| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૯. નિબ્બાનસુત્તં
9. Nibbānasuttaṃ
૧૭૯. અથ ખો આયસ્મા આનન્દો યેનાયસ્મા સારિપુત્તો તેનુપસઙ્કમિ; ઉપસઙ્કમિત્વા આયસ્મતા સારિપુત્તેન સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો આયસ્મા આનન્દો આયસ્મન્તં સારિપુત્તં એતદવોચ – ‘‘કો નુ ખો, આવુસો સારિપુત્ત, હેતુ કો પચ્ચયો, યેન મિધેકચ્ચે સત્તા દિટ્ઠેવ ધમ્મે ન પરિનિબ્બાયન્તી’’તિ?
179. Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā ānando āyasmantaṃ sāriputtaṃ etadavoca – ‘‘ko nu kho, āvuso sāriputta, hetu ko paccayo, yena midhekacce sattā diṭṭheva dhamme na parinibbāyantī’’ti?
‘‘ઇધાવુસો આનન્દ, સત્તા ઇમા હાનભાગિયા સઞ્ઞાતિ યથાભૂતં નપ્પજાનન્તિ, ઇમા ઠિતિભાગિયા સઞ્ઞાતિ યથાભૂતં નપ્પજાનન્તિ, ઇમા વિસેસભાગિયા સઞ્ઞાતિ યથાભૂતં નપ્પજાનન્તિ, ઇમા નિબ્બેધભાગિયા સઞ્ઞાતિ યથાભૂતં નપ્પજાનન્તિ. અયં ખો, આવુસો આનન્દ, હેતુ અયં પચ્ચયો, યેન મિધેકચ્ચે સત્તા દિટ્ઠેવ ધમ્મે ન પરિનિબ્બાયન્તી’’તિ.
‘‘Idhāvuso ānanda, sattā imā hānabhāgiyā saññāti yathābhūtaṃ nappajānanti, imā ṭhitibhāgiyā saññāti yathābhūtaṃ nappajānanti, imā visesabhāgiyā saññāti yathābhūtaṃ nappajānanti, imā nibbedhabhāgiyā saññāti yathābhūtaṃ nappajānanti. Ayaṃ kho, āvuso ānanda, hetu ayaṃ paccayo, yena midhekacce sattā diṭṭheva dhamme na parinibbāyantī’’ti.
‘‘કો પનાવુસો સારિપુત્ત, હેતુ કો પચ્ચયો, યેન મિધેકચ્ચે સત્તા દિટ્ઠેવ ધમ્મે પરિનિબ્બાયન્તી’’તિ? ‘‘ઇધાવુસો આનન્દ, સત્તા ઇમા હાનભાગિયા સઞ્ઞાતિ યથાભૂતં પજાનન્તિ, ઇમા ઠિતિભાગિયા સઞ્ઞાતિ યથાભૂતં પજાનન્તિ, ઇમા વિસેસભાગિયા સઞ્ઞાતિ યથાભૂતં પજાનન્તિ, ઇમા નિબ્બેધભાગિયા સઞ્ઞાતિ યથાભૂતં પજાનન્તિ. અયં ખો, આવુસો આનન્દ, હેતુ અયં પચ્ચયો, યેન મિધેકચ્ચે સત્તા દિટ્ઠેવ ધમ્મે પરિનિબ્બાયન્તી’’તિ. નવમં.
‘‘Ko panāvuso sāriputta, hetu ko paccayo, yena midhekacce sattā diṭṭheva dhamme parinibbāyantī’’ti? ‘‘Idhāvuso ānanda, sattā imā hānabhāgiyā saññāti yathābhūtaṃ pajānanti, imā ṭhitibhāgiyā saññāti yathābhūtaṃ pajānanti, imā visesabhāgiyā saññāti yathābhūtaṃ pajānanti, imā nibbedhabhāgiyā saññāti yathābhūtaṃ pajānanti. Ayaṃ kho, āvuso ānanda, hetu ayaṃ paccayo, yena midhekacce sattā diṭṭheva dhamme parinibbāyantī’’ti. Navamaṃ.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૯. નિબ્બાનસુત્તવણ્ણના • 9. Nibbānasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૯. નિબ્બાનસુત્તવણ્ણના • 9. Nibbānasuttavaṇṇanā
