| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೧೦. ನನ್ದಕಲಿಚ್ಛವಿಸುತ್ತಂ
10. Nandakalicchavisuttaṃ
೧೦೨೬. ಏಕಂ ಸಮಯಂ ಭಗವಾ ವೇಸಾಲಿಯಂ ವಿಹರತಿ ಮಹಾವನೇ ಕೂಟಾಗಾರಸಾಲಾಯಂ। ಅಥ ಖೋ ನನ್ದಕೋ ಲಿಚ್ಛವಿಮಹಾಮತ್ತೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನಂ ಖೋ ನನ್ದಕಂ ಲಿಚ್ಛವಿಮಹಾಮತ್ತಂ ಭಗವಾ ಏತದವೋಚ –
1026. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho nandako licchavimahāmatto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho nandakaṃ licchavimahāmattaṃ bhagavā etadavoca –
‘‘ಚತೂಹಿ ಖೋ, ನನ್ದಕ, ಧಮ್ಮೇಹಿ ಸಮನ್ನಾಗತೋ ಅರಿಯಸಾವಕೋ ಸೋತಾಪನ್ನೋ ಹೋತಿ ಅವಿನಿಪಾತಧಮ್ಮೋ ನಿಯತೋ ಸಮ್ಬೋಧಿಪರಾಯಣೋ। ಕತಮೇಹಿ ಚತೂಹಿ? ಇಧ, ನನ್ದಕ, ಅರಿಯಸಾವಕೋ ಬುದ್ಧೇ ಅವೇಚ್ಚಪ್ಪಸಾದೇನ ಸಮನ್ನಾಗತೋ ಹೋತಿ – ಇತಿಪಿ ಸೋ ಭಗವಾ…ಪೇ॰… ಸತ್ಥಾ ದೇವಮನುಸ್ಸಾನಂ ಬುದ್ಧೋ ಭಗವಾತಿ। ಧಮ್ಮೇ…ಪೇ॰… ಸಙ್ಘೇ…ಪೇ॰… ಅರಿಯಕನ್ತೇಹಿ ಸೀಲೇಹಿ ಸಮನ್ನಾಗತೋ ಹೋತಿ ಅಖಣ್ಡೇಹಿ…ಪೇ॰… ಸಮಾಧಿಸಂವತ್ತನಿಕೇಹಿ। ಇಮೇಹಿ ಖೋ, ನನ್ದಕ, ಚತೂಹಿ ಧಮ್ಮೇಹಿ ಸಮನ್ನಾಗತೋ ಅರಿಯಸಾವಕೋ ಸೋತಾಪನ್ನೋ ಹೋತಿ ಅವಿನಿಪಾತಧಮ್ಮೋ ನಿಯತೋ ಸಮ್ಬೋಧಿಪರಾಯಣೋ।
‘‘Catūhi kho, nandaka, dhammehi samannāgato ariyasāvako sotāpanno hoti avinipātadhammo niyato sambodhiparāyaṇo. Katamehi catūhi? Idha, nandaka, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Imehi kho, nandaka, catūhi dhammehi samannāgato ariyasāvako sotāpanno hoti avinipātadhammo niyato sambodhiparāyaṇo.
‘‘ಇಮೇಹಿ ಚ ಪನ, ನನ್ದಕ, ಚತೂಹಿ ಧಮ್ಮೇಹಿ ಸಮನ್ನಾಗತೋ ಅರಿಯಸಾವಕೋ ಆಯುನಾ ಸಂಯುತ್ತೋ ಹೋತಿ ದಿಬ್ಬೇನಪಿ ಮಾನುಸೇನಪಿ; ವಣ್ಣೇನ ಸಂಯುತ್ತೋ ಹೋತಿ ದಿಬ್ಬೇನಪಿ ಮಾನುಸೇನಪಿ; ಸುಖೇನ ಸಂಯುತ್ತೋ ಹೋತಿ ದಿಬ್ಬೇನಪಿ ಮಾನುಸೇನಪಿ; ಯಸೇನ ಸಂಯುತ್ತೋ ಹೋತಿ ದಿಬ್ಬೇನಪಿ ಮಾನುಸೇನಪಿ; ಆಧಿಪತೇಯ್ಯೇನ ಸಂಯುತ್ತೋ ಹೋತಿ ದಿಬ್ಬೇನಪಿ ಮಾನುಸೇನಪಿ। ತಂ ಖೋ ಪನಾಹಂ, ನನ್ದಕ , ನಾಞ್ಞಸ್ಸ ಸಮಣಸ್ಸ ವಾ ಬ್ರಾಹ್ಮಣಸ್ಸ ವಾ ಸುತ್ವಾ ವದಾಮಿ। ಅಪಿ ಚ ಯದೇವ ಮಯಾ ಸಾಮಂ ಞಾತಂ ಸಾಮಂ ದಿಟ್ಠಂ ಸಾಮಂ ವಿದಿತಂ, ತದೇವಾಹಂ ವದಾಮೀ’’ತಿ।
‘‘Imehi ca pana, nandaka, catūhi dhammehi samannāgato ariyasāvako āyunā saṃyutto hoti dibbenapi mānusenapi; vaṇṇena saṃyutto hoti dibbenapi mānusenapi; sukhena saṃyutto hoti dibbenapi mānusenapi; yasena saṃyutto hoti dibbenapi mānusenapi; ādhipateyyena saṃyutto hoti dibbenapi mānusenapi. Taṃ kho panāhaṃ, nandaka , nāññassa samaṇassa vā brāhmaṇassa vā sutvā vadāmi. Api ca yadeva mayā sāmaṃ ñātaṃ sāmaṃ diṭṭhaṃ sāmaṃ viditaṃ, tadevāhaṃ vadāmī’’ti.
ಏವಂ ವುತ್ತೇ ಅಞ್ಞತರೋ ಪುರಿಸೋ ನನ್ದಕಂ ಲಿಚ್ಛವಿಮಹಾಮತ್ತಂ ಏತದವೋಚ – ‘‘ನಹಾನಕಾಲೋ, ಭನ್ತೇ’’ತಿ। ‘‘ಅಲಂ ದಾನಿ, ಭಣೇ, ಏತೇನ ಬಾಹಿರೇನ ನಹಾನೇನ। ಅಲಮಿದಂ ಅಜ್ಝತ್ತಂ ನಹಾನಂ ಭವಿಸ್ಸತಿ, ಯದಿದಂ – ಭಗವತಿ ಪಸಾದೋ’’ತಿ। ದಸಮಂ।
Evaṃ vutte aññataro puriso nandakaṃ licchavimahāmattaṃ etadavoca – ‘‘nahānakālo, bhante’’ti. ‘‘Alaṃ dāni, bhaṇe, etena bāhirena nahānena. Alamidaṃ ajjhattaṃ nahānaṃ bhavissati, yadidaṃ – bhagavati pasādo’’ti. Dasamaṃ.
ಸರಣಾನಿವಗ್ಗೋ ತತಿಯೋ।
Saraṇānivaggo tatiyo.
ತಸ್ಸುದ್ದಾನಂ –
Tassuddānaṃ –
ಮಹಾನಾಮೇನ ದ್ವೇ ವುತ್ತಾ, ಗೋಧಾ ಚ ಸರಣಾ ದುವೇ।
Mahānāmena dve vuttā, godhā ca saraṇā duve;
ದುವೇ ಅನಾಥಪಿಣ್ಡಿಕಾ, ದುವೇ ವೇರಭಯೇನ ಚ।
Duve anāthapiṇḍikā, duve verabhayena ca;
ಲಿಚ್ಛವೀ ದಸಮೋ ವುತ್ತೋ, ವಗ್ಗೋ ತೇನ ಪವುಚ್ಚತೀತಿ॥
Licchavī dasamo vutto, vaggo tena pavuccatīti.
