| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
நப்படிப்பஸ்ஸம்பே⁴தப்³ப³தேசத்தாலீஸகங்
Nappaṭippassambhetabbatecattālīsakaṃ
62. ‘‘பஞ்சஹி , பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மங் நப்படிப்பஸ்ஸம்பே⁴தப்³ப³ங். உபஸம்பாதே³தி, நிஸ்ஸயங் தே³தி, ஸாமணேரங் உபட்டா²பேதி, பி⁴க்கு²னோவாத³கஸம்முதிங் ஸாதி³யதி, ஸம்மதோபி பி⁴க்கு²னியோ ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மங் நப்படிப்பஸ்ஸம்பே⁴தப்³ப³ங்.
62. ‘‘Pañcahi , bhikkhave, aṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ. Upasampādeti, nissayaṃ deti, sāmaṇeraṃ upaṭṭhāpeti, bhikkhunovādakasammutiṃ sādiyati, sammatopi bhikkhuniyo ovadati – imehi kho, bhikkhave, pañcahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ.
1 ‘‘அபரேஹிபி , பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மங் நப்படிப்பஸ்ஸம்பே⁴தப்³ப³ங். யாய ஆபத்தியா ஸங்கே⁴ன, ஆபத்தியா அப்படிகம்மே, உக்கே²பனீயகம்மங் கதங் ஹோதி தங் ஆபத்திங் ஆபஜ்ஜதி, அஞ்ஞங் வா தாதி³ஸிகங், ததோ வா பாபிட்ட²தரங்; கம்மங் க³ரஹதி, கம்மிகே க³ரஹதி…பே॰… பகதத்தஸ்ஸ பி⁴க்கு²னோ அபி⁴வாத³னங், பச்சுட்டா²னங், அஞ்ஜலிகம்மங், ஸாமீசிகம்மங், ஆஸனாபி⁴ஹாரங் ஸாதி³யதி…பே॰… பகதத்தஸ்ஸ பி⁴க்கு²னோ ஸெய்யாபி⁴ஹாரங், பாதோ³த³கங் பாத³பீட²ங், பாத³கத²லிகங், பத்தசீவரப்படிக்³க³ஹணங், நஹானே பிட்டி²பரிகம்மங் ஸாதி³யதி…பே॰… பகதத்தங் பி⁴க்கு²ங் ஸீலவிபத்தியா அனுத்³த⁴ங்ஸேதி, ஆசாரவிபத்தியா அனுத்³த⁴ங்ஸேதி, தி³ட்டி²விபத்தியா அனுத்³த⁴ங்ஸேதி, ஆஜீவவிபத்தியா அனுத்³த⁴ங்ஸேதி, பி⁴க்கு²ங் பி⁴க்கூ²ஹி பே⁴தே³தி…பே॰… கி³ஹித்³த⁴ஜங் தா⁴ரேதி, தித்தி²யத்³த⁴ஜங் தா⁴ரேதி, தித்தி²யே ஸேவதி, பி⁴க்கூ² ந ஸேவதி, பி⁴க்கு²ஸிக்கா²ய ந ஸிக்க²தி…பே॰… பகதத்தேன பி⁴க்கு²னா ஸத்³தி⁴ங் ஏகச்ச²ன்னே ஆவாஸே வஸதி, ஏகச்ச²ன்னே அனாவாஸே வஸதி, ஏகச்ச²ன்னே ஆவாஸே வா அனாவாஸே வா வஸதி, பகதத்தங் பி⁴க்கு²ங் தி³ஸ்வா ஆஸனா ந வுட்டா²தி, பகதத்தங் பி⁴க்கு²ங் ஆஸாதே³தி அந்தோ வா ப³ஹி வா – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே , உக்கே²பனீயகம்மங் நப்படிப்பஸ்ஸம்பே⁴தப்³ப³ங்.
2 ‘‘Aparehipi , bhikkhave, pañcahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ. Yāya āpattiyā saṅghena, āpattiyā appaṭikamme, ukkhepanīyakammaṃ kataṃ hoti taṃ āpattiṃ āpajjati, aññaṃ vā tādisikaṃ, tato vā pāpiṭṭhataraṃ; kammaṃ garahati, kammike garahati…pe… pakatattassa bhikkhuno abhivādanaṃ, paccuṭṭhānaṃ, añjalikammaṃ, sāmīcikammaṃ, āsanābhihāraṃ sādiyati…pe… pakatattassa bhikkhuno seyyābhihāraṃ, pādodakaṃ pādapīṭhaṃ, pādakathalikaṃ, pattacīvarappaṭiggahaṇaṃ, nahāne piṭṭhiparikammaṃ sādiyati…pe… pakatattaṃ bhikkhuṃ sīlavipattiyā anuddhaṃseti, ācāravipattiyā anuddhaṃseti, diṭṭhivipattiyā anuddhaṃseti, ājīvavipattiyā anuddhaṃseti, bhikkhuṃ bhikkhūhi bhedeti…pe… gihiddhajaṃ dhāreti, titthiyaddhajaṃ dhāreti, titthiye sevati, bhikkhū na sevati, bhikkhusikkhāya na sikkhati…pe… pakatattena bhikkhunā saddhiṃ ekacchanne āvāse vasati, ekacchanne anāvāse vasati, ekacchanne āvāse vā anāvāse vā vasati, pakatattaṃ bhikkhuṃ disvā āsanā na vuṭṭhāti, pakatattaṃ bhikkhuṃ āsādeti anto vā bahi vā – imehi kho, bhikkhave, pañcahaṅgehi samannāgatassa bhikkhuno, āpattiyā appaṭikamme , ukkhepanīyakammaṃ nappaṭippassambhetabbaṃ.
‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மங் நப்படிப்பஸ்ஸம்பே⁴தப்³ப³ங். பகதத்தஸ்ஸ பி⁴க்கு²னோ உபோஸத²ங் ட²பேதி, பவாரணங் ட²பேதி, ஸவசனீயங் கரோதி, அனுவாத³ங் பட்ட²பேதி, ஓகாஸங் காரேதி, சோதே³தி, ஸாரேதி, பி⁴க்கூ²ஹி ஸம்பயோஜேதி – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மங் நப்படிப்பஸ்ஸம்பே⁴தப்³ப³ங்.
‘‘Aṭṭhahi, bhikkhave, aṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ. Pakatattassa bhikkhuno uposathaṃ ṭhapeti, pavāraṇaṃ ṭhapeti, savacanīyaṃ karoti, anuvādaṃ paṭṭhapeti, okāsaṃ kāreti, codeti, sāreti, bhikkhūhi sampayojeti – imehi kho, bhikkhave, aṭṭhahaṅgehi samannāgatassa bhikkhuno, āpattiyā appaṭikamme, ukkhepanīyakammaṃ nappaṭippassambhetabbaṃ.
ஆபத்தியா அப்படிகம்மே உக்கே²பனீயகம்மே
Āpattiyā appaṭikamme ukkhepanīyakamme
நப்படிப்பஸ்ஸம்பே⁴தப்³ப³தேசத்தாலீஸகங் நிட்டி²தங்.
Nappaṭippassambhetabbatecattālīsakaṃ niṭṭhitaṃ.
Footnotes:
