| Library / Tipiṭaka / તિપિટક • Tipiṭaka / ભિક્ખુનીવિભઙ્ગ • Bhikkhunīvibhaṅga |
૯. નવમસિક્ખાપદં
9. Navamasikkhāpadaṃ
૯૨૦. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન થુલ્લનન્દાય ભિક્ખુનિયા ઉપટ્ઠાકકુલં થુલ્લનન્દં ભિક્ખુનિં એતદવોચ – ‘‘સચે મયં, અય્યે, સક્કોમ, ભિક્ખુનિસઙ્ઘસ્સ ચીવરં દસ્સામા’’તિ. તેન ખો પન સમયેન વસ્સંવુટ્ઠા ભિક્ખુનિયો ચીવરં ભાજેતુકામા સન્નિપતિંસુ. થુલ્લનન્દા ભિક્ખુની તા ભિક્ખુનિયો એતદવોચ – ‘‘આગમેથ, અય્યે, અત્થિ ભિક્ખુનિસઙ્ઘસ્સ ચીવરપચ્ચાસા’’તિ. ભિક્ખુનિયો થુલ્લનન્દં ભિક્ખુનિં એતદવોચું – ‘‘ગચ્છાય્યે, તં ચીવરં જાનાહી’’તિ. થુલ્લનન્દા ભિક્ખુની યેન તં કુલં તેનુપસઙ્કમિ; ઉપસઙ્કમિત્વા તે મનુસ્સે એતદવોચ – ‘‘દેથાવુસો, ભિક્ખુનિસઙ્ઘસ્સ ચીવર’’ન્તિ. ‘‘ન મયં, અય્યે, સક્કોમ ભિક્ખુનિસઙ્ઘસ્સ ચીવરં દાતુ’’ન્તિ . થુલ્લનન્દા ભિક્ખુની ભિક્ખુનીનં એતમત્થં આરોચેસિ. યા તા ભિક્ખુનિયો અપ્પિચ્છા…પે॰… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા થુલ્લનન્દા દુબ્બલચીવરપચ્ચાસાય ચીવરકાલસમયં અતિક્કામેસ્સતી’’તિ…પે॰… સચ્ચં કિર, ભિક્ખવે, થુલ્લનન્દા ભિક્ખુની દુબ્બલચીવરપચ્ચાસાય ચીવરકાલસમયં અતિક્કામેતીતિ 1? ‘‘સચ્ચં, ભગવા’’તિ. વિગરહિ બુદ્ધો ભગવા…પે॰… કથઞ્હિ નામ, ભિક્ખવે, થુલ્લનન્દા ભિક્ખુની દુબ્બલચીવરપચ્ચાસાય ચીવરકાલસમયં અતિક્કામેસ્સતિ ! નેતં, ભિક્ખવે, અપ્પસન્નાનં વા પસાદાય…પે॰… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –
920. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandāya bhikkhuniyā upaṭṭhākakulaṃ thullanandaṃ bhikkhuniṃ etadavoca – ‘‘sace mayaṃ, ayye, sakkoma, bhikkhunisaṅghassa cīvaraṃ dassāmā’’ti. Tena kho pana samayena vassaṃvuṭṭhā bhikkhuniyo cīvaraṃ bhājetukāmā sannipatiṃsu. Thullanandā bhikkhunī tā bhikkhuniyo etadavoca – ‘‘āgametha, ayye, atthi bhikkhunisaṅghassa cīvarapaccāsā’’ti. Bhikkhuniyo thullanandaṃ bhikkhuniṃ etadavocuṃ – ‘‘gacchāyye, taṃ cīvaraṃ jānāhī’’ti. Thullanandā bhikkhunī yena taṃ kulaṃ tenupasaṅkami; upasaṅkamitvā te manusse etadavoca – ‘‘dethāvuso, bhikkhunisaṅghassa cīvara’’nti. ‘‘Na mayaṃ, ayye, sakkoma bhikkhunisaṅghassa cīvaraṃ dātu’’nti . Thullanandā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā dubbalacīvarapaccāsāya cīvarakālasamayaṃ atikkāmessatī’’ti…pe… saccaṃ kira, bhikkhave, thullanandā bhikkhunī dubbalacīvarapaccāsāya cīvarakālasamayaṃ atikkāmetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī dubbalacīvarapaccāsāya cīvarakālasamayaṃ atikkāmessati ! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
૯૨૧. ‘‘યા પન ભિક્ખુની દુબ્બલચીવરપચ્ચાસાય ચીવરકાલસમયં અતિક્કામેય્ય, પાચિત્તિય’’ન્તિ.
921.‘‘Yā pana bhikkhunī dubbalacīvarapaccāsāya cīvarakālasamayaṃ atikkāmeyya, pācittiya’’nti.
૯૨૨. યા પનાતિ યા યાદિસા…પે॰… ભિક્ખુનીતિ…પે॰… અયં ઇમસ્મિં અત્થે અધિપ્પેતા ભિક્ખુનીતિ.
922.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
દુબ્બલચીવરપચ્ચાસા નામ ‘‘સચે મયં સક્કોમ, દસ્સામ કરિસ્સામા’’તિ વાચા ભિન્ના હોતિ.
Dubbalacīvarapaccāsā nāma ‘‘sace mayaṃ sakkoma, dassāma karissāmā’’ti vācā bhinnā hoti.
ચીવરકાલસમયો નામ અનત્થતે કથિને વસ્સાનસ્સ પચ્છિમો માસો, અત્થતે કથિને પઞ્ચ માસા.
Cīvarakālasamayo nāma anatthate kathine vassānassa pacchimo māso, atthate kathine pañca māsā.
ચીવરકાલસમયં અતિક્કામેય્યાતિ અનત્થતે કથિને વસ્સાનસ્સ પચ્છિમં દિવસં અતિક્કામેતિ, આપત્તિ પાચિત્તિયસ્સ. અત્થતે કથિને કથિનુદ્ધારદિવસં અતિક્કામેતિ, આપત્તિ પાચિત્તિયસ્સ.
Cīvarakālasamayaṃ atikkāmeyyāti anatthate kathine vassānassa pacchimaṃ divasaṃ atikkāmeti, āpatti pācittiyassa. Atthate kathine kathinuddhāradivasaṃ atikkāmeti, āpatti pācittiyassa.
૯૨૩. દુબ્બલચીવરે દુબ્બલચીવરસઞ્ઞા ચીવરકાલસમયં અતિક્કામેતિ, આપત્તિ પાચિત્તિયસ્સ. દુબ્બલચીવરે વેમતિકા ચીવરકાલસમયં અતિક્કામેતિ, આપત્તિ દુક્કટસ્સ. દુબ્બલચીવરે અદુબ્બલચીવરસઞ્ઞા ચીવરકાલસમયં અતિક્કામેતિ, અનાપત્તિ.
923. Dubbalacīvare dubbalacīvarasaññā cīvarakālasamayaṃ atikkāmeti, āpatti pācittiyassa. Dubbalacīvare vematikā cīvarakālasamayaṃ atikkāmeti, āpatti dukkaṭassa. Dubbalacīvare adubbalacīvarasaññā cīvarakālasamayaṃ atikkāmeti, anāpatti.
અદુબ્બલચીવરે દુબ્બલચીવરસઞ્ઞા, આપત્તિ દુક્કટસ્સ. અદુબ્બલચીવરે વેમતિકા, આપત્તિ દુક્કટસ્સ. અદુબ્બલચીવરે અદુબ્બલચીવરસઞ્ઞા, અનાપત્તિ.
Adubbalacīvare dubbalacīvarasaññā, āpatti dukkaṭassa. Adubbalacīvare vematikā, āpatti dukkaṭassa. Adubbalacīvare adubbalacīvarasaññā, anāpatti.
૯૨૪. અનાપત્તિ આનિસંસં દસ્સેત્વા નિવારેતિ, ઉમ્મત્તિકાય, આદિકમ્મિકાયાતિ.
924. Anāpatti ānisaṃsaṃ dassetvā nivāreti, ummattikāya, ādikammikāyāti.
નવમસિક્ખાપદં નિટ્ઠિતં.
Navamasikkhāpadaṃ niṭṭhitaṃ.
Footnotes:
Related texts:
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / ભિક્ખુનીવિભઙ્ગ-અટ્ઠકથા • Bhikkhunīvibhaṅga-aṭṭhakathā / ૯. નવમસિક્ખાપદવણ્ણના • 9. Navamasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૩. નગ્ગવગ્ગવણ્ણના • 3. Naggavaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૯. નવમસિક્ખાપદવણ્ણના • 9. Navamasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૧. પઠમાદિસિક્ખાપદવણ્ણના • 1. Paṭhamādisikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૯. નવમસિક્ખાપદં • 9. Navamasikkhāpadaṃ
