| Library / Tipiṭaka / തിപിടക • Tipiṭaka / ഖുദ്ദസിക്ഖാ-മൂലസിക്ഖാ • Khuddasikkhā-mūlasikkhā |
൧൯. ന്ഹാനകപ്പനിദ്ദേസവണ്ണനാ
19. Nhānakappaniddesavaṇṇanā
൧൬൮. പുരതോതി (ചൂളവ॰ ൩൭൨) ഥേരാനം പുരതോ ഉപരി വാ ന ച ന്ഹായേയ്യാതി അത്ഥോ.
168.Puratoti (cūḷava. 372) therānaṃ purato upari vā na ca nhāyeyyāti attho.
൧൬൯-൧൭൧. കുട്ടത്ഥമ്ഭതരുട്ടാനേതി ഏത്ഥ (ചൂളവ॰ ൨൪൩; ചൂളവ॰ അട്ഠ॰ ൨൪൩) കുട്ടേ വാ ഥമ്ഭേ വാ തരുമ്ഹി വാ അട്ടാനഫലകേ വാ കായം ന ഘംസയേതി അത്ഥോ. ഗന്ധബ്ബഹത്ഥോ നാമ മക്കടഹത്ഥസദിസോ ദാരുആദിമയോ. കുരുവിന്ദകസുത്തിയാതി കുരുവിന്ദസുത്തിയാ. മല്ലകേന വാ അഞ്ഞമഞ്ഞം വാ. ‘‘ന ഭിക്ഖവേ വിഗ്ഗയ്ഹ പരികമ്മം കാരാപേതബ്ബം. യോ കാരാപേയ്യ, ആപത്തി ദുക്കടസ്സാ’’തി (ചൂളവ॰ ൨൪൩) ഏവം വുത്തം വിഗ്ഗഹപരികമ്മം സന്ധായ ‘‘അഞ്ഞമഞ്ഞം വാ’’തി വുത്തം.
169-171.Kuṭṭatthambhataruṭṭāneti ettha (cūḷava. 243; cūḷava. aṭṭha. 243) kuṭṭe vā thambhe vā tarumhi vā aṭṭānaphalake vā kāyaṃ na ghaṃsayeti attho. Gandhabbahattho nāma makkaṭahatthasadiso dāruādimayo. Kuruvindakasuttiyāti kuruvindasuttiyā. Mallakena vā aññamaññaṃ vā. ‘‘Na bhikkhave viggayha parikammaṃ kārāpetabbaṃ. Yo kārāpeyya, āpatti dukkaṭassā’’ti (cūḷava. 243) evaṃ vuttaṃ viggahaparikammaṃ sandhāya ‘‘aññamaññaṃ vā’’ti vuttaṃ.
ഇദാനി കപ്പിയാനി ദസ്സേതും ‘‘കപാലിട്ഠകഖണ്ഡാനീ’’തിആദിമാഹ. സബ്ബേസം വട്ടതീതി സമ്ബന്ധോ . ഗിലാനസ്സപി (ചൂളവ॰ അട്ഠ॰ ൨൪൩) അഗിലാനസ്സപി ഇമാനി കപാലിട്ഠകഖണ്ഡാദീനി കായഘംസനേ വട്ടന്തി. പുഥുപാണീതി (ചൂളവ॰ ൨൪൪) ഹത്ഥപരികമ്മം വുച്ചതി. തസ്മാ സബ്ബേസം ഹത്ഥേന പിട്ഠിപരികമ്മം കാതും വട്ടതി. അകതമല്ലകം നാമ ഏകദാഠിമം പരിച്ഛിന്ദിത്വാ കതം. പാസാണാദയോ പാദഘംസനേ ഏവ കപ്പിയാ. ന്ഹാനകപ്പവിനിച്ഛയോ.
Idāni kappiyāni dassetuṃ ‘‘kapāliṭṭhakakhaṇḍānī’’tiādimāha. Sabbesaṃ vaṭṭatīti sambandho . Gilānassapi (cūḷava. aṭṭha. 243) agilānassapi imāni kapāliṭṭhakakhaṇḍādīni kāyaghaṃsane vaṭṭanti. Puthupāṇīti (cūḷava. 244) hatthaparikammaṃ vuccati. Tasmā sabbesaṃ hatthena piṭṭhiparikammaṃ kātuṃ vaṭṭati. Akatamallakaṃ nāma ekadāṭhimaṃ paricchinditvā kataṃ. Pāsāṇādayo pādaghaṃsane eva kappiyā. Nhānakappavinicchayo.
ന്ഹാനകപ്പനിദ്ദേസവണ്ണനാ നിട്ഠിതാ.
Nhānakappaniddesavaṇṇanā niṭṭhitā.
