| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
१८. नग्गनिद्देसवण्णना
18. Nagganiddesavaṇṇanā
१६६. ‘‘न त्वेव नग्गेन आगन्तब्बं, यो आगच्छेय्य, आपत्ति दुक्कटस्सा’’ति (पारा॰ ५१७) वुत्तत्ता (चूळव॰ २६१;) ‘‘नग्गो मग्गं न वजे’’ति वुत्तं।
166. ‘‘Na tveva naggena āgantabbaṃ, yo āgaccheyya, āpatti dukkaṭassā’’ti (pārā. 517) vuttattā (cūḷava. 261;) ‘‘naggo maggaṃ na vaje’’ti vuttaṃ.
१६७. पटिच्छादिसूति ‘‘तेन खो पन समयेन भिक्खू जन्ताघरेपि उदकेपि परिकम्मं कातुं कुक्कुच्चायन्ति। अनुजानामि, भिक्खवे, तिस्सो पटिच्छादियो जन्ताघरप्पटिच्छादिं उदकप्पटिच्छादिं वत्थप्पटिच्छादि’’न्ति एवं वुत्तासु तीसु पटिच्छादीसूति अत्थो। दुवेति एतासु तीसु पटिच्छादीसु उदकजन्ताघरप्पटिच्छादियो परिकम्मे कप्पन्तीति अधिप्पायो। वत्थच्छादीति वत्थप्पटिच्छादि। सब्बत्थाति खादनीयसायनीयादीसु सब्बकम्मेसु कप्पियाति अत्थो। नग्गविनिच्छयो।
167.Paṭicchādisūti ‘‘tena kho pana samayena bhikkhū jantāgharepi udakepi parikammaṃ kātuṃ kukkuccāyanti. Anujānāmi, bhikkhave, tisso paṭicchādiyo jantāgharappaṭicchādiṃ udakappaṭicchādiṃ vatthappaṭicchādi’’nti evaṃ vuttāsu tīsu paṭicchādīsūti attho. Duveti etāsu tīsu paṭicchādīsu udakajantāgharappaṭicchādiyo parikamme kappantīti adhippāyo. Vatthacchādīti vatthappaṭicchādi. Sabbatthāti khādanīyasāyanīyādīsu sabbakammesu kappiyāti attho. Naggavinicchayo.
नग्गनिद्देसवण्णना निट्ठिता।
Nagganiddesavaṇṇanā niṭṭhitā.
