| Library / Tipiṭaka / ತಿಪಿಟಕ • Tipiṭaka / ನೇತ್ತಿಪ್ಪಕರಣಪಾಳಿ • Nettippakaraṇapāḷi |
೩. ನಿದ್ದೇಸವಾರೋ
3. Niddesavāro
೪. ತತ್ಥ ಸಙ್ಖೇಪತೋ ನೇತ್ತಿ ಕಿತ್ತಿತಾ।
4. Tattha saṅkhepato netti kittitā.
ಹಾರಸಙ್ಖೇಪೋ
Hārasaṅkhepo
೧.
1.
ಅಸ್ಸಾದಾದೀನವತಾ , ನಿಸ್ಸರಣಮ್ಪಿ ಚ ಫಲಂ ಉಪಾಯೋ ಚ।
Assādādīnavatā , nissaraṇampi ca phalaṃ upāyo ca;
ಆಣತ್ತೀ ಚ ಭಗವತೋ, ಯೋಗೀನಂ ದೇಸನಾಹಾರೋ॥
Āṇattī ca bhagavato, yogīnaṃ desanāhāro.
೨.
2.
ಯಂ ಪುಚ್ಛಿತಞ್ಚ ವಿಸ್ಸಜ್ಜಿತಞ್ಚ, ಸುತ್ತಸ್ಸ ಯಾ ಚ ಅನುಗೀತಿ।
Yaṃ pucchitañca vissajjitañca, suttassa yā ca anugīti;
ಸುತ್ತಸ್ಸ ಯೋ ಪವಿಚಯೋ, ಹಾರೋ ವಿಚಯೋತಿ ನಿದ್ದಿಟ್ಠೋ॥
Suttassa yo pavicayo, hāro vicayoti niddiṭṭho.
೩.
3.
ಸಬ್ಬೇಸಂ ಹಾರಾನಂ, ಯಾ ಭೂಮೀ ಯೋ ಚ ಗೋಚರೋ ತೇಸಂ।
Sabbesaṃ hārānaṃ, yā bhūmī yo ca gocaro tesaṃ;
ಯುತ್ತಾಯುತ್ತಪರಿಕ್ಖಾ, ಹಾರೋ ಯುತ್ತೀತಿ ನಿದ್ದಿಟ್ಠೋ॥
Yuttāyuttaparikkhā, hāro yuttīti niddiṭṭho.
೪.
4.
ಧಮ್ಮಂ ದೇಸೇತಿ ಜಿನೋ, ತಸ್ಸ ಚ ಧಮ್ಮಸ್ಸ ಯಂ ಪದಟ್ಠಾನಂ।
Dhammaṃ deseti jino, tassa ca dhammassa yaṃ padaṭṭhānaṃ;
ಇತಿ ಯಾವ ಸಬ್ಬಧಮ್ಮಾ, ಏಸೋ ಹಾರೋ ಪದಟ್ಠಾನೋ॥
Iti yāva sabbadhammā, eso hāro padaṭṭhāno.
೫.
5.
ವುತ್ತಮ್ಹಿ ಏಕಧಮ್ಮೇ, ಯೇ ಧಮ್ಮಾ ಏಕಲಕ್ಖಣಾ ಕೇಚಿ।
Vuttamhi ekadhamme, ye dhammā ekalakkhaṇā keci;
ವುತ್ತಾ ಭವನ್ತಿ ಸಬ್ಬೇ, ಸೋ ಹಾರೋ ಲಕ್ಖಣೋ ನಾಮ॥
Vuttā bhavanti sabbe, so hāro lakkhaṇo nāma.
೬.
6.
ನೇರುತ್ತಮಧಿಪ್ಪಾಯೋ, ಬ್ಯಞ್ಜನಮಥ ದೇಸನಾನಿದಾನಞ್ಚ।
Neruttamadhippāyo, byañjanamatha desanānidānañca;
ಪುಬ್ಬಾಪರಾನುಸನ್ಧೀ, ಏಸೋ ಹಾರೋ ಚತುಬ್ಯೂಹೋ॥
Pubbāparānusandhī, eso hāro catubyūho.
೭.
7.
ಏಕಮ್ಹಿ ಪದಟ್ಠಾನೇ, ಪರಿಯೇಸತಿ ಸೇಸಕಂ ಪದಟ್ಠಾನಂ।
Ekamhi padaṭṭhāne, pariyesati sesakaṃ padaṭṭhānaṃ;
ಆವಟ್ಟತಿ ಪಟಿಪಕ್ಖೇ, ಆವಟ್ಟೋ ನಾಮ ಸೋ ಹಾರೋ॥
Āvaṭṭati paṭipakkhe, āvaṭṭo nāma so hāro.
೮.
8.
ಧಮ್ಮಞ್ಚ ಪದಟ್ಠಾನಂ, ಭೂಮಿಞ್ಚ ವಿಭಜ್ಜತೇ ಅಯಂ ಹಾರೋ।
Dhammañca padaṭṭhānaṃ, bhūmiñca vibhajjate ayaṃ hāro;
ಸಾಧಾರಣೇ ಅಸಾಧಾರಣೇ ಚ ನೇಯ್ಯೋ ವಿಭತ್ತೀತಿ॥
Sādhāraṇe asādhāraṇe ca neyyo vibhattīti.
೯.
9.
ಕುಸಲಾಕುಸಲೇ ಧಮ್ಮೇ, ನಿದ್ದಿಟ್ಠೇ ಭಾವಿತೇ ಪಹೀನೇ ಚ।
Kusalākusale dhamme, niddiṭṭhe bhāvite pahīne ca;
ಪರಿವತ್ತತಿ ಪಟಿಪಕ್ಖೇ, ಹಾರೋ ಪರಿವತ್ತನೋ ನಾಮ॥
Parivattati paṭipakkhe, hāro parivattano nāma.
೧೦.
10.
ವೇವಚನಾನಿ ಬಹೂನಿ ತು, ಸುತ್ತೇ ವುತ್ತಾನಿ ಏಕಧಮ್ಮಸ್ಸ।
Vevacanāni bahūni tu, sutte vuttāni ekadhammassa;
ಯೋ ಜಾನಾತಿ ಸುತ್ತವಿದೂ, ವೇವಚನೋ ನಾಮ ಸೋ ಹಾರೋ॥
Yo jānāti suttavidū, vevacano nāma so hāro.
೧೧.
11.
ಏಕಂ ಭಗವಾ ಧಮ್ಮಂ, ಪಞ್ಞತ್ತೀಹಿ ವಿವಿಧಾಹಿ ದೇಸೇತಿ।
Ekaṃ bhagavā dhammaṃ, paññattīhi vividhāhi deseti;
ಸೋ ಆಕಾರೋ ಞೇಯ್ಯೋ, ಪಞ್ಞತ್ತೀ ನಾಮ ಹಾರೋತಿ॥
So ākāro ñeyyo, paññattī nāma hāroti.
೧೨.
12.
ಯೋ ಚ ಪಟಿಚ್ಚುಪ್ಪಾದೋ, ಇನ್ದ್ರಿಯಖನ್ಧಾ ಚ ಧಾತು ಆಯತನಾ।
Yo ca paṭiccuppādo, indriyakhandhā ca dhātu āyatanā;
ಏತೇಹಿ ಓತರತಿ ಯೋ, ಓತರಣೋ ನಾಮ ಸೋ ಹಾರೋ॥
Etehi otarati yo, otaraṇo nāma so hāro.
೧೩.
13.
ವಿಸ್ಸಜ್ಜಿತಮ್ಹಿ ಪಞ್ಹೇ, ಗಾಥಾಯಂ ಪುಚ್ಛಿತಾಯಮಾರಬ್ಭ।
Vissajjitamhi pañhe, gāthāyaṃ pucchitāyamārabbha;
ಸುದ್ಧಾಸುದ್ಧಪರಿಕ್ಖಾ, ಹಾರೋ ಸೋ ಸೋಧನೋ ನಾಮ॥
Suddhāsuddhaparikkhā, hāro so sodhano nāma.
೧೪.
14.
ಏಕತ್ತತಾಯ ಧಮ್ಮಾ, ಯೇಪಿ ಚ ವೇಮತ್ತತಾಯ ನಿದ್ದಿಟ್ಠಾ।
Ekattatāya dhammā, yepi ca vemattatāya niddiṭṭhā;
ತೇನ ವಿಕಪ್ಪಯಿತಬ್ಬಾ, ಏಸೋ ಹಾರೋ ಅಧಿಟ್ಠಾನೋ॥
Tena vikappayitabbā, eso hāro adhiṭṭhāno.
೧೫.
15.
ಯೇ ಧಮ್ಮಾ ಯಂ ಧಮ್ಮಂ, ಜನಯನ್ತಿಪ್ಪಚ್ಚಯಾ ಪರಮ್ಪರತೋ।
Ye dhammā yaṃ dhammaṃ, janayantippaccayā paramparato;
ಹೇತುಮವಕಡ್ಢಯಿತ್ವಾ, ಏಸೋ ಹಾರೋ ಪರಿಕ್ಖಾರೋ॥
Hetumavakaḍḍhayitvā, eso hāro parikkhāro.
೧೬.
16.
ಯೇ ಧಮ್ಮಾ ಯಂ ಮೂಲಾ, ಯೇ ಚೇಕತ್ಥಾ ಪಕಾಸಿತಾ ಮುನಿನಾ।
Ye dhammā yaṃ mūlā, ye cekatthā pakāsitā muninā;
ತೇ ಸಮರೋಪಯಿತಬ್ಬಾ, ಏಸ ಸಮಾರೋಪನೋ ಹಾರೋ॥
Te samaropayitabbā, esa samāropano hāro.
ನಯಸಙ್ಖೇಪೋ
Nayasaṅkhepo
೧೭.
17.
ತಣ್ಹಞ್ಚ ಅವಿಜ್ಜಮ್ಪಿ ಚ, ಸಮಥೇನ ವಿಪಸ್ಸನಾ ಯೋ ನೇತಿ।
Taṇhañca avijjampi ca, samathena vipassanā yo neti;
ಸಚ್ಚೇಹಿ ಯೋಜಯಿತ್ವಾ, ಅಯಂ ನಯೋ ನನ್ದಿಯಾವಟ್ಟೋ॥
Saccehi yojayitvā, ayaṃ nayo nandiyāvaṭṭo.
೧೮.
18.
ಯೋ ಅಕುಸಲೇ ಸಮೂಲೇಹಿ, ನೇತಿ ಕುಸಲೇ ಚ ಕುಸಲಮೂಲೇಹಿ।
Yo akusale samūlehi, neti kusale ca kusalamūlehi;
ಭೂತಂ ತಥಂ ಅವಿತಥಂ, ತಿಪುಕ್ಖಲಂ ತಂ ನಯಂ ಆಹು॥
Bhūtaṃ tathaṃ avitathaṃ, tipukkhalaṃ taṃ nayaṃ āhu.
೧೯.
19.
ಯೋ ನೇತಿ ವಿಪಲ್ಲಾಸೇಹಿ, ಕಿಲೇಸೇ ಇನ್ದ್ರಿಯೇಹಿ ಸದ್ಧಮ್ಮೇ।
Yo neti vipallāsehi, kilese indriyehi saddhamme;
ಏತಂ ನಯಂ ನಯವಿದೂ, ಸೀಹವಿಕ್ಕೀಳಿತಂ ಆಹು॥
Etaṃ nayaṃ nayavidū, sīhavikkīḷitaṃ āhu.
೨೦.
20.
ವೇಯ್ಯಾಕರಣೇಸು ಹಿ ಯೇ, ಕುಸಲಾಕುಸಲಾ ತಹಿಂ ತಹಿಂ ವುತ್ತಾ।
Veyyākaraṇesu hi ye, kusalākusalā tahiṃ tahiṃ vuttā;
ಮನಸಾ ವೋಲೋಕಯತೇ, ತಂ ಖು ದಿಸಾಲೋಚನಂ ಆಹು॥
Manasā volokayate, taṃ khu disālocanaṃ āhu.
೨೧.
21.
ಓಲೋಕೇತ್ವಾ ದಿಸಲೋಚನೇನ, ಉಕ್ಖಿಪಿಯ ಯಂ ಸಮಾನೇತಿ।
Oloketvā disalocanena, ukkhipiya yaṃ samāneti;
ಸಬ್ಬೇ ಕುಸಲಾಕುಸಲೇ, ಅಯಂ ನಯೋ ಅಙ್ಕುಸೋ ನಾಮ॥
Sabbe kusalākusale, ayaṃ nayo aṅkuso nāma.
೨೨.
22.
ಸಙ್ಖಿಪಿಯ ಅಙ್ಕುಸೇನ ಹಿ, ನಯೇಹಿ ತೀಹಿ ನಿದ್ದಿಸೇ ಸುತ್ತಂ॥
Saṅkhipiya aṅkusena hi, nayehi tīhi niddise suttaṃ.
ದ್ವಾದಸಪದ
Dvādasapada
೨೩.
23.
ಅಕ್ಖರಂ ಪದಂ ಬ್ಯಞ್ಜನಂ, ನಿರುತ್ತಿ ತಥೇವ ನಿದ್ದೇಸೋ।
Akkharaṃ padaṃ byañjanaṃ, nirutti tatheva niddeso;
ಆಕಾರಛಟ್ಠವಚನಂ, ಏತ್ತಾವ ಬ್ಯಞ್ಜನಂ ಸಬ್ಬಂ॥
Ākārachaṭṭhavacanaṃ, ettāva byañjanaṃ sabbaṃ.
೨೪.
24.
ಸಙ್ಕಾಸನಾ ಪಕಾಸನಾ, ವಿವರಣಾ ವಿಭಜನುತ್ತಾನೀಕಮ್ಮಪಞ್ಞತ್ತಿ।
Saṅkāsanā pakāsanā, vivaraṇā vibhajanuttānīkammapaññatti;
ಏತೇಹಿ ಛಹಿ ಪದೇಹಿ, ಅತ್ಥೋ ಕಮ್ಮಞ್ಚ ನಿದ್ದಿಟ್ಠಂ॥
Etehi chahi padehi, attho kammañca niddiṭṭhaṃ.
೨೫.
25.
ತೀಣಿ ಚ ನಯಾ ಅನೂನಾ, ಅತ್ಥಸ್ಸ ಚ ಛಪ್ಪದಾನಿ ಗಣಿತಾನಿ।
Tīṇi ca nayā anūnā, atthassa ca chappadāni gaṇitāni;
ನವಹಿ ಪದೇಹಿ ಭಗವತೋ, ವಚನಸ್ಸತ್ಥೋ ಸಮಾಯುತ್ತೋ॥
Navahi padehi bhagavato, vacanassattho samāyutto.
೨೬.
26.
ಅತ್ಥಸ್ಸ ನವಪ್ಪದಾನಿ, ಬ್ಯಞ್ಜನಪರಿಯೇಟ್ಠಿಯಾ ಚತುಬ್ಬೀಸ।
Atthassa navappadāni, byañjanapariyeṭṭhiyā catubbīsa;
ನಿದ್ದೇಸವಾರೋ।
Niddesavāro.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ನೇತ್ತಿಪ್ಪಕರಣ-ಅಟ್ಠಕಥಾ • Nettippakaraṇa-aṭṭhakathā / ೩. ನಿದ್ದೇಸವಾರವಣ್ಣನಾ • 3. Niddesavāravaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಖುದ್ದಕನಿಕಾಯ (ಟೀಕಾ) • Khuddakanikāya (ṭīkā) / ನೇತ್ತಿಪ್ಪಕರಣ-ಟೀಕಾ • Nettippakaraṇa-ṭīkā / ೩. ನಿದ್ದೇಸವಾರವಣ್ಣನಾ • 3. Niddesavāravaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಖುದ್ದಕನಿಕಾಯ (ಟೀಕಾ) • Khuddakanikāya (ṭīkā) / ನೇತ್ತಿವಿಭಾವಿನೀ • Nettivibhāvinī / ೩. ನಿದ್ದೇಸವಾರಅತ್ಥವಿಭಾವನಾ • 3. Niddesavāraatthavibhāvanā
