| Library / Tipiṭaka / ཏིཔིཊཀ • Tipiṭaka / ཙཱུལ༹ནིདྡེས-ཨཊྛཀཐཱ • Cūḷaniddesa-aṭṭhakathā |
༧. ནནྡམཱཎཝསུཏྟནིདྡེསཝཎྞནཱ
7. Nandamāṇavasuttaniddesavaṇṇanā
༤༦. སཏྟམེ ནནྡསུཏྟེ – པཋམགཱཐཱཡཏྠོ – ལོཀེ ཁཏྟིཡཱདཡོཛནཱ ཨཱཛཱིཝཀནིགཎྛཱདིཀེ སནྡྷཱཡ ‘‘སནྟི ལོཀེ མུནཡོ’’ཏི ཝདནྟི། ཏཡིདཾ ཀཐཾསཱུཏི ཀིཾ ནུ ཁོ ཏེ སམཱཔཏྟིཉཱཎཱདིནཱ ཉཱཎེན ཨུཔཔནྣཏྟཱ ཉཱཎཱུཔཔནྣཾ མུནི ནོ ཝདནྟི, ཨེཝཾཝིདྷཾ ནུ ཝདནྟི, ཨུདཱཧུ ཝེ ནཱནཔྤཀཱརཀེན ལཱུཁཛཱིཝིཏསངྑཱཏེན ཛཱིཝིཏེནཱུཔཔནྣནྟི།
46. Sattame nandasutte – paṭhamagāthāyattho – loke khattiyādayojanā ājīvakanigaṇṭhādike sandhāya ‘‘santi loke munayo’’ti vadanti. Tayidaṃ kathaṃsūti kiṃ nu kho te samāpattiñāṇādinā ñāṇena upapannattā ñāṇūpapannaṃ muni no vadanti, evaṃvidhaṃ nu vadanti, udāhu ve nānappakārakena lūkhajīvitasaṅkhātena jīvitenūpapannanti.
ནིདྡེསེ ཨཊྛསམཱཔཏྟིཉཱཎེན ཝཱཏི པཋམཛ྄ཛྷཱནཱདིཨཊྛསམཱཔཏྟིསམྤཡུཏྟཉཱཎེན ཝཱ། པཉྩཱབྷིཉྙཱཉཱཎེན ཝཱཏི པུབྦེནིཝཱསཱདིཛཱནནཉཱཎེན ཝཱ།
Niddese aṭṭhasamāpattiñāṇena vāti paṭhamajjhānādiaṭṭhasamāpattisampayuttañāṇena vā. Pañcābhiññāñāṇena vāti pubbenivāsādijānanañāṇena vā.
༤༧. ཨཐསྶ བྷགཝཱ ཏདུབྷཡམྤི པཊིཀྑིཔིཏྭཱ མུནིཾ དསྶེནྟོ ‘‘ན དིཊྛིཡཱ’’ཏི གཱཐམཱཧ།
47. Athassa bhagavā tadubhayampi paṭikkhipitvā muniṃ dassento ‘‘na diṭṭhiyā’’ti gāthamāha.
༤༨. ཨིདཱནི ‘‘དིཊྛཱདཱིཧི སུདྡྷཱི’’ཏི ཝདནྟཱནཾ ཝཱདེ ཀངྑཱཔཧཱནཏྠཾ ‘‘ཡེ ཀེཙིམེ’’ཏི པུཙྪཏི། ཏཏྠ ཨནེཀརཱུཔེནཱཏི ཀོཏཱུཧལམངྒལཱདིནཱཔི། ཏཏྠ ཡཏཱ ཙརནྟཱཏི ཏཏྠ སཀྐཱཡདིཊྛིཡཱ གུཏྟཱ ཝིཧརནྟཱ།
48. Idāni ‘‘diṭṭhādīhi suddhī’’ti vadantānaṃ vāde kaṅkhāpahānatthaṃ ‘‘ye kecime’’ti pucchati. Tattha anekarūpenāti kotūhalamaṅgalādināpi. Tattha yatā carantāti tattha sakkāyadiṭṭhiyā guttā viharantā.
༤༩. ཨཐསྶ ཏཐཱ སུདྡྷིཨབྷཱཝཾ དཱིཔེནྟོ བྷགཝཱ ཙཏུཏྠཾ གཱཐམཱཧ།
49. Athassa tathā suddhiabhāvaṃ dīpento bhagavā catutthaṃ gāthamāha.
༥༠. ཨེཝཾ ‘‘ནཱཏརིཾསཱུ’’ཏི སུཏྭཱ ཨིདཱནི ཡོ ཨཏརི, ཏཾ སོཏུཀཱམོ ‘‘ཡེ ཀེཙིམེ’’ཏི པུཙྪཏི། ཨཐསྶ བྷགཝཱ ཨོགྷཏིཎྞམུཁེན ཛཱཏིཛརཱཏིཎྞེ དསྶེནྟོ ཚཊྛཾ གཱཐམཱཧ།
50. Evaṃ ‘‘nātariṃsū’’ti sutvā idāni yo atari, taṃ sotukāmo ‘‘ye kecime’’ti pucchati. Athassa bhagavā oghatiṇṇamukhena jātijarātiṇṇe dassento chaṭṭhaṃ gāthamāha.
༥༡. ཏཏྠ ནིཝུཏཱཏི ཨོཝུཊཱ པརིཡོནདྡྷཱ། ཡེ སཱིདྷཱཏི ཡེ སུ ཨིདྷ, ཨེཏྠ ཙ སུ-ཨིཏི ནིཔཱཏམཏྟཾ། ཏཎྷཾ པརིཉྙཱཡཱཏི ཏཱིཧི པརིཉྙཱཧི ཏཎྷཾ པརིཛཱནིཏྭཱ། སེསཾ སབྦཏྠ པུབྦེ ཝུཏྟནཡཏྟཱ པཱཀཊམེཝ།
51. Tattha nivutāti ovuṭā pariyonaddhā. Ye sīdhāti ye su idha, ettha ca su-iti nipātamattaṃ. Taṇhaṃ pariññāyāti tīhi pariññāhi taṇhaṃ parijānitvā. Sesaṃ sabbattha pubbe vuttanayattā pākaṭameva.
༥༢. ཨེཝཾ བྷགཝཱ ཨརཧཏྟནིཀཱུཊེནེཝ དེསནཾ ནིཊྛཱཔེསི, དེསནཱཔརིཡོསཱནེ པན ནནྡོ བྷགཝཏོ བྷཱསིཏཾ ཨབྷིནནྡམཱནོ ཨེཏཱབྷིནནྡཱམཱིཏི གཱཐམཱཧ། ཨིདྷཱཔི ཙ པུབྦེ ཝུཏྟསདིསོ ཨེཝ དྷམྨཱབྷིསམཡོ ཨཧོསཱིཏི།
52. Evaṃ bhagavā arahattanikūṭeneva desanaṃ niṭṭhāpesi, desanāpariyosāne pana nando bhagavato bhāsitaṃ abhinandamāno etābhinandāmīti gāthamāha. Idhāpi ca pubbe vuttasadiso eva dhammābhisamayo ahosīti.
སདྡྷམྨཔྤཛྫོཏིཀཱཡ ཙཱུལ༹ནིདྡེས-ཨཊྛཀཐཱཡ
Saddhammappajjotikāya cūḷaniddesa-aṭṭhakathāya
ནནྡམཱཎཝསུཏྟནིདྡེསཝཎྞནཱ ནིཊྛིཏཱ།
Nandamāṇavasuttaniddesavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཙཱུལ༹ནིདྡེསཔཱལི༹ • Cūḷaniddesapāḷi
༧. ནནྡམཱཎཝཔུཙྪཱ • 7. Nandamāṇavapucchā
༧. ནནྡམཱཎཝཔུཙྪཱནིདྡེསོ • 7. Nandamāṇavapucchāniddeso
