| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. நதும்ஹாகங்வக்³கோ³
4. Natumhākaṃvaggo
1. நதும்ஹாகங்ஸுத்தங்
1. Natumhākaṃsuttaṃ
33. ஸாவத்தி²னிதா³னங் . ‘‘யங், பி⁴க்க²வே, ந தும்ஹாகங், தங் பஜஹத². தங் வோ பஹீனங் ஹிதாய ஸுகா²ய ப⁴விஸ்ஸதி. கிஞ்ச, பி⁴க்க²வே, ந தும்ஹாகங்? ரூபங், பி⁴க்க²வே, ந தும்ஹாகங், தங் பஜஹத². தங் வோ பஹீனங் ஹிதாய ஸுகா²ய ப⁴விஸ்ஸதி. வேத³னா ந தும்ஹாகங், தங் பஜஹத². ஸா வோ பஹீனா ஹிதாய ஸுகா²ய ப⁴விஸ்ஸதி. ஸஞ்ஞா ந தும்ஹாகங்… ஸங்கா²ரா ந தும்ஹாகங், தே பஜஹத². தே வோ பஹீனா ஹிதாய ஸுகா²ய ப⁴விஸ்ஸந்தி. விஞ்ஞாணங் ந தும்ஹாகங், தங் பஜஹத². தங் வோ பஹீனங் ஹிதாய ஸுகா²ய ப⁴விஸ்ஸதி’’.
33. Sāvatthinidānaṃ . ‘‘Yaṃ, bhikkhave, na tumhākaṃ, taṃ pajahatha. Taṃ vo pahīnaṃ hitāya sukhāya bhavissati. Kiñca, bhikkhave, na tumhākaṃ? Rūpaṃ, bhikkhave, na tumhākaṃ, taṃ pajahatha. Taṃ vo pahīnaṃ hitāya sukhāya bhavissati. Vedanā na tumhākaṃ, taṃ pajahatha. Sā vo pahīnā hitāya sukhāya bhavissati. Saññā na tumhākaṃ… saṅkhārā na tumhākaṃ, te pajahatha. Te vo pahīnā hitāya sukhāya bhavissanti. Viññāṇaṃ na tumhākaṃ, taṃ pajahatha. Taṃ vo pahīnaṃ hitāya sukhāya bhavissati’’.
‘‘ஸெய்யதா²பி, பி⁴க்க²வே, யங் இமஸ்மிங் ஜேதவனே திணகட்ட²ஸாகா²பலாஸங் தங் ஜனோ ஹரெய்ய வா ட³ஹெய்ய வா யதா²பச்சயங் வா கரெய்ய. அபி நு தும்ஹாகங் ஏவமஸ்ஸ – ‘அம்ஹே ஜனோ ஹரதி வா ட³ஹதி வா யதா²பச்சயங் வா கரோதீ’’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘ந ஹி நோ ஏதங், ப⁴ந்தே, அத்தா வா அத்தனியங் வா’’தி. ‘‘ஏவமேவ கோ², பி⁴க்க²வே, ரூபங் ந தும்ஹாகங், தங் பஜஹத². தங் வோ பஹீனங் ஹிதாய ஸுகா²ய ப⁴விஸ்ஸதி. வேத³னா ந தும்ஹாகங், தங் பஜஹத². ஸா வோ பஹீனா ஹிதாய ஸுகா²ய ப⁴விஸ்ஸதி. ஸஞ்ஞா ந தும்ஹாகங்… ஸங்கா²ரா ந தும்ஹாகங்… விஞ்ஞாணங் ந தும்ஹாகங், தங் பஜஹத². தங் வோ பஹீனங் ஹிதாய ஸுகா²ய ப⁴விஸ்ஸதீ’’தி. பட²மங்.
‘‘Seyyathāpi, bhikkhave, yaṃ imasmiṃ jetavane tiṇakaṭṭhasākhāpalāsaṃ taṃ jano hareyya vā ḍaheyya vā yathāpaccayaṃ vā kareyya. Api nu tumhākaṃ evamassa – ‘amhe jano harati vā ḍahati vā yathāpaccayaṃ vā karotī’’’ti? ‘‘No hetaṃ, bhante’’. ‘‘Taṃ kissa hetu’’? ‘‘Na hi no etaṃ, bhante, attā vā attaniyaṃ vā’’ti. ‘‘Evameva kho, bhikkhave, rūpaṃ na tumhākaṃ, taṃ pajahatha. Taṃ vo pahīnaṃ hitāya sukhāya bhavissati. Vedanā na tumhākaṃ, taṃ pajahatha. Sā vo pahīnā hitāya sukhāya bhavissati. Saññā na tumhākaṃ… saṅkhārā na tumhākaṃ… viññāṇaṃ na tumhākaṃ, taṃ pajahatha. Taṃ vo pahīnaṃ hitāya sukhāya bhavissatī’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. நதும்ஹாகஸுத்தவண்ணனா • 1. Natumhākasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. நதும்ஹாகங்ஸுத்தவண்ணனா • 1. Natumhākaṃsuttavaṇṇanā
