| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
১০. নিব্বানসুখজাননপঞ্হো
10. Nibbānasukhajānanapañho
১০. রাজা আহ ‘‘ভন্তে নাগসেন, যো ন লভতি নিব্বানং, জানাতি সো ‘সুখং নিব্বান’’’ন্তি? ‘‘আম, মহারাজ, যো ন লভতি নিব্বানং, জানাতি সো ‘সুখং নিব্বান’’’ন্তি। ‘‘কথং, ভন্তে নাগসেন, অলভন্তো জানাতি ‘সুখং নিব্বান’’’ন্তি? ‘‘তং কিং মঞ্ঞসি, মহারাজ, যেসং নচ্ছিন্না হত্থপাদা , জানেয্যুং তে, মহারাজ, ‘দুক্খং হত্থপাদচ্ছেদন’’’ন্তি? ‘‘আম, ভন্তে, জানেয্যু’’ন্তি। ‘‘কথং জানেয্যু’’ন্তি? ‘‘অঞ্ঞেসং, ভন্তে, ছিন্নহত্থপাদানং পরিদেৰিতসদ্দং সুত্ৰা জানন্তি ‘দুক্খং হত্থপাদচ্ছেদন’’’ন্তি । ‘‘এৰমেৰ খো, মহারাজ, যেসং দিট্ঠং নিব্বানং, তেসং সদ্দং সুত্ৰা জানাতি ‘সুখং নিব্বান’’’ন্তি।
10. Rājā āha ‘‘bhante nāgasena, yo na labhati nibbānaṃ, jānāti so ‘sukhaṃ nibbāna’’’nti? ‘‘Āma, mahārāja, yo na labhati nibbānaṃ, jānāti so ‘sukhaṃ nibbāna’’’nti. ‘‘Kathaṃ, bhante nāgasena, alabhanto jānāti ‘sukhaṃ nibbāna’’’nti? ‘‘Taṃ kiṃ maññasi, mahārāja, yesaṃ nacchinnā hatthapādā , jāneyyuṃ te, mahārāja, ‘dukkhaṃ hatthapādacchedana’’’nti? ‘‘Āma, bhante, jāneyyu’’nti. ‘‘Kathaṃ jāneyyu’’nti? ‘‘Aññesaṃ, bhante, chinnahatthapādānaṃ paridevitasaddaṃ sutvā jānanti ‘dukkhaṃ hatthapādacchedana’’’nti . ‘‘Evameva kho, mahārāja, yesaṃ diṭṭhaṃ nibbānaṃ, tesaṃ saddaṃ sutvā jānāti ‘sukhaṃ nibbāna’’’nti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
নিব্বানসুখজাননপঞ্হো দসমো।
Nibbānasukhajānanapañho dasamo.
নিব্বানৰগ্গো চতুত্থো।
Nibbānavaggo catuttho.
ইমস্মিং ৰগ্গে দস পঞ্হা।
Imasmiṃ vagge dasa pañhā.
