| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೮೯. ಞಾತಕಾದಿಗ್ಗಹಣಕಥಾ
89. Ñātakādiggahaṇakathā
೧೬೬. ತೇನ ಖೋ ಪನ ಸಮಯೇನ ಅಞ್ಞತರಂ ಭಿಕ್ಖುಂ ತದಹುಪೋಸಥೇ ಞಾತಕಾ ಗಣ್ಹಿಂಸುಂ। ಭಗವತೋ ಏತಮತ್ಥಂ ಆರೋಚೇಸುಂ।
166. Tena kho pana samayena aññataraṃ bhikkhuṃ tadahuposathe ñātakā gaṇhiṃsuṃ. Bhagavato etamatthaṃ ārocesuṃ.
ಇಧ ಪನ, ಭಿಕ್ಖವೇ, ಭಿಕ್ಖುಂ ತದಹುಪೋಸಥೇ ಞಾತಕಾ ಗಣ್ಹನ್ತಿ। ತೇ ಞಾತಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ಮುಞ್ಚಥ, ಯಾವಾಯಂ ಭಿಕ್ಖು ಉಪೋಸಥಂ ಕರೋತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ತೇ ಞಾತಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಮುಹುತ್ತಂ ಏಕಮನ್ತಂ ಹೋಥ, ಯಾವಾಯಂ ಭಿಕ್ಖು ಪಾರಿಸುದ್ಧಿಂ ದೇತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ತೇ ಞಾತಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ನಿಸ್ಸೀಮಂ ನೇಥ, ಯಾವ ಸಙ್ಘೋ ಉಪೋಸಥಂ ಕರೋತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ನ ತ್ವೇವ ವಗ್ಗೇನ ಸಙ್ಘೇನ ಉಪೋಸಥೋ ಕಾತಬ್ಬೋ। ಕರೇಯ್ಯ ಚೇ, ಆಪತ್ತಿ ದುಕ್ಕಟಸ್ಸ।
Idha pana, bhikkhave, bhikkhuṃ tadahuposathe ñātakā gaṇhanti. Te ñātakā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ muñcatha, yāvāyaṃ bhikkhu uposathaṃ karotī’’ti. Evañcetaṃ labhetha, iccetaṃ kusalaṃ. No ce labhetha, te ñātakā bhikkhūhi evamassu vacanīyā – ‘‘iṅgha, tumhe āyasmanto muhuttaṃ ekamantaṃ hotha, yāvāyaṃ bhikkhu pārisuddhiṃ detī’’ti. Evañcetaṃ labhetha, iccetaṃ kusalaṃ. No ce labhetha, te ñātakā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ nissīmaṃ netha, yāva saṅgho uposathaṃ karotī’’ti. Evañcetaṃ labhetha, iccetaṃ kusalaṃ. No ce labhetha, na tveva vaggena saṅghena uposatho kātabbo. Kareyya ce, āpatti dukkaṭassa.
ಇಧ ಪನ, ಭಿಕ್ಖವೇ, ಭಿಕ್ಖುಂ ತದಹುಪೋಸಥೇ ರಾಜಾನೋ ಗಣ್ಹನ್ತಿ,…ಪೇ॰… ಚೋರಾ ಗಣ್ಹನ್ತಿ – ಧುತ್ತಾ ಗಣ್ಹನ್ತಿ – ಭಿಕ್ಖುಪಚ್ಚತ್ಥಿಕಾ ಗಣ್ಹನ್ತಿ, ತೇ ಭಿಕ್ಖುಪಚ್ಚತ್ಥಿಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ಮುಞ್ಚಥ, ಯಾವಾಯಂ ಭಿಕ್ಖು ಉಪೋಸಥಂ ಕರೋತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ತೇ ಭಿಕ್ಖುಪಚ್ಚತ್ಥಿಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಮುಹುತ್ತಂ ಏಕಮನ್ತಂ ಹೋಥ, ಯಾವಾಯಂ ಭಿಕ್ಖು ಪಾರಿಸುದ್ಧಿಂ ದೇತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ತೇ ಭಿಕ್ಖುಪಚ್ಚತ್ಥಿಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ನಿಸ್ಸೀಮಂ ನೇಥ, ಯಾವ ಸಙ್ಘೋ ಉಪೋಸಥಂ ಕರೋತೀ’’ತಿ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ನ ತ್ವೇವ ವಗ್ಗೇನ ಸಙ್ಘೇನ ಉಪೋಸಥೋ ಕಾತಬ್ಬೋ। ಕರೇಯ್ಯ ಚೇ, ಆಪತ್ತಿ ದುಕ್ಕಟಸ್ಸಾತಿ।
Idha pana, bhikkhave, bhikkhuṃ tadahuposathe rājāno gaṇhanti,…pe… corā gaṇhanti – dhuttā gaṇhanti – bhikkhupaccatthikā gaṇhanti, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ muñcatha, yāvāyaṃ bhikkhu uposathaṃ karotī’’ti. Evañcetaṃ labhetha, iccetaṃ kusalaṃ. No ce labhetha, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto muhuttaṃ ekamantaṃ hotha, yāvāyaṃ bhikkhu pārisuddhiṃ detī’’ti. Evañcetaṃ labhetha, iccetaṃ kusalaṃ. No ce labhetha, te bhikkhupaccatthikā bhikkhūhi evamassu vacanīyā – ‘‘iṅgha, tumhe āyasmanto imaṃ bhikkhuṃ muhuttaṃ nissīmaṃ netha, yāva saṅgho uposathaṃ karotī’’ti. Evañcetaṃ labhetha, iccetaṃ kusalaṃ. No ce labhetha, na tveva vaggena saṅghena uposatho kātabbo. Kareyya ce, āpatti dukkaṭassāti.
Related texts:
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಛನ್ದದಾನಾದಿಕಥಾವಣ್ಣನಾ • Chandadānādikathāvaṇṇanā
