| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༠. ནིབྦཱནསུཁཛཱནནཔཉྷོ
10. Nibbānasukhajānanapañho
༡༠. རཱཛཱ ཨཱཧ ‘‘བྷནྟེ ནཱགསེན, ཡོ ན ལབྷཏི ནིབྦཱནཾ, ཛཱནཱཏི སོ ‘སུཁཾ ནིབྦཱན’’’ནྟི? ‘‘ཨཱམ, མཧཱརཱཛ, ཡོ ན ལབྷཏི ནིབྦཱནཾ, ཛཱནཱཏི སོ ‘སུཁཾ ནིབྦཱན’’’ནྟི། ‘‘ཀཐཾ, བྷནྟེ ནཱགསེན, ཨལབྷནྟོ ཛཱནཱཏི ‘སུཁཾ ནིབྦཱན’’’ནྟི? ‘‘ཏཾ ཀིཾ མཉྙསི, མཧཱརཱཛ, ཡེསཾ ནཙྪིནྣཱ ཧཏྠཔཱདཱ , ཛཱནེཡྻུཾ ཏེ, མཧཱརཱཛ, ‘དུཀྑཾ ཧཏྠཔཱདཙྪེདན’’’ནྟི? ‘‘ཨཱམ, བྷནྟེ, ཛཱནེཡྻུ’’ནྟི། ‘‘ཀཐཾ ཛཱནེཡྻུ’’ནྟི? ‘‘ཨཉྙེསཾ, བྷནྟེ, ཚིནྣཧཏྠཔཱདཱནཾ པརིདེཝིཏསདྡཾ སུཏྭཱ ཛཱནནྟི ‘དུཀྑཾ ཧཏྠཔཱདཙྪེདན’’’ནྟི ། ‘‘ཨེཝམེཝ ཁོ, མཧཱརཱཛ, ཡེསཾ དིཊྛཾ ནིབྦཱནཾ, ཏེསཾ སདྡཾ སུཏྭཱ ཛཱནཱཏི ‘སུཁཾ ནིབྦཱན’’’ནྟི།
10. Rājā āha ‘‘bhante nāgasena, yo na labhati nibbānaṃ, jānāti so ‘sukhaṃ nibbāna’’’nti? ‘‘Āma, mahārāja, yo na labhati nibbānaṃ, jānāti so ‘sukhaṃ nibbāna’’’nti. ‘‘Kathaṃ, bhante nāgasena, alabhanto jānāti ‘sukhaṃ nibbāna’’’nti? ‘‘Taṃ kiṃ maññasi, mahārāja, yesaṃ nacchinnā hatthapādā , jāneyyuṃ te, mahārāja, ‘dukkhaṃ hatthapādacchedana’’’nti? ‘‘Āma, bhante, jāneyyu’’nti. ‘‘Kathaṃ jāneyyu’’nti? ‘‘Aññesaṃ, bhante, chinnahatthapādānaṃ paridevitasaddaṃ sutvā jānanti ‘dukkhaṃ hatthapādacchedana’’’nti . ‘‘Evameva kho, mahārāja, yesaṃ diṭṭhaṃ nibbānaṃ, tesaṃ saddaṃ sutvā jānāti ‘sukhaṃ nibbāna’’’nti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
ནིབྦཱནསུཁཛཱནནཔཉྷོ དསམོ།
Nibbānasukhajānanapañho dasamo.
ནིབྦཱནཝགྒོ ཙཏུཏྠོ།
Nibbānavaggo catuttho.
ཨིམསྨིཾ ཝགྒེ དས པཉྷཱ།
Imasmiṃ vagge dasa pañhā.
