| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
३. नागविमानवत्थु
3. Nāgavimānavatthu
७०५.
705.
‘‘अलङ्कता मणिकञ्चनाचितं, सोवण्णजालचितं महन्तं।
‘‘Alaṅkatā maṇikañcanācitaṃ, sovaṇṇajālacitaṃ mahantaṃ;
अभिरुय्ह गजवरं सुकप्पितं, इधागमा वेहायसं 1 अन्तलिक्खे॥
Abhiruyha gajavaraṃ sukappitaṃ, idhāgamā vehāyasaṃ 2 antalikkhe.
७०६.
706.
‘‘नागस्स दन्तेसु दुवेसु निम्मिता, अच्छोदका 3 पदुमिनियो सुफुल्ला।
‘‘Nāgassa dantesu duvesu nimmitā, acchodakā 4 paduminiyo suphullā;
पदुमेसु च तुरियगणा पभिज्जरे, इमा च नच्चन्ति मनोहरायो॥
Padumesu ca turiyagaṇā pabhijjare, imā ca naccanti manoharāyo.
७०७.
707.
‘‘देविद्धिपत्तासि महानुभावे, मनुस्सभूता किमकासि पुञ्ञं।
‘‘Deviddhipattāsi mahānubhāve, manussabhūtā kimakāsi puññaṃ;
केनासि एवं जलितानुभावा, वण्णो च ते सब्बदिसा पभासती’’ति॥
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
७०८.
708.
‘‘बाराणसियं उपसङ्कमित्वा, बुद्धस्सहं वत्थयुगं अदासिं।
‘‘Bārāṇasiyaṃ upasaṅkamitvā, buddhassahaṃ vatthayugaṃ adāsiṃ;
पादानि वन्दित्वा 5 छमा निसीदिं, वित्ता चहं अञ्जलिकं अकासिं॥
Pādāni vanditvā 6 chamā nisīdiṃ, vittā cahaṃ añjalikaṃ akāsiṃ.
७०९.
709.
‘‘बुद्धो च मे कञ्चनसन्निभत्तचो, अदेसयि समुदयदुक्खनिच्चतं।
‘‘Buddho ca me kañcanasannibhattaco, adesayi samudayadukkhaniccataṃ;
असङ्खतं दुक्खनिरोधसस्सतं, मग्गं अदेसयि 7 यतो विजानिसं।
Asaṅkhataṃ dukkhanirodhasassataṃ, maggaṃ adesayi 8 yato vijānisaṃ;
७१०.
710.
‘‘अप्पायुकी कालकता ततो चुता, उपपन्ना तिदसगणं यसस्सिनी।
‘‘Appāyukī kālakatā tato cutā, upapannā tidasagaṇaṃ yasassinī;
सक्कस्सहं अञ्ञतरा पजापति, यसुत्तरा नाम दिसासु विस्सुता’’ति॥
Sakkassahaṃ aññatarā pajāpati, yasuttarā nāma disāsu vissutā’’ti.
नागविमानं ततियं।
Nāgavimānaṃ tatiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / ३. नागविमानवण्णना • 3. Nāgavimānavaṇṇanā
