| Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
நயஸமுட்டா²னவாரவண்ணனா
Nayasamuṭṭhānavāravaṇṇanā
79. ‘‘விஸயபே⁴த³தோ’’தி ஸங்கே²பேன வுத்தமத்த²ங் வித்தா²ரதோ விவரிதுங் ‘‘யதா² ஹீ’’திஆதி³மாஹ. தத்த² நயதோதி நயக்³கா³ஹதோ. ந ஹி படிவேத⁴ஞாணங் விய விபஸ்ஸனாஞாணங் பச்சக்க²தோ பவத்ததீதி. அனுபு³ஜ்ஜி²யமானோதி அபி⁴ஸமயஞாணஸ்ஸ அனுரூபங் பு³ஜ்ஜி²யமானோ. யதா² ஏகபடிவேதே⁴னேவ மக்³க³ஞாணங் பவத்ததி, ஏவங் தத³னுச்ச²விகங் விபஸ்ஸனாஞாணேன க³ய்ஹமானோதி அத்தோ². ஏவஞ்ச கத்வா நந்தி³யாவட்டாதீ³னங் திண்ணங் அத்த²னயபா⁴வோ ஸமத்தி²தோ ஹோதீதி. ததா² ஹி அத்த²விஸேஸஸரூபதாய தயோ நயா ‘‘ஸுத்தத்தோ²’’தி வுத்தா, பத³த்த²விசாரபா⁴வேபி பன ஹாரா ‘‘ப்³யஞ்ஜனவிசயோ’’தி. யதி³ ஏவங் கத²ங் தயோதி சோத³னங் ஸந்தா⁴யாஹ ‘‘படிவிஜ்ஜ²ந்தானங் பனா’’திஆதி³. தத்த² ஏகமேகோ ஸங்கிலேஸவோதா³னானங் விபா⁴க³தோ த்³விஸங்க³ஹோதி யோஜனா. சதுச²அட்ட²தி³ஸோ சாதி ந பச்சேகங் தே நந்தி³யாவட்டாத³யோ சதுச²அட்ட²தி³ஸா, அத² கோ² யதா²க்கமந்தி. ‘‘ஏவ’’ந்திஆதி³ யதா²வுத்தஸ்ஸ அத்த²ஸ்ஸ நிக³மனங்.
79.‘‘Visayabhedato’’ti saṅkhepena vuttamatthaṃ vitthārato vivarituṃ ‘‘yathā hī’’tiādimāha. Tattha nayatoti nayaggāhato. Na hi paṭivedhañāṇaṃ viya vipassanāñāṇaṃ paccakkhato pavattatīti. Anubujjhiyamānoti abhisamayañāṇassa anurūpaṃ bujjhiyamāno. Yathā ekapaṭivedheneva maggañāṇaṃ pavattati, evaṃ tadanucchavikaṃ vipassanāñāṇena gayhamānoti attho. Evañca katvā nandiyāvaṭṭādīnaṃ tiṇṇaṃ atthanayabhāvo samatthito hotīti. Tathā hi atthavisesasarūpatāya tayo nayā ‘‘suttattho’’ti vuttā, padatthavicārabhāvepi pana hārā ‘‘byañjanavicayo’’ti. Yadi evaṃ kathaṃ tayoti codanaṃ sandhāyāha ‘‘paṭivijjhantānaṃ panā’’tiādi. Tattha ekameko saṃkilesavodānānaṃ vibhāgato dvisaṅgahoti yojanā. Catuchaaṭṭhadiso cāti na paccekaṃ te nandiyāvaṭṭādayo catuchaaṭṭhadisā, atha kho yathākkamanti. ‘‘Eva’’ntiādi yathāvuttassa atthassa nigamanaṃ.
ததா² சாதி யதா²வுத்தஸ்ஸ அத்த²ஸ்ஸ உபசயேன ஸமத்த²னா. புப்³பா³ கோடி ந பஞ்ஞாயதீதி எத்த² யங் வத்தப்³ப³ங், தங் பரதோ பட்டா²னகதா²யங் ஆவி ப⁴விஸ்ஸதி. ‘‘அந்த⁴ங் தமங் ததா³ ஹோதி, யங் லோபோ⁴ ஸஹதே நர’’ந்திஆதி³ (சூளனி॰ க²க்³க³விஸாணஸுத்தனித்³தே³ஸ 128) வசனதோ காமதண்ஹாபி படிச்சா²த³னஸபா⁴வா, யதோ காமச்ச²ந்த³ங் ‘‘நீவரண’’ந்தி வுத்தங். அவிஜ்ஜாய பன ப⁴வேஸு ஆதீ³னவப்படிச்சா²த³னங் ஸாதிஸயந்தி. ததா² அவிஜ்ஜாபி ஸங்யோஜனஸபா⁴வா, யதோ ஸா ப³ஹித்³தா⁴ ஸங்யோஜனபா⁴வேன வுத்தா. ஏவங் ஸந்தேபி தண்ஹாய ப³ந்த⁴னட்டோ² ஸாதிஸயோ அபெக்கி²தபா⁴வதோதி இமமத்த²ங் த³ஸ்ஸெந்தோ ‘‘ததா²பி…பே॰… வுத்த’’ந்தி ஆஹ.
Tathā cāti yathāvuttassa atthassa upacayena samatthanā. Pubbā koṭi na paññāyatīti ettha yaṃ vattabbaṃ, taṃ parato paṭṭhānakathāyaṃ āvi bhavissati. ‘‘Andhaṃ tamaṃ tadā hoti, yaṃ lobho sahate nara’’ntiādi (cūḷani. khaggavisāṇasuttaniddesa 128) vacanato kāmataṇhāpi paṭicchādanasabhāvā, yato kāmacchandaṃ ‘‘nīvaraṇa’’nti vuttaṃ. Avijjāya pana bhavesu ādīnavappaṭicchādanaṃ sātisayanti. Tathā avijjāpi saṃyojanasabhāvā, yato sā bahiddhā saṃyojanabhāvena vuttā. Evaṃ santepi taṇhāya bandhanaṭṭho sātisayo apekkhitabhāvatoti imamatthaṃ dassento ‘‘tathāpi…pe… vutta’’nti āha.
‘‘ஸங்யுத்தா’’தி பத³ஸ்ஸ ஸம்பயுத்தாதி அத்தோ²தி ஆஹ ‘‘மிஸ்ஸிதா’’தி. ‘‘அவிஜ்ஜாபி⁴பூ⁴தா…பே॰… அபி⁴னிவிஸந்தா’’தி ஏதேன அவிஜ்ஜாய அயாதா²வக³ஹணஹேதுதங் த³ஸ்ஸேதி, ததோ ஸோ அவிந்தி³யங் விந்த³தீதி அவிஜ்ஜாதி வுச்சதி. கிலிஸ்ஸனங் உபதாபனந்தி ஆஹ ‘‘கிலிஸ்ஸனப்பயோக³ங் அத்தபரிதாபனபடிபத்தி’’ந்தி. அல்லீயனங் ஸேவனங்.
‘‘Saṃyuttā’’ti padassa sampayuttāti atthoti āha ‘‘missitā’’ti. ‘‘Avijjābhibhūtā…pe… abhinivisantā’’ti etena avijjāya ayāthāvagahaṇahetutaṃ dasseti, tato so avindiyaṃ vindatīti avijjāti vuccati. Kilissanaṃ upatāpananti āha ‘‘kilissanappayogaṃ attaparitāpanapaṭipatti’’nti. Allīyanaṃ sevanaṃ.
து³க்க²ந்தி …பே॰… ஜானந்தீதி அத்தனா அனுபூ⁴யமானங் ததா² ததா² உபட்டி²தங் காயிகசேதஸிகது³க்க²ங், இதரம்பி வா ஏகதே³ஸங் ஜானந்தி. தண்ஹாயபி ஏஸேவ நயோ. ஸபா⁴க³விஸபா⁴க³படிபஜ்ஜிதப்³பா³காரதோ தத்த² தேஸங் ஞாணங் நத்தே²வாதித³ஸ்ஸெந்தோ ‘‘இத³ங் து³க்க²’’ந்திஆதி³மாஹ. பவத்திபவத்திஹேதுமத்தம்பீதி ‘‘பவத்தி பவத்திஹேதூ’’தி எத்தகம்பி. கா பன கதா²தி பசுரஜனஸாதா⁴ரணே லோகியேபி நாம அத்தே² யேஸங் ஞாணஸ்ஸ படிகா⁴தோ, பரமக³ம்பீ⁴ரே அரியானங் ஏவ விஸயபூ⁴தே லோகுத்தரே நிவத்தினிவத்திஹேதுஸங்கா²தே அத்தே² கா நாம கதா², சி²ன்னா கதா²தி அத்தோ². அட்ட²ஸமாபத்திபபே⁴த³ஸ்ஸ கேவலஸ்ஸ ஸமத²ஸ்ஸ தாதி³ஸே காலே பா³ஹிரகானஞ்ச இஜ்ஜ²னதோ ‘‘விபஸ்ஸனாதி⁴ட்டா²ன’’ந்தி விஸேஸிதங். வூபஸமோ ஸமுச்சே²தோ³, படிப்பஸ்ஸத்³தி⁴ ச.
Dukkhanti…pe… jānantīti attanā anubhūyamānaṃ tathā tathā upaṭṭhitaṃ kāyikacetasikadukkhaṃ, itarampi vā ekadesaṃ jānanti. Taṇhāyapi eseva nayo. Sabhāgavisabhāgapaṭipajjitabbākārato tattha tesaṃ ñāṇaṃ natthevātidassento ‘‘idaṃ dukkha’’ntiādimāha. Pavattipavattihetumattampīti ‘‘pavatti pavattihetū’’ti ettakampi. Kā pana kathāti pacurajanasādhāraṇe lokiyepi nāma atthe yesaṃ ñāṇassa paṭighāto, paramagambhīre ariyānaṃ eva visayabhūte lokuttare nivattinivattihetusaṅkhāte atthe kā nāma kathā, chinnā kathāti attho. Aṭṭhasamāpattipabhedassa kevalassa samathassa tādise kāle bāhirakānañca ijjhanato ‘‘vipassanādhiṭṭhāna’’nti visesitaṃ. Vūpasamo samucchedo, paṭippassaddhi ca.
‘‘ஸங்ஸாரஸ்ஸ அனுபச்சே²த³னதோ’’தி இத³ங் தி³ட்டி²க³தானங் தி³ட்டி²க³திகமதத³ஸ்ஸனங். ஸோ ஹி புத்தமுக²த³ஸ்ஸனே அஸதி ஸங்ஸாரோ உச்சி²ஜ்ஜெய்யாதி பா⁴யதி. யதோ வுத்தங் –
‘‘Saṃsārassa anupacchedanato’’ti idaṃ diṭṭhigatānaṃ diṭṭhigatikamatadassanaṃ. So hi puttamukhadassane asati saṃsāro ucchijjeyyāti bhāyati. Yato vuttaṃ –
‘‘க³ண்டு³ப்பாதோ³ கிகீ சேவ, குந்தீ ப்³ராஹ்மணத⁴ம்மிகோ;
‘‘Gaṇḍuppādo kikī ceva, kuntī brāhmaṇadhammiko;
ஏதே அப⁴யங் பா⁴யந்தி, ஸம்மூள்ஹா சதுரோ ஜனா’’தி. (ஸு॰ நி॰ அட்ட²॰ 2.293; அ॰ நி॰ டீ॰ 3.5.192);
Ete abhayaṃ bhāyanti, sammūḷhā caturo janā’’ti. (su. ni. aṭṭha. 2.293; a. ni. ṭī. 3.5.192);
தத³பி⁴ஞ்ஞாதி தங் யதா²வுத்தஅந்தத்³வயங் அபி⁴ஜானந்தி கு³ணங் ஆரோபெத்வா ஜானந்தீதி தத³பி⁴ஞ்ஞா. அத்த²ப⁴ஞ்ஜனதோ, ரோக³க³ண்ட³ஸல்லஸதி³ஸதாய அத்தபா⁴வஸங்கிலேஸானஞ்ச ரோக³க³ண்ட³ஸல்லதா.
Tadabhiññāti taṃ yathāvuttaantadvayaṃ abhijānanti guṇaṃ āropetvā jānantīti tadabhiññā. Atthabhañjanato, rogagaṇḍasallasadisatāya attabhāvasaṃkilesānañca rogagaṇḍasallatā.
ஸக்காயத³ஸ்ஸனேதி எத்த² தி³ட்டி²த³ஸ்ஸனங், ஸக்காயோவ த³ஸ்ஸனங் ஸக்காயத³ஸ்ஸனந்தி அத்தோ² வேதி³தப்³போ³. தேஸந்தி தி³ட்டி²சரிதானங். அத்தாபி⁴னிவேஸோ ப³லவா. தஸ்மா யதா²உபட்டி²தங் ரூபங் ‘‘அத்தா’’இச்சேவ க³ண்ஹந்தீதி அதி⁴ப்பாயோ. ததா² வேத³னாதி³ங். தண்ஹாசரிதோ பன யதா²உபட்டி²தங் ரூபங் தண்ஹாவத்து²ங் கத்வா அத்தனியாபி⁴னிவேஸேன அபி⁴னிவிஸந்தா தத³ஞ்ஞமேவ அத்ததோ ஸமனுபஸ்ஸந்தி. ஏவங் வேத³னாதீ³ஸு. தேனாஹ ‘‘தண்ஹாசரிதா’’திஆதி³. விஜ்ஜமானேதி பரமத்த²தோ உபலப்³ப⁴மானே. காயேதி ஸமூஹே. தி³ட்டி²யா பரிகப்பிதோ அத்தாதி³ ஏவ பரமத்த²தோ நுபலப்³ப⁴தி, தி³ட்டி² பன லப்³ப⁴தேவாதி ஆஹ ‘‘ஸதீ வா விஜ்ஜமானா’’தி.
Sakkāyadassaneti ettha diṭṭhidassanaṃ, sakkāyova dassanaṃ sakkāyadassananti attho veditabbo. Tesanti diṭṭhicaritānaṃ. Attābhiniveso balavā. Tasmā yathāupaṭṭhitaṃ rūpaṃ ‘‘attā’’icceva gaṇhantīti adhippāyo. Tathā vedanādiṃ. Taṇhācarito pana yathāupaṭṭhitaṃ rūpaṃ taṇhāvatthuṃ katvā attaniyābhinivesena abhinivisantā tadaññameva attato samanupassanti. Evaṃ vedanādīsu. Tenāha ‘‘taṇhācaritā’’tiādi. Vijjamāneti paramatthato upalabbhamāne. Kāyeti samūhe. Diṭṭhiyā parikappito attādi eva paramatthato nupalabbhati, diṭṭhi pana labbhatevāti āha ‘‘satī vā vijjamānā’’ti.
ஸக்காயத³ஸ்ஸனமுகே²னாதி ஸக்காயதி³ட்டி²முகே²ன.
Sakkāyadassanamukhenāti sakkāyadiṭṭhimukhena.
உச்சே²த³ஸஸ்ஸதந்தி தங்ஸஹசரணதோ உச்சே²த³ஸஸ்ஸததி³ட்டி² வுத்தா. ‘‘உச்சே²த³ஸஸ்ஸதவாதா³’’திபி பாடோ².
Ucchedasassatanti taṃsahacaraṇato ucchedasassatadiṭṭhi vuttā. ‘‘Ucchedasassatavādā’’tipi pāṭho.
கஸிணாயதனானீதி கஸிணஜ்ஜா²னானி.
Kasiṇāyatanānīti kasiṇajjhānāni.
தேஜெத்வாதி நிஸானெத்வா.
Tejetvāti nisānetvā.
81. எத்தாவதா நந்தி³யாவட்டஸ்ஸ பூ⁴மிரசனவஸேன ஸங்கிலேஸபக்கோ² த³ஸ்ஸிதோதி ஆஹ ‘‘தத்த² தி³ட்டி²சரிதோதிஆதி³னா வோதா³னபக்க²ங் த³ஸ்ஸேதீ’’தி. ‘‘யஸ்மா ஸல்லேகே² திப்³ப³கா³ரவோ’’தி இமினா தத்த² திப்³ப³கா³ரவத்தா ஸங்லேகா²னுஸந்ததவுத்தினா ப⁴வதீதி த³ஸ்ஸேதி. ஸேஸேஸுபி ஏஸேவ நயோ. மிச்சா²தி⁴மொக்கோ² ஸத்³தா⁴பதிரூபகோ அவத்து²ஸ்மிங் பஸாதோ³.
81. Ettāvatā nandiyāvaṭṭassa bhūmiracanavasena saṃkilesapakkho dassitoti āha ‘‘tattha diṭṭhicaritotiādinā vodānapakkhaṃ dassetī’’ti. ‘‘Yasmā sallekhe tibbagāravo’’ti iminā tattha tibbagāravattā saṃlekhānusantatavuttinā bhavatīti dasseti. Sesesupi eseva nayo. Micchādhimokkho saddhāpatirūpako avatthusmiṃ pasādo.
புக்³க³லாதி⁴ட்டா²னேன த⁴ம்மமேவ விப⁴ஜதீதி ஆஹ ‘‘ஸத்தாபி…பே॰… த³ஸ்ஸேதீ’’தி.
Puggalādhiṭṭhānena dhammameva vibhajatīti āha ‘‘sattāpi…pe… dassetī’’ti.
யே ஹி கேசீதி எத்த² ஹி-ஸத்³தோ³ நிபாதமத்தங். ‘‘இமாஹி ஏவ சதூஹி படிபதா³ஹீ’’திபி பாளி. து³க்கா²படிபதா³தி³விபா⁴கே³ன மக்³கோ³ ஏவ இத⁴ வுத்தோதி ஆஹ ‘‘படிபதா³ ஹி மக்³கோ³’’தி சதுத்³தி³ஸாஸங்கா²தங் மக்³க³ந்தி சதுத்³தி³ஸாஸங்கா²தங் பவத்தனுபாயங். த்³வே தி³ஸா ஏதிஸ்ஸாதி த்³விதி³ஸா. நந்தி³யாவட்டஸ்ஸாதி நந்தி³யாவட்டனயஸ்ஸ.
Ye hi kecīti ettha hi-saddo nipātamattaṃ. ‘‘Imāhi eva catūhi paṭipadāhī’’tipi pāḷi. Dukkhāpaṭipadādivibhāgena maggo eva idha vuttoti āha ‘‘paṭipadā hi maggo’’ti catuddisāsaṅkhātaṃ magganti catuddisāsaṅkhātaṃ pavattanupāyaṃ. Dve disā etissāti dvidisā. Nandiyāvaṭṭassāti nandiyāvaṭṭanayassa.
82. விவத்ததி வட்டங் எத்தா²தி விவத்தங், விவத்தங் ஏவ விவட்டங், அஸங்க²ததா⁴து, நிப்³பு³தி ஏவ வா. தேன வுத்தங் ‘‘நிப்³பா³ன’’ந்தி.
82. Vivattati vaṭṭaṃ etthāti vivattaṃ, vivattaṃ eva vivaṭṭaṃ, asaṅkhatadhātu, nibbuti eva vā. Tena vuttaṃ ‘‘nibbāna’’nti.
‘‘கத்த² த³ட்ட²ப்³ப³’’ந்தி வா பாளி. உபசயேதி உபசயாவத்தா²யந்தி அத்தோ². த³ஸன்னந்தி லோபா⁴தி³கிலேஸவத்தூ²னங். விபல்லாஸஹேதுபா⁴வதோதி ஸுப⁴ஸஞ்ஞாதி³விபல்லாஸஹேதுகபா⁴வதோ. விபரியேஸக்³கா³ஹவஸேன ஹி ஆதீ³னவேஸு ஏவ ஸங்யோஜனியேஸு த⁴ம்மேஸு அஸ்ஸாதா³னுபஸ்ஸிதா. ந ஹி யதா²பூ⁴தஞாணே ஸதி ததா² ஸம்ப⁴வோ. தேன வுத்தங் ‘‘த³ஸன்னங்…பே॰… பா⁴வதோ’’தி. த³ஸவித⁴காரணேதி த³ஸவிதே⁴ காரணே, த³ஸவித⁴ஸ்ஸ வா காரணே. அயோனிஸோமனஸிகாரபரிக்க²தா த⁴ம்மா ஸுபா⁴ரம்மணாத³யோ.
‘‘Katthadaṭṭhabba’’nti vā pāḷi. Upacayeti upacayāvatthāyanti attho. Dasannanti lobhādikilesavatthūnaṃ. Vipallāsahetubhāvatoti subhasaññādivipallāsahetukabhāvato. Vipariyesaggāhavasena hi ādīnavesu eva saṃyojaniyesu dhammesu assādānupassitā. Na hi yathābhūtañāṇe sati tathā sambhavo. Tena vuttaṃ ‘‘dasannaṃ…pe… bhāvato’’ti. Dasavidhakāraṇeti dasavidhe kāraṇe, dasavidhassa vā kāraṇe. Ayonisomanasikāraparikkhatā dhammā subhārammaṇādayo.
தப்³பி³ஸயா கிலேஸாதி ஆஹாரபரிஞ்ஞாபரிப³ந்த⁴பூ⁴தா கிலேஸா. விஞ்ஞாணட்டி²தீஸுபி ஏஸேவ நயோ. காயே பவத்தமானோ பட²மோ விபல்லாஸோ காயஸமுதா³யே, காயேகதே³ஸே ச கப³ளீகாரே ஆஹாரே பவத்தோ ஏவ ஹோதீதி வுத்தங் ‘‘பட²மே ஆஹாரே விஸயபூ⁴தே பட²மோ விபல்லாஸோ பவத்ததீ’’தி. ததா² வேத³னாயங் பவத்தமானோ து³தியவிபல்லாஸோ தப்பச்சயே ப²ஸ்ஸாஹாரே, சித்தே பவத்தமானோ ததியவிபல்லாஸோ தப்பச்சயே மனோஸஞ்சேதனாஹாரே, த⁴ம்மேஸு பவத்தமானோ சதுத்த²விபல்லாஸோ தப்பச்சயே விஞ்ஞாணாஹாரே பவத்தோ ஏவ ஹோதீதி வுத்தங் ‘‘சதுத்தே² ஆஹாரே சதுத்தோ² விபல்லாஸோ’’தி. தேனாஹ ‘‘ஸேஸாஹாரேஸுபி ஏஸேவ நயோ’’தி. ஆஹாரஸீஸேன வா ஆஹாரபடிப³த்³தோ⁴ ச²ந்த³ராகோ³ க³ஹிதோ. விஞ்ஞாணட்டி²தீஸுபி ஏஸேவ நயோ. தேனேவாஹ ‘‘ஆஹாரஸீஸேன தப்³பி³ஸயா கிலேஸா அதி⁴ப்பேதா’’தி. பட²மே ஆஹாரே விஸயபூ⁴தேதி ச பட²மே ஆஹாரே ச²ந்த³ராக³ஸ்ஸ விஸயபா⁴வங் பத்தே, தப்³பா⁴வங் அனதிக்கந்தேதி அத்தோ². அப்பஹீனச்ச²ந்த³ராக³ஸ்ஸ ஹி தத்த² விபல்லாஸா ஸம்ப⁴வந்தி, ந இதரஸ்ஸ. ததா² து³தியவிபல்லாஸாதீ³ஸு அப்பஹீனேஸு. இதரே உபாதா³னானி பவத்தந்தேவ அப்பஹீனத்தாதி ஆஹ ‘‘ஸேஸபதே³ஸுபி ஏஸேவ நயோ’’தி. யஸ்மா ச உபாதா³னாதீ³ஸு அப்பஹீனேஸுபி யோகா³த³யோ பவத்தந்தேவ யதா²ரஹங் தங்ஸபா⁴வத்தா, ததே³கட்ட²ஸபா⁴வதோ ச, தஸ்மா வுத்தங் பாளியங் ‘‘பட²மே உபாதா³னே பட²மோ யோகோ³’’திஆதி³. தேனாஹ ‘‘ஸேஸபதே³ஸுபி ஏஸேவ நயோ’’தி.
Tabbisayā kilesāti āhārapariññāparibandhabhūtā kilesā. Viññāṇaṭṭhitīsupi eseva nayo. Kāye pavattamāno paṭhamo vipallāso kāyasamudāye, kāyekadese ca kabaḷīkāre āhāre pavatto eva hotīti vuttaṃ ‘‘paṭhame āhāre visayabhūte paṭhamo vipallāsopavattatī’’ti. Tathā vedanāyaṃ pavattamāno dutiyavipallāso tappaccaye phassāhāre, citte pavattamāno tatiyavipallāso tappaccaye manosañcetanāhāre, dhammesu pavattamāno catutthavipallāso tappaccaye viññāṇāhāre pavatto eva hotīti vuttaṃ ‘‘catutthe āhāre catuttho vipallāso’’ti. Tenāha ‘‘sesāhāresupi eseva nayo’’ti. Āhārasīsena vā āhārapaṭibaddho chandarāgo gahito. Viññāṇaṭṭhitīsupi eseva nayo. Tenevāha ‘‘āhārasīsena tabbisayā kilesā adhippetā’’ti. Paṭhame āhāre visayabhūteti ca paṭhame āhāre chandarāgassa visayabhāvaṃ patte, tabbhāvaṃ anatikkanteti attho. Appahīnacchandarāgassa hi tattha vipallāsā sambhavanti, na itarassa. Tathā dutiyavipallāsādīsu appahīnesu. Itare upādānāni pavattanteva appahīnattāti āha ‘‘sesapadesupi eseva nayo’’ti. Yasmā ca upādānādīsu appahīnesupi yogādayo pavattanteva yathārahaṃ taṃsabhāvattā, tadekaṭṭhasabhāvato ca, tasmā vuttaṃ pāḷiyaṃ ‘‘paṭhame upādāne paṭhamo yogo’’tiādi. Tenāha ‘‘sesapadesupi eseva nayo’’ti.
83. அபரிஜானந்தஸ்ஸாதி ஞாதபரிஞ்ஞாய, தீரணபரிஞ்ஞாய, பஹானபரிஞ்ஞாயாதி தீஹி பரிஞ்ஞாஹி பரிச்சி²ந்தி³த்வா அஜானந்தஸ்ஸ, தேஸங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் அனவபு³ஜ்ஜ²ந்தஸ்ஸாதி அத்தோ². திப்³போ³ ப³ஹலோ ச²ந்த³ராகோ³ ஹோதி தண்ஹாசரிதபா⁴வதோதி அதி⁴ப்பாயோ. இதி உபக்கிலேஸஸ்ஸ தி³ட்டா²பி⁴னிவேஸஸ்ஸ ஹேதுபா⁴வதோதி இமமத்த²ங் ஸந்தா⁴யாஹ ‘‘வுத்தனயேனேவா’’தி. ஸுப⁴ஸுக²ஸஞ்ஞாகாமுபாதா³னகாமப⁴வயோக³அபி⁴ஜ்ஜா²காயக³ந்த²காமப⁴வாஸவ- காமப⁴வோக⁴ராக³ஸல்லச²ந்தா³க³திக³மனானி தண்ஹாபக்கி²கதாய, தண்ஹாஸபா⁴வதாய ச தண்ஹாபதா⁴னானி. ஸீலப்³ப³துபாதா³னப்³யாபாத³காயக³ந்த²தோ³ஸஸல்லதோ³ஸாக³திக³மனானி பன தண்ஹாபா⁴வே பா⁴வதோ , விஞ்ஞாணட்டி²தியோ தண்ஹாவிஸயதோ, ஸப்³பே³ஸங் வா தண்ஹாவிஸயதோ தண்ஹாபதா⁴னதா லப்³ப⁴தேவ. பச்சி²மகானங் தி³ட்டி²பதா⁴னதா வுத்தனயானுஸாரேன வேதி³தப்³பா³.
83.Aparijānantassāti ñātapariññāya, tīraṇapariññāya, pahānapariññāyāti tīhi pariññāhi paricchinditvā ajānantassa, tesaṃ samudayañca atthaṅgamañca assādañca ādīnavañca nissaraṇañca yathābhūtaṃ anavabujjhantassāti attho. Tibbo bahalo chandarāgo hoti taṇhācaritabhāvatoti adhippāyo. Iti upakkilesassa diṭṭhābhinivesassa hetubhāvatoti imamatthaṃ sandhāyāha ‘‘vuttanayenevā’’ti. Subhasukhasaññākāmupādānakāmabhavayogaabhijjhākāyaganthakāmabhavāsava- kāmabhavogharāgasallachandāgatigamanāni taṇhāpakkhikatāya, taṇhāsabhāvatāya ca taṇhāpadhānāni. Sīlabbatupādānabyāpādakāyaganthadosasalladosāgatigamanāni pana taṇhābhāve bhāvato , viññāṇaṭṭhitiyo taṇhāvisayato, sabbesaṃ vā taṇhāvisayato taṇhāpadhānatā labbhateva. Pacchimakānaṃ diṭṭhipadhānatā vuttanayānusārena veditabbā.
84. கப³ளீகாரே ஆஹாரேதி கப³ளீகாராஹாரவிஸயே ச²ந்த³ராகே³. ‘‘அப்பஹீனே’’திஆதி³கங் பரியாயகத²ங் முஞ்சித்வா நிப்பரியாயமேவ த³ஸ்ஸெந்தோ கப³ளீகாராஹாரஸ்ஸ ‘‘அஸுப⁴ஸபா⁴வத்தா, அஸுப⁴ஸமுட்டா²னத்தா சா’’தி வுத்தங். லப்³ப⁴மானே ஹி உஜுகே அத்தே² கிங் பரியாயகதா²யாதி. ச²ந்த³ராகோ³ வா தத்த² அத்த²ஸித்³தோ⁴தி ஏவம்பெத்த² அத்தோ² வுத்தோ. ந ஹி தத்த² அஸதி ச²ந்த³ராகே³ விபல்லாஸோ ஸம்ப⁴வதி. து³க்க²ஸபா⁴வத்தாதி ஸங்கா²ரது³க்க²தாய து³க்க²ஸபா⁴வத்தா. து³க்க²பச்சயத்தாதி திவித⁴து³க்க²தாலக்க²ணஸ்ஸ து³க்க²ஸ்ஸ காரணதோ. விஞ்ஞாணே நிச்சஸஞ்ஞினோ. ததா² ஹி ஸாதி நாம பி⁴க்கு² கேவட்டபுத்தோ ‘‘தங்யேவ விஞ்ஞாணங் ஸந்தா⁴வதி ஸங்ஸரதீ’’தி தத்த² நிச்சாபி⁴னிவேஸங் ஸங்வேதே³ஸி. யேபு⁴ய்யேன ஸங்கா²ரேஸு அத்தஸஞ்ஞிதா தி³ட்டி²க³திகானங் ‘‘சேதனா அத்தா’’திஆதி³தி³ட்டி²பரிதீ³பனேஸு வேதி³தப்³பா³. ‘‘ப⁴வவிஸுத்³தீ⁴’’தி பத³ஸ்ஸ அத்த²வசனங் ‘‘நிப்³பு³திஸுக²’’ந்தி. ‘‘ஸீலப்³ப³தேஹி…பே॰… ஸுக²ந்தி த³ள்ஹங் க³ண்ஹாதீ’’தி இமினா ஸீலப்³ப³துபாதா³னங் இத⁴ ப⁴வுபாதா³னந்தி த³ஸ்ஸேதி. ததா² ஹி வக்க²தி ‘‘ஸீலப்³ப³துபாதா³னஸங்கா²தேன ப⁴வுபாதா³னேனா’’தி.
84.Kabaḷīkāre āhāreti kabaḷīkārāhāravisaye chandarāge. ‘‘Appahīne’’tiādikaṃ pariyāyakathaṃ muñcitvā nippariyāyameva dassento kabaḷīkārāhārassa ‘‘asubhasabhāvattā, asubhasamuṭṭhānattā cā’’ti vuttaṃ. Labbhamāne hi ujuke atthe kiṃ pariyāyakathāyāti. Chandarāgo vā tattha atthasiddhoti evampettha attho vutto. Na hi tattha asati chandarāge vipallāso sambhavati. Dukkhasabhāvattāti saṅkhāradukkhatāya dukkhasabhāvattā. Dukkhapaccayattāti tividhadukkhatālakkhaṇassa dukkhassa kāraṇato. Viññāṇe niccasaññino. Tathā hi sāti nāma bhikkhu kevaṭṭaputto ‘‘taṃyeva viññāṇaṃ sandhāvati saṃsaratī’’ti tattha niccābhinivesaṃ saṃvedesi. Yebhuyyena saṅkhāresu attasaññitā diṭṭhigatikānaṃ ‘‘cetanā attā’’tiādidiṭṭhiparidīpanesu veditabbā. ‘‘Bhavavisuddhī’’ti padassa atthavacanaṃ ‘‘nibbutisukha’’nti. ‘‘Sīlabbatehi…pe… sukhanti daḷhaṃ gaṇhātī’’ti iminā sīlabbatupādānaṃ idha bhavupādānanti dasseti. Tathā hi vakkhati ‘‘sīlabbatupādānasaṅkhātena bhavupādānenā’’ti.
பச்சயா ஹொந்தி உபனிஸ்ஸயபச்சயாதி³னா. பட²மே யோகே³ டி²தோதி பட²மே யோகே³ பதிட்டி²தோ. அப்பஹீனா ஹி கிலேஸா கம்மவட்டாதீ³னங் காரணபூ⁴தா தங்ஸமங்கி³னோ ஸத்தஸ்ஸ பதிட்டா²தி வுச்சந்தி. பரஸ்ஸ அபி⁴ஜ்ஜா²யனங் பராபி⁴ஜ்ஜா²யனங். ப⁴வபத்த²னாய ப⁴வதி³ட்டி²ப⁴வராக³வஸேன பியாயிதஸ்ஸ வத்து²னோ விபரிணாமஞ்ஞதா²பா⁴வே தோ³மனஸ்ஸுப்பத்திங் ஸந்தா⁴ய வுத்தங் ‘‘ப⁴வராக³…பே॰… பதூ³ஸெந்தீ’’தி.
Paccayā honti upanissayapaccayādinā. Paṭhame yoge ṭhitoti paṭhame yoge patiṭṭhito. Appahīnā hi kilesā kammavaṭṭādīnaṃ kāraṇabhūtā taṃsamaṅgino sattassa patiṭṭhāti vuccanti. Parassa abhijjhāyanaṃ parābhijjhāyanaṃ. Bhavapatthanāya bhavadiṭṭhibhavarāgavasena piyāyitassa vatthuno vipariṇāmaññathābhāve domanassuppattiṃ sandhāya vuttaṃ ‘‘bhavarāga…pe… padūsentī’’ti.
க³ந்தி²த்வாதி க³ந்தி²ங் கத்வா. த்³விதா⁴பூ⁴தங் ரஜ்ஜுஆதி³கே விய க³ந்தி²கரணஞ்ஹி க³ந்த²னங். சித்தங் பரியாதா³ய திட்ட²ந்தா ஆஸவானங் உப்பத்திஹேது ஹொந்தீதி ஸம்ப³ந்தோ⁴. பரியுட்டா²னப்பத்தா ஏகச்சே கிலேஸா விஸேஸதோ ஆஸவுப்பத்திஹேது ஹொந்தீதி த³ஸ்ஸனத்த²ங் அட்ட²கதா²யங் உப்படிபாடிவசனங். தப்படிபக்கே² விஸயே பத்தே²தீதி யோஜனா. தப்³பி³ஸயப³ஹுலே ப⁴வே பத்தே²தீதி யதா² மானுஸகேஹி காமேஹி நிப்³பி³ன்னரூபா தே³வூபபத்தி. தங்ஸபா⁴வத்தாதி தி³ட்டி²ஸபா⁴வத்தா. அபராபரந்தி அஞ்ஞமஞ்ஞங். ஏகச்சா ஹி தி³ட்டி² ஏகச்சஸ்ஸ தி³ட்டா²பி⁴னிவேஸஸ்ஸ காரணங் ஹோதி, யதா² ஸக்காயதி³ட்டி² இதராஸங். அபி⁴னிவிஸந்தஸ்ஸாதி அபி⁴னிவேஸனஹேது. ‘‘அயோனிஸோமனஸிகாரதோ…பே॰… அவிஜ்ஜாஸவோ உப்பஜ்ஜதீ’’தி இத³ங் ஸச்சாபி⁴னிவேஸஸ்ஸ ப²லபூ⁴தங் அவிஜ்ஜாஸவங் த³ஸ்ஸேதி ஏகந்தவஸ்ஸிமேக⁴வுட்டா²னேன விய மஹோக⁴ப்பவத்தி. அவிஜ்ஜாஸவோ ஸித்³தோ⁴ ஹோதி வுட்டி²ஹேதுகமஹோக⁴ஸித்³தி⁴யா உபரிமேக⁴வுட்டா²னங் விய.
Ganthitvāti ganthiṃ katvā. Dvidhābhūtaṃ rajjuādike viya ganthikaraṇañhi ganthanaṃ. Cittaṃ pariyādāya tiṭṭhantā āsavānaṃ uppattihetu hontīti sambandho. Pariyuṭṭhānappattā ekacce kilesā visesato āsavuppattihetu hontīti dassanatthaṃ aṭṭhakathāyaṃ uppaṭipāṭivacanaṃ. Tappaṭipakkhe visaye patthetīti yojanā. Tabbisayabahule bhave patthetīti yathā mānusakehi kāmehi nibbinnarūpā devūpapatti. Taṃsabhāvattāti diṭṭhisabhāvattā. Aparāparanti aññamaññaṃ. Ekaccā hi diṭṭhi ekaccassa diṭṭhābhinivesassa kāraṇaṃ hoti, yathā sakkāyadiṭṭhi itarāsaṃ. Abhinivisantassāti abhinivesanahetu. ‘‘Ayonisomanasikārato…pe… avijjāsavo uppajjatī’’ti idaṃ saccābhinivesassa phalabhūtaṃ avijjāsavaṃ dasseti ekantavassimeghavuṭṭhānena viya mahoghappavatti. Avijjāsavo siddho hoti vuṭṭhihetukamahoghasiddhiyā uparimeghavuṭṭhānaṃ viya.
‘‘நந்தீ³ராக³ஸஹக³தா’’திஆதீ³ஸு (மஹாவ॰ 14) விய தப்³பா⁴வத்தோ² ஸஹக³தஸத்³தோ³தி ஆஹ ‘‘அனுஸய…பே॰… பூ⁴தா வா’’தி. சித்தஸ்ஸ அப்³ப⁴ந்தரஸங்கா²தங் ஹத³யந்தி விபாகசித்தப்பவத்திங் ஸந்தா⁴ய வத³தி. விபாகவட்டேபி கிலேஸவாஸனாஹிதா அத்தி² காசி விஸேஸமத்தா.
‘‘Nandīrāgasahagatā’’tiādīsu (mahāva. 14) viya tabbhāvattho sahagatasaddoti āha ‘‘anusaya…pe… bhūtā vā’’ti. Cittassa abbhantarasaṅkhātaṃ hadayanti vipākacittappavattiṃ sandhāya vadati. Vipākavaṭṭepi kilesavāsanāhitā atthi kāci visesamattā.
லோப⁴ஸஹக³தஸ்ஸ விஞ்ஞாணஸ்ஸ. இதரஸ்ஸ தோ³ஸஸஹக³தாதி³கஸ்ஸ. ப்³யஞ்ஜனேன விய போ⁴ஜனஸ்ஸ ஆரம்மணஸ்ஸ அபி⁴ஸங்க²ரணங் விஸேஸாபாத³னங் உபஸேசனங், நந்தீ³ ஸப்பீதிகதண்ஹா உபஸேசனங் ஏதஸ்ஸாதி நந்தூ³பஸேசனங் உபஸேசனபூ⁴தாயபி நந்தி³யா ராக³ஸல்லஉபனிஸதோ. உபஸித்தே பன வத்தப்³ப³மேவ நத்தீ²தி த³ஸ்ஸேதுங் பாளியா ‘‘ராக³ஸல்லேன நந்தூ³பஸேசனேன விஞ்ஞாணேனா’’தி வுத்தந்தி தமத்த²ங் பாகடங் காதுங் ‘‘கேன பன தங் நந்தூ³பஸேசன’’ந்தி புச்ச²தி.
Lobhasahagatassa viññāṇassa. Itarassa dosasahagatādikassa. Byañjanena viya bhojanassa ārammaṇassa abhisaṅkharaṇaṃ visesāpādanaṃ upasecanaṃ, nandī sappītikataṇhā upasecanaṃ etassāti nandūpasecanaṃ upasecanabhūtāyapi nandiyā rāgasallaupanisato. Upasitte pana vattabbameva natthīti dassetuṃ pāḷiyā ‘‘rāgasallena nandūpasecanena viññāṇenā’’ti vuttanti tamatthaṃ pākaṭaṃ kātuṃ ‘‘kena pana taṃ nandūpasecana’’nti pucchati.
ராக³ஸல்லேனாதி ஹேதும்ஹி கரணவசனந்தி த³ஸ்ஸெந்தோ ‘‘ராக³ஸல்லேன ஹேதுபூ⁴தேனா’’தி ஆஹ. உபனிஸ்ஸயபச்சயத்தோ² செத்த² ஹெத்வத்தோ². உபக³ந்தப்³ப³தோ விஞ்ஞாணேனாதி விப⁴த்திங் பரிணாமெத்வா யோஜேதப்³ப³ங். ‘‘பதிட்டா²பா⁴வதோ’’தி இமினா விஞ்ஞாணஸ்ஸ நிஸ்ஸயாதி³பச்சயதங் வத³தி. தேனாஹ ‘‘ரூபக்க²ந்த⁴ங் நிஸ்ஸாய திட்ட²தீ’’தி. ஏவங் து³தியாதி³விஞ்ஞாணட்டி²தீஸுபி நிஸ்ஸயாதி³பச்சயதா வத்தப்³பா³ பதிட்டா²வசனதோ.
Rāgasallenāti hetumhi karaṇavacananti dassento ‘‘rāgasallena hetubhūtenā’’ti āha. Upanissayapaccayattho cettha hetvattho. Upagantabbato viññāṇenāti vibhattiṃ pariṇāmetvā yojetabbaṃ. ‘‘Patiṭṭhābhāvato’’ti iminā viññāṇassa nissayādipaccayataṃ vadati. Tenāha ‘‘rūpakkhandhaṃ nissāya tiṭṭhatī’’ti. Evaṃ dutiyādiviññāṇaṭṭhitīsupi nissayādipaccayatā vattabbā patiṭṭhāvacanato.
85. யதி³பி அகுஸலமூலாதி³கே திபுக்க²லஸ்ஸ, தண்ஹாதி³கே நந்தி³யாவட்டஸ்ஸ தி³ஸாபா⁴வேன வக்க²தி, ததா²பி அஞ்ஞமஞ்ஞானுப்பவேஸதோ ஏகஸ்மிங் நயே ஸித்³தே⁴ இதரேபி ஸித்³தா⁴ ஏவ ஹொந்தீதி இமஸ்ஸ விஸேஸஸ்ஸ த³ஸ்ஸனத்த²ங் ‘‘ஆஹாராத³யோ…பே॰… வவத்த²பேது’’ந்தி வுத்தங். வக்க²மானே வா அகுஸலமூலதண்ஹாதி³கே ஆதி³ஸத்³தே³ன ஸங்க³ஹெத்வா ‘‘ஆஹாராத³யோ’’தி வத³ந்தோ ‘‘நயான’’ந்தி ப³ஹுவசனமாஹ. ஏகஸ்ஸ அத்த²ஸ்ஸாதி ராக³சரிதஸ்ஸ உபக்கிலேஸதாஸங்கா²தஸ்ஸ ஏகஸ்ஸ பயோஜனஸ்ஸ. ப்³யஞ்ஜனத்தோ²பி க³ஹிதோ, ந ப்³யஞ்ஜனமேவ க³ஹிதந்தி ஸுத்தபதா³னி அஞ்ஞமஞ்ஞபரியாயவசனானி யதா²ரஹங் தண்ஹாவத்தூ²னங் தத்த² கதி²தத்தா வுத்தங் ‘‘ஸவத்து²கா தண்ஹா வுத்தா’’தி. தோ³ஸவத்தூ²னங், தி³ட்டி²வத்தூ²னஞ்ச தத்த² கதி²தத்தா ‘‘ஸவத்து²கோ தோ³ஸோ, ஸவத்து²கா தி³ட்டி² ச வுத்தா’’தி இமமத்த²ங் ஸந்தா⁴யாஹ ‘‘வுத்தனயானுஸாரேனா’’தி.
85. Yadipi akusalamūlādike tipukkhalassa, taṇhādike nandiyāvaṭṭassa disābhāvena vakkhati, tathāpi aññamaññānuppavesato ekasmiṃ naye siddhe itarepi siddhā eva hontīti imassa visesassa dassanatthaṃ ‘‘āhārādayo…pe… vavatthapetu’’nti vuttaṃ. Vakkhamāne vā akusalamūlataṇhādike ādisaddena saṅgahetvā ‘‘āhārādayo’’ti vadanto ‘‘nayāna’’nti bahuvacanamāha. Ekassa atthassāti rāgacaritassa upakkilesatāsaṅkhātassa ekassa payojanassa. Byañjanatthopi gahito, na byañjanameva gahitanti suttapadāni aññamaññapariyāyavacanāni yathārahaṃ taṇhāvatthūnaṃ tattha kathitattā vuttaṃ ‘‘savatthukā taṇhā vuttā’’ti. Dosavatthūnaṃ, diṭṭhivatthūnañca tattha kathitattā ‘‘savatthuko doso, savatthukā diṭṭhi ca vuttā’’ti imamatthaṃ sandhāyāha ‘‘vuttanayānusārenā’’ti.
து³க்கா²காரேன ஸஹ து³க்கா²காரங் க³ஹெத்வாதி அத்தோ². ஏவஞ்சேதந்தி யதி³ தங்தங்அனுபஸ்ஸனாப³ஹுலஸ்ஸ வஸேன புரிமாஹாரத்³வயாதீ³ஸு விமொக்க²முக²விஸேஸனித்³தா⁴ரணங் கதங், ஏதங் ஏவமேவ வேதி³தப்³ப³ங், ந அஞ்ஞதா². தத்த² காரணங் வத³ந்தோ ‘‘ந ஹீ’’திஆதி³மாஹ. தஸ்ஸத்தோ² – யதா² அரியமக்³கா³னங் ஓதி⁴ஸோ கிலேஸப்பஜஹனதோ பஹாதப்³பே³ஸு த⁴ம்மேஸு நியமோ அத்தி², ந ஏவங் விபஸ்ஸனாய பரிஞ்ஞாபஹானானங் அனிச்சந்திகத்தாதி.
Dukkhākārena saha dukkhākāraṃ gahetvāti attho. Evañcetanti yadi taṃtaṃanupassanābahulassa vasena purimāhāradvayādīsu vimokkhamukhavisesaniddhāraṇaṃ kataṃ, etaṃ evameva veditabbaṃ, na aññathā. Tattha kāraṇaṃ vadanto ‘‘na hī’’tiādimāha. Tassattho – yathā ariyamaggānaṃ odhiso kilesappajahanato pahātabbesu dhammesu niyamo atthi, na evaṃ vipassanāya pariññāpahānānaṃ aniccantikattāti.
அபரே பனாஹு – புரிமே ஆஹாரத்³வயே பரிகிலேஸபா⁴வேன, து³க்க²பச்சயத்தா ச து³க்க²லக்க²ணங் ஸுபாகடங். தத்த² புரிமே விஞ்ஞாணட்டி²தித்³வயவிஞ்ஞாணாஹாரே ததியவிஞ்ஞாணட்டி²தியங் அனிச்சலக்க²ணங், மனோஸஞ்சேதனாஹாரே சதுத்த²விஞ்ஞாணட்டி²தியங் அனத்தலக்க²ணங் ஸுபாகடந்தி திஸ்ஸன்னங் அனுபஸ்ஸனானங் பவத்திமுக²தாய தேஹி அப்பணிஹிதாதி³விமொக்க²முகே²ஹி பரிஞ்ஞங் க³ச்ச²ந்தீதி. ததா² விபல்லாஸாதீ³ஸு புரிமத்³வயங் து³க்கா²னுபஸ்ஸனாய உஜுவிபச்சனீகங், இதரத்³வயங் அனிச்சானத்தானுபஸ்ஸனானங். இதி பவத்திமுக²தாய ச உஜுவிபச்சனீகதாய ச இமே த⁴ம்மா யதா²ரஹங் அப்பணிஹிதாதி³விமொக்க²முகே²ஹி பரிஞ்ஞெய்யா, பஹாதப்³பா³ ச வுத்தா. தத்த² ஸுப⁴ஸுக²ஸஞ்ஞாகாமுபாதா³னஸீலப்³ப³துபாதா³னகாமயோக³ப⁴வயோக³அபி⁴ஜ்ஜா²காய க³ந்த²காமாஸவகாமோக⁴ ப⁴வோக⁴ ராக³ஸல்லச²ந்த³அக³திக³மனானி ஸுக²ஸ்ஸாத³வஸேன பவத்தனதோ து³க்கா²னுபஸ்ஸனாய படிபக்க²பா⁴வதோ ப்³யாபாத³காயக³ந்த²தோ³ஸஸல்லதோ³ஸஅக³திக³மனானி பவத்திமுக²தாய அப்பணிஹிதவிமொக்க²முகே²ன பஹாதப்³பா³னி. ததியஸஞ்ஞாத³யோ நிச்சாபி⁴னிவேஸதன்னிமித்தாஹி அனிச்சானுபஸ்ஸனாய படிபக்க²பா⁴வதோ அனிமித்தவிமொக்க²முகே²ன பஹாதப்³பா³. சதுத்த²ஸஞ்ஞாத³யோ அத்தாபி⁴னிவேஸதன்னித்தாஹி அனத்தானுபஸ்ஸனாய படிபக்க²பா⁴வதோ ஸுஞ்ஞதவிமொக்க²முகே²ன பஹாதப்³பா³. தத்த² மானஸல்லப⁴யஅக³திக³மனானங் நிச்சாபி⁴னிவேஸனிமித்ததா வேதி³தப்³பா³. ந ஹி அனிச்சதோ பஸ்ஸதோ மானஜப்பனங், ப⁴யங் வா ஸம்ப⁴வதி. அவிஜ்ஜாயோகா³தீ³னங் அத்தாபி⁴னிவேஸனிமித்ததா பாகடா ஏவாதி.
Apare panāhu – purime āhāradvaye parikilesabhāvena, dukkhapaccayattā ca dukkhalakkhaṇaṃ supākaṭaṃ. Tattha purime viññāṇaṭṭhitidvayaviññāṇāhāre tatiyaviññāṇaṭṭhitiyaṃ aniccalakkhaṇaṃ, manosañcetanāhāre catutthaviññāṇaṭṭhitiyaṃ anattalakkhaṇaṃ supākaṭanti tissannaṃ anupassanānaṃ pavattimukhatāya tehi appaṇihitādivimokkhamukhehi pariññaṃ gacchantīti. Tathā vipallāsādīsu purimadvayaṃ dukkhānupassanāya ujuvipaccanīkaṃ, itaradvayaṃ aniccānattānupassanānaṃ. Iti pavattimukhatāya ca ujuvipaccanīkatāya ca ime dhammā yathārahaṃ appaṇihitādivimokkhamukhehi pariññeyyā, pahātabbā ca vuttā. Tattha subhasukhasaññākāmupādānasīlabbatupādānakāmayogabhavayogaabhijjhākāya ganthakāmāsavakāmogha bhavogha rāgasallachandaagatigamanāni sukhassādavasena pavattanato dukkhānupassanāya paṭipakkhabhāvato byāpādakāyaganthadosasalladosaagatigamanāni pavattimukhatāya appaṇihitavimokkhamukhena pahātabbāni. Tatiyasaññādayo niccābhinivesatannimittāhi aniccānupassanāya paṭipakkhabhāvato animittavimokkhamukhena pahātabbā. Catutthasaññādayo attābhinivesatannittāhi anattānupassanāya paṭipakkhabhāvato suññatavimokkhamukhena pahātabbā. Tattha mānasallabhayaagatigamanānaṃ niccābhinivesanimittatā veditabbā. Na hi aniccato passato mānajappanaṃ, bhayaṃ vā sambhavati. Avijjāyogādīnaṃ attābhinivesanimittatā pākaṭā evāti.
86. அப்பமஞ்ஞாவஜ்ஜா ரூபாவசரஸமாபத்தியோ தி³ப்³ப³விஹாரா ‘‘தே³வூபபத்திஸங்வத்தனிககுஸலஸமாபத்தியோ சா’’தி கத்வா, ஸதிபி தப்³பா⁴வே பரஹிதபடிபத்திதோ, நித்³தோ³ஸதாய ச ஸெட்டா² விஹாராதி சதஸ்ஸோ அப்பமஞ்ஞா ப்³ரஹ்மவிஹாரா, சதஸ்ஸோ ப²லஸமாபத்தியோ அரியவிஹாரா ‘‘ஆரகா கிலேஸேஹி அரியானங் விஹாரா’’தி. சதஸ்ஸோ ஆருப்பஸமாபத்தியோ ஆனேஞ்ஜவிஹாரா , ஸதிபி தே³வூபபத்திஸங்வத்தனிககுஸலஸமாபத்திபா⁴வே ஆனேஞ்ஜஸந்ததாஹி லோகியேஸு ஸிகா²ப்பத்திதோ.
86. Appamaññāvajjā rūpāvacarasamāpattiyo dibbavihārā ‘‘devūpapattisaṃvattanikakusalasamāpattiyo cā’’ti katvā, satipi tabbhāve parahitapaṭipattito, niddosatāya ca seṭṭhā vihārāti catasso appamaññā brahmavihārā, catasso phalasamāpattiyo ariyavihārā ‘‘ārakā kilesehi ariyānaṃ vihārā’’ti. Catasso āruppasamāpattiyo āneñjavihārā, satipi devūpapattisaṃvattanikakusalasamāpattibhāve āneñjasantatāhi lokiyesu sikhāppattito.
அதி⁴கரணபே⁴தே³னாதி வத்து²பே⁴தே³ன.
Adhikaraṇabhedenāti vatthubhedena.
யங் அபி⁴ண்ஹங் ந பவத்ததி, தங் அச்ச²ரியந்தி த³ஸ்ஸேதுங் ‘‘அந்த⁴ஸ்ஸ…பே॰… உப்பஜ்ஜனக’’ந்தி வுத்தங். அதி⁴திட்ட²தி ஸீலாதி³ ஏதேன ஸச்சேன, எத்த² வா ஸச்சே நிமித்தபூ⁴தே, அதி⁴ட்டா²னமத்தமேவ வா தங் ஸச்சந்தி ஏவங் கரணாதி⁴கரணபா⁴வத்தா² பச்சயவஸேன வேதி³தப்³பா³ ஸமானாதி⁴கரணஸமாஸபக்கே². ததா² அஞ்ஞபத³த்த²ஸமாஸபக்கே². இதரஸ்மிங் பன ஸமாஸே கரணாதி⁴கரணத்தா² ஏவ, தே ச கோ² ஸீலாதி³வஸேன ச வேதி³தப்³பா³. ஸுக²ந்தி ஜா²னவிபஸ்ஸனாமக்³க³ப²லனிப்³பா³னஸுக²ங். லோகியவிபாகஸுக²ம்பி லப்³ப⁴தேவ. ‘‘நாஞ்ஞத்ர பொ³ஜ்ஜா²…பே॰… பாணின’’ந்தி (ஸங்॰ நி॰ 1. 98) ஹி இமாய கா³தா²ய ஸங்க³ஹிதா அனத்தபரிஹாரமுகே²ன ஸத்தானங் அப⁴யா நிப்³பா³னஸம்பத்திஸுகா²வஹா சத்தாரோ த⁴ம்மா இத⁴ ‘‘ஸுக²பா⁴கி³யா’’தி வுத்தாதி. அனவஸேஸபரியாதா³னதோதி ப²ரணவஸேன அனவஸேஸக்³க³ஹணதோ.
Yaṃ abhiṇhaṃ na pavattati, taṃ acchariyanti dassetuṃ ‘‘andhassa…pe… uppajjanaka’’nti vuttaṃ. Adhitiṭṭhati sīlādi etena saccena, ettha vā sacce nimittabhūte, adhiṭṭhānamattameva vā taṃ saccanti evaṃ karaṇādhikaraṇabhāvatthā paccayavasena veditabbā samānādhikaraṇasamāsapakkhe. Tathā aññapadatthasamāsapakkhe. Itarasmiṃ pana samāse karaṇādhikaraṇatthā eva, te ca kho sīlādivasena ca veditabbā. Sukhanti jhānavipassanāmaggaphalanibbānasukhaṃ. Lokiyavipākasukhampi labbhateva. ‘‘Nāññatra bojjhā…pe… pāṇina’’nti (saṃ. ni. 1. 98) hi imāya gāthāya saṅgahitā anattaparihāramukhena sattānaṃ abhayā nibbānasampattisukhāvahā cattāro dhammā idha ‘‘sukhabhāgiyā’’ti vuttāti. Anavasesapariyādānatoti pharaṇavasena anavasesaggahaṇato.
பட²மஸ்ஸ ஸதிபட்டா²னஸ்ஸ பட²மபடிபதா³வஸேன பவத்தஸ்ஸாதி அதி⁴ப்பாயோ. ஏவங் ஸேஸேஸுபி. ‘‘யதா² ஹீ’’திஆதி³னா யதா²வுத்தபடிபதா³ஸதிபட்டா²னானங் நானந்தரியகதங் உபமாய விபா⁴வேதி. ஸதிபி ச ஸப்³பா³ஹி படிபதா³ஹி ஸப்³பே³ஸங் ஸதிபட்டா²னானங் நியமாபா⁴வே நானந்தரிகபா⁴வேன தே³ஸனாக்கமேனேவெத்த² நேஸங் அயமனுக்கமோ கதோதி வேதி³தப்³போ³. அத² வா காயவேத³னாஸு ஸுப⁴ஸுக²ஸஞ்ஞானங் து³ப்³பி³னிவேடி²யதாய அஸுப⁴து³க்கா²னுபஸ்ஸனானங் கிச்சஸித்³தி⁴தோ புரிமேன படிபதா³த்³வயேன புரிமங் ஸதிபட்டா²னத்³வயங் யோஜிதங் தத³பா⁴வதோ. இதரேன இதரங். தானி ஹி புரிமேஸு ஸதிபட்டா²னேஸு கதகம்மஸ்ஸ இச்சி²தப்³பா³னி. அத² வா யதா² தண்ஹாசரிததி³ட்டி²சரிதானங் மந்த³திக்க²பஞ்ஞானங் வஸேன சதஸ்ஸோ படிபதா³ யோஜிதா, ஏவங் சத்தாரி ஸதிபட்டா²னானி ஸம்ப⁴வந்தீதி த³ஸ்ஸேதுங் படிபதா³ஸதிபட்டா²னானங் அயமனுக்கமோ கதோ.
Paṭhamassa satipaṭṭhānassa paṭhamapaṭipadāvasena pavattassāti adhippāyo. Evaṃ sesesupi. ‘‘Yathā hī’’tiādinā yathāvuttapaṭipadāsatipaṭṭhānānaṃ nānantariyakataṃ upamāya vibhāveti. Satipi ca sabbāhi paṭipadāhi sabbesaṃ satipaṭṭhānānaṃ niyamābhāve nānantarikabhāvena desanākkamenevettha nesaṃ ayamanukkamo katoti veditabbo. Atha vā kāyavedanāsu subhasukhasaññānaṃ dubbiniveṭhiyatāya asubhadukkhānupassanānaṃ kiccasiddhito purimena paṭipadādvayena purimaṃ satipaṭṭhānadvayaṃ yojitaṃ tadabhāvato. Itarena itaraṃ. Tāni hi purimesu satipaṭṭhānesu katakammassa icchitabbāni. Atha vā yathā taṇhācaritadiṭṭhicaritānaṃ mandatikkhapaññānaṃ vasena catasso paṭipadā yojitā, evaṃ cattāri satipaṭṭhānāni sambhavantīti dassetuṃ paṭipadāsatipaṭṭhānānaṃ ayamanukkamo kato.
‘‘ததா²’’தி இமினா யதா² ஸமானபடிபக்க²தாய பட²மஸ்ஸ ஸதிபட்டா²னஸ்ஸ பா⁴வனா பட²மஸ்ஸ ஜா²னஸ்ஸ விஸேஸாவஹா, ஏவங் பீதிஸஹக³தாதி³ஸமானதாய து³தியஸதிபட்டா²னாதி³பா⁴வனா து³தியஜ்ஜா²னாதீ³னங் விஸேஸாவஹாதி இமமத்த²ங் உபஸங்ஹரதி. பீதிபடிஸங்வேத³னாதீ³தி ஆதி³ஸத்³தே³ன ஸுக²படிஸங்வேத³னங், சித்தஸங்கா²ரபடிஸங்வேத³னங், பஸ்ஸம்ப⁴னஞ்ச ஸங்க³ண்ஹாதி. சித்தஸ்ஸ அபி⁴ப்பமோத³னக்³க³ஹணஞ்செத்த² நித³ஸ்ஸனமத்தங் த³ட்ட²ப்³ப³ங் படிஸங்வேத³னஸமாத³ஹனவிமோசனானம்பி வஸேன பவத்தியா இச்சி²தப்³ப³த்தா. அனிச்சவிராகா³தீ³தி ஆதி³ஸத்³தே³ன நிரோத⁴படினிஸ்ஸக்³கா³ ஸங்க³ய்ஹந்தி.
‘‘Tathā’’ti iminā yathā samānapaṭipakkhatāya paṭhamassa satipaṭṭhānassa bhāvanā paṭhamassa jhānassa visesāvahā, evaṃ pītisahagatādisamānatāya dutiyasatipaṭṭhānādibhāvanā dutiyajjhānādīnaṃ visesāvahāti imamatthaṃ upasaṃharati. Pītipaṭisaṃvedanādīti ādisaddena sukhapaṭisaṃvedanaṃ, cittasaṅkhārapaṭisaṃvedanaṃ, passambhanañca saṅgaṇhāti. Cittassa abhippamodanaggahaṇañcettha nidassanamattaṃ daṭṭhabbaṃ paṭisaṃvedanasamādahanavimocanānampi vasena pavattiyā icchitabbattā. Aniccavirāgādīti ādisaddena nirodhapaṭinissaggā saṅgayhanti.
ரூபாவசரஸமாபத்தீனந்தி எத்த² படிலத்³த⁴மத்தங் பட²மஜ்ஜா²னங் பட²மஜ்ஜா²னஸமாபத்தியா பகு³ணவஸீபா⁴வாபாத³னஸ்ஸ பச்சயோ ஹோதி, ந இதராஸங். இதராஸங் பன அதி⁴ட்டா²னபா⁴வேன பரம்பராய பச்சயோ ஹோதீதி வேதி³தப்³ப³ங். ப்³யாபாத³விஹிங்ஸாவிதக்கஅரதிராகா³ ப்³யாபாத³விதக்காத³யோ. ஸுகே²னாதி அகிச்சே²ன, அகஸிரேனாதி அத்தோ².
Rūpāvacarasamāpattīnanti ettha paṭiladdhamattaṃ paṭhamajjhānaṃ paṭhamajjhānasamāpattiyā paguṇavasībhāvāpādanassa paccayo hoti, na itarāsaṃ. Itarāsaṃ pana adhiṭṭhānabhāvena paramparāya paccayo hotīti veditabbaṃ. Byāpādavihiṃsāvitakkaaratirāgā byāpādavitakkādayo. Sukhenāti akicchena, akasirenāti attho.
தி³ப்³ப³விஹாராதி³கே சத்தாரோ விஹாரே பத³ட்டா²னங் கத்வா நானாஸந்தானேஸு உப்பன்னாய வுட்டா²னகா³மினிவிபஸ்ஸனாய யதா²க்கமங் அனுப்பன்னாகுஸலானுப்பாத³னாதி³வஸேன பவத்தவிஸயங் ஸந்தா⁴ய பாளியங் ‘‘பட²மோ விஹாரோ பா⁴விதோ ப³ஹுலீகதோ’’திஆதி³ வுத்தங். ஸம்மப்பதா⁴னஸதி³ஸஞ்ஹெத்த² ஸம்மப்பதா⁴னங் வுத்தங். அரியவிஹாரே ச ஹெட்டி²மே நிஸ்ஸாய உபரிமக்³கா³தி⁴க³மாய வாயமந்தஸ்ஸ அயங் நயோ லப்³ப⁴தி. மக்³க³பரியாபன்னஸ்ஸேவ வா ஸம்மப்பதா⁴னஸ்ஸ நானாஸந்தானிகஸ்ஸ யதா²வுத்தவிபஸ்ஸனாக³மனேன தங்தங்கிச்சாதி³கஸ்ஸ வஸேனேதங் வுத்தங். ஸக்கா ஹி விபஸ்ஸனாக³மனேன ஸத்³தி⁴ந்த்³ரியாதி³திக்க²தாவிஸேஸோ விய வீரியஸ்ஸ கிச்சவிஸேஸவிஸயோ மக்³கோ³ விஞ்ஞாதுங்.
Dibbavihārādike cattāro vihāre padaṭṭhānaṃ katvā nānāsantānesu uppannāya vuṭṭhānagāminivipassanāya yathākkamaṃ anuppannākusalānuppādanādivasena pavattavisayaṃ sandhāya pāḷiyaṃ ‘‘paṭhamo vihāro bhāvito bahulīkato’’tiādi vuttaṃ. Sammappadhānasadisañhettha sammappadhānaṃ vuttaṃ. Ariyavihāre ca heṭṭhime nissāya uparimaggādhigamāya vāyamantassa ayaṃ nayo labbhati. Maggapariyāpannasseva vā sammappadhānassa nānāsantānikassa yathāvuttavipassanāgamanena taṃtaṃkiccādikassa vasenetaṃ vuttaṃ. Sakkā hi vipassanāgamanena saddhindriyāditikkhatāviseso viya vīriyassa kiccavisesavisayo maggo viññātuṃ.
ததா² ஸிகா²ப்பத்தஉபெக்கா²ஸதிபாரிஸுத்³தி⁴தி³ப்³ப³விஹாரங் நிஸ்ஸாய உப்பன்னங் பட²மங் ஸம்மப்பதா⁴னங் மானப்பஹானங் உக்கங்ஸேதி, ப்³ரஹ்மவிஹாரஸன்னிஸ்ஸயே உப்பன்னங் து³தியங் ஸம்மப்பதா⁴னங் காமாலயஸமுக்³கா⁴தங், அரியவிஹாரஸன்னிஸ்ஸயேன உப்பன்னங் ததியங் ஸம்மப்பதா⁴னங் அவிஜ்ஜாபஹானங், ஸந்தவிமொக்க²ஸன்னிஸ்ஸயேன உப்பன்னங் சதுத்த²ங் ஸம்மப்பதா⁴னங் ப⁴வூபஸமங் உக்கங்ஸேதீதி த³ஸ்ஸேதுங் ‘‘பட²மங் ஸம்மப்பதா⁴ன’’ந்திஆதி³ வுத்தங்.
Tathā sikhāppattaupekkhāsatipārisuddhidibbavihāraṃ nissāya uppannaṃ paṭhamaṃ sammappadhānaṃ mānappahānaṃ ukkaṃseti, brahmavihārasannissaye uppannaṃ dutiyaṃ sammappadhānaṃ kāmālayasamugghātaṃ, ariyavihārasannissayena uppannaṃ tatiyaṃ sammappadhānaṃ avijjāpahānaṃ, santavimokkhasannissayena uppannaṃ catutthaṃ sammappadhānaṃ bhavūpasamaṃ ukkaṃsetīti dassetuṃ ‘‘paṭhamaṃ sammappadhāna’’ntiādi vuttaṃ.
பஹீனமானோ ந விஸங்வாதெ³ய்யாதி மானப்பஹானங் ஸச்சாதி⁴ட்டா²னங் வட்³டே⁴தி விஸங்வாத³னநிமித்தஸ்ஸேவ அபா⁴வதோ. அப்பஹீனமானோ ஹி மானநிஸ்ஸயேன கிஞ்சி விஸங்வாதெ³ய்ய. காமாலயே, தி³ட்டா²லயே ச ஸமுக்³கா⁴டிதே சாக³படிபக்க²ஸ்ஸ அவஸரோ ஏவ நத்தீ²தி ஆலயஸமுக்³கா⁴தோ சாகா³தி⁴ட்டா²னங் வட்³டே⁴தி. அவிஜ்ஜாய ஸமுச்சி²ன்னாய பஞ்ஞாபு³த்³தி⁴யா பரிப³ந்தோ⁴வ நத்தி², ப⁴வஸங்கா²ரேஸு ஒஸ்ஸட்டே²ஸு அப⁴வூபஸமஸ்ஸ ஓகாஸோவ நத்தீ²தி மானப்பஹானாத³யோ ஸச்சாதி⁴ட்டா²னாதி³கே ஸங்வட்³டெ⁴ந்தீதி த³ஸ்ஸேதுங் ‘‘மானப்பஹான’’ந்திஆதி³ வுத்தங்.
Pahīnamāno na visaṃvādeyyāti mānappahānaṃ saccādhiṭṭhānaṃ vaḍḍheti visaṃvādananimittasseva abhāvato. Appahīnamāno hi mānanissayena kiñci visaṃvādeyya. Kāmālaye, diṭṭhālaye ca samugghāṭite cāgapaṭipakkhassa avasaro eva natthīti ālayasamugghāto cāgādhiṭṭhānaṃ vaḍḍheti. Avijjāya samucchinnāya paññābuddhiyā paribandhova natthi, bhavasaṅkhāresu ossaṭṭhesu abhavūpasamassa okāsova natthīti mānappahānādayo saccādhiṭṭhānādike saṃvaḍḍhentīti dassetuṃ ‘‘mānappahāna’’ntiādi vuttaṃ.
அவிஸங்வாத³னஸீலோ த⁴ம்மச்ச²ந்த³ப³ஹுலோ ச²ந்தா³தி⁴பதெய்யங் ஸமாதி⁴ங் நிப்³ப³த்தேதி. சாகா³தி⁴முத்தோ நெக்க²ம்மஜ்ஜா²ஸயோ அகோஸஜ்ஜப³ஹுலதாய வீரியாதி⁴பதெய்யங், ஞாணுத்தரோ சித்தங் அத்தனோ வஸே வத்தெந்தோ சித்தாதி⁴பதெய்யங், வூபஸந்தஸபா⁴வோ உபஸமஹேதுபூ⁴தாய வீமங்ஸாய வீமங்ஸயதோ வீமங்ஸாதி⁴பதெய்யங் ஸமாதி⁴ங் நிப்³ப³த்தேதீதி ஸச்சாதி⁴ட்டா²னாதி³பாரிஸுத்³தி⁴ச²ந்த³ஸமாதி⁴ஆதீ³னங் பாரிபூரியா ஸங்வத்ததீதி த³ஸ்ஸேதுங் ‘‘ஸச்சாதி⁴ட்டா²னங் பா⁴வித’’ந்திஆதி³ வுத்தங்.
Avisaṃvādanasīlo dhammacchandabahulo chandādhipateyyaṃ samādhiṃ nibbatteti. Cāgādhimutto nekkhammajjhāsayo akosajjabahulatāya vīriyādhipateyyaṃ, ñāṇuttaro cittaṃ attano vase vattento cittādhipateyyaṃ, vūpasantasabhāvo upasamahetubhūtāya vīmaṃsāya vīmaṃsayato vīmaṃsādhipateyyaṃ samādhiṃ nibbattetīti saccādhiṭṭhānādipārisuddhichandasamādhiādīnaṃ pāripūriyā saṃvattatīti dassetuṃ ‘‘saccādhiṭṭhānaṃ bhāvita’’ntiādi vuttaṃ.
த⁴ம்மச்ச²ந்த³ப³ஹுலோ ச²ந்த³ஸமாதி⁴ம்ஹி டி²தோ இட்டா²னிட்ட²ச²ளாரம்மணாபாதே அனவஜ்ஜஸேவீ ஹோதி. ஆரத்³த⁴வீரியோ வீரியஸமாதி⁴ம்ஹி டி²தோ ஸங்கிலேஸபக்க²ஸ்ஸ ஸந்தபனவஸேனேவ புஞ்ஞங் பரிபூரேதி. சித்தங் அத்தனோ வஸே வத்தெந்தோ சித்தஸமாதி⁴ம்ஹி டி²தோ பஞ்ஞாய உபகாரானுபகாரகே த⁴ம்மே பரிக்³க³ண்ஹந்தோ பு³த்³தி⁴ங் பா²திங் க³மிஸ்ஸதி. வீமங்ஸாஸமாதி⁴ம்ஹி டி²தோ த⁴ம்மவிசயப³ஹுலோ உபதி⁴படினிஸ்ஸக்³கா³வஹமேவ படிபத்திங் ப்³ரூஹேதீதி இமமத்த²ங் த³ஸ்ஸேதுங் ‘‘ச²ந்த³ஸமாதி⁴ பா⁴விதோ’’திஆதி³ வுத்தங்.
Dhammacchandabahulo chandasamādhimhi ṭhito iṭṭhāniṭṭhachaḷārammaṇāpāte anavajjasevī hoti. Āraddhavīriyo vīriyasamādhimhi ṭhito saṃkilesapakkhassa santapanavaseneva puññaṃ paripūreti. Cittaṃ attano vase vattento cittasamādhimhi ṭhito paññāya upakārānupakārake dhamme pariggaṇhanto buddhiṃ phātiṃ gamissati. Vīmaṃsāsamādhimhi ṭhito dhammavicayabahulo upadhipaṭinissaggāvahameva paṭipattiṃ brūhetīti imamatthaṃ dassetuṃ ‘‘chandasamādhi bhāvito’’tiādi vuttaṃ.
தூ³ராதூ³ரபச்சத்தி²கனிவாரணே ப³ஹூபகாரோ இந்த்³ரியஸங்வரோ மெத்தாய விஸேஸுப்பத்திஹேதுதோ மெத்தங் வட்³டே⁴தி. தபேன ஸங்கிலேஸத⁴ம்மே விக்க²ம்பெ⁴ந்தோ வீரியாதி⁴கோ பரது³க்கா²பனயனகாமதங் ஸாஹத்தி²கங் கரோதீதி தபோ கருணங் ஸங்வட்³டே⁴தி. பஞ்ஞா பரியோதா³பிதா ஸாவஜ்ஜானவஜ்ஜத⁴ம்மே பரிக்³க³ண்ஹந்தீ பஹாஸனிபாததோ முதி³தங் ரக்க²ந்தீ பரிப்³ரூஹேதி. உபதி⁴னிஸ்ஸக்³கோ³ பக்க²ந்தோ³ நின்னபோணபப்³பா⁴ரோவ ஸம்மதே³வ ஸத்தஸங்கா²ரேஸு உதா³ஸினோ ஹோதீதி ஸோ உபெக்கா²விஹாரங் பரிவட்³டே⁴தீதி இமமத்த²ங் த³ஸ்ஸேதுங் ‘‘இந்த்³ரியஸங்வரோ பா⁴விதோ’’திஆதி³ வுத்தங். தேனாஹ ‘‘யோ யஸ்ஸ விஸேஸபச்சயோ, ஸோ தங் பரிபூரேதீதி வுத்தோ’’தி.
Dūrādūrapaccatthikanivāraṇe bahūpakāro indriyasaṃvaro mettāya visesuppattihetuto mettaṃ vaḍḍheti. Tapena saṃkilesadhamme vikkhambhento vīriyādhiko paradukkhāpanayanakāmataṃ sāhatthikaṃ karotīti tapo karuṇaṃ saṃvaḍḍheti. Paññā pariyodāpitā sāvajjānavajjadhamme pariggaṇhantī pahāsanipātato muditaṃ rakkhantī paribrūheti. Upadhinissaggo pakkhando ninnapoṇapabbhārova sammadeva sattasaṅkhāresu udāsino hotīti so upekkhāvihāraṃ parivaḍḍhetīti imamatthaṃ dassetuṃ ‘‘indriyasaṃvaro bhāvito’’tiādi vuttaṃ. Tenāha ‘‘yo yassa visesapaccayo, so taṃ paripūretīti vutto’’ti.
87. தி³ஸாபா⁴வேனாதி நயானங் தி³ஸாபா⁴வேனாதி யோஜேதப்³ப³ங். அத்தோ²பிஸ்ஸ புப்³பே³ வுத்தனயேனேவ வேதி³தப்³போ³. யேன சதுக்கேன யஸ்ஸ ராக³சரிதாதி³புக்³க³லஸ்ஸ வோதா³னங் விஸுத்³தி⁴. யதா² அபரிஞ்ஞாதா, அப்பஹீனா ச பட²மாஹாரவிபல்லாஸாத³யோ ராக³சரிதாதீ³னங் புக்³க³லானங் உபக்கிலேஸா, ஏவங் பட²மபடிபதா³த³யோ பா⁴விதா ப³ஹுலீகதா நேஸங் விஸுத்³தி⁴யோ ஹொந்தீதி வுத்தனயானுஸாரேன ஸக்கா விஞ்ஞாதுந்தி ஆஹ ‘‘ஹெட்டா² வுத்தனயமேவா’’தி.
87.Disābhāvenāti nayānaṃ disābhāvenāti yojetabbaṃ. Atthopissa pubbe vuttanayeneva veditabbo. Yena catukkena yassa rāgacaritādipuggalassa vodānaṃ visuddhi. Yathā apariññātā, appahīnā ca paṭhamāhāravipallāsādayo rāgacaritādīnaṃ puggalānaṃ upakkilesā, evaṃ paṭhamapaṭipadādayo bhāvitā bahulīkatā nesaṃ visuddhiyo hontīti vuttanayānusārena sakkā viññātunti āha ‘‘heṭṭhā vuttanayamevā’’ti.
அத² வா புரிமாஹி த்³வீஹி படிபதா³ஹி ஸிஜ்ஜ²மானா விபஸ்ஸனா அத்தனோ கிச்சவுத்திஸங்கா²தங் பவத்திது³க்க²ம்பி ஸங்க³ண்ஹந்தீ து³க்கா²னுபஸ்ஸனாபா³ஹுல்லவிஸேஸதோ து³க்க²லக்க²ணங் படிவிஜ்ஜ²ந்தீ ‘‘அப்பணிஹிதங் விமொக்க²முக²’’ந்தி வுத்தா. ததியாய படிபதா³ய ஸிஜ்ஜ²மானா ஸுக²ப்பவத்திகதாய ஸம்மதே³வ ஸந்ததிக⁴னங் பி⁴ந்தி³த்வா அனிச்சலக்க²ணங் விபா⁴வெந்தீ ‘‘அனிமித்தங் விமொக்க²முக²’’ந்தி வுத்தா. சதுத்தா²ய பன படிபதா³ய ஸிஜ்ஜ²மானா ஸுக²ப்பவத்திகதாய, விஸத³ஞாணதாய ச ஸமூஹகிச்சாரம்மணக⁴னங் பி⁴ந்தி³த்வா ஸம்மதே³வ அனத்தலக்க²ணங் விபா⁴வெந்தீ ‘‘ஸுஞ்ஞதங் விமொக்க²முக²’’ந்தி வுத்தா.
Atha vā purimāhi dvīhi paṭipadāhi sijjhamānā vipassanā attano kiccavuttisaṅkhātaṃ pavattidukkhampi saṅgaṇhantī dukkhānupassanābāhullavisesato dukkhalakkhaṇaṃ paṭivijjhantī ‘‘appaṇihitaṃ vimokkhamukha’’nti vuttā. Tatiyāya paṭipadāya sijjhamānā sukhappavattikatāya sammadeva santatighanaṃ bhinditvā aniccalakkhaṇaṃ vibhāventī ‘‘animittaṃ vimokkhamukha’’nti vuttā. Catutthāya pana paṭipadāya sijjhamānā sukhappavattikatāya, visadañāṇatāya ca samūhakiccārammaṇaghanaṃ bhinditvā sammadeva anattalakkhaṇaṃ vibhāventī ‘‘suññataṃ vimokkhamukha’’nti vuttā.
ததா² காயவேத³னானுபஸ்ஸனா விஸேஸதோ து³க்க²லக்க²ணங் விபா⁴வெந்தீ, சித்தானுபஸ்ஸனா அனிச்சலக்க²ணங், த⁴ம்மானுபஸ்ஸனா அனத்தலக்க²ணந்தி தா யதா²க்கமங் ‘‘அப்பணிஹிதாதி³விமொக்க²முக²’’ந்தி வுத்தா.
Tathā kāyavedanānupassanā visesato dukkhalakkhaṇaṃ vibhāventī, cittānupassanā aniccalakkhaṇaṃ, dhammānupassanā anattalakkhaṇanti tā yathākkamaṃ ‘‘appaṇihitādivimokkhamukha’’nti vuttā.
ஸப்பீதிகதாய அஸ்ஸாதா³னி பட²மது³தியஜ்ஜா²னானி விரஜ்ஜனவஸேன விஸேஸதோ து³க்க²தோ பஸ்ஸந்தியா விபஸ்ஸனாய வஸேன ‘‘அப்பணிஹிதங் விமொக்க²முக²’’ந்தி வுத்தானி. ததியங் ஸந்தஸுக²தாய பா³ஹிரகானங் நிச்சாபி⁴னிவேஸவத்து²பூ⁴தங் ஸபா⁴வதோ ‘‘அனிச்ச’’ந்தி பஸ்ஸந்தியா விபஸ்ஸனாய வஸேன ‘‘அனிமித்தங் விமொக்க²முக²’’ந்தி வுத்தங். சதுத்த²ங் உபக்கிலேஸவிக³மாதீ³ஹி பரிஸுத்³த⁴ங் ஸுஸமாஹிதங் யதா² பரேஸங், ஏவங் அத்தனோ ச யதா²பூ⁴தஸபா⁴வாவபோ³த⁴ஹேதுதாய ஸம்மதே³வ ‘‘ஸுஞ்ஞ’’ந்தி பஸ்ஸந்தியா விபஸ்ஸனாய வஸேன ‘‘ஸுஞ்ஞதங் விமொக்க²முக²’’ந்தி வுத்தங்.
Sappītikatāya assādāni paṭhamadutiyajjhānāni virajjanavasena visesato dukkhato passantiyā vipassanāya vasena ‘‘appaṇihitaṃ vimokkhamukha’’nti vuttāni. Tatiyaṃ santasukhatāya bāhirakānaṃ niccābhinivesavatthubhūtaṃ sabhāvato ‘‘anicca’’nti passantiyā vipassanāya vasena ‘‘animittaṃ vimokkhamukha’’nti vuttaṃ. Catutthaṃ upakkilesavigamādīhi parisuddhaṃ susamāhitaṃ yathā paresaṃ, evaṃ attano ca yathābhūtasabhāvāvabodhahetutāya sammadeva ‘‘suñña’’nti passantiyā vipassanāya vasena ‘‘suññataṃ vimokkhamukha’’nti vuttaṃ.
ஏவங் விஹாரானங் விபஸ்ஸனாவஸேனேவ விமொக்க²முக²தா, தத்த² ‘‘தி³ப்³ப³ப்³ரஹ்மவிஹாரானங் ஸந்தஸுக²தாய அஸ்ஸாத³னீயதா’’திஆதி³னா அப்பணிஹிதவிமொக்க²முக²தா யோஜேதப்³பா³. அரியவிஹாரஸ்ஸ பஞ்ஞாதி⁴கத்தா விஸேஸதோ அனத்தானுபஸ்ஸனாஸன்னிஸ்ஸயதாய ஸுஞ்ஞதவிமொக்க²தா. ஆனேஞ்ஜவிஹாரஸ்ஸ ஸந்தவிமொக்க²தாய அனிச்சலக்க²ணப்படிவேத⁴ஸ்ஸ விஸேஸபச்சயஸபா⁴வதோ அனிமித்தவிமொக்க²முக²தா யோஜேதப்³பா³.
Evaṃ vihārānaṃ vipassanāvaseneva vimokkhamukhatā, tattha ‘‘dibbabrahmavihārānaṃ santasukhatāya assādanīyatā’’tiādinā appaṇihitavimokkhamukhatā yojetabbā. Ariyavihārassa paññādhikattā visesato anattānupassanāsannissayatāya suññatavimokkhatā. Āneñjavihārassa santavimokkhatāya aniccalakkhaṇappaṭivedhassa visesapaccayasabhāvato animittavimokkhamukhatā yojetabbā.
ததா² புரிமானங் த்³வின்னங் ஸம்மப்பதா⁴னானங் ஸங்கிலேஸவிஸயத்தா கிலேஸது³க்க²வீதிக்கமஸ்ஸ து³க்கா²னுபஸ்ஸனாபா³ஹுல்லத்தா அப்பணிஹிதவிமொக்க²முக²தா. ததியஸ்ஸ அனுப்பன்னகுஸலுப்பாத³னேன த⁴ம்மானங் உத³யவயவந்ததாவிபா⁴வனதோ அனிச்சலக்க²ணங் பாகடந்தி அனிமித்தவிமொக்க²முக²தா. சதுத்த²ஸ்ஸ உப்பன்னானங் டி²தத்தங் ப்³யாபாராபஜ்ஜனேன த⁴ம்மானங் அவஸவத்திதாதீ³பனதோ அனத்தலக்க²ணங் ஸுபாகடந்தி ஸுஞ்ஞதவிமொக்க²முக²தா.
Tathā purimānaṃ dvinnaṃ sammappadhānānaṃ saṃkilesavisayattā kilesadukkhavītikkamassa dukkhānupassanābāhullattā appaṇihitavimokkhamukhatā. Tatiyassa anuppannakusaluppādanena dhammānaṃ udayavayavantatāvibhāvanato aniccalakkhaṇaṃ pākaṭanti animittavimokkhamukhatā. Catutthassa uppannānaṃ ṭhitattaṃ byāpārāpajjanena dhammānaṃ avasavattitādīpanato anattalakkhaṇaṃ supākaṭanti suññatavimokkhamukhatā.
மானப்பஹானாலயஸமுக்³கா⁴தானங் ஸஹாயதண்ஹாபஹானதாய தண்ஹாபணிதி⁴விஸோத⁴னதோ அப்பணிஹிதவிமொக்க²முக²தா. அவிஜ்ஜாபஹானஸ்ஸ பஞ்ஞாகிச்சாதி⁴கதாய ஸுஞ்ஞதவிமொக்க²முக²தா. ப⁴வூபஸமஸ்ஸ ஸங்கா²ரனிமித்தபடிபக்க²தாய அனிமித்தவிமொக்க²முக²தா.
Mānappahānālayasamugghātānaṃ sahāyataṇhāpahānatāya taṇhāpaṇidhivisodhanato appaṇihitavimokkhamukhatā. Avijjāpahānassa paññākiccādhikatāya suññatavimokkhamukhatā. Bhavūpasamassa saṅkhāranimittapaṭipakkhatāya animittavimokkhamukhatā.
பகதியா து³க்க²ஸபா⁴வே ஸங்கா²ரே ஞாணஸச்சேன அவிஸங்வாதெ³ந்தோ து³க்க²தோ ஏவ பஸ்ஸதி, சாகா³தி⁴விமுத்ததாய தண்ஹங் விதூ³ரீகரொந்தோ ராக³ப்பணிதி⁴ங் விஸோஸேதீதி புரிமங் அதி⁴ட்டா²னத்³வயங் ‘‘அப்பணிஹிதங் விமொக்க²முக²’’ந்தி வுத்தங். இதரஸ்ஸ பன அதி⁴ட்டா²னத்³வயஸ்ஸ ஸுஞ்ஞதானிமித்தவிமொக்க²முக²தா வுத்தனயா ஏவ.
Pakatiyā dukkhasabhāve saṅkhāre ñāṇasaccena avisaṃvādento dukkhato eva passati, cāgādhivimuttatāya taṇhaṃ vidūrīkaronto rāgappaṇidhiṃ visosetīti purimaṃ adhiṭṭhānadvayaṃ ‘‘appaṇihitaṃ vimokkhamukha’’nti vuttaṃ. Itarassa pana adhiṭṭhānadvayassa suññatānimittavimokkhamukhatā vuttanayā eva.
ச²ந்தா³தி⁴பதெய்யா சித்தேகக்³க³தா விஸேஸதோ த⁴ம்மச்ச²ந்த³வதோ நெக்க²ம்மவிதக்கப³ஹுலஸ்ஸ ஹோதி, வீரியாதி⁴பதெய்யா பன காமவிதக்காதி³கே வினோதெ³ந்தஸ்ஸாதி தது³ப⁴யங் நிஸ்ஸாய பவத்தா விபஸ்ஸனா விஸேஸதோ ராகா³தி³ப்பணிதீ⁴னங் விஸோஸனதோ ‘‘அப்பணிஹிதங் விமொக்க²முக²’’ந்தி வுத்தா. சித்தாதி⁴பதெய்யங் , வீமங்ஸாதி⁴பதெய்யஞ்ச நிஸ்ஸாய பவத்தா யதா²க்கமங் அனிச்சானத்தானுபஸ்ஸனாபா³ஹுல்லதோ ‘‘அனிமித்தங் விமொக்க²முக²ங், அப்பணிஹிதங் விமொக்க²முக²’’ந்தி ச வுத்தா.
Chandādhipateyyā cittekaggatā visesato dhammacchandavato nekkhammavitakkabahulassa hoti, vīriyādhipateyyā pana kāmavitakkādike vinodentassāti tadubhayaṃ nissāya pavattā vipassanā visesato rāgādippaṇidhīnaṃ visosanato ‘‘appaṇihitaṃ vimokkhamukha’’nti vuttā. Cittādhipateyyaṃ , vīmaṃsādhipateyyañca nissāya pavattā yathākkamaṃ aniccānattānupassanābāhullato ‘‘animittaṃ vimokkhamukhaṃ, appaṇihitaṃ vimokkhamukha’’nti ca vuttā.
அபி⁴ஜ்ஜா²வினயனோ இந்த்³ரியஸங்வரோ, காமஸங்கப்பாதி³வினோத³னோ தபோ ச வுத்தனயேனேவ பணிதி⁴படிபக்க²தோ அப்பணிஹிதங் விமொக்க²முக²ங், பு³த்³தி⁴ அனத்தானுபஸ்ஸனானிமித்தங், உபதி⁴படினிஸ்ஸக்³கோ³ நிமித்தக்³கா³ஹபடிபக்கோ²தி தது³ப⁴யஸன்னிஸ்ஸயா விபஸ்ஸனா யதா²க்கமங் ‘‘ஸுஞ்ஞதங், அனிமித்தங் விமொக்க²முக²’’ந்தி வுத்தா.
Abhijjhāvinayano indriyasaṃvaro, kāmasaṅkappādivinodano tapo ca vuttanayeneva paṇidhipaṭipakkhato appaṇihitaṃ vimokkhamukhaṃ, buddhi anattānupassanānimittaṃ, upadhipaṭinissaggo nimittaggāhapaṭipakkhoti tadubhayasannissayā vipassanā yathākkamaṃ ‘‘suññataṃ, animittaṃ vimokkhamukha’’nti vuttā.
ஆஸன்னபச்சத்தி²கராக³ங் படிபா³ஹந்தீ மெத்தா ராக³பணிதி⁴யா படிபக்கோ², கருணா பரது³க்கா²பனயனாகாரவுத்திகா து³க்க²ஸஹக³தாய து³க்கா²னுபஸ்ஸனாய விஸேஸபச்சயோதி தது³ப⁴யஸன்னிஸ்ஸயா விபஸ்ஸனா ‘‘அப்பணிஹிதங் விமொக்க²முக²’’ந்தி வுத்தா. முதி³தா ஸத்தானங் மோத³க்³க³ஹணப³ஹுலா தத³னிச்சதாத³ஸ்ஸனதோ அனிச்சானுபஸ்ஸனாய விஸேஸபச்சயோதி தன்னிஸ்ஸயா விபஸ்ஸனா அனிமித்தங் விமொக்க²முக²ங். உபெக்கா² ஞாணகிச்சாதி⁴கதாய அனத்தானுபஸ்ஸனாய விஸேஸபச்சயோதி தன்னிஸ்ஸயா விபஸ்ஸனா ‘‘ஸுஞ்ஞதங் விமொக்க²முக²’’ந்தி வுத்தாதி ஏவமெத்த² பவத்திஆகாரதோ விபஸ்ஸதோ நிஸ்ஸயதோ, கிச்சதோ ச பி⁴ந்தி³த்வா விமொக்க²முகா²னி யோஜிதானீதி.
Āsannapaccatthikarāgaṃ paṭibāhantī mettā rāgapaṇidhiyā paṭipakkho, karuṇā paradukkhāpanayanākāravuttikā dukkhasahagatāya dukkhānupassanāya visesapaccayoti tadubhayasannissayā vipassanā ‘‘appaṇihitaṃ vimokkhamukha’’nti vuttā. Muditā sattānaṃ modaggahaṇabahulā tadaniccatādassanato aniccānupassanāya visesapaccayoti tannissayā vipassanā animittaṃ vimokkhamukhaṃ. Upekkhā ñāṇakiccādhikatāya anattānupassanāya visesapaccayoti tannissayā vipassanā ‘‘suññataṃ vimokkhamukha’’nti vuttāti evamettha pavattiākārato vipassato nissayato, kiccato ca bhinditvā vimokkhamukhāni yojitānīti.
ஸமதிக்கமனங் பரிஞ்ஞாபஹானஞ்ச. ஸபரஸந்தானேதி அத்தனோ, பரேஸஞ்ச ஸந்தானே, தேன காயிகோ, வாசஸிகோ ச விஹாரோ ‘‘விக்கீளித’’ந்தி வுத்தோதி த³ஸ்ஸேதி ‘‘விவிதோ⁴ ஹாரோ’’தி கத்வா. தஸ்ஸ பன விபா⁴வனா இத⁴ அதி⁴ப்பேதா நயஸ்ஸ பூ⁴மிபா⁴வதோ. யேன படிபக்க²பா⁴வேன. தேஸங் படிபக்க²பா⁴வோதி தேஸங் ஆஹாராதீ³னங் படிபக்க²பா⁴வோ பஹாதப்³ப³பா⁴வோ படிபதா³தீ³னங் படிபக்க²பா⁴வோ பஹாயகபா⁴வோதி யோஜேதப்³ப³ங். தத்த² படிபதா³க்³க³ஹணேன விபஸ்ஸனா கதி²தா. விபஸ்ஸனா ச சத்தாரோ ஆஹாரே பரிஜானந்தீ தப்படிப³த்³த⁴ச²ந்த³ராக³ங் பஜஹதீதி உஜுகமேவ தேஸங் படிபக்க²தா, ஏவங் ஜா²னாதீ³னம்பி உபாதா³னாதி³படிபக்க²தா வேதி³தப்³பா³ தது³பதே³ஸேன விபஸ்ஸனாய கதி²தத்தா. விபல்லாஸஸதிபட்டா²னானங் படிபக்க²பா⁴வோ பாகடோ ஏவ. ந்தி ஸீஹவிக்கீளிதங். வீஸதியா சதுக்கேஹி விஸபா⁴க³தோ வித்தா²ரேன விப⁴த்தந்தி தீஹி பதே³ஹி ஸங்க³ஹெத்வா கதி²கத்தா வுத்தங் ‘‘ஸங்கே²பேன த³ஸ்ஸெந்தோ’’தி.
Samatikkamanaṃ pariññāpahānañca. Saparasantāneti attano, paresañca santāne, tena kāyiko, vācasiko ca vihāro ‘‘vikkīḷita’’nti vuttoti dasseti ‘‘vividho hāro’’ti katvā. Tassa pana vibhāvanā idha adhippetā nayassa bhūmibhāvato. Yena paṭipakkhabhāvena. Tesaṃ paṭipakkhabhāvoti tesaṃ āhārādīnaṃ paṭipakkhabhāvo pahātabbabhāvo paṭipadādīnaṃ paṭipakkhabhāvo pahāyakabhāvoti yojetabbaṃ. Tattha paṭipadāggahaṇena vipassanā kathitā. Vipassanā ca cattāro āhāre parijānantī tappaṭibaddhachandarāgaṃ pajahatīti ujukameva tesaṃ paṭipakkhatā, evaṃ jhānādīnampi upādānādipaṭipakkhatā veditabbā tadupadesena vipassanāya kathitattā. Vipallāsasatipaṭṭhānānaṃ paṭipakkhabhāvo pākaṭo eva. Nti sīhavikkīḷitaṃ. Vīsatiyā catukkehi visabhāgato vitthārena vibhattanti tīhi padehi saṅgahetvā kathikattā vuttaṃ ‘‘saṅkhepena dassento’’ti.
இந்த்³ரியானந்தி ஸத்³தா⁴தி³இந்த்³ரியானங். த³ஸன்னங் சதுக்கானங் நித்³தா⁴ரணாதி யோஜனா.
Indriyānanti saddhādiindriyānaṃ. Dasannaṃ catukkānaṃ niddhāraṇāti yojanā.
88. நிக்³க³ச்ச²தீதி நிக்க²மதி. ததோ நித்³தா⁴ரெத்வா வுச்சமானோ ஹி நிக்³க³ச்ச²ந்தோ விய ஹோதீதி. சத்தாரோ புக்³க³லேதி ‘‘தண்ஹாசரிதோ மந்தோ³’’திஆதி³னா (நெத்தி॰ 6) வுத்தே சத்தாரோ புக்³க³லே. புக்³க³லாதி⁴ட்டா²னேன செத்த² த⁴ம்மோ வுத்தோதி ஆஹ ‘‘பூ⁴மிங் நித்³தி³ஸித்வா’’தி. ததோ ஏவாதி யதா²வுத்தபுக்³க³லசதுக்கதோ ஏவ. இதரத்தா²பீதி ‘‘ஸுகா²ய…பே॰… புக்³க³லா’’தி எத்தா²பி. ஸாதா⁴ரணாயாதி பட²மசதுத்தா²ஹிபி விமிஸ்ஸாய. யதா²வுத்தாஸூதி து³தியததியாஸு.
88.Niggacchatīti nikkhamati. Tato niddhāretvā vuccamāno hi niggacchanto viya hotīti. Cattāro puggaleti ‘‘taṇhācarito mando’’tiādinā (netti. 6) vutte cattāro puggale. Puggalādhiṭṭhānena cettha dhammo vuttoti āha ‘‘bhūmiṃ niddisitvā’’ti. Tato evāti yathāvuttapuggalacatukkato eva. Itaratthāpīti ‘‘sukhāya…pe… puggalā’’ti etthāpi. Sādhāraṇāyāti paṭhamacatutthāhipi vimissāya. Yathāvuttāsūti dutiyatatiyāsu.
ஹெட்டா²தி தே³ஸனாஹாரவிப⁴ங்க³விசயஹாரஸம்பாதவண்ணனாஸு.
Heṭṭhāti desanāhāravibhaṅgavicayahārasampātavaṇṇanāsu.
ஏஸேவ நயோதி குஸலமூலாதி³த்³வாத³ஸதிகஸங்க³ஹோ அனவஜ்ஜபக்கோ². ‘‘வோதா³யதி ஸுஜ்ஜ²தி ஏதேனாதி வோதா³ன’’ந்தி (நெத்தி॰ அட்ட²॰ 11) வங் நேதப்³ப³தங் ஸந்தா⁴யாஹ.
Eseva nayoti kusalamūlādidvādasatikasaṅgaho anavajjapakkho. ‘‘Vodāyati sujjhati etenāti vodāna’’nti (netti. aṭṭha. 11) vaṃ netabbataṃ sandhāyāha.
யதா² ஹாரஉத்³தே³ஸோ கதோ, ஏவங் நயானங் அகரணே காரணங், பயோஜனஞ்ச விபா⁴வேதுகாமோ ‘‘கஸ்மா பனா’’திஆதி³மாஹ. நயேஹி நயந்தரேஹி. ஸம்ப⁴வத³ஸ்ஸனத்த²ந்தி உபபத்தித³ஸ்ஸனத்த²ங். தத்த² ஸம்ப⁴வோ அனுத்³தே³ஸக்கமேன நித்³தி³ஸனே கரணங் த³ஸ்ஸனங் பயோஜனங். யதி³ ஹி இமே நயா உப்பத்திட்டா²னவஸேன அஸங்கிண்ணா ப⁴வெய்யுங், ஹாரா விய உத்³தே³ஸானுக்கமேனேவ நித்³தி³ஸிதப்³பா³ ஸியுங். ததா² ஹி வுத்தங் ஹாரானங் உத்³தே³ஸாவஸானே ‘‘ஏதே ஸோளஸ ஹாரா பகித்திதா அத்த²தோ அஸங்கிண்ணா’’தி (நெத்தி॰ 1).
Yathā hārauddeso kato, evaṃ nayānaṃ akaraṇe kāraṇaṃ, payojanañca vibhāvetukāmo ‘‘kasmā panā’’tiādimāha. Nayehi nayantarehi. Sambhavadassanatthanti upapattidassanatthaṃ. Tattha sambhavo anuddesakkamena niddisane karaṇaṃ dassanaṃ payojanaṃ. Yadi hi ime nayā uppattiṭṭhānavasena asaṃkiṇṇā bhaveyyuṃ, hārā viya uddesānukkameneva niddisitabbā siyuṃ. Tathā hi vuttaṃ hārānaṃ uddesāvasāne ‘‘ete soḷasa hārā pakittitā atthato asaṃkiṇṇā’’ti (netti. 1).
யஸ்மா பனேதே மூலபதே³ஹி மூலபத³ந்தரனித்³தா⁴ரணேன அஞ்ஞமஞ்ஞங் தே நிக்³க³ச்ச²ந்தி, தஸ்மா ஏகஸ்மிங் நித்³தி³ட்டே² இதரோபி அத்த²தோ நித்³தி³ட்டோ²யேவ நாம ஹோதீதி இமஸ்ஸ அத்த²ஸ்ஸ த³ஸ்ஸனத்த²ங் ‘‘உத்³தே³ஸானுக்கமேன நித்³தே³ஸோ ந கதோ’’தி.
Yasmā panete mūlapadehi mūlapadantaraniddhāraṇena aññamaññaṃ te niggacchanti, tasmā ekasmiṃ niddiṭṭhe itaropi atthato niddiṭṭhoyeva nāma hotīti imassa atthassa dassanatthaṃ ‘‘uddesānukkamena niddeso na kato’’ti.
இதா³னி தமேவ ஸங்கே²பேன வுத்தமத்த²ங் வித்தா²ரேன த³ஸ்ஸேதுங் ‘‘பட²மனயதோ ஹீ’’திஆதி³ வுத்தங். தத்த² தண்ஹாதி³ட்டி²சரிதவஸேன த்³விதா⁴ புக்³க³லே விப⁴ஜித்வா தேஸங் வஸேன நந்தி³யாவட்டனயங் நீஹரித்வா புன தே ஏவ தண்ஹாதி³ட்டி²சரிதே சதுப்படிபதா³விபா⁴கே³ன விப⁴ஜித்வா ஸீஹவிக்கீளிதஸ்ஸ நயஸ்ஸ ஸம்ப⁴வோ த³ஸ்ஸிதோ, தே ஏவ சதுப்படிபதா³பே⁴த³பி⁴ன்னே புக்³க³லே புன உக்³க⁴டிதஞ்ஞுஆதி³விபா⁴கே³ன திதா⁴ விப⁴ஜித்வா திபுக்க²லஸ்ஸ நயஸ்ஸ ஸம்ப⁴வோ த³ஸ்ஸிதோ. தங் ஸந்தா⁴யாஹ ‘‘பட²மனயதோ…பே॰… நித்³தி³ட்டோ²’’தி.
Idāni tameva saṅkhepena vuttamatthaṃ vitthārena dassetuṃ ‘‘paṭhamanayato hī’’tiādi vuttaṃ. Tattha taṇhādiṭṭhicaritavasena dvidhā puggale vibhajitvā tesaṃ vasena nandiyāvaṭṭanayaṃ nīharitvā puna te eva taṇhādiṭṭhicarite catuppaṭipadāvibhāgena vibhajitvā sīhavikkīḷitassa nayassa sambhavo dassito, te eva catuppaṭipadābhedabhinne puggale puna ugghaṭitaññuādivibhāgena tidhā vibhajitvā tipukkhalassa nayassa sambhavo dassito. Taṃ sandhāyāha ‘‘paṭhamanayato…pe… niddiṭṭho’’ti.
யஸ்மா ஸுப⁴ஸுக²ஸஞ்ஞாஹி லோபோ⁴, நிச்சஸஞ்ஞாய தோ³ஸோ ‘‘இமினா மே அனத்தோ² கதோ’’தி ஆகா⁴துப்பத்திதோ , அத்தஸஞ்ஞாய மோஹோ க³ஹிதோ ஹோதி. ததா² அஸுப⁴ஸஞ்ஞாதீ³ஹி அலோபா⁴த³யோ, தஸ்மா த⁴ம்மாதி⁴ட்டா²னவஸேன ததியனயதோ து³தியனயஸ்ஸ ஸம்ப⁴வோ. யஸ்மா பன லோபே⁴ ஸதி ஸம்ப⁴வதோ லோப⁴க்³க³ஹணேனேவ தோ³ஸோ க³ய்ஹதி. லோபோ⁴ ச தண்ஹா, மோஹோ அவிஜ்ஜா, தப்படிபக்க²தோ அலோபா⁴தோ³ஸேஹி ஸமதோ² க³ய்ஹதி, அமோஹேன விபஸ்ஸனா, தஸ்மா த⁴ம்மாதி⁴ட்டா²னவஸேனேவ து³தியனயதோ பட²மனயஸ்ஸ ஸம்ப⁴வோதி இமங் விஸேஸங் தீ³பேதுங் உத்³தே³ஸானுக்கமேன நித்³தே³ஸோ ந கதோதி த³ஸ்ஸெந்தோ ‘‘த⁴ம்மாதி⁴ட்டா²னவஸேன பனா’’திஆதி³மாஹ.
Yasmā subhasukhasaññāhi lobho, niccasaññāya doso ‘‘iminā me anattho kato’’ti āghātuppattito , attasaññāya moho gahito hoti. Tathā asubhasaññādīhi alobhādayo, tasmā dhammādhiṭṭhānavasena tatiyanayato dutiyanayassa sambhavo. Yasmā pana lobhe sati sambhavato lobhaggahaṇeneva doso gayhati. Lobho ca taṇhā, moho avijjā, tappaṭipakkhato alobhādosehi samatho gayhati, amohena vipassanā, tasmā dhammādhiṭṭhānavaseneva dutiyanayato paṭhamanayassa sambhavoti imaṃ visesaṃ dīpetuṃ uddesānukkamena niddeso na katoti dassento ‘‘dhammādhiṭṭhānavasena panā’’tiādimāha.
தேனேவாதி ததியனயதோ து³தியனயஸ்ஸ விய து³தியனயதோ பட²மனயஸ்ஸபி ஸம்ப⁴வதோ. ஏவங் பாளியங் புக்³க³லாதி⁴ட்டா²னவஸேன ஆக³தங் நிஸ்ஸாய அட்ட²கதா²யங் த⁴ம்மாதி⁴ட்டா²னவஸேனேவ நயனிக்³க³மோ நித்³தா⁴ரிதோதி அயமேவ விஸேஸோ. யதி³ ஏவந்தி பாளியங் ஆக³தப்பகாரதோ அஞ்ஞேனபி பகாரேன நயா நித்³தா⁴ரேதப்³பா³, ஏவங் ஸந்தே யதா² புக்³க³லாதி⁴ட்டா²னவஸேன பட²மனயதோ ததியனயஸ்ஸ, ததியனயதோ து³தியனயஸ்ஸ ஸம்ப⁴வோ த³ஸ்ஸிதோ, ஏவங் த⁴ம்மாதி⁴ட்டா²னவஸேனேவ பட²மனயதோ ததியனயது³தியனயானங், த⁴ம்மாதி⁴ட்டா²னவஸேனேவ து³தியனயதோ ததியனயஸ்ஸ ஸம்ப⁴வோ தீ³பேதப்³போ³தி இமமத்த²மாஹ ‘‘த்³வே ஹுத்வா…பே॰… ஸியா’’தி.
Tenevāti tatiyanayato dutiyanayassa viya dutiyanayato paṭhamanayassapi sambhavato. Evaṃ pāḷiyaṃ puggalādhiṭṭhānavasena āgataṃ nissāya aṭṭhakathāyaṃ dhammādhiṭṭhānavaseneva nayaniggamo niddhāritoti ayameva viseso. Yadi evanti pāḷiyaṃ āgatappakārato aññenapi pakārena nayā niddhāretabbā, evaṃ sante yathā puggalādhiṭṭhānavasena paṭhamanayato tatiyanayassa, tatiyanayato dutiyanayassa sambhavo dassito, evaṃ dhammādhiṭṭhānavaseneva paṭhamanayato tatiyanayadutiyanayānaṃ, dhammādhiṭṭhānavaseneva dutiyanayato tatiyanayassa sambhavo dīpetabboti imamatthamāha ‘‘dve hutvā…pe… siyā’’ti.
தத்த² நயோதி பச்சா² வுத்தது³தியனயோ. அத்த²தோதி அத்தா²பத்திதோ, அத்த²தோ லப்³ப⁴மானத்தா ஏவ ஸரூபேன ந கதி²தோதி அத்தோ². இதா³னி தங் அத்தா²பத்திங் ஏகந்திகங் கத்வா த³ஸ்ஸேதுங் ‘‘யஸ்மா’’திஆதி³ வுத்தங். அனுப்பவேஸோ இச்சி²தோ தங்தங்னயமூலபதா³னங் நயந்தரமூலபதே³ஸு ஸமவருஜ்ஜ²னதோ. ததா² ஹி ‘‘யத்த² ஸப்³போ³ அகுஸலபக்கோ² ஸங்க³ஹங் ஸமோஸரணங் க³ச்ச²தி, யத்த² ஸப்³போ³ குஸலபக்கோ² ஸங்க³ஹங் ஸமோஸரணங் க³ச்ச²தீ’’தி (நெத்தி॰ 3) ச வுத்தங். அயஞ்ச அத்தோ²தி ‘‘நயானங் அஞ்ஞமஞ்ஞஅனுப்பவேஸோ நிக்³க³மோ’’தி அயங் து³விதோ⁴ அத்தோ². பிடகானங் அத்த²கத²னங் பேடகங், ஸோ ஏவ உபதே³ஸோதி பேடகோபதே³ஸோ, உபதே³ஸபூ⁴தா பரியத்திஸங்வண்ணனாதி அத்தோ².
Tattha nayoti pacchā vuttadutiyanayo. Atthatoti atthāpattito, atthato labbhamānattā eva sarūpena na kathitoti attho. Idāni taṃ atthāpattiṃ ekantikaṃ katvā dassetuṃ ‘‘yasmā’’tiādi vuttaṃ. Anuppaveso icchito taṃtaṃnayamūlapadānaṃ nayantaramūlapadesu samavarujjhanato. Tathā hi ‘‘yattha sabbo akusalapakkho saṅgahaṃ samosaraṇaṃ gacchati, yattha sabbo kusalapakkho saṅgahaṃ samosaraṇaṃ gacchatī’’ti (netti. 3) ca vuttaṃ. Ayañca atthoti ‘‘nayānaṃ aññamaññaanuppaveso niggamo’’ti ayaṃ duvidho attho. Piṭakānaṃ atthakathanaṃ peṭakaṃ, so eva upadesoti peṭakopadeso, upadesabhūtā pariyattisaṃvaṇṇanāti attho.
ஆதி³தோ பட்டா²யாதி நயானங் அஞ்ஞமஞ்ஞஅனுப்பவேஸனிக்³க³மமத்தமேவ அவிபா⁴வெத்வா நயவிசாரஸ்ஸ பட²மாவயவதோ பபு⁴தி விபா⁴வனா தீ³பனா பகாஸனா.
Ādito paṭṭhāyāti nayānaṃ aññamaññaanuppavesaniggamamattameva avibhāvetvā nayavicārassa paṭhamāvayavato pabhuti vibhāvanā dīpanā pakāsanā.
தோ³ஸதி³ட்டீ²தி அப்பஸ்ஸாத³தாதி³தோ³ஸகா³ஹிகதி³ட்டீ², தோ³ஸத³ஸ்ஸினோதி அத்தோ². தே ஹி அஸமூஹதானுஸயா, காமேஸு ச ஆதீ³னவத³ஸ்ஸினோ. இத³ஞ்ஹி நேஸங் அங்க³த்³வயங் அத்தகிலமதா²னுயோக³ஸ்ஸ காரணங் வுத்தங். நத்தி² அத்தோ²தி யோ ராகா³பி⁴பூ⁴தேஹி அந்த⁴பா³லேஹி பரிகப்பிதோ தி³ட்ட²த⁴ம்மிகோ காமேஹி அத்தோ², ஸோ மது⁴பி³ந்து³கி³த்³த⁴ஸ்ஸ மது⁴லித்தஸத்த²தா⁴ராவலேஹனஸதி³ஸோ அப்பஸ்ஸாதோ³ ப³ஹுது³க்கோ² ப³ஹுபாயாஸோ ப³ஹுஆதீ³னவோ ஸவிகா⁴தோ ஸபரிளாஹோ ஸம்பராயிகோ ததே²வாதி ஸப்³ப³தா³பி விஞ்ஞூஜாதிகஸ்ஸ காமேஹி பயோஜனங் ந விஜ்ஜதி. அனஜ்ஜோ²ஸிதாதி அனபி⁴பூ⁴தா விஹரந்தி. தேன வுச்சதி ஸுகா² படிபதா³தி தேன மந்த³கிலேஸபா⁴வேன தேஸங் புக்³க³லானங் அகிச்சே²ன ஸிஜ்ஜ²மானா விபஸ்ஸனா படிபதா³ ‘‘ஸுகா² படிபதா³’’தி வுச்சதி. அஜ்ஜோ²ஸிதாதி அபி⁴னிவிட்டா². இமே ஸப்³பே³ ஸத்தாதி இமே தண்ஹாதி³ட்டி²சரிதபா⁴வேன த்³விதா⁴ வுத்தா அபரிமாணப்பபே⁴தா³ ஸப்³பே³பி படிபஜ்ஜந்தா ஸத்தா.
Dosadiṭṭhīti appassādatādidosagāhikadiṭṭhī, dosadassinoti attho. Te hi asamūhatānusayā, kāmesu ca ādīnavadassino. Idañhi nesaṃ aṅgadvayaṃ attakilamathānuyogassa kāraṇaṃ vuttaṃ. Natthi atthoti yo rāgābhibhūtehi andhabālehi parikappito diṭṭhadhammiko kāmehi attho, so madhubindugiddhassa madhulittasatthadhārāvalehanasadiso appassādo bahudukkho bahupāyāso bahuādīnavo savighāto sapariḷāho samparāyiko tathevāti sabbadāpi viññūjātikassa kāmehi payojanaṃ na vijjati. Anajjhositāti anabhibhūtā viharanti. Tena vuccati sukhā paṭipadāti tena mandakilesabhāvena tesaṃ puggalānaṃ akicchena sijjhamānā vipassanā paṭipadā ‘‘sukhā paṭipadā’’ti vuccati. Ajjhositāti abhiniviṭṭhā. Ime sabbe sattāti ime taṇhādiṭṭhicaritabhāvena dvidhā vuttā aparimāṇappabhedā sabbepi paṭipajjantā sattā.
ஸுகே²ன படினிஸ்ஸஜ்ஜந்தீதி கிலேஸே அகிச்சே²ன பஜஹந்தி. ‘‘இமா சதஸ்ஸோ படிபதா³’’திஆதி³ படிபதா³னங் எத்தாவதாயங், விஸயபா⁴வகிச்சேஸு ச ப்³யபி⁴சாராபா⁴வத³ஸ்ஸனங். அயங் படிபதா³தி நிக³மனங், அயங் படிபதா³ யாய வஸேன ஸீஹவிக்கீளிதஸ்ஸ நயஸ்ஸ பூ⁴மித³ஸ்ஸனத்த²ங் சத்தாரோ புக்³க³லா நித்³தா⁴ரிதாதி அதி⁴ப்பாயோ. சதுக்கமக்³கே³ன கிலேஸே நித்³தி³ஸதீதி அனந்தரங் வக்க²மானேன ஆஹாராதி³சதுக்கமக்³கே³ன த³ஸவத்து²கே கிலேஸஸமூஹே நித்³தி³ஸதி. சதுக்கமக்³கே³ன அரியத⁴ம்மேஸு நித்³தி³ஸிதப்³பா³தி தப்படிபக்கே²ன படிபதா³தி³சதுக்கமக்³கே³ன அரியத⁴ம்மேஸு போ³தி⁴பக்கி²யேஸு விஸயபூ⁴தேஸு நித்³தா⁴ரெத்வா கதே²தப்³பா³.
Sukhenapaṭinissajjantīti kilese akicchena pajahanti. ‘‘Imā catasso paṭipadā’’tiādi paṭipadānaṃ ettāvatāyaṃ, visayabhāvakiccesu ca byabhicārābhāvadassanaṃ. Ayaṃ paṭipadāti nigamanaṃ, ayaṃ paṭipadā yāya vasena sīhavikkīḷitassa nayassa bhūmidassanatthaṃ cattāro puggalā niddhāritāti adhippāyo. Catukkamaggena kilese niddisatīti anantaraṃ vakkhamānena āhārādicatukkamaggena dasavatthuke kilesasamūhe niddisati. Catukkamaggena ariyadhammesu niddisitabbāti tappaṭipakkhena paṭipadādicatukkamaggena ariyadhammesu bodhipakkhiyesu visayabhūtesu niddhāretvā kathetabbā.
இத³ஞ்ச பமாணங் சத்தாரோ ஆஹாராதி இமேஸங் விபல்லாஸானங் பவத்தியா பமாணங், யதி³த³ங் சத்தாரோ ஆஹாரா. இத³ங் வுத்தங் ஹோதி – யாவதே³வ சத்தாரோ ஆஹாரா பரிஞ்ஞங் ந க³ச்ச²ந்தி, தாவதே³வ சத்தாரோ விபல்லாஸே விப⁴ஜந்தி. யாவதே³வ சத்தாரோ விபல்லாஸா அப்பஹீனா, தாவதே³வ சத்தாரி உபாதா³னானி பரிப்³ரூஹந்தீதி. ஏவங் ஸப்³ப³த்த² யதா²ரஹங் வத்தப்³ப³ங். தேனாஹ ‘‘ஏவங் இமானி ஸப்³பா³னி த³ஸ பதா³னீ’’தி. ‘‘யோஜேதப்³பா³னீ’’தி ச வசனஸேஸோ.
Idañca pamāṇaṃ cattāro āhārāti imesaṃ vipallāsānaṃ pavattiyā pamāṇaṃ, yadidaṃ cattāro āhārā. Idaṃ vuttaṃ hoti – yāvadeva cattāro āhārā pariññaṃ na gacchanti, tāvadeva cattāro vipallāse vibhajanti. Yāvadeva cattāro vipallāsā appahīnā, tāvadeva cattāri upādānāni paribrūhantīti. Evaṃ sabbattha yathārahaṃ vattabbaṃ. Tenāha ‘‘evaṃ imāni sabbāni dasa padānī’’ti. ‘‘Yojetabbānī’’ti ca vacanaseso.
‘‘அபி⁴ஜ்ஜா²ய க³ந்த²தீ’’தி இமினா அபி⁴ஜ்ஜா²யனமேவ க³ந்த²னந்தி த³ஸ்ஸேதி. ஏஸ நயோ ஸேஸேஸுபி. பபஞ்செந்தோதி தி³ட்டா²பி⁴னிவேஸங் வித்தா²ரெந்தோ.
‘‘Abhijjhāya ganthatī’’ti iminā abhijjhāyanameva ganthananti dasseti. Esa nayo sesesupi. Papañcentoti diṭṭhābhinivesaṃ vitthārento.
விப்படிஸாருப்பத்திஹேதுபா⁴வோ கிலேஸானங் ஆஸவனந்தி ஆஹ ‘‘ஆஸவந்தீ’’தி. கிங் விப்படிஸாராதி தேன கிலேஸானங் வீதிக்கமவத்து²ங் வத³தி. யஸ்மா அப்பஹீனானுஸயஸ்ஸேவ விப்படிஸாரா, ந இதரஸ்ஸ, தஸ்மா ‘‘யே விப்படிஸாரா, தே அனுஸயா’’தி வுத்தங். பத³த்³வயேனபி ப²லூபசாரேன காரணங் வுத்தங்.
Vippaṭisāruppattihetubhāvo kilesānaṃ āsavananti āha ‘‘āsavantī’’ti. Kiṃ vippaṭisārāti tena kilesānaṃ vītikkamavatthuṃ vadati. Yasmā appahīnānusayasseva vippaṭisārā, na itarassa, tasmā ‘‘ye vippaṭisārā, te anusayā’’ti vuttaṃ. Padadvayenapi phalūpacārena kāraṇaṃ vuttaṃ.
பட²மேன பதே³னாதி யதா²வுத்தேஸு த³ஸஸு ஸுத்தபதே³ஸு பட²மேன பதே³ன. பட²மாய தி³ஸாயாதி தத³த்த²ஸங்கா²தாய ஸீஹவிக்கீளிதஸ்ஸ ஸங்கிலேஸபக்கே² பட²மாய தி³ஸாய.
Paṭhamenapadenāti yathāvuttesu dasasu suttapadesu paṭhamena padena. Paṭhamāya disāyāti tadatthasaṅkhātāya sīhavikkīḷitassa saṃkilesapakkhe paṭhamāya disāya.
இதீதி ஏவங், வுத்தனயேனாதி அத்தோ². குஸலாகுஸலானந்தி யதா²வுத்தஅனவஜ்ஜஸாவஜ்ஜத⁴ம்மானங். பக்க²படிபக்க²வஸேனாதி வோதா³னபக்க²தப்படிபக்க²வஸேன. யோஜனாதி பட²மதி³ஸாதி³பா⁴வேன யுத்தே கத்வா மனஸானுபெக்க²னா. ‘‘மனஸா வோலோகயதே’’தி (நெத்தி॰ 4) ஹி வுத்தங்.
Itīti evaṃ, vuttanayenāti attho. Kusalākusalānanti yathāvuttaanavajjasāvajjadhammānaṃ. Pakkhapaṭipakkhavasenāti vodānapakkhatappaṭipakkhavasena. Yojanāti paṭhamadisādibhāvena yutte katvā manasānupekkhanā. ‘‘Manasā volokayate’’ti (netti. 4) hi vuttaṃ.
தஸ்ஸாதி தி³ஸாலோகனஸ்ஸ. ஸோதாபத்திப²லாதீ³னங் பரியோஸானதா இந்த்³ரியவஸேன வேதி³தப்³பா³. யேஸஞ்ஹி ஸத்³தா⁴தீ³னங் இந்த்³ரியானங் வஸேன ஸதிபட்டா²னாதீ³னி ஸிஜ்ஜ²ந்தி, தேஸங் வஸேன ஸோதாபத்திப²லாதீ³னங் பரியோஸானதா. தத்த² ஸோதாபத்திப²லே ஸத்³தி⁴ந்த்³ரியங் பாரிபூரிங் க³ச்ச²தி. ஸோதாபன்னோ ஹி ஸத்³தா⁴ய பரிபூரிகாரீ. ஸகதா³கா³மிப²லே வீரியிந்த்³ரியங் பாரிபூரிங் க³ச்ச²தி. ஸகதா³கா³மீ ஹி ஆரத்³த⁴வீரியோ உபரிமக்³கா³தி⁴க³மாய. அனாகா³மிப²லே ஸமாதி⁴ந்த்³ரியங் பாரிபூரிங் க³ச்ச²தி. அனாகா³மீ ஸமாதி⁴ஸ்மிங் பரிபூரிகாரீ. அக்³க³ப²லே அரஹத்தே ஸதிந்த்³ரியஞ்ச பஞ்ஞிந்த்³ரியஞ்ச பாரிபூரிங் க³ச்ச²தி. அரஹா ஹி ஸதிவேபுல்லப்பத்தோ, பஞ்ஞாவேபுல்லப்பத்தோ சாதி.
Tassāti disālokanassa. Sotāpattiphalādīnaṃ pariyosānatā indriyavasena veditabbā. Yesañhi saddhādīnaṃ indriyānaṃ vasena satipaṭṭhānādīni sijjhanti, tesaṃ vasena sotāpattiphalādīnaṃ pariyosānatā. Tattha sotāpattiphale saddhindriyaṃ pāripūriṃ gacchati. Sotāpanno hi saddhāya paripūrikārī. Sakadāgāmiphale vīriyindriyaṃ pāripūriṃ gacchati. Sakadāgāmī hi āraddhavīriyo uparimaggādhigamāya. Anāgāmiphale samādhindriyaṃ pāripūriṃ gacchati. Anāgāmī samādhismiṃ paripūrikārī. Aggaphale arahatte satindriyañca paññindriyañca pāripūriṃ gacchati. Arahā hi sativepullappatto, paññāvepullappatto cāti.
அபரே பனாஹு – ஸத்³தா⁴ப³லேன ஸுப⁴ஸஞ்ஞாய பஹானங். ஸத்³த³ஹந்தோ ஹி படிக்கூலமனஸிகாரே கம்மங் கரோதி. வீரியப³லேன ஸுக²ஸஞ்ஞாய பஹானங். வீரியவா ஹி ஸுக²ஸ்ஸாத³ங் அபி⁴ப⁴வித்வா யோனிஸோமனஸிகாரமனுயுஞ்ஜதி. ஸமாதி⁴ப³லேன நிச்சஸஞ்ஞாய பஹானங். ஸமாஹிதோ ஹி ஸங்கா²ரானங் உத³யப்³ப³யங் பரிக்³க³ண்ஹந்தோ அனிச்சஸஞ்ஞங் படிலப⁴தி. பஞ்ஞாப³லேன அத்தஸஞ்ஞாய பஹானங். பஞ்ஞவா ஹி ஸங்கா²ரானங் அவஸவத்திதங் ஸல்லக்கெ²ந்தோ அத்தஸுஞ்ஞதங் படிவிஜ்ஜ²தி. ஸதி பன ஸப்³ப³த்தா²பி இச்சி²தப்³பா³. தேனாஹ ‘‘ஸதிங் ச க்²வாஹங், பி⁴க்க²வே, ஸப்³ப³த்தி²கங் வதா³மீ’’தி (ஸங்॰ நி॰ 5.234; மி॰ ப॰ 2.1.13). ஏவங் சதுவிபல்லாஸப்பஹாயீனங் சதுன்னங் இந்த்³ரியானங் பாரிபூரிட்டா²னங் சத்தாரி ஸாமஞ்ஞப²லானி சதுவிபல்லாஸமுகா²னங் சதுன்னங் தி³ஸானங் பரியோஸானானி வுத்தானீதி.
Apare panāhu – saddhābalena subhasaññāya pahānaṃ. Saddahanto hi paṭikkūlamanasikāre kammaṃ karoti. Vīriyabalena sukhasaññāya pahānaṃ. Vīriyavā hi sukhassādaṃ abhibhavitvā yonisomanasikāramanuyuñjati. Samādhibalena niccasaññāya pahānaṃ. Samāhito hi saṅkhārānaṃ udayabbayaṃ pariggaṇhanto aniccasaññaṃ paṭilabhati. Paññābalena attasaññāya pahānaṃ. Paññavā hi saṅkhārānaṃ avasavattitaṃ sallakkhento attasuññataṃ paṭivijjhati. Sati pana sabbatthāpi icchitabbā. Tenāha ‘‘satiṃ ca khvāhaṃ, bhikkhave, sabbatthikaṃ vadāmī’’ti (saṃ. ni. 5.234; mi. pa. 2.1.13). Evaṃ catuvipallāsappahāyīnaṃ catunnaṃ indriyānaṃ pāripūriṭṭhānaṃ cattāri sāmaññaphalāni catuvipallāsamukhānaṃ catunnaṃ disānaṃ pariyosānāni vuttānīti.
‘‘லோபோ⁴ அகுஸலமூல’’ந்திஆதி³ லோபா⁴தீ³னங் ஹேதுப²லபா⁴வேன ஸம்பயுத்ததாய த³ஸ்ஸனங்.
‘‘Lobho akusalamūla’’ntiādi lobhādīnaṃ hetuphalabhāvena sampayuttatāya dassanaṃ.
தத்த² மனாபிகேனாதி யேபு⁴ய்யவஸேன வுத்தங். அமனாபிகேனாபி ஹி ஆரம்மணேன விபரியேஸவஸேன லோபோ⁴ உப்பஜ்ஜதி. மனாபிகேனாதி வா மனாபிகாகாரேன. ப²ஸ்ஸவேத³னூபவிசாரராக³விதக்கபரிளாஹா ஸஹஜாதாபி லப்³ப⁴ந்தி, அஸஹஜாதாபி. ‘‘உப்பாதோ³’’தி ஏதேன உப்பஜ்ஜமானஸங்கா²ரக்³க³ஹணந்தி ‘‘உப்பஜ்ஜதீ’’தி வுத்தங். உப்பாத³லக்க²ணஸ்ஸேவ பன க³ஹணே ‘‘உப்பஜ்ஜதீ’’தி ந வத்தப்³ப³ங் ஸியா. ந ஹி உப்பாதோ³ உப்பஜ்ஜதி, ராக³ஜபரிளாஹஹேதுகதா ச தேஸங் ராக³ஸ்ஸ தண்ஹாஸபா⁴வத்தா. தண்ஹா ஹி து³க்க²ஸ்ஸ ஸமுத³யோ, யங் கிஞ்சி ஸமுத³யத⁴ம்மங், ஸப்³ப³ங் தங் து³க்க²ந்தி. ததா² ச வுத்தங் ‘‘தண்ஹாஸஹஜாதவேத³னாய பன லோபோ⁴ ஸஹஜாதாதி³பச்சயேஹி ச பச்சயோ’’தி. ஏவங் இட்டா²ரம்மணே உப்பன்னலோப⁴ஸஹக³தஸுக²வேத³னாய உத³யோ இத⁴ ‘‘உப்பாதோ³ ஸங்க²தலக்க²ண’’ந்தி வுத்தோ, தஸ்ஸா விபரிணாமோ ‘‘விபரிணாமது³க்க²தா’’தி. விபரிணாமாவத்தா² ச உத³யாவத்த²ங் வினா ந ஹோதீதி ஸா தங் நிஸ்ஸாய உப்பஜ்ஜந்தீ விய வுத்தா ‘‘உப்பாத³ங்…பே॰… து³க்க²தா’’தி.
Tattha manāpikenāti yebhuyyavasena vuttaṃ. Amanāpikenāpi hi ārammaṇena vipariyesavasena lobho uppajjati. Manāpikenāti vā manāpikākārena. Phassavedanūpavicārarāgavitakkapariḷāhā sahajātāpi labbhanti, asahajātāpi. ‘‘Uppādo’’ti etena uppajjamānasaṅkhāraggahaṇanti ‘‘uppajjatī’’ti vuttaṃ. Uppādalakkhaṇasseva pana gahaṇe ‘‘uppajjatī’’ti na vattabbaṃ siyā. Na hi uppādo uppajjati, rāgajapariḷāhahetukatā ca tesaṃ rāgassa taṇhāsabhāvattā. Taṇhā hi dukkhassa samudayo, yaṃ kiñci samudayadhammaṃ, sabbaṃ taṃ dukkhanti. Tathā ca vuttaṃ ‘‘taṇhāsahajātavedanāya pana lobho sahajātādipaccayehi ca paccayo’’ti. Evaṃ iṭṭhārammaṇe uppannalobhasahagatasukhavedanāya udayo idha ‘‘uppādo saṅkhatalakkhaṇa’’nti vutto, tassā vipariṇāmo ‘‘vipariṇāmadukkhatā’’ti. Vipariṇāmāvatthā ca udayāvatthaṃ vinā na hotīti sā taṃ nissāya uppajjantī viya vuttā ‘‘uppādaṃ…pe… dukkhatā’’ti.
தோ³ஸோ அகுஸலமூலந்திஆதீ³ஸுபி வுத்தனயானுஸாரேன அத்தோ² வேதி³தப்³போ³. அயங் பன விஸேஸோ – டி²தஸ்ஸ அஞ்ஞத²த்தங் நாம ஜரா, தங் நிஸ்ஸாய தோ³மனஸ்ஸஸ்ஸ உப்பஜ்ஜனதோ வுத்தங் ‘‘டி²தஸ்ஸ…பே॰… து³க்க²து³க்க²தா’’தி. தோ³ஸஜபரிளாஹஹேதுகதா ஜராய தோ³ஸப³ஹுலஸ்ஸ புக்³க³லஸ்ஸ நசிரேன ஜீரணதோ வேதி³தப்³பா³.
Doso akusalamūlantiādīsupi vuttanayānusārena attho veditabbo. Ayaṃ pana viseso – ṭhitassa aññathattaṃ nāma jarā, taṃ nissāya domanassassa uppajjanato vuttaṃ ‘‘ṭhitassa…pe… dukkhadukkhatā’’ti. Dosajapariḷāhahetukatā jarāya dosabahulassa puggalassa nacirena jīraṇato veditabbā.
வயோதி ஸங்கா²ரானங் நிரோதோ⁴. அனிச்சதாவஸேன ச ஸங்க²தத⁴ம்மானங் ஸங்கா²ரது³க்க²தாதி வுத்தங் ‘‘வய…பே॰… ஸங்கா²ரது³க்க²தா’’தி. தேனாஹ ப⁴க³வா ‘‘யத³னிச்சங் தங் து³க்க²’’ந்தி (ஸங்॰ நி॰ 3.15, 45, 76; படி॰ ம॰ 2.10). மோஹஜபரிளாஹஹேதுகதா வயலக்க²ணஸ்ஸ யேபு⁴ய்யேன ஸம்மோஹனிமித்தத்தா, மரணஸ்ஸ அவிஜ்ஜாபச்சயத்தா ச ஸங்ஸாரப்பவத்தியா வேதி³தப்³பா³.
Vayoti saṅkhārānaṃ nirodho. Aniccatāvasena ca saṅkhatadhammānaṃ saṅkhāradukkhatāti vuttaṃ ‘‘vaya…pe… saṅkhāradukkhatā’’ti. Tenāha bhagavā ‘‘yadaniccaṃ taṃ dukkha’’nti (saṃ. ni. 3.15, 45, 76; paṭi. ma. 2.10). Mohajapariḷāhahetukatā vayalakkhaṇassa yebhuyyena sammohanimittattā, maraṇassa avijjāpaccayattā ca saṃsārappavattiyā veditabbā.
அலோபா⁴தீ³னங் பஞ்ஞாதி³பாரிபூரிஹேதுகதா யதா²ரஹங் உபனிஸ்ஸயகோடிஸஹஜாதகோடியா ச பச்சயபா⁴வேன வேதி³தப்³பா³. ஸப்³பே³ ஹி குஸலா த⁴ம்மா ஸப்³பே³ஸங் குஸலானங் த⁴ம்மானங் யதா²ஸம்ப⁴வங் பச்சயவிஸேஸா ஹொந்தி ஏவாதி. அப்³யாபாத³விதக்கஸன்னிஸ்ஸயோ உபவிசாரோ அப்³யாபாதூ³பவிசாரோ. அவிஹிங்ஸூபசாரேபி ஏஸேவ நயோ.
Alobhādīnaṃ paññādipāripūrihetukatā yathārahaṃ upanissayakoṭisahajātakoṭiyā ca paccayabhāvena veditabbā. Sabbe hi kusalā dhammā sabbesaṃ kusalānaṃ dhammānaṃ yathāsambhavaṃ paccayavisesā honti evāti. Abyāpādavitakkasannissayo upavicāro abyāpādūpavicāro. Avihiṃsūpacārepi eseva nayo.
அயங் திபுக்க²லோ நாம து³தியோ நயோ ஸத்³தி⁴ங் தி³ஸாலோகனநயேன நித்³தி³ட்டோ²தி வசனஸேஸோ. ‘‘இமே சத்தாரோ’’திஆதி³ புக்³க³லாதி⁴ட்டா²னேனேவ நந்தி³யாவட்டஸ்ஸ நயஸ்ஸ பூ⁴மித³ஸ்ஸனத்த²ங் ஆரத்³த⁴ங். இமே யதா²வுத்தபடிபதா³சதுக்கஸ்ஸ வஸேன சதுப்³பி³தா⁴. விஸேஸேனாதி தி³ட்டி²தண்ஹாஸன்னிஸ்ஸயதாவிஸேஸேன. தி³ட்டி²சரிதோ ஹி திக்க²பஞ்ஞோ, மந்த³பஞ்ஞோ ச ஸுகா²ய படிபதா³ய கி²ப்பாபி⁴ஞ்ஞாய ச த³ந்தா⁴பி⁴ஞ்ஞாய ச நிய்யாதீதி த்³விதா⁴ வுத்தோதி. ததா² தண்ஹாசரிதோ து³க்கா²ய படிபதா³ய கி²ப்பாபி⁴ஞ்ஞாய ச த³ந்தா⁴பி⁴ஞ்ஞாய ச நிய்யாதீதி த்³விதா⁴ வுத்தோதி த³ஸ்ஸிதோ சாயமத்தோ². தேனாஹ ‘‘த்³வே ஹொந்தி தி³ட்டி²சரிதோ ச தண்ஹாசரிதோ சா’’தி.
Ayaṃ tipukkhalo nāma dutiyo nayo saddhiṃ disālokananayena niddiṭṭhoti vacanaseso. ‘‘Ime cattāro’’tiādi puggalādhiṭṭhāneneva nandiyāvaṭṭassa nayassa bhūmidassanatthaṃ āraddhaṃ. Ime yathāvuttapaṭipadācatukkassa vasena catubbidhā. Visesenāti diṭṭhitaṇhāsannissayatāvisesena. Diṭṭhicarito hi tikkhapañño, mandapañño ca sukhāya paṭipadāya khippābhiññāya ca dandhābhiññāya ca niyyātīti dvidhā vuttoti. Tathā taṇhācarito dukkhāya paṭipadāya khippābhiññāya ca dandhābhiññāya ca niyyātīti dvidhā vuttoti dassito cāyamattho. Tenāha ‘‘dve honti diṭṭhicarito ca taṇhācarito cā’’ti.
சத்தாரோ ஹுத்வாதி ஸீஹவிக்கீளிதஸ்ஸ நயஸ்ஸ பூ⁴மித³ஸ்ஸனே சத்தாரோ ஹுத்வா டி²தா, சதுப்படிபதா³வஸேன சத்தாரோ கத்வா வுத்தாதி அத்தோ². தயோ ஹொந்தீதி திபுக்க²லஸ்ஸ நயஸ்ஸ பூ⁴மித³ஸ்ஸனே உக்³க⁴டிதஞ்ஞுஆதி³வஸேன தயோ ப⁴வந்தி. தயோ ஹுத்வாதி ததா² தயோ ஹுத்வா டி²தா தயோ கத்வா கதி²தா. த்³வே ஹொந்தீதி இதா³னி நந்தி³யாவட்டஸ்ஸ நயஸ்ஸ பூ⁴மித³ஸ்ஸனே த்³வே ப⁴வந்தி. அஜ்ஜோ²ஸானந்தி தி³ட்டி²அஜ்ஜோ²ஸானங். அபி⁴னிவேஸோதி தண்ஹாபி⁴னிவேஸோ. அஹங்காரோதி அஹங்மானோ ‘‘அஹ’’ந்தி வா கரணங் அஹங்காரோ. தி³ட்டி²மானமஞ்ஞனானங் வஸேன ‘‘அஹமஸ்மீ’’தி ஸமனுபஸ்ஸனா மமங்காரோ, மமாயனங் தண்ஹாக்³கா³ஹோ.
Cattārohutvāti sīhavikkīḷitassa nayassa bhūmidassane cattāro hutvā ṭhitā, catuppaṭipadāvasena cattāro katvā vuttāti attho. Tayo hontīti tipukkhalassa nayassa bhūmidassane ugghaṭitaññuādivasena tayo bhavanti. Tayo hutvāti tathā tayo hutvā ṭhitā tayo katvā kathitā. Dve hontīti idāni nandiyāvaṭṭassa nayassa bhūmidassane dve bhavanti. Ajjhosānanti diṭṭhiajjhosānaṃ. Abhinivesoti taṇhābhiniveso. Ahaṃkāroti ahaṃmāno ‘‘aha’’nti vā karaṇaṃ ahaṃkāro. Diṭṭhimānamaññanānaṃ vasena ‘‘ahamasmī’’ti samanupassanā mamaṃkāro, mamāyanaṃ taṇhāggāho.
த³ஸபதா³னி ‘‘பட²மா தி³ஸா’’தி காதப்³பா³னீதி நந்தி³யாவட்டஸ்ஸ நயஸ்ஸ ‘‘பட²மா தி³ஸா’’தி கரணீயானி, ‘‘பட²மா தி³ஸா’’தி வவத்த²பேதப்³பா³னீதி அத்தோ². ஸங்கி²த்தேன…பே॰… பக்க²ஸ்ஸாதி அனேகப்பபே⁴த³ஸ்ஸபி கண்ஹபக்க²ஸ்ஸ ஸங்கிலேஸபக்க²ஸ்ஸ அத்த²ங் ஸங்கி²த்தேன ஸங்கே²பேன படிபக்கே² வத்தமானே வோதா³னத⁴ம்மே உத்³தி³ஸ்ஸ ஞாபெந்தி பகாஸெந்தி, பட²மா காதப்³பா³தி யோஜனா. த³ஸ பதா³னி து³தியகானீதி தண்ஹாதி³கா த³ஸ கொட்டா²ஸா ‘‘து³தியா தி³ஸா’’தி காதப்³பா³. ‘‘ஸங்கி²த்தேன…பே॰… கண்ஹபக்க²ஸ்ஸா’’தி ஆனெத்வா யோஜேதப்³ப³ங்.
Dasapadāni ‘‘paṭhamā disā’’ti kātabbānīti nandiyāvaṭṭassa nayassa ‘‘paṭhamā disā’’ti karaṇīyāni, ‘‘paṭhamā disā’’ti vavatthapetabbānīti attho. Saṃkhittena…pe… pakkhassāti anekappabhedassapi kaṇhapakkhassa saṃkilesapakkhassa atthaṃ saṃkhittena saṅkhepena paṭipakkhe vattamāne vodānadhamme uddissa ñāpenti pakāsenti, paṭhamā kātabbāti yojanā. Dasa padāni dutiyakānīti taṇhādikā dasa koṭṭhāsā ‘‘dutiyā disā’’ti kātabbā. ‘‘Saṃkhittena…pe… kaṇhapakkhassā’’ti ānetvā yojetabbaṃ.
யோனிஸோதி உபாயஸோ. யோனிஸோ மனஸிகாரோ அனிச்சாதி³வஸேன பட²மமனஸிகாரோ. பஞ்ஞாதி ஸுதசிந்தாமயீ பஞ்ஞா, ஜா²னாபி⁴ஞ்ஞா ச. நிப்³பி³தா³தி நிப்³பே³த⁴ஞாணங். ஸோமனஸ்ஸத⁴ம்மூபஸஞ்ஹிதங் பமோதா³தி³ஸஹக³தங் சேதஸிகஸுக²ங்.
Yonisoti upāyaso. Yoniso manasikāro aniccādivasena paṭhamamanasikāro. Paññāti sutacintāmayī paññā, jhānābhiññā ca. Nibbidāti nibbedhañāṇaṃ. Somanassadhammūpasañhitaṃ pamodādisahagataṃ cetasikasukhaṃ.
குஸலபக்கே² சாதி ச-ஸத்³தோ³ ஸமுச்சயத்தோ², தேன உப⁴யபக்க²தோ ஸமுச்சயவஸேன சதஸ்ஸோ தி³ஸா, ந பச்சேகந்தி த³ஸ்ஸேதி.
Kusalapakkhe cāti ca-saddo samuccayattho, tena ubhayapakkhato samuccayavasena catasso disā, na paccekanti dasseti.
தேஸந்தி தண்ஹாதீ³னங், தண்ஹாய, தண்ஹாபக்கி²கானஞ்சாதி அத்தோ². ஸதிபி அனவஸேஸதோ ராகே³ பஹீயமானே அனவஸேஸதோ அவிஜ்ஜாபி பஹீயதேவ, ராக³ஸ்ஸ பன சேதோவிமுத்தி உஜுபடிபக்கோ²தி த³ஸ்ஸனத்த²ங் ‘‘ராக³விராகா³’’தி வுத்தங். அவிஜ்ஜாவிராகா³தி எத்தா²பி ஏஸேவ நயோ. அயஞ்ச அத்தோ² ‘‘ஆஸவானங் க²யா அனாஸவங் சேதோவிமுத்திங் பஞ்ஞாவிமுத்தி’’ந்திஆதி³னா (ம॰ நி॰ 1.438) ஆக³தபாளியா அத்த²வண்ணனாவஸேன வுத்தா, இத⁴ பன ‘‘ராக³விராகா³ சேதோவிமுத்தி ஸெக்க²ப²லங், அவிஜ்ஜாவிராகா³ பஞ்ஞாவிமுத்தி அஸெக்க²ப²ல’’ந்திஆதி³னா (நெத்தி॰ 51) வேவசனஸமாரோபனே ஆக³தத்தா புரிமா அனாகா³மிப²லங். தஞ்ஹி காமராக³ஸ்ஸ உஜுவிபச்சனீகதோ ஸமாதி⁴பாரிபூரியாவ விஸேஸதோ ‘‘ராக³விராகா³ சேதோவிமுத்தீ’’தி வுச்சதி, பச்சி²மா அரஹத்தப²லங் தண்ஹாய, அவிஜ்ஜாய ச அனவஸேஸப்பஹானதோ, பஞ்ஞாபாரிபூரியா ச ‘‘அவிஜ்ஜாவிராகா³ பஞ்ஞாவிமுத்தீ’’தி வுச்சதி.
Tesanti taṇhādīnaṃ, taṇhāya, taṇhāpakkhikānañcāti attho. Satipi anavasesato rāge pahīyamāne anavasesato avijjāpi pahīyateva, rāgassa pana cetovimutti ujupaṭipakkhoti dassanatthaṃ ‘‘rāgavirāgā’’ti vuttaṃ. Avijjāvirāgāti etthāpi eseva nayo. Ayañca attho ‘‘āsavānaṃ khayā anāsavaṃ cetovimuttiṃ paññāvimutti’’ntiādinā (ma. ni. 1.438) āgatapāḷiyā atthavaṇṇanāvasena vuttā, idha pana ‘‘rāgavirāgā cetovimutti sekkhaphalaṃ, avijjāvirāgā paññāvimutti asekkhaphala’’ntiādinā (netti. 51) vevacanasamāropane āgatattā purimā anāgāmiphalaṃ. Tañhi kāmarāgassa ujuvipaccanīkato samādhipāripūriyāva visesato ‘‘rāgavirāgā cetovimuttī’’ti vuccati, pacchimā arahattaphalaṃ taṇhāya, avijjāya ca anavasesappahānato, paññāpāripūriyā ca ‘‘avijjāvirāgā paññāvimuttī’’ti vuccati.
தத்தா²தி நந்தி³யாவட்டனயே. தேஸூதி ‘‘சத்தாரி பதா³னீ’’தி வுத்தேஸு தண்ஹாதீ³ஸு சதூஸு மூலபதே³ஸு. இத⁴ ஸமோஸரணந்தி ஸங்க³ஹோ வுத்தோ, ஸோ ச ஸபா⁴வதோ, ஸபா⁴க³தோ ச ஹோதீதி தண்ஹாதீ³னி சத்தாரி த³ஸ்ஸெத்வா ‘‘தேஸு அட்டா²ரஸ மூலபதா³னி ஸமோஸரந்தீ’’தி வுத்தங். ஸமத²ங் ப⁴ஜந்தி ஸபா⁴வதோ, ஸபா⁴க³தோ சாதி அதி⁴ப்பாயோ. விபஸ்ஸனங் ப⁴ஜந்தீதி எத்தா²பி ஏஸேவ நயோ. நயாதி⁴ட்டா²னானங் நயாதி⁴ட்டா²னே அனுப்பவேஸோ நயானங் நயேஸு அனுப்பவேஸோ ஏவ நாம ஹோதீதி ஆஹ ‘‘திபுக்க²லோ…பே॰… அனுப்பவிஸந்தீ’’தி.
Tatthāti nandiyāvaṭṭanaye. Tesūti ‘‘cattāri padānī’’ti vuttesu taṇhādīsu catūsu mūlapadesu. Idha samosaraṇanti saṅgaho vutto, so ca sabhāvato, sabhāgato ca hotīti taṇhādīni cattāri dassetvā ‘‘tesu aṭṭhārasa mūlapadāni samosarantī’’ti vuttaṃ. Samathaṃ bhajanti sabhāvato, sabhāgato cāti adhippāyo. Vipassanaṃ bhajantīti etthāpi eseva nayo. Nayādhiṭṭhānānaṃ nayādhiṭṭhāne anuppaveso nayānaṃ nayesu anuppaveso eva nāma hotīti āha ‘‘tipukkhalo…pe… anuppavisantī’’ti.
அலோபா⁴மோஹபக்க²ங் அப⁴ஜாபெத்வா அதோ³ஸபக்க²ங் ப⁴ஜாபேதப்³ப³ஸ்ஸ நந்தி³யாவட்டஸீஹவிக்கீளிதமூலபத³ஸ்ஸ அபா⁴வதோ அதோ³ஸோ ஏகஸுத்தகோடியா ஏககோவ ஹோதீதி த³ஸ்ஸெந்தோ ஆஹ ‘‘அதோ³ஸோ அதோ³ஸோ ஏவா’’தி. தோ³ஸோ தோ³ஸோ ஏவாதி எத்தா²பி ஏஸேவ நயோ. ஸமோஸரந்தி ஸபா⁴க³தோ ச ஸபா⁴வதோ ச ஸங்க³ஹங் க³ச்ச²ந்தீதி அத்தோ².
Alobhāmohapakkhaṃ abhajāpetvā adosapakkhaṃ bhajāpetabbassa nandiyāvaṭṭasīhavikkīḷitamūlapadassa abhāvato adoso ekasuttakoṭiyā ekakova hotīti dassento āha ‘‘adoso adoso evā’’ti. Doso doso evāti etthāpi eseva nayo. Samosaranti sabhāgato ca sabhāvato ca saṅgahaṃ gacchantīti attho.
பூ⁴மி கோ³சரோதி ச மூலபதா³னி ஏவ ஸந்தா⁴ய வத³தி. ஏகேகங் நயங் அனுப்பவிஸதி தங்தங்மூலபதா³னுப்பவேஸதோ. குஸலே வா விஞ்ஞாதே அகுஸலோ படிபக்கோ², அகுஸலே வா குஸலோ படிபக்கோ² அன்வேஸிதப்³போ³ ஸங்வண்ணியமானஸுத்தபதா³னுரூபதோ உபபரிக்கி²தப்³போ³. அன்வேஸனா உபபரிக்கா² ‘‘தி³ஸாலோகன’’ந்தி வுச்சதி. ஸோ நயோ நித்³தி³ஸிதப்³போ³தி ததா² அன்வேஸித்வா தேஹி த⁴ம்மேஹி தி³ஸா வவத்த²பெத்வா ஸோ ஸோ நயோ நித்³தா⁴ரெத்வா யோஜேதப்³போ³. யதா² மூலபதே³ஸு மூலபதா³னங் அனுப்பவேஸோ ஸங்வண்ணிதோ, இமினாவ நயேன மூலபத³தோ மூலபதா³னங் நித்³தா⁴ரணாதி வேதி³தப்³பா³தி த³ஸ்ஸெந்தோ ‘‘யதா² ஏகம்ஹி…பே॰… நித்³தி³ஸிதப்³பா³னீ’’தி ஆஹ. ‘‘ஏகேகஸ்மிஞ்ஹீ’’திஆதி³ காரணவசனங்.
Bhūmi gocaroti ca mūlapadāni eva sandhāya vadati. Ekekaṃ nayaṃ anuppavisati taṃtaṃmūlapadānuppavesato. Kusale vā viññāte akusalo paṭipakkho, akusale vā kusalo paṭipakkho anvesitabbo saṃvaṇṇiyamānasuttapadānurūpato upaparikkhitabbo. Anvesanā upaparikkhā ‘‘disālokana’’nti vuccati. So nayo niddisitabboti tathā anvesitvā tehi dhammehi disā vavatthapetvā so so nayo niddhāretvā yojetabbo. Yathā mūlapadesu mūlapadānaṃ anuppaveso saṃvaṇṇito, imināva nayena mūlapadato mūlapadānaṃ niddhāraṇāti veditabbāti dassento ‘‘yathā ekamhi…pe… niddisitabbānī’’ti āha. ‘‘Ekekasmiñhī’’tiādi kāraṇavacanaṃ.
தத்த² தத்தா²தி ஏகேகஸ்மிங் நயே. ஏகஸ்மிங் த⁴ம்மே விஞ்ஞாதேதி தண்ஹாதி³கே ஏகஸ்மிங் மூலபத³த⁴ம்மே ஸரூபதோ, நித்³தா⁴ரணவஸேன வா விஞ்ஞாதே. ஸப்³பே³ த⁴ம்மா விஞ்ஞாதா ஹொந்தீதி தத³ஞ்ஞமூலபத³பூ⁴தா ஸப்³பே³ லோபா⁴த³யோ விஞ்ஞாதா நயஸ்ஸ பூ⁴மிசரணாயொக்³யதாய பகாஸா பாகடா ஹொந்தி . ‘‘இமேஸ’’ந்திஆதி³ நயத்தயதி³ஸாபூ⁴தத⁴ம்மானங் மத்த²கபாபனேன திண்ணங் நயானங் கூடக்³க³ஹணங், தங் ஹெட்டா² வுத்தனயமேவ.
Tattha tatthāti ekekasmiṃ naye. Ekasmiṃ dhamme viññāteti taṇhādike ekasmiṃ mūlapadadhamme sarūpato, niddhāraṇavasena vā viññāte. Sabbedhammā viññātā hontīti tadaññamūlapadabhūtā sabbe lobhādayo viññātā nayassa bhūmicaraṇāyogyatāya pakāsā pākaṭā honti . ‘‘Imesa’’ntiādi nayattayadisābhūtadhammānaṃ matthakapāpanena tiṇṇaṃ nayānaṃ kūṭaggahaṇaṃ, taṃ heṭṭhā vuttanayameva.
புன ‘‘இமேஸூ’’திஆதி³ கம்மனயத்³வயஸ்ஸ விபா⁴க³விபா⁴வனங், தங் விஞ்ஞெய்யமேவ.
Puna ‘‘imesū’’tiādi kammanayadvayassa vibhāgavibhāvanaṃ, taṃ viññeyyameva.
நயஸமுட்டா²னவாரவண்ணனா நிட்டி²தா.
Nayasamuṭṭhānavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / நயஸமுட்டா²னங் • Nayasamuṭṭhānaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / நயஸமுட்டா²னவாரவண்ணனா • Nayasamuṭṭhānavāravaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / நயஸமுட்டா²னவிபா⁴வனா • Nayasamuṭṭhānavibhāvanā
