| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၆. နာနာဓမ္မာနံ ဧကကိစ္စအဘိနိပ္ဖာဒနပဉ္ဟော
16. Nānādhammānaṃ ekakiccaabhinipphādanapañho
၁၆. ရာဇာ အာဟ ‘‘ဘန္တေ နာဂသေန, ဣမေ ဓမ္မာ နာနာ သန္တာ ဧကံ အတ္ထံ အဘိနိပ္ဖာဒေန္တီ’’တိ? ‘‘အာမ, မဟာရာဇ, ဣမေ ဓမ္မာ နာနာ သန္တာ ဧကံ အတ္ထံ အဘိနိပ္ဖာဒေန္တိ, ကိလေသေ ဟနန္တီ’’တိ။
16. Rājā āha ‘‘bhante nāgasena, ime dhammā nānā santā ekaṃ atthaṃ abhinipphādentī’’ti? ‘‘Āma, mahārāja, ime dhammā nānā santā ekaṃ atthaṃ abhinipphādenti, kilese hanantī’’ti.
‘‘ကထံ, ဘန္တေ, ဣမေ ဓမ္မာ နာနာ သန္တာ ဧကံ အတ္ထံ အဘိနိပ္ဖာဒေန္တိ, ကိလေသေ ဟနန္တိ? ဩပမ္မံ ကရောဟီ’’တိ။ ‘‘ယထာ, မဟာရာဇ, သေနာ နာနာ သန္တာ ဟတ္ထီ စ အသ္သာ စ ရထာ စ ပတ္တီ စ ဧကံ အတ္ထံ အဘိနိပ္ဖာဒေန္တိ, သင္ဂာမေ ပရသေနံ အဘိဝိဇိနန္တိ။ ဧဝမေဝ ခော, မဟာရာဇ, ဣမေ ဓမ္မာ နာနာ သန္တာ ဧကံ အတ္ထံ အဘိနိပ္ဖာဒေန္တိ, ကိလေသေ ဟနန္တီ’’တိ။
‘‘Kathaṃ, bhante, ime dhammā nānā santā ekaṃ atthaṃ abhinipphādenti, kilese hananti? Opammaṃ karohī’’ti. ‘‘Yathā, mahārāja, senā nānā santā hatthī ca assā ca rathā ca pattī ca ekaṃ atthaṃ abhinipphādenti, saṅgāme parasenaṃ abhivijinanti. Evameva kho, mahārāja, ime dhammā nānā santā ekaṃ atthaṃ abhinipphādenti, kilese hanantī’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
နာနာဓမ္မာနံ ဧကကိစ္စအဘိနိပ္ဖာဒနပဉ္ဟော သောဠသမော။
Nānādhammānaṃ ekakiccaabhinipphādanapañho soḷasamo.
မဟာဝဂ္ဂော ပဌမော။
Mahāvaggo paṭhamo.
ဣမသ္မိံ ဝဂ္ဂေ သောဠသ ပဉ္ဟာ။
Imasmiṃ vagge soḷasa pañhā.
