| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
19. න්හානකප්පනිද්දෙසවණ්ණනා
19. Nhānakappaniddesavaṇṇanā
168. කප්පනං කප්පියතා කප්පො, න්හානෙ කප්පො න්හානකප්පො. නවකො ථෙරානං පුරතො උපරි වා න ච න්හායෙය්යාති සම්බන්ධො. න චාති නයෙව. පුරතොති අභිමුඛෙ. උපරීති නදියා උපරි.
168. Kappanaṃ kappiyatā kappo, nhāne kappo nhānakappo. Navako therānaṃ purato upari vā na ca nhāyeyyāti sambandho. Na cāti nayeva. Puratoti abhimukhe. Uparīti nadiyā upari.
169-171. කුට්ටත්ථම්භතරුට්ටානෙ කායං න ඝංසයෙති සම්බන්ධො. තත්ථ කුට්ටං නාම ඉට්ඨකදාරුසිලාභිත්ති. ථම්භො නාම නහානතිත්ථෙ නිඛනිත්වා ඨපිතො. තරූති රුක්ඛො. අට්ටානං නාම තච්ඡෙත්වා අට්ඨපදාකාරෙන රාජියො ඡින්දිත්වා නහානතිත්ථෙ නිඛාතඵලකං. ගන්ධබ්බහත්ථෙන වා…පෙ.… මල්ලකෙන වා කායං සරීරෙන වා අඤ්ඤමඤ්ඤං න ඝංසයෙති සම්බන්ධො. ගන්ධබ්බහත්ථෙනාති දාරුමයහත්ථෙන. කුරුවින්දකසුත්තියාති කුරුවින්දකපාසාණචුණ්ණානි ලාඛාය බන්ධිත්වා කතගුළිකාවලියා සුත්තෙන ආවුණිතසුත්තියා. මල්ලකෙනාති මකරදන්තකෙ ඡින්දිත්වා පදුමකණ්ණිකසණ්ඨානෙන කතමල්ලකෙන. සරීරෙනාති අත්තනො කායෙන. අඤ්ඤමඤ්ඤස්ස අඤ්ඤමඤ්ඤං කිරියාකරණසඞ්ඛාතෙ කිරියාබ්යභිහාරෙ ද්විත්තං. කපාල…පෙ.… පුථුපාණි ච සබ්බෙසං වට්ටතීති සම්බන්ධො. කපාලඤ්ච ඉට්ඨකා ච, තාසං ඛණ්ඩානි. පුථුපාණීති පුථු නානා පාණි පුථුපාණි, හත්ථපරිකම්මං රුළ්හීවසෙන. සබ්බෙසන්ති ගිලානාගිලානානං. ගිලානස්ස අකතමල්ලකං වට්ටතීති සම්බන්ධො. අකතමල්ලකං නාම කතමල්ලකවිපරීතං. ඵෙණං නාම සමුද්දඵෙණන්ති.
169-171. Kuṭṭatthambhataruṭṭāne kāyaṃ na ghaṃsayeti sambandho. Tattha kuṭṭaṃ nāma iṭṭhakadārusilābhitti. Thambho nāma nahānatitthe nikhanitvā ṭhapito. Tarūti rukkho. Aṭṭānaṃ nāma tacchetvā aṭṭhapadākārena rājiyo chinditvā nahānatitthe nikhātaphalakaṃ. Gandhabbahatthena vā…pe… mallakena vā kāyaṃ sarīrena vā aññamaññaṃ na ghaṃsayeti sambandho. Gandhabbahatthenāti dārumayahatthena. Kuruvindakasuttiyāti kuruvindakapāsāṇacuṇṇāni lākhāya bandhitvā kataguḷikāvaliyā suttena āvuṇitasuttiyā. Mallakenāti makaradantake chinditvā padumakaṇṇikasaṇṭhānena katamallakena. Sarīrenāti attano kāyena. Aññamaññassa aññamaññaṃ kiriyākaraṇasaṅkhāte kiriyābyabhihāre dvittaṃ. Kapāla…pe… puthupāṇi ca sabbesaṃ vaṭṭatīti sambandho. Kapālañca iṭṭhakā ca, tāsaṃ khaṇḍāni. Puthupāṇīti puthu nānā pāṇi puthupāṇi, hatthaparikammaṃ ruḷhīvasena. Sabbesanti gilānāgilānānaṃ. Gilānassa akatamallakaṃ vaṭṭatīti sambandho. Akatamallakaṃ nāma katamallakaviparītaṃ. Pheṇaṃ nāma samuddapheṇanti.
න්හානකප්පනිද්දෙසවණ්ණනා නිට්ඨිතා.
Nhānakappaniddesavaṇṇanā niṭṭhitā.
