| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
១៩. ន្ហានកប្បនិទ្ទេសវណ្ណនា
19. Nhānakappaniddesavaṇṇanā
១៦៨. កប្បនំ កប្បិយតា កប្បោ, ន្ហានេ កប្បោ ន្ហានកប្បោ។ នវកោ ថេរានំ បុរតោ ឧបរិ វា ន ច ន្ហាយេយ្យាតិ សម្ពន្ធោ។ ន ចាតិ នយេវ។ បុរតោតិ អភិមុខេ។ ឧបរីតិ នទិយា ឧបរិ។
168. Kappanaṃ kappiyatā kappo, nhāne kappo nhānakappo. Navako therānaṃ purato upari vā na ca nhāyeyyāti sambandho. Na cāti nayeva. Puratoti abhimukhe. Uparīti nadiyā upari.
១៦៩-១៧១. កុដ្ដត្ថម្ភតរុដ្ដានេ កាយំ ន ឃំសយេតិ សម្ពន្ធោ។ តត្ថ កុដ្ដំ នាម ឥដ្ឋកទារុសិលាភិត្តិ។ ថម្ភោ នាម នហានតិត្ថេ និខនិត្វា ឋបិតោ។ តរូតិ រុក្ខោ។ អដ្ដានំ នាម តច្ឆេត្វា អដ្ឋបទាការេន រាជិយោ ឆិន្ទិត្វា នហានតិត្ថេ និខាតផលកំ។ គន្ធព្ពហត្ថេន វា…បេ.… មល្លកេន វា កាយំ សរីរេន វា អញ្ញមញ្ញំ ន ឃំសយេតិ សម្ពន្ធោ។ គន្ធព្ពហត្ថេនាតិ ទារុមយហត្ថេន។ កុរុវិន្ទកសុត្តិយាតិ កុរុវិន្ទកបាសាណចុណ្ណានិ លាខាយ ពន្ធិត្វា កតគុឡិកាវលិយា សុត្តេន អាវុណិតសុត្តិយា។ មល្លកេនាតិ មករទន្តកេ ឆិន្ទិត្វា បទុមកណ្ណិកសណ្ឋានេន កតមល្លកេន។ សរីរេនាតិ អត្តនោ កាយេន។ អញ្ញមញ្ញស្ស អញ្ញមញ្ញំ កិរិយាករណសង្ខាតេ កិរិយាព្យភិហារេ ទ្វិត្តំ។ កបាល…បេ.… បុថុបាណិ ច សព្ពេសំ វដ្ដតីតិ សម្ពន្ធោ។ កបាលញ្ច ឥដ្ឋកា ច, តាសំ ខណ្ឌានិ។ បុថុបាណីតិ បុថុ នានា បាណិ បុថុបាណិ, ហត្ថបរិកម្មំ រុឡ្ហីវសេន។ សព្ពេសន្តិ គិលានាគិលានានំ។ គិលានស្ស អកតមល្លកំ វដ្ដតីតិ សម្ពន្ធោ។ អកតមល្លកំ នាម កតមល្លកវិបរីតំ។ ផេណំ នាម សមុទ្ទផេណន្តិ។
169-171. Kuṭṭatthambhataruṭṭāne kāyaṃ na ghaṃsayeti sambandho. Tattha kuṭṭaṃ nāma iṭṭhakadārusilābhitti. Thambho nāma nahānatitthe nikhanitvā ṭhapito. Tarūti rukkho. Aṭṭānaṃ nāma tacchetvā aṭṭhapadākārena rājiyo chinditvā nahānatitthe nikhātaphalakaṃ. Gandhabbahatthena vā…pe… mallakena vā kāyaṃ sarīrena vā aññamaññaṃ na ghaṃsayeti sambandho. Gandhabbahatthenāti dārumayahatthena. Kuruvindakasuttiyāti kuruvindakapāsāṇacuṇṇāni lākhāya bandhitvā kataguḷikāvaliyā suttena āvuṇitasuttiyā. Mallakenāti makaradantake chinditvā padumakaṇṇikasaṇṭhānena katamallakena. Sarīrenāti attano kāyena. Aññamaññassa aññamaññaṃ kiriyākaraṇasaṅkhāte kiriyābyabhihāre dvittaṃ. Kapāla…pe… puthupāṇi ca sabbesaṃ vaṭṭatīti sambandho. Kapālañca iṭṭhakā ca, tāsaṃ khaṇḍāni. Puthupāṇīti puthu nānā pāṇi puthupāṇi, hatthaparikammaṃ ruḷhīvasena. Sabbesanti gilānāgilānānaṃ. Gilānassa akatamallakaṃ vaṭṭatīti sambandho. Akatamallakaṃ nāma katamallakaviparītaṃ. Pheṇaṃ nāma samuddapheṇanti.
ន្ហានកប្បនិទ្ទេសវណ្ណនា និដ្ឋិតា។
Nhānakappaniddesavaṇṇanā niṭṭhitā.
