| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๗. นวกมฺมิกสุตฺตํ
7. Navakammikasuttaṃ
๒๐๓. เอกํ สมยํ ภควา โกสเลสุ วิหรติ อญฺญตรสฺมิํ วนสเณฺฑ ฯ เตน โข ปน สมเยน นวกมฺมิกภารทฺวาโช พฺราหฺมโณ ตสฺมิํ วนสเณฺฑ กมฺมนฺตํ การาเปติฯ อทฺทสา โข นวกมฺมิกภารทฺวาโช พฺราหฺมโณ ภควนฺตํ อญฺญตรสฺมิํ สาลรุกฺขมูเล นิสินฺนํ ปลฺลงฺกํ อาภุชิตฺวา อุชุํ กายํ ปณิธาย ปริมุขํ สติํ อุปฎฺฐเปตฺวาฯ ทิสฺวานสฺส เอตทโหสิ – ‘‘อหํ โข อิมสฺมิํ วนสเณฺฑ กมฺมนฺตํ การาเปโนฺต รมามิฯ อยํ สมโณ โคตโม กิํ การาเปโนฺต รมตี’’ติ? อถ โข นวกมฺมิกภารทฺวาโช พฺราหฺมโณ เยน ภควา เตนุปสงฺกมิฯ อุปสงฺกมิตฺวา ภควนฺตํ คาถาย อชฺฌภาสิ –
203. Ekaṃ samayaṃ bhagavā kosalesu viharati aññatarasmiṃ vanasaṇḍe . Tena kho pana samayena navakammikabhāradvājo brāhmaṇo tasmiṃ vanasaṇḍe kammantaṃ kārāpeti. Addasā kho navakammikabhāradvājo brāhmaṇo bhagavantaṃ aññatarasmiṃ sālarukkhamūle nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. Disvānassa etadahosi – ‘‘ahaṃ kho imasmiṃ vanasaṇḍe kammantaṃ kārāpento ramāmi. Ayaṃ samaṇo gotamo kiṃ kārāpento ramatī’’ti? Atha kho navakammikabhāradvājo brāhmaṇo yena bhagavā tenupasaṅkami. Upasaṅkamitvā bhagavantaṃ gāthāya ajjhabhāsi –
‘‘เก นุ กมฺมนฺตา กรียนฺติ, ภิกฺขุ สาลวเน ตว;
‘‘Ke nu kammantā karīyanti, bhikkhu sālavane tava;
ยเทกโก อรญฺญสฺมิํ, รติํ วินฺทติ โคตโม’’ติฯ
Yadekako araññasmiṃ, ratiṃ vindati gotamo’’ti.
‘‘น เม วนสฺมิํ กรณียมตฺถิ,
‘‘Na me vanasmiṃ karaṇīyamatthi,
อุจฺฉินฺนมูลํ เม วนํ วิสูกํ;
Ucchinnamūlaṃ me vanaṃ visūkaṃ;
สฺวาหํ วเน นิพฺพนโถ วิสโลฺล,
Svāhaṃ vane nibbanatho visallo,
เอโก รเม อรติํ วิปฺปหายา’’ติฯ
Eko rame aratiṃ vippahāyā’’ti.
เอวํ วุเตฺต, นวกมฺมิกภารทฺวาโช พฺราหฺมโณ ภควนฺตํ เอตทโวจ – ‘‘อภิกฺกนฺตํ, โภ โคตม…เป.… อุปาสกํ มํ ภวํ โคตโม ธาเรตุ อชฺชตเคฺค ปาณุเปตํ สรณํ คต’’นฺติฯ
Evaṃ vutte, navakammikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๗. นวกมฺมิกสุตฺตวณฺณนา • 7. Navakammikasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๗. วนกมฺมิกสุตฺตวณฺณนา • 7. Vanakammikasuttavaṇṇanā
