| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
নগন্তব্বগন্তব্বৰারকথা
Nagantabbagantabbavārakathā
১৮১. সভিক্খুকা আৰাসাতি যস্মিং আৰাসে উপোসথকারকা ভিক্খূ অত্থি, তম্হা আৰাসা যং ন সক্কোতি তদহেৰ আগন্তুং , সো আৰাসো উপোসথং অকত্ৰা ন গন্তব্বো। অঞ্ঞত্র সঙ্ঘেনাতি সঙ্ঘপ্পহোনকেহি ভিক্খূহি ৰিনা। অঞ্ঞত্র অন্তরাযাতি পুব্বে ৰুত্তং দসৰিধং অন্তরাযং ৰিনা। সব্বন্তিমেন পন পরিচ্ছেদেন অত্তচতুত্থেন অন্তরাযে ৰা সতি গন্তুং ৰট্টতি। অনাৰাসোতি নৰকম্মসালাদিকো যো কোচি পদেসো। যথা চ আৰাসাদযো ন গন্তব্বা; এৰং সচে ৰিহারে উপোসথং করোন্তি, উপোসথাধিট্ঠানত্থং সীমাপি নদীপি ন গন্তব্বা। সচে পনেত্থ কোচি ভিক্খু হোতি, তস্স সন্তিকং গন্তুং ৰট্টতি। ৰিস্সট্ঠউপোসথাপি আৰাসা গন্তুং ৰট্টতি; এৰং গতো অধিট্ঠাতুম্পি লভতি। আরঞ্ঞকেনাপি ভিক্খুনা উপোসথদিৰসে গামে পিণ্ডায চরিত্ৰা অত্তনো ৰিহারমেৰ আগন্তব্বং। সচে অঞ্ঞং ৰিহারং ওক্কমতি, তত্থ উপোসথং কত্ৰাৰ আগন্তব্বং, অকত্ৰা ন ৰট্টতি।
181.Sabhikkhukā āvāsāti yasmiṃ āvāse uposathakārakā bhikkhū atthi, tamhā āvāsā yaṃ na sakkoti tadaheva āgantuṃ , so āvāso uposathaṃ akatvā na gantabbo. Aññatra saṅghenāti saṅghappahonakehi bhikkhūhi vinā. Aññatra antarāyāti pubbe vuttaṃ dasavidhaṃ antarāyaṃ vinā. Sabbantimena pana paricchedena attacatutthena antarāye vā sati gantuṃ vaṭṭati. Anāvāsoti navakammasālādiko yo koci padeso. Yathā ca āvāsādayo na gantabbā; evaṃ sace vihāre uposathaṃ karonti, uposathādhiṭṭhānatthaṃ sīmāpi nadīpi na gantabbā. Sace panettha koci bhikkhu hoti, tassa santikaṃ gantuṃ vaṭṭati. Vissaṭṭhauposathāpi āvāsā gantuṃ vaṭṭati; evaṃ gato adhiṭṭhātumpi labhati. Āraññakenāpi bhikkhunā uposathadivase gāme piṇḍāya caritvā attano vihārameva āgantabbaṃ. Sace aññaṃ vihāraṃ okkamati, tattha uposathaṃ katvāva āgantabbaṃ, akatvā na vaṭṭati.
১৮২. যং জঞ্ঞা সক্কোমি অজ্জেৰ গন্তুন্তি যং জানেয্য অজ্জেৰ তত্থ গন্তুং সক্কোমীতি; এৰরূপো আৰাসো গন্তব্বো। তত্থ ভিক্খূহি সদ্ধিং উপোসথং করোন্তেনাপি হি ইমিনা নেৰ উপোসথন্তরাযো কতো ভৰিস্সতীতি।
182.Yaṃ jaññā sakkomi ajjeva gantunti yaṃ jāneyya ajjeva tattha gantuṃ sakkomīti; evarūpo āvāso gantabbo. Tattha bhikkhūhi saddhiṃ uposathaṃ karontenāpi hi iminā neva uposathantarāyo kato bhavissatīti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১০৩. নগন্তব্বৰারো • 103. Nagantabbavāro
১০৪. গন্তব্বৰারো • 104. Gantabbavāro
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / নগন্তব্বগন্তব্বৰারকথাৰণ্ণনা • Nagantabbagantabbavārakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / নগন্তব্বগন্তব্বৰারকথাৰণ্ণনা • Nagantabbagantabbavārakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / লিঙ্গাদিদস্সনকথাদিৰণ্ণনা • Liṅgādidassanakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১০৩. নগন্তব্বগন্তব্বৰারকথা • 103. Nagantabbagantabbavārakathā
