| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
நிக³மனகதா²
Nigamanakathā
எத்தாவதா ச –
Ettāvatāca –
ஸுவிமுத்தப⁴வாதா³னோ, தே³வதா³னவமானிதோ;
Suvimuttabhavādāno, devadānavamānito;
பச்சி²ன்னதண்ஹாஸந்தானோ, பீதிஸங்வேக³தீ³பனோ.
Pacchinnataṇhāsantāno, pītisaṃvegadīpano.
ஸத்³த⁴ம்மதா³னநிரதோ, உபாதா³னக்க²யாவஹோ;
Saddhammadānanirato, upādānakkhayāvaho;
தத்த² தத்த² உதா³னே யே, உதா³னேஸி வினாயகோ.
Tattha tattha udāne ye, udānesi vināyako.
தே ஸப்³பே³ ஏகதோ கத்வா, ஆரோபெந்தேஹி ஸங்க³ஹங்;
Te sabbe ekato katvā, āropentehi saṅgahaṃ;
உதா³னமிதி ஸங்கீ³தங், த⁴ம்மஸங்கா³ஹகேஹி யங்.
Udānamiti saṅgītaṃ, dhammasaṅgāhakehi yaṃ.
தஸ்ஸ அத்த²ங் பகாஸேதுங், போராணட்ட²கதா²னயங்;
Tassa atthaṃ pakāsetuṃ, porāṇaṭṭhakathānayaṃ;
நிஸ்ஸாய யா ஸமாரத்³தா⁴, அத்த²ஸங்வண்ணனா மயா.
Nissāya yā samāraddhā, atthasaṃvaṇṇanā mayā.
ஸா தத்த² பரமத்தா²னங், ஸுத்தந்தேஸு யதா²ரஹங்;
Sā tattha paramatthānaṃ, suttantesu yathārahaṃ;
பகாஸனா பரமத்த²தீ³பனீ நாம நாமதோ.
Pakāsanā paramatthadīpanī nāma nāmato.
ஸம்பத்தா பரினிட்டா²னங், அனாகுலவினிச்ச²யா;
Sampattā pariniṭṭhānaṃ, anākulavinicchayā;
சதுத்திங்ஸப்பமாணாய, பாளியா பா⁴ணவாரதோ.
Catuttiṃsappamāṇāya, pāḷiyā bhāṇavārato.
இதி தங் ஸங்க²ரொந்தேன, யங் தங் அதி⁴க³தங் மயா;
Iti taṃ saṅkharontena, yaṃ taṃ adhigataṃ mayā;
புஞ்ஞங் தஸ்ஸானுபா⁴வேன, லோகனாத²ஸ்ஸ ஸாஸனங்.
Puññaṃ tassānubhāvena, lokanāthassa sāsanaṃ.
ஓகா³ஹித்வா விஸுத்³தா⁴ய, ஸீலாதி³படிபத்தியா;
Ogāhitvā visuddhāya, sīlādipaṭipattiyā;
ஸப்³பே³பி தே³ஹினோ ஹொந்து, விமுத்திரஸபா⁴கி³னோ.
Sabbepi dehino hontu, vimuttirasabhāgino.
சிரங் திட்ட²து லோகஸ்மிங், ஸம்மாஸம்பு³த்³த⁴ஸாஸனங்;
Ciraṃ tiṭṭhatu lokasmiṃ, sammāsambuddhasāsanaṃ;
தஸ்மிங் ஸகா³ரவா நிச்சங், ஹொந்து ஸப்³பே³பி பாணினோ.
Tasmiṃ sagāravā niccaṃ, hontu sabbepi pāṇino.
ஸம்மா வஸ்ஸது காலேன, தே³வோபி ஜக³தீபதி;
Sammā vassatu kālena, devopi jagatīpati;
ஸத்³த⁴ம்மனிரதோ லோகங், த⁴ம்மேனேவ பஸாஸதூதி.
Saddhammanirato lokaṃ, dhammeneva pasāsatūti.
ப³த³ரதித்த²விஹாரவாஸினா ஆசரியத⁴ம்மபாலத்தே²ரேன
Badaratitthavihāravāsinā ācariyadhammapālattherena
கதாஉதா³னஸ்ஸ அட்ட²கதா² ஸமத்தா.
Katāudānassa aṭṭhakathā samattā.
