| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৯. নিব্বেধিকসুত্তৰণ্ণনা
9. Nibbedhikasuttavaṇṇanā
৬৩. নৰমে অনিব্বিদ্ধপুব্বে অপ্পদালিতপুব্বে লোভক্খন্ধাদযো নিব্বিজ্ঝতি পদালেতীতি নিব্বেধিকপরিযাযো, নিব্বিজ্ঝনকারণন্তি অত্থো। নিদানসম্ভৰোতি কামে নিদেতি উপ্পাদনসমত্থতায নিয্যাদেতীতি নিদানং। সম্ভৰতি ততোতি সম্ভৰো, নিদানমেৰ সম্ভৰো নিদানসম্ভৰো। ৰেমত্ততাতি নানাকরণং।
63. Navame anibbiddhapubbe appadālitapubbe lobhakkhandhādayo nibbijjhati padāletīti nibbedhikapariyāyo, nibbijjhanakāraṇanti attho. Nidānasambhavoti kāme nideti uppādanasamatthatāya niyyādetīti nidānaṃ. Sambhavati tatoti sambhavo, nidānameva sambhavo nidānasambhavo. Vemattatāti nānākaraṇaṃ.
কামগুণাতি কামযিতব্বট্ঠেন কামা, বন্ধনট্ঠেন গুণা ‘‘অন্তগুণ’’ন্তিআদীসু ৰিয। চক্খুৰিঞ্ঞেয্যাতি চক্খুৰিঞ্ঞাণেন পস্সিতব্বা। ইট্ঠাতি পরিযিট্ঠা ৰা হোন্তু মা ৰা, ইট্ঠারম্মণভূতাতি অত্থো। কন্তাতি কমনীযা। মনাপাতি মনৰড্ঢনকা। পিযরূপাতি পিযজাতিকা। কামূপসঞ্হিতাতি আরম্মণং কত্ৰা উপ্পজ্জমানেন কামেন উপসঞ্হিতা। রজনীযাতি রাগুপ্পত্তিকারণভূতা। নেতে কামাতি ন এতে কমনট্ঠেন কামা নাম হোন্তি। সঙ্কপ্পরাগোতি সঙ্কপ্পৰসেন উপ্পন্নরাগো। কামোতি অযং কামপ্পহানায পটিপন্নেহি পহাতব্বো। কমনট্ঠেন কামা নাম। চিত্রানীতি চিত্রৰিচিত্রারম্মণানি।
Kāmaguṇāti kāmayitabbaṭṭhena kāmā, bandhanaṭṭhena guṇā ‘‘antaguṇa’’ntiādīsu viya. Cakkhuviññeyyāti cakkhuviññāṇena passitabbā. Iṭṭhāti pariyiṭṭhā vā hontu mā vā, iṭṭhārammaṇabhūtāti attho. Kantāti kamanīyā. Manāpāti manavaḍḍhanakā. Piyarūpāti piyajātikā. Kāmūpasañhitāti ārammaṇaṃ katvā uppajjamānena kāmena upasañhitā. Rajanīyāti rāguppattikāraṇabhūtā. Nete kāmāti na ete kamanaṭṭhena kāmā nāma honti. Saṅkapparāgoti saṅkappavasena uppannarāgo. Kāmoti ayaṃ kāmappahānāya paṭipannehi pahātabbo. Kamanaṭṭhena kāmā nāma. Citrānīti citravicitrārammaṇāni.
ফস্সোতি সহজাতফস্সো। কামযমানোতি কামং কামযমানো। তজ্জং তজ্জন্তি তজ্জাতিকং তজ্জাতিকং। পুঞ্ঞভাগিযন্তি দিব্বে কামে পত্থেত্ৰা সুচরিতপারিপূরিযা দেৰলোকে নিব্বত্তস্স অত্তভাৰো পুঞ্ঞভাগিযো নাম, দুচ্চরিতপারিপূরিযা অপাযে নিব্বত্তস্স অত্তভাৰো অপুঞ্ঞভাগিযো নাম। অযং ৰুচ্চতি, ভিক্খৰে, কামানং ৰিপাকোতি অযং দুৰিধোপি কামপত্থনং নিস্সায উপ্পন্নত্তা কামানং ৰিপাকোতি ৰুচ্চতি। সো ইমং নিব্বেধিকন্তি সো ভিক্খু ইমং ছত্তিংসট্ঠানেসু নিব্বিজ্ঝনকং সেট্ঠচরিযং জানাতি। কামনিরোধন্তি কামানং নিরোধনে এৰং লদ্ধনামং। ইমস্মিঞ্হি ঠানে ব্রহ্মচরিযসঙ্খাতো মগ্গোৰ কামনিরোধোতি ৰুত্তো।
Phassoti sahajātaphasso. Kāmayamānoti kāmaṃ kāmayamāno. Tajjaṃ tajjanti tajjātikaṃ tajjātikaṃ. Puññabhāgiyanti dibbe kāme patthetvā sucaritapāripūriyā devaloke nibbattassa attabhāvo puññabhāgiyo nāma, duccaritapāripūriyā apāye nibbattassa attabhāvo apuññabhāgiyo nāma. Ayaṃ vuccati, bhikkhave, kāmānaṃ vipākoti ayaṃ duvidhopi kāmapatthanaṃ nissāya uppannattā kāmānaṃ vipākoti vuccati. So imaṃ nibbedhikanti so bhikkhu imaṃ chattiṃsaṭṭhānesu nibbijjhanakaṃ seṭṭhacariyaṃ jānāti. Kāmanirodhanti kāmānaṃ nirodhane evaṃ laddhanāmaṃ. Imasmiñhi ṭhāne brahmacariyasaṅkhāto maggova kāmanirodhoti vutto.
সামিসাতি কিলেসামিসসম্পযুত্তা। ইমিনা নযেন সব্বঠানেসু অত্থো ৰেদিতব্বো। অপিচেত্থ ৰোহারৰেপক্কন্তি ৰোহারৰিপাকং। কথাসঙ্খাতো হি ৰোহারো সঞ্ঞায ৰিপাকো নাম। যথা যথা নন্তি এত্থ নং-ইতি নিপাতমত্তমেৰ। ইতি যস্মা যথা যথা সঞ্জানাতি, তথা তথা এৰংসঞ্ঞী অহোসিন্তি কথেতি, তস্মা ৰোহারৰেপক্কাতি অত্থো।
Sāmisāti kilesāmisasampayuttā. Iminā nayena sabbaṭhānesu attho veditabbo. Apicettha vohāravepakkanti vohāravipākaṃ. Kathāsaṅkhāto hi vohāro saññāya vipāko nāma. Yathāyathā nanti ettha naṃ-iti nipātamattameva. Iti yasmā yathā yathā sañjānāti, tathā tathā evaṃsaññī ahosinti katheti, tasmā vohāravepakkāti attho.
অৰিজ্জাতি অট্ঠসু ঠানেসু অঞ্ঞাণভূতা বহলঅৰিজ্জা। নিরযং গমেন্তীতি নিরযগমনীযা, নিরযে নিব্বত্তিপচ্চযাতি অত্থো। সেসেসুপি এসেৰ নযো। চেতনাহন্তি চেতনং অহং। ইধ সব্বসঙ্গাহিকা সংৰিদহনচেতনা গহিতা। চেতযিত্ৰাতি দ্ৰারপ্পৰত্তচেতনা। মনসাতি চেতনাসম্পযুত্তচিত্তেন। নিরযৰেদনীযন্তি নিরযে ৰিপাকদাযকং। সেসেসুপি এসেৰ নযো। অধিমত্তন্তি বলৰদুক্খং। দন্ধৰিরাগীতি গরুকং ন খিপ্পং সণিকং ৰিগচ্ছনকদুক্খং। উরত্তাল়িং কন্দতীতি উরং তাল়েত্ৰা রোদতি। পরিযেট্ঠিন্তি পরিযেসনং। একপদং দ্ৰিপদন্তি একপদমন্তং ৰা দ্ৰিপদমন্তং ৰা, কো মন্তং জানাতীতি অত্থো। সম্মোহৰেপক্কন্তি সম্মোহৰিপাকং। দুক্খস্স হি সম্মোহো নিস্সন্দৰিপাকো নাম। দুতিযপদেপি এসেৰ নযো। পরিযেসনাপি হি তস্স নিস্সন্দৰিপাকোতি। ইমস্মিং সুত্তে ৰট্টৰিৰট্টং কথিতং।
Avijjāti aṭṭhasu ṭhānesu aññāṇabhūtā bahalaavijjā. Nirayaṃ gamentīti nirayagamanīyā, niraye nibbattipaccayāti attho. Sesesupi eseva nayo. Cetanāhanti cetanaṃ ahaṃ. Idha sabbasaṅgāhikā saṃvidahanacetanā gahitā. Cetayitvāti dvārappavattacetanā. Manasāti cetanāsampayuttacittena. Nirayavedanīyanti niraye vipākadāyakaṃ. Sesesupi eseva nayo. Adhimattanti balavadukkhaṃ. Dandhavirāgīti garukaṃ na khippaṃ saṇikaṃ vigacchanakadukkhaṃ. Urattāḷiṃ kandatīti uraṃ tāḷetvā rodati. Pariyeṭṭhinti pariyesanaṃ. Ekapadaṃ dvipadanti ekapadamantaṃ vā dvipadamantaṃ vā, ko mantaṃ jānātīti attho. Sammohavepakkanti sammohavipākaṃ. Dukkhassa hi sammoho nissandavipāko nāma. Dutiyapadepi eseva nayo. Pariyesanāpi hi tassa nissandavipākoti. Imasmiṃ sutte vaṭṭavivaṭṭaṃ kathitaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৯. নিব্বেধিকসুত্তং • 9. Nibbedhikasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৯. নিব্বেধিকসুত্তৰণ্ণনা • 9. Nibbedhikasuttavaṇṇanā
