| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
நிக³மனகதா²
Nigamanakathā
1.
1.
ஜம்பு³தீ³பதலே ரம்மே, மரம்மவிஸயே ஸுதே;
Jambudīpatale ramme, marammavisaye sute;
தம்ப³தீ³பரட்டே² டி²தங், புரங் ரதனநாமகங்.
Tambadīparaṭṭhe ṭhitaṃ, puraṃ ratananāmakaṃ.
2.
2.
ஜினஸாஸனபஜ்ஜோதங் , அனேகரதனாகரங்;
Jinasāsanapajjotaṃ , anekaratanākaraṃ;
ஸாது⁴ஜ்ஜனானமாவாஸங், ஸொண்ணபாஸாத³லங்கதங்.
Sādhujjanānamāvāsaṃ, soṇṇapāsādalaṅkataṃ.
3.
3.
தஸ்மிங் ரதனபுரம்ஹி, ராஜானேகரட்டி²ஸ்ஸரோ;
Tasmiṃ ratanapuramhi, rājānekaraṭṭhissaro;
ஸிரீஸுத⁴ம்மராஜாதி, மஹாஅதி⁴பதீதி ச.
Sirīsudhammarājāti, mahāadhipatīti ca.
4.
4.
ஏவங்னாமோ மஹாதேஜோ, ரஜ்ஜங் காரேஸி த⁴ம்மதோ;
Evaṃnāmo mahātejo, rajjaṃ kāresi dhammato;
காராபேஸி ராஜா மணி-சூளங் மஹந்தசேதியங்.
Kārāpesi rājā maṇi-cūḷaṃ mahantacetiyaṃ.
5.
5.
தஸ்ஸ காலே ப்³ரஹாரஞ்ஞே, திரியோ நாம பப்³ப³தோ;
Tassa kāle brahāraññe, tiriyo nāma pabbato;
புப்³ப³காரஞ்ஞவாஸீனங், நிவாஸோ பா⁴வனாரஹோ.
Pubbakāraññavāsīnaṃ, nivāso bhāvanāraho.
6.
6.
அட்டா²ரஸஹி தோ³ஸேஹி, முத்தோ பஞ்சங்கு³பாக³தோ;
Aṭṭhārasahi dosehi, mutto pañcaṅgupāgato;
அரஞ்ஞலக்க²ணங் பத்தோ, ப³த்³த⁴ஸீமாயலங்கதோ.
Araññalakkhaṇaṃ patto, baddhasīmāyalaṅkato.
7.
7.
தஸ்மிங் பப்³ப³தே வஸந்தோ, மஹாதே²ரோ ஸுபாகடோ;
Tasmiṃ pabbate vasanto, mahāthero supākaṭo;
திபேடகாலங்காரோதி, த்³விக்க²த்துங் லத்³த⁴லஞ்ச²னோ.
Tipeṭakālaṅkāroti, dvikkhattuṃ laddhalañchano.
8.
8.
தேபா⁴துகனரிந்தா³னங், க³ருபூ⁴தோ ஸுபேஸலோ;
Tebhātukanarindānaṃ, garubhūto supesalo;
குஸலோ பரியத்திம்ஹி, படிபத்திம்ஹி காரகோ.
Kusalo pariyattimhi, paṭipattimhi kārako.
9.
9.
ஸோஹங் லஜ்ஜீபேஸலேஹி, பி⁴க்கூ²ஹி அபி⁴யாசிதோ;
Sohaṃ lajjīpesalehi, bhikkhūhi abhiyācito;
ஸாஸனஸ்ஸோபகாராய, அகாஸிங் ஸீலவட்³ட⁴னங்.
Sāsanassopakārāya, akāsiṃ sīlavaḍḍhanaṃ.
10.
10.
வினயாலங்காரங் நாம, லஜ்ஜீனங் உபகாரகங்;
Vinayālaṅkāraṃ nāma, lajjīnaṃ upakārakaṃ;
ஸுட்டு² வினயஸங்க³ஹ-வண்ணனங் ஸாது⁴ஸேவிதங்.
Suṭṭhu vinayasaṅgaha-vaṇṇanaṃ sādhusevitaṃ.
11.
11.
ரூபசி²த்³த³னாஸகண்ணே , ஸம்பத்தே ஜினஸாஸனே;
Rūpachiddanāsakaṇṇe , sampatte jinasāsane;
சி²த்³த³ஸுஞ்ஞஸுஞ்ஞரூபே, கலியுக³ம்ஹி ஆக³தே.
Chiddasuññasuññarūpe, kaliyugamhi āgate.
12.
12.
நிட்டா²பிதா அயங் டீகா, மயா ஸாஸனகாரணா;
Niṭṭhāpitā ayaṃ ṭīkā, mayā sāsanakāraṇā;
த்³வீஸு ஸொண்ணவிஹாரேஸு, த்³விக்க²த்துங் லத்³த⁴கேதுனா.
Dvīsu soṇṇavihāresu, dvikkhattuṃ laddhaketunā.
13.
13.
இமினா புஞ்ஞகம்மேன, அஞ்ஞேன குஸலேன ச;
Iminā puññakammena, aññena kusalena ca;
இதோ சுதாஹங் து³தியே, அத்தபா⁴வம்ஹி ஆக³தே.
Ito cutāhaṃ dutiye, attabhāvamhi āgate.
14.
14.
ஹிமவந்தபதே³ஸம்ஹி, பப்³ப³தே க³ந்த⁴மாத³னே;
Himavantapadesamhi, pabbate gandhamādane;
ஆஸன்னே மணிகு³ஹாய, மஞ்ஜூஸகது³மஸ்ஸ ச.
Āsanne maṇiguhāya, mañjūsakadumassa ca.
15.
15.
தஸ்மிங் ஹெஸ்ஸங் பு⁴ம்மதே³வோ, அதிதீ³கா⁴யுகோ வரோ;
Tasmiṃ hessaṃ bhummadevo, atidīghāyuko varo;
பஞ்ஞாவீரியஸம்பன்னோ, பு³த்³த⁴ஸாஸனமாமகோ.
Paññāvīriyasampanno, buddhasāsanamāmako.
16.
16.
யாவ திட்ட²தி ஸாஸனங், தாவ சேதியவந்த³னங்;
Yāva tiṭṭhati sāsanaṃ, tāva cetiyavandanaṃ;
போ³தி⁴பூஜங் ஸங்க⁴பூஜங், கரெய்யங் துட்ட²மானஸோ.
Bodhipūjaṃ saṅghapūjaṃ, kareyyaṃ tuṭṭhamānaso.
17.
17.
பி⁴க்கூ²னங் படிபன்னானங், வெய்யாவச்சங் கரெய்யஹங்;
Bhikkhūnaṃ paṭipannānaṃ, veyyāvaccaṃ kareyyahaṃ;
பரியத்தாபி⁴யுத்தானங், கங்கா²வினோத³யெய்யஹங்.
Pariyattābhiyuttānaṃ, kaṅkhāvinodayeyyahaṃ.
18.
18.
ஸாஸனங் பக்³க³ண்ஹந்தானங், ராஜூனங் ஸஹாயோ அஸ்ஸங்;
Sāsanaṃ paggaṇhantānaṃ, rājūnaṃ sahāyo assaṃ;
ஸாஸனங் நிக்³க³ண்ஹந்தானங், வாரேதுங் ஸமத்தோ² அஸ்ஸங்.
Sāsanaṃ niggaṇhantānaṃ, vāretuṃ samattho assaṃ.
19.
19.
ஸாஸனந்தரதா⁴னே து, மஞ்ஜூஸங் ருக்க²முத்தமங்;
Sāsanantaradhāne tu, mañjūsaṃ rukkhamuttamaṃ;
நந்த³மூலஞ்ச பப்³பா⁴ரங், நிச்சங் பூஜங் கரெய்யஹங்.
Nandamūlañca pabbhāraṃ, niccaṃ pūjaṃ kareyyahaṃ.
20.
20.
யதா³ து பச்சேகபு³த்³தா⁴, உப்பஜ்ஜந்தி மஹாயஸா;
Yadā tu paccekabuddhā, uppajjanti mahāyasā;
ததா³ தேஸங் நிச்சகப்பங், உபட்டா²னங் கரெய்யஹங்.
Tadā tesaṃ niccakappaṃ, upaṭṭhānaṃ kareyyahaṃ.
21.
21.
தேனேவ அத்தபா⁴வேன, யாவ பு³த்³து⁴ப்பாதா³ அஹங்;
Teneva attabhāvena, yāva buddhuppādā ahaṃ;
திட்ட²ந்தோ பு³த்³து⁴ப்பாத³ம்ஹி, மனுஸ்ஸேஸு ப⁴வாமஹங்.
Tiṭṭhanto buddhuppādamhi, manussesu bhavāmahaṃ.
22.
22.
மெத்தெய்யஸ்ஸ ப⁴க³வதோ, பப்³ப³ஜித்வான ஸாஸனே;
Metteyyassa bhagavato, pabbajitvāna sāsane;
தோஸயித்வான ஜினங் தங், லபே⁴ ப்³யாகரணுத்தமங்.
Tosayitvāna jinaṃ taṃ, labhe byākaraṇuttamaṃ.
23.
23.
ப்³யாகரணங் லபி⁴த்வான, பூரெத்வா ஸப்³ப³பாரமீ;
Byākaraṇaṃ labhitvāna, pūretvā sabbapāramī;
அனாக³தம்ஹி அத்³தா⁴னே, பு³த்³தோ⁴ ஹெஸ்ஸங் ஸதே³வகேதி.
Anāgatamhi addhāne, buddho hessaṃ sadevaketi.
வினயாலங்காரடீகா ஸமத்தா.
Vinayālaṅkāraṭīkā samattā.
