| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૧૬. નાનાધમ્માનં એકકિચ્ચઅભિનિપ્ફાદનપઞ્હો
16. Nānādhammānaṃ ekakiccaabhinipphādanapañho
૧૬. રાજા આહ ‘‘ભન્તે નાગસેન, ઇમે ધમ્મા નાના સન્તા એકં અત્થં અભિનિપ્ફાદેન્તી’’તિ? ‘‘આમ, મહારાજ, ઇમે ધમ્મા નાના સન્તા એકં અત્થં અભિનિપ્ફાદેન્તિ, કિલેસે હનન્તી’’તિ.
16. Rājā āha ‘‘bhante nāgasena, ime dhammā nānā santā ekaṃ atthaṃ abhinipphādentī’’ti? ‘‘Āma, mahārāja, ime dhammā nānā santā ekaṃ atthaṃ abhinipphādenti, kilese hanantī’’ti.
‘‘કથં, ભન્તે, ઇમે ધમ્મા નાના સન્તા એકં અત્થં અભિનિપ્ફાદેન્તિ, કિલેસે હનન્તિ? ઓપમ્મં કરોહી’’તિ. ‘‘યથા, મહારાજ, સેના નાના સન્તા હત્થી ચ અસ્સા ચ રથા ચ પત્તી ચ એકં અત્થં અભિનિપ્ફાદેન્તિ, સઙ્ગામે પરસેનં અભિવિજિનન્તિ. એવમેવ ખો, મહારાજ, ઇમે ધમ્મા નાના સન્તા એકં અત્થં અભિનિપ્ફાદેન્તિ, કિલેસે હનન્તી’’તિ.
‘‘Kathaṃ, bhante, ime dhammā nānā santā ekaṃ atthaṃ abhinipphādenti, kilese hananti? Opammaṃ karohī’’ti. ‘‘Yathā, mahārāja, senā nānā santā hatthī ca assā ca rathā ca pattī ca ekaṃ atthaṃ abhinipphādenti, saṅgāme parasenaṃ abhivijinanti. Evameva kho, mahārāja, ime dhammā nānā santā ekaṃ atthaṃ abhinipphādenti, kilese hanantī’’ti.
‘‘કલ્લોસિ, ભન્તે નાગસેના’’તિ.
‘‘Kallosi, bhante nāgasenā’’ti.
નાનાધમ્માનં એકકિચ્ચઅભિનિપ્ફાદનપઞ્હો સોળસમો.
Nānādhammānaṃ ekakiccaabhinipphādanapañho soḷasamo.
મહાવગ્ગો પઠમો.
Mahāvaggo paṭhamo.
ઇમસ્મિં વગ્ગે સોળસ પઞ્હા.
Imasmiṃ vagge soḷasa pañhā.
