| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
19. න්හානකප්පනිද්දෙසවණ්ණනා
19. Nhānakappaniddesavaṇṇanā
168. පුරතොති (චූළව. 372) ථෙරානං පුරතො උපරි වා න ච න්හායෙය්යාති අත්ථො.
168.Puratoti (cūḷava. 372) therānaṃ purato upari vā na ca nhāyeyyāti attho.
169-171. කුට්ටත්ථම්භතරුට්ටානෙති එත්ථ (චූළව. 243; චූළව. අට්ඨ. 243) කුට්ටෙ වා ථම්භෙ වා තරුම්හි වා අට්ටානඵලකෙ වා කායං න ඝංසයෙති අත්ථො. ගන්ධබ්බහත්ථො නාම මක්කටහත්ථසදිසො දාරුආදිමයො. කුරුවින්දකසුත්තියාති කුරුවින්දසුත්තියා. මල්ලකෙන වා අඤ්ඤමඤ්ඤං වා. ‘‘න භික්ඛවෙ විග්ගය්හ පරිකම්මං කාරාපෙතබ්බං. යො කාරාපෙය්ය, ආපත්ති දුක්කටස්සා’’ති (චූළව. 243) එවං වුත්තං විග්ගහපරිකම්මං සන්ධාය ‘‘අඤ්ඤමඤ්ඤං වා’’ති වුත්තං.
169-171.Kuṭṭatthambhataruṭṭāneti ettha (cūḷava. 243; cūḷava. aṭṭha. 243) kuṭṭe vā thambhe vā tarumhi vā aṭṭānaphalake vā kāyaṃ na ghaṃsayeti attho. Gandhabbahattho nāma makkaṭahatthasadiso dāruādimayo. Kuruvindakasuttiyāti kuruvindasuttiyā. Mallakena vā aññamaññaṃ vā. ‘‘Na bhikkhave viggayha parikammaṃ kārāpetabbaṃ. Yo kārāpeyya, āpatti dukkaṭassā’’ti (cūḷava. 243) evaṃ vuttaṃ viggahaparikammaṃ sandhāya ‘‘aññamaññaṃ vā’’ti vuttaṃ.
ඉදානි කප්පියානි දස්සෙතුං ‘‘කපාලිට්ඨකඛණ්ඩානී’’තිආදිමාහ. සබ්බෙසං වට්ටතීති සම්බන්ධො . ගිලානස්සපි (චූළව. අට්ඨ. 243) අගිලානස්සපි ඉමානි කපාලිට්ඨකඛණ්ඩාදීනි කායඝංසනෙ වට්ටන්ති. පුථුපාණීති (චූළව. 244) හත්ථපරිකම්මං වුච්චති. තස්මා සබ්බෙසං හත්ථෙන පිට්ඨිපරිකම්මං කාතුං වට්ටති. අකතමල්ලකං නාම එකදාඨිමං පරිච්ඡින්දිත්වා කතං. පාසාණාදයො පාදඝංසනෙ එව කප්පියා. න්හානකප්පවිනිච්ඡයො.
Idāni kappiyāni dassetuṃ ‘‘kapāliṭṭhakakhaṇḍānī’’tiādimāha. Sabbesaṃ vaṭṭatīti sambandho . Gilānassapi (cūḷava. aṭṭha. 243) agilānassapi imāni kapāliṭṭhakakhaṇḍādīni kāyaghaṃsane vaṭṭanti. Puthupāṇīti (cūḷava. 244) hatthaparikammaṃ vuccati. Tasmā sabbesaṃ hatthena piṭṭhiparikammaṃ kātuṃ vaṭṭati. Akatamallakaṃ nāma ekadāṭhimaṃ paricchinditvā kataṃ. Pāsāṇādayo pādaghaṃsane eva kappiyā. Nhānakappavinicchayo.
න්හානකප්පනිද්දෙසවණ්ණනා නිට්ඨිතා.
Nhānakappaniddesavaṇṇanā niṭṭhitā.
