| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
৩. নিদ্দেসৰারো
3. Niddesavāro
৪. তত্থ সঙ্খেপতো নেত্তি কিত্তিতা।
4. Tattha saṅkhepato netti kittitā.
হারসঙ্খেপো
Hārasaṅkhepo
১.
1.
অস্সাদাদীনৰতা , নিস্সরণম্পি চ ফলং উপাযো চ।
Assādādīnavatā , nissaraṇampi ca phalaṃ upāyo ca;
আণত্তী চ ভগৰতো, যোগীনং দেসনাহারো॥
Āṇattī ca bhagavato, yogīnaṃ desanāhāro.
২.
2.
যং পুচ্ছিতঞ্চ ৰিস্সজ্জিতঞ্চ, সুত্তস্স যা চ অনুগীতি।
Yaṃ pucchitañca vissajjitañca, suttassa yā ca anugīti;
সুত্তস্স যো পৰিচযো, হারো ৰিচযোতি নিদ্দিট্ঠো॥
Suttassa yo pavicayo, hāro vicayoti niddiṭṭho.
৩.
3.
সব্বেসং হারানং, যা ভূমী যো চ গোচরো তেসং।
Sabbesaṃ hārānaṃ, yā bhūmī yo ca gocaro tesaṃ;
যুত্তাযুত্তপরিক্খা, হারো যুত্তীতি নিদ্দিট্ঠো॥
Yuttāyuttaparikkhā, hāro yuttīti niddiṭṭho.
৪.
4.
ধম্মং দেসেতি জিনো, তস্স চ ধম্মস্স যং পদট্ঠানং।
Dhammaṃ deseti jino, tassa ca dhammassa yaṃ padaṭṭhānaṃ;
ইতি যাৰ সব্বধম্মা, এসো হারো পদট্ঠানো॥
Iti yāva sabbadhammā, eso hāro padaṭṭhāno.
৫.
5.
ৰুত্তম্হি একধম্মে, যে ধম্মা একলক্খণা কেচি।
Vuttamhi ekadhamme, ye dhammā ekalakkhaṇā keci;
ৰুত্তা ভৰন্তি সব্বে, সো হারো লক্খণো নাম॥
Vuttā bhavanti sabbe, so hāro lakkhaṇo nāma.
৬.
6.
নেরুত্তমধিপ্পাযো, ব্যঞ্জনমথ দেসনানিদানঞ্চ।
Neruttamadhippāyo, byañjanamatha desanānidānañca;
পুব্বাপরানুসন্ধী, এসো হারো চতুব্যূহো॥
Pubbāparānusandhī, eso hāro catubyūho.
৭.
7.
একম্হি পদট্ঠানে, পরিযেসতি সেসকং পদট্ঠানং।
Ekamhi padaṭṭhāne, pariyesati sesakaṃ padaṭṭhānaṃ;
আৰট্টতি পটিপক্খে, আৰট্টো নাম সো হারো॥
Āvaṭṭati paṭipakkhe, āvaṭṭo nāma so hāro.
৮.
8.
ধম্মঞ্চ পদট্ঠানং, ভূমিঞ্চ ৰিভজ্জতে অযং হারো।
Dhammañca padaṭṭhānaṃ, bhūmiñca vibhajjate ayaṃ hāro;
সাধারণে অসাধারণে চ নেয্যো ৰিভত্তীতি॥
Sādhāraṇe asādhāraṇe ca neyyo vibhattīti.
৯.
9.
কুসলাকুসলে ধম্মে, নিদ্দিট্ঠে ভাৰিতে পহীনে চ।
Kusalākusale dhamme, niddiṭṭhe bhāvite pahīne ca;
পরিৰত্ততি পটিপক্খে, হারো পরিৰত্তনো নাম॥
Parivattati paṭipakkhe, hāro parivattano nāma.
১০.
10.
ৰেৰচনানি বহূনি তু, সুত্তে ৰুত্তানি একধম্মস্স।
Vevacanāni bahūni tu, sutte vuttāni ekadhammassa;
যো জানাতি সুত্তৰিদূ, ৰেৰচনো নাম সো হারো॥
Yo jānāti suttavidū, vevacano nāma so hāro.
১১.
11.
একং ভগৰা ধম্মং, পঞ্ঞত্তীহি ৰিৰিধাহি দেসেতি।
Ekaṃ bhagavā dhammaṃ, paññattīhi vividhāhi deseti;
সো আকারো ঞেয্যো, পঞ্ঞত্তী নাম হারোতি॥
So ākāro ñeyyo, paññattī nāma hāroti.
১২.
12.
যো চ পটিচ্চুপ্পাদো, ইন্দ্রিযখন্ধা চ ধাতু আযতনা।
Yo ca paṭiccuppādo, indriyakhandhā ca dhātu āyatanā;
এতেহি ওতরতি যো, ওতরণো নাম সো হারো॥
Etehi otarati yo, otaraṇo nāma so hāro.
১৩.
13.
ৰিস্সজ্জিতম্হি পঞ্হে, গাথাযং পুচ্ছিতাযমারব্ভ।
Vissajjitamhi pañhe, gāthāyaṃ pucchitāyamārabbha;
সুদ্ধাসুদ্ধপরিক্খা, হারো সো সোধনো নাম॥
Suddhāsuddhaparikkhā, hāro so sodhano nāma.
১৪.
14.
একত্ততায ধম্মা, যেপি চ ৰেমত্ততায নিদ্দিট্ঠা।
Ekattatāya dhammā, yepi ca vemattatāya niddiṭṭhā;
তেন ৰিকপ্পযিতব্বা, এসো হারো অধিট্ঠানো॥
Tena vikappayitabbā, eso hāro adhiṭṭhāno.
১৫.
15.
যে ধম্মা যং ধম্মং, জনযন্তিপ্পচ্চযা পরম্পরতো।
Ye dhammā yaṃ dhammaṃ, janayantippaccayā paramparato;
হেতুমৰকড্ঢযিত্ৰা, এসো হারো পরিক্খারো॥
Hetumavakaḍḍhayitvā, eso hāro parikkhāro.
১৬.
16.
যে ধম্মা যং মূলা, যে চেকত্থা পকাসিতা মুনিনা।
Ye dhammā yaṃ mūlā, ye cekatthā pakāsitā muninā;
তে সমরোপযিতব্বা, এস সমারোপনো হারো॥
Te samaropayitabbā, esa samāropano hāro.
নযসঙ্খেপো
Nayasaṅkhepo
১৭.
17.
তণ্হঞ্চ অৰিজ্জম্পি চ, সমথেন ৰিপস্সনা যো নেতি।
Taṇhañca avijjampi ca, samathena vipassanā yo neti;
সচ্চেহি যোজযিত্ৰা, অযং নযো নন্দিযাৰট্টো॥
Saccehi yojayitvā, ayaṃ nayo nandiyāvaṭṭo.
১৮.
18.
যো অকুসলে সমূলেহি, নেতি কুসলে চ কুসলমূলেহি।
Yo akusale samūlehi, neti kusale ca kusalamūlehi;
ভূতং তথং অৰিতথং, তিপুক্খলং তং নযং আহু॥
Bhūtaṃ tathaṃ avitathaṃ, tipukkhalaṃ taṃ nayaṃ āhu.
১৯.
19.
যো নেতি ৰিপল্লাসেহি, কিলেসে ইন্দ্রিযেহি সদ্ধম্মে।
Yo neti vipallāsehi, kilese indriyehi saddhamme;
এতং নযং নযৰিদূ, সীহৰিক্কীল়িতং আহু॥
Etaṃ nayaṃ nayavidū, sīhavikkīḷitaṃ āhu.
২০.
20.
ৰেয্যাকরণেসু হি যে, কুসলাকুসলা তহিং তহিং ৰুত্তা।
Veyyākaraṇesu hi ye, kusalākusalā tahiṃ tahiṃ vuttā;
মনসা ৰোলোকযতে, তং খু দিসালোচনং আহু॥
Manasā volokayate, taṃ khu disālocanaṃ āhu.
২১.
21.
ওলোকেত্ৰা দিসলোচনেন, উক্খিপিয যং সমানেতি।
Oloketvā disalocanena, ukkhipiya yaṃ samāneti;
সব্বে কুসলাকুসলে, অযং নযো অঙ্কুসো নাম॥
Sabbe kusalākusale, ayaṃ nayo aṅkuso nāma.
২২.
22.
সঙ্খিপিয অঙ্কুসেন হি, নযেহি তীহি নিদ্দিসে সুত্তং॥
Saṅkhipiya aṅkusena hi, nayehi tīhi niddise suttaṃ.
দ্ৰাদসপদ
Dvādasapada
২৩.
23.
অক্খরং পদং ব্যঞ্জনং, নিরুত্তি তথেৰ নিদ্দেসো।
Akkharaṃ padaṃ byañjanaṃ, nirutti tatheva niddeso;
আকারছট্ঠৰচনং, এত্তাৰ ব্যঞ্জনং সব্বং॥
Ākārachaṭṭhavacanaṃ, ettāva byañjanaṃ sabbaṃ.
২৪.
24.
সঙ্কাসনা পকাসনা, ৰিৰরণা ৰিভজনুত্তানীকম্মপঞ্ঞত্তি।
Saṅkāsanā pakāsanā, vivaraṇā vibhajanuttānīkammapaññatti;
এতেহি ছহি পদেহি, অত্থো কম্মঞ্চ নিদ্দিট্ঠং॥
Etehi chahi padehi, attho kammañca niddiṭṭhaṃ.
২৫.
25.
তীণি চ নযা অনূনা, অত্থস্স চ ছপ্পদানি গণিতানি।
Tīṇi ca nayā anūnā, atthassa ca chappadāni gaṇitāni;
নৰহি পদেহি ভগৰতো, ৰচনস্সত্থো সমাযুত্তো॥
Navahi padehi bhagavato, vacanassattho samāyutto.
২৬.
26.
অত্থস্স নৰপ্পদানি, ব্যঞ্জনপরিযেট্ঠিযা চতুব্বীস।
Atthassa navappadāni, byañjanapariyeṭṭhiyā catubbīsa;
নিদ্দেসৰারো।
Niddesavāro.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৩. নিদ্দেসৰারৰণ্ণনা • 3. Niddesavāravaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ৩. নিদ্দেসৰারৰণ্ণনা • 3. Niddesavāravaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ৩. নিদ্দেসৰারঅত্থৰিভাৰনা • 3. Niddesavāraatthavibhāvanā
