| Library / Tipiṭaka / තිපිටක • Tipiṭaka / කථාවත්ථුපාළි • Kathāvatthupāḷi |
20. වීසතිමවග්ගො
20. Vīsatimavaggo
(195) 2. ඤාණකථා
(195) 2. Ñāṇakathā
863. නත්ථි පුථුජ්ජනස්ස ඤාණන්ති? ආමන්තා. නත්ථි පුථුජ්ජනස්ස පඤ්ඤා පජානනා විචයො පවිචයො ධම්මවිචයො සල්ලක්ඛණා උපලක්ඛණා පච්චුපලක්ඛණාති? න හෙවං වත්තබ්බෙ…පෙ.… නනු අත්ථි පුථුජ්ජනස්ස පඤ්ඤා පජානනා විචයො…පෙ.… පච්චුපලක්ඛණාති? ආමන්තා. හඤ්චි අත්ථි පුථුජ්ජනස්ස පඤ්ඤා පජානනා විචයො…පෙ.… පච්චුපලක්ඛණා, නො ච වත රෙ වත්තබ්බෙ – ‘‘නත්ථි පුථුජ්ජනස්ස ඤාණ’’න්ති.
863. Natthi puthujjanassa ñāṇanti? Āmantā. Natthi puthujjanassa paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇāti? Na hevaṃ vattabbe…pe… nanu atthi puthujjanassa paññā pajānanā vicayo…pe… paccupalakkhaṇāti? Āmantā. Hañci atthi puthujjanassa paññā pajānanā vicayo…pe… paccupalakkhaṇā, no ca vata re vattabbe – ‘‘natthi puthujjanassa ñāṇa’’nti.
864. නත්ථි පුථුජ්ජනස්ස ඤාණන්ති? ආමන්තා. පුථුජ්ජනො පඨමං ඣානං සමාපජ්ජෙය්යාති? ආමන්තා. හඤ්චි පුථුජ්ජනො පඨමං ඣානං සමාපජ්ජෙය්ය, නො ච වත රෙ වත්තබ්බෙ – ‘‘නත්ථි පුථුජ්ජනස්ස ඤාණ’’න්ති.
864. Natthi puthujjanassa ñāṇanti? Āmantā. Puthujjano paṭhamaṃ jhānaṃ samāpajjeyyāti? Āmantā. Hañci puthujjano paṭhamaṃ jhānaṃ samāpajjeyya, no ca vata re vattabbe – ‘‘natthi puthujjanassa ñāṇa’’nti.
පුථුජ්ජනො දුතියං ඣානං…පෙ.… තතියං ඣානං…පෙ.… චතුත්ථං ඣානං…පෙ.… ආකාසානඤ්චායතනං සමාපජ්ජෙය්ය, විඤ්ඤාණඤ්චායතනං ආකිඤ්චඤ්ඤායතනං නෙවසඤ්ඤානාසඤ්ඤායතනං සමාපජ්ජෙය්ය, පුථුජ්ජනො දානං දදෙය්ය …පෙ.… චීවරං දදෙය්ය, පිණ්ඩපාතං දදෙය්ය, සෙනාසනං දදෙය්ය, ගිලානපච්චයභෙසජ්ජපරික්ඛාරං දදෙය්යාති? ආමන්තා. හඤ්චි පුථුජ්ජනො ගිලානපච්චයභෙසජ්ජපරික්ඛාරං දදෙය්ය, නො ච වත රෙ වත්තබ්බෙ – නත්ථි පුථුජ්ජනස්ස ඤාණ’’න්ති.
Puthujjano dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ…pe… ākāsānañcāyatanaṃ samāpajjeyya, viññāṇañcāyatanaṃ ākiñcaññāyatanaṃ nevasaññānāsaññāyatanaṃ samāpajjeyya, puthujjano dānaṃ dadeyya …pe… cīvaraṃ dadeyya, piṇḍapātaṃ dadeyya, senāsanaṃ dadeyya, gilānapaccayabhesajjaparikkhāraṃ dadeyyāti? Āmantā. Hañci puthujjano gilānapaccayabhesajjaparikkhāraṃ dadeyya, no ca vata re vattabbe – natthi puthujjanassa ñāṇa’’nti.
865. අත්ථි පුථුජ්ජනස්ස ඤාණන්ති? ආමන්තා. පුථුජ්ජනො තෙන ඤාණෙන දුක්ඛං පරිජානාති , සමුදයං පජහති, නිරොධං සච්ඡිකරොති, මග්ගං භාවෙතීති? න හෙවං වත්තබ්බෙ…පෙ.….
865. Atthi puthujjanassa ñāṇanti? Āmantā. Puthujjano tena ñāṇena dukkhaṃ parijānāti , samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
ඤාණකථා නිට්ඨිතා.
Ñāṇakathā niṭṭhitā.
Related texts:
අට්ඨකථා • Aṭṭhakathā / අභිධම්මපිටක (අට්ඨකථා) • Abhidhammapiṭaka (aṭṭhakathā) / පඤ්චපකරණ-අට්ඨකථා • Pañcapakaraṇa-aṭṭhakathā / 2. ඤාණකථාවණ්ණනා • 2. Ñāṇakathāvaṇṇanā
ටීකා • Tīkā / අභිධම්මපිටක (ටීකා) • Abhidhammapiṭaka (ṭīkā) / පඤ්චපකරණ-මූලටීකා • Pañcapakaraṇa-mūlaṭīkā / 2. ඤාණකථාවණ්ණනා • 2. Ñāṇakathāvaṇṇanā
ටීකා • Tīkā / අභිධම්මපිටක (ටීකා) • Abhidhammapiṭaka (ṭīkā) / පඤ්චපකරණ-අනුටීකා • Pañcapakaraṇa-anuṭīkā / 2. ඤාණකථාවණ්ණනා • 2. Ñāṇakathāvaṇṇanā
