| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៦. នាវាលគ្គនកង្គបញ្ហោ
6. Nāvālagganakaṅgapañho
៦. ‘‘ភន្តេ នាគសេន, ‘នាវាលគ្គនកស្ស ទ្វេ អង្គានិ គហេតព្ពានី’តិ យំ វទេសិ, កតមានិ តានិ ទ្វេ អង្គានិ គហេតព្ពានី’’តិ? ‘‘យថា, មហារាជ, នាវាលគ្គនកំ ពហុឩមិជាលាកុលវិក្ខោភិតសលិលតលេ មហតិមហាសមុទ្ទេ នាវំ លគ្គេតិ ឋបេតិ, ន ទេតិ ទិសាវិទិសំ ហរិតុំ, ឯវមេវ ខោ, មហារាជ, យោគិនា យោគាវចរេន រាគទោសមោហូមិជាលេ មហតិមហាវិតក្កសម្បហារេ ចិត្តំ លគ្គេតព្ពំ, ន ទាតព្ពំ ទិសាវិទិសំ ហរិតុំ។ ឥទំ, មហារាជ, នាវាលគ្គនកស្ស បឋមំ អង្គំ គហេតព្ពំ។
6. ‘‘Bhante nāgasena, ‘nāvālagganakassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, nāvālagganakaṃ bahuūmijālākulavikkhobhitasalilatale mahatimahāsamudde nāvaṃ laggeti ṭhapeti, na deti disāvidisaṃ harituṃ, evameva kho, mahārāja, yoginā yogāvacarena rāgadosamohūmijāle mahatimahāvitakkasampahāre cittaṃ laggetabbaṃ, na dātabbaṃ disāvidisaṃ harituṃ. Idaṃ, mahārāja, nāvālagganakassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, នាវាលគ្គនកំ ន ប្លវតិ 1 វិសីទតិ, ហត្ថសតេបិ ឧទកេ នាវំ លគ្គេតិ ឋានមុបនេតិ, ឯវមេវ ខោ, មហារាជ, យោគិនា យោគាវចរេន លាភយសសក្ការមាននវន្ទនបូជនអបចិតីសុ លាភគ្គយសគ្គេបិ ន ប្លវិតព្ពំ, សរីរយាបនមត្តកេ យេវ ចិត្តំ ឋបេតព្ពំ។ ឥទំ, មហារាជ, នាវាលគ្គនកស្ស ទុតិយំ អង្គំ គហេតព្ពំ។ ភាសិតម្បេតំ, មហារាជ, ថេរេន សារិបុត្តេន ធម្មសេនាបតិនា –
‘‘Puna caparaṃ, mahārāja, nāvālagganakaṃ na plavati 2 visīdati, hatthasatepi udake nāvaṃ laggeti ṭhānamupaneti, evameva kho, mahārāja, yoginā yogāvacarena lābhayasasakkāramānanavandanapūjanaapacitīsu lābhaggayasaggepi na plavitabbaṃ, sarīrayāpanamattake yeva cittaṃ ṭhapetabbaṃ. Idaṃ, mahārāja, nāvālagganakassa dutiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘យថា សមុទ្ទេ លគ្គនកំ, ន ប្លវតិ វិសីទតិ;
‘‘‘Yathā samudde lagganakaṃ, na plavati visīdati;
តថេវ លាភសក្ការេ, មា ប្លវថ វិសីទថា’’’តិ។
Tatheva lābhasakkāre, mā plavatha visīdathā’’’ti.
នាវាលគ្គនកង្គបញ្ហោ ឆដ្ឋោ។
Nāvālagganakaṅgapañho chaṭṭho.
Footnotes:
