| Library / Tipiṭaka / තිපිටක • Tipiṭaka / විමානවත්ථුපාළි • Vimānavatthupāḷi |
3. නාගවිමානවත්ථු
3. Nāgavimānavatthu
705.
705.
‘‘අලඞ්කතා මණිකඤ්චනාචිතං, සොවණ්ණජාලචිතං මහන්තං;
‘‘Alaṅkatā maṇikañcanācitaṃ, sovaṇṇajālacitaṃ mahantaṃ;
අභිරුය්හ ගජවරං සුකප්පිතං, ඉධාගමා වෙහායසං 1 අන්තලික්ඛෙ.
Abhiruyha gajavaraṃ sukappitaṃ, idhāgamā vehāyasaṃ 2 antalikkhe.
706.
706.
‘‘නාගස්ස දන්තෙසු දුවෙසු නිම්මිතා, අච්ඡොදකා 3 පදුමිනියො සුඵුල්ලා;
‘‘Nāgassa dantesu duvesu nimmitā, acchodakā 4 paduminiyo suphullā;
පදුමෙසු ච තුරියගණා පභිජ්ජරෙ, ඉමා ච නච්චන්ති මනොහරායො.
Padumesu ca turiyagaṇā pabhijjare, imā ca naccanti manoharāyo.
707.
707.
‘‘දෙවිද්ධිපත්තාසි මහානුභාවෙ, මනුස්සභූතා කිමකාසි පුඤ්ඤං;
‘‘Deviddhipattāsi mahānubhāve, manussabhūtā kimakāsi puññaṃ;
කෙනාසි එවං ජලිතානුභාවා, වණ්ණො ච තෙ සබ්බදිසා පභාසතී’’ති.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
708.
708.
‘‘බාරාණසියං උපසඞ්කමිත්වා, බුද්ධස්සහං වත්ථයුගං අදාසිං;
‘‘Bārāṇasiyaṃ upasaṅkamitvā, buddhassahaṃ vatthayugaṃ adāsiṃ;
පාදානි වන්දිත්වා 5 ඡමා නිසීදිං, විත්තා චහං අඤ්ජලිකං අකාසිං.
Pādāni vanditvā 6 chamā nisīdiṃ, vittā cahaṃ añjalikaṃ akāsiṃ.
709.
709.
‘‘බුද්ධො ච මෙ කඤ්චනසන්නිභත්තචො, අදෙසයි සමුදයදුක්ඛනිච්චතං;
‘‘Buddho ca me kañcanasannibhattaco, adesayi samudayadukkhaniccataṃ;
අසඞ්ඛතං දුක්ඛනිරොධසස්සතං, මග්ගං අදෙසයි 7 යතො විජානිසං;
Asaṅkhataṃ dukkhanirodhasassataṃ, maggaṃ adesayi 8 yato vijānisaṃ;
710.
710.
‘‘අප්පායුකී කාලකතා තතො චුතා, උපපන්නා තිදසගණං යසස්සිනී;
‘‘Appāyukī kālakatā tato cutā, upapannā tidasagaṇaṃ yasassinī;
සක්කස්සහං අඤ්ඤතරා පජාපති, යසුත්තරා නාම දිසාසු විස්සුතා’’ති.
Sakkassahaṃ aññatarā pajāpati, yasuttarā nāma disāsu vissutā’’ti.
නාගවිමානං තතියං.
Nāgavimānaṃ tatiyaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / විමානවත්ථු-අට්ඨකථා • Vimānavatthu-aṭṭhakathā / 3. නාගවිමානවණ්ණනා • 3. Nāgavimānavaṇṇanā
