye, udānesi vināyako.
তে সব্বে একতো কত্ৰা, আরোপেন্তেহি সঙ্গহং।
Te sabbe ekato katvā, āropentehi saṅgahaṃ;
উদানমিতি সঙ্গীতং, ধম্মসঙ্গাহকেহি যং॥
Udānamiti saṅgītaṃ, dhammasaṅgāhakehi yaṃ.
তস্স অত্থং পকাসেতুং, পোরাণট্ঠকথানযং।
Tassa atthaṃ pakāsetuṃ, porāṇaṭṭhakathānayaṃ;
নিস্সায যা সমারদ্ধা, অত্থসংৰণ্ণনা মযা॥
Nissāya yā samāraddhā, atthasaṃvaṇṇanā mayā.
সা তত্থ পরমত্থানং, সুত্তন্তেসু যথারহং।
Sā tattha paramatthānaṃ, suttantesu yathārahaṃ;
পকাসনা পরমত্থদীপনী নাম নামতো॥
Pakāsanā paramatthadīpanī nāma nāmato.
সম্পত্তা পরিনিট্ঠানং, অনাকুলৰিনিচ্ছযা।
Sampattā pariniṭṭhānaṃ, anākulavinicchayā;
চতুত্তিংসপ্পমাণায, পাল়িযা ভাণৰারতো॥
Catuttiṃsappamāṇāya, pāḷiyā bhāṇavārato.
ইতি তং সঙ্খরোন্তেন, যং তং অধিগতং মযা।
Iti taṃ saṅkharontena, yaṃ taṃ adhigataṃ mayā;
পুঞ্ঞং তস্সানুভাৰেন, লোকনাথস্স সাসনং॥
Puññaṃ tassānubhāvena, lokanāthassa sāsanaṃ.
ওগাহিত্ৰা ৰিসুদ্ধায, সীলাদিপটিপত্তিযা।
Ogāhitvā visuddhāya, sīlādipaṭipattiyā;
সব্বেপি দেহিনো হোন্তু, ৰিমুত্তিরসভাগিনো॥
Sabbepi dehino hontu, vimuttirasabhāgino.
চিরং তিট্ঠতু লোকস্মিং, সম্মাসম্বুদ্ধসাসনং।
Ciraṃ tiṭṭhatu lokasmiṃ, sammāsambuddhasāsanaṃ;
তস্মিং সগারৰা নিচ্চং, হোন্তু সব্বেপি পাণিনো॥
Tasmiṃ sagāravā niccaṃ, hontu sabbepi pāṇino.
সম্মা ৰস্সতু কালেন, দেৰোপি জগতীপতি।
Sammā vassatu kālena, devopi jagatīpati;
সদ্ধম্মনিরতো লোকং, ধম্মেনেৰ পসাসতূতি॥
Saddhammanirato lokaṃ, dhammeneva pasāsatūti.
বদরতিত্থৰিহারৰাসিনা আচরিযধম্মপালত্থেরেন
Badaratitthavihāravāsinā ācariyadhammapālattherena
কতাউদানস্স অট্ঠকথা সমত্তা।
Katāudānassa aṭṭhakathā samattā.
