| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
১৯. ন্হানকপ্পনিদ্দেসৰণ্ণনা
19. Nhānakappaniddesavaṇṇanā
১৬৮. পুরতোতি (চূল়ৰ॰ ৩৭২) থেরানং পুরতো উপরি ৰা ন চ ন্হাযেয্যাতি অত্থো।
168.Puratoti (cūḷava. 372) therānaṃ purato upari vā na ca nhāyeyyāti attho.
১৬৯-১৭১. কুট্টত্থম্ভতরুট্টানেতি এত্থ (চূল়ৰ॰ ২৪৩; চূল়ৰ॰ অট্ঠ॰ ২৪৩) কুট্টে ৰা থম্ভে ৰা তরুম্হি ৰা অট্টানফলকে ৰা কাযং ন ঘংসযেতি অত্থো। গন্ধব্বহত্থো নাম মক্কটহত্থসদিসো দারুআদিমযো। কুরুৰিন্দকসুত্তিযাতি কুরুৰিন্দসুত্তিযা। মল্লকেন ৰা অঞ্ঞমঞ্ঞং ৰা। ‘‘ন ভিক্খৰে ৰিগ্গয্হ পরিকম্মং কারাপেতব্বং। যো কারাপেয্য, আপত্তি দুক্কটস্সা’’তি (চূল়ৰ॰ ২৪৩) এৰং ৰুত্তং ৰিগ্গহপরিকম্মং সন্ধায ‘‘অঞ্ঞমঞ্ঞং ৰা’’তি ৰুত্তং।
169-171.Kuṭṭatthambhataruṭṭāneti ettha (cūḷava. 243; cūḷava. aṭṭha. 243) kuṭṭe vā thambhe vā tarumhi vā aṭṭānaphalake vā kāyaṃ na ghaṃsayeti attho. Gandhabbahattho nāma makkaṭahatthasadiso dāruādimayo. Kuruvindakasuttiyāti kuruvindasuttiyā. Mallakena vā aññamaññaṃ vā. ‘‘Na bhikkhave viggayha parikammaṃ kārāpetabbaṃ. Yo kārāpeyya, āpatti dukkaṭassā’’ti (cūḷava. 243) evaṃ vuttaṃ viggahaparikammaṃ sandhāya ‘‘aññamaññaṃ vā’’ti vuttaṃ.
ইদানি কপ্পিযানি দস্সেতুং ‘‘কপালিট্ঠকখণ্ডানী’’তিআদিমাহ। সব্বেসং ৰট্টতীতি সম্বন্ধো । গিলানস্সপি (চূল়ৰ॰ অট্ঠ॰ ২৪৩) অগিলানস্সপি ইমানি কপালিট্ঠকখণ্ডাদীনি কাযঘংসনে ৰট্টন্তি। পুথুপাণীতি (চূল়ৰ॰ ২৪৪) হত্থপরিকম্মং ৰুচ্চতি। তস্মা সব্বেসং হত্থেন পিট্ঠিপরিকম্মং কাতুং ৰট্টতি। অকতমল্লকং নাম একদাঠিমং পরিচ্ছিন্দিত্ৰা কতং। পাসাণাদযো পাদঘংসনে এৰ কপ্পিযা। ন্হানকপ্পৰিনিচ্ছযো।
Idāni kappiyāni dassetuṃ ‘‘kapāliṭṭhakakhaṇḍānī’’tiādimāha. Sabbesaṃ vaṭṭatīti sambandho . Gilānassapi (cūḷava. aṭṭha. 243) agilānassapi imāni kapāliṭṭhakakhaṇḍādīni kāyaghaṃsane vaṭṭanti. Puthupāṇīti (cūḷava. 244) hatthaparikammaṃ vuccati. Tasmā sabbesaṃ hatthena piṭṭhiparikammaṃ kātuṃ vaṭṭati. Akatamallakaṃ nāma ekadāṭhimaṃ paricchinditvā kataṃ. Pāsāṇādayo pādaghaṃsane eva kappiyā. Nhānakappavinicchayo.
ন্হানকপ্পনিদ্দেসৰণ্ণনা নিট্ঠিতা।
Nhānakappaniddesavaṇṇanā niṭṭhitā.
