| Library / Tipiṭaka / තිපිටක • Tipiṭaka / කථාවත්ථුපාළි • Kathāvatthupāḷi |
17. සත්තරසමවග්ගො
17. Sattarasamavaggo
(173) 8. න වත්තබ්බං සඞ්ඝො භුඤ්ජතීතිකථා
(173) 8. Na vattabbaṃ saṅgho bhuñjatītikathā
795. න වත්තබ්බං – ‘‘සඞ්ඝො භුඤ්ජති පිවති ඛාදති සායතී’’ති? ආමන්තා. නනු අත්ථි කෙචි සඞ්ඝභත්තානි කරොන්ති, උද්දෙසභත්තානි කරොන්ති, යාගුපානානි කරොන්තීති? ආමන්තා. හඤ්චි අත්ථි කෙචි සඞ්ඝභත්තානි කරොන්ති, උද්දෙසභත්තානි කරොන්ති, යාගුපානානි කරොන්ති, තෙන වත රෙ වත්තබ්බෙ – ‘‘සඞ්ඝො භුඤ්ජති පිවති ඛාදති සායතී’’ති.
795. Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu atthi keci saṅghabhattāni karonti, uddesabhattāni karonti, yāgupānāni karontīti? Āmantā. Hañci atthi keci saṅghabhattāni karonti, uddesabhattāni karonti, yāgupānāni karonti, tena vata re vattabbe – ‘‘saṅgho bhuñjati pivati khādati sāyatī’’ti.
න වත්තබ්බං – ‘‘සඞ්ඝො භුඤ්ජති පිවති ඛාදති සායතී’’ති? ආමන්තා. නනු වුත්තං භගවතා – ‘‘ගණභොජනං පරම්පරභොජනං අතිරිත්තභොජනං අනතිරිත්තභොජන’’න්ති? ආමන්තා. හඤ්චි වුත්තං භගවතා – ‘‘ගණභොජනං පරම්පරභොජනං අතිරිත්තභොජනං අනතිරිත්තභොජනං’’, තෙන වත රෙ වත්තබ්බෙ – ‘‘සඞ්ඝො භුඤ්ජති පිවති ඛාදති සායතී’’ති.
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojana’’nti? Āmantā. Hañci vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojanaṃ’’, tena vata re vattabbe – ‘‘saṅgho bhuñjati pivati khādati sāyatī’’ti.
න වත්තබ්බං – ‘‘සඞ්ඝො භුඤ්ජති පිවති ඛාදති සායතී’’ති? ආමන්තා. නනු අට්ඨ පානානි වුත්තානි භගවතා – අම්බපානං, ජම්බුපානං , චොචපානං, මොචපානං, මධුකපානං, 1 මුද්දිකපානං, සාලුකපානං, ඵාරුසකපානන්ති? ආමන්තා. හඤ්චි අට්ඨ පානානි වුත්තානි භගවතා – අම්බපානං, ජම්බුපානං, චොචපානං, මොචපානං, මධුකපානං, මුද්දිකපානං , සාලුකපානං, ඵාරුසකපානං, තෙන වත රෙ වත්තබ්බෙ – ‘‘සඞ්ඝො භුඤ්ජති පිවති ඛාදති සායතී’’ති.
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu aṭṭha pānāni vuttāni bhagavatā – ambapānaṃ, jambupānaṃ , cocapānaṃ, mocapānaṃ, madhukapānaṃ, 2 muddikapānaṃ, sālukapānaṃ, phārusakapānanti? Āmantā. Hañci aṭṭha pānāni vuttāni bhagavatā – ambapānaṃ, jambupānaṃ, cocapānaṃ, mocapānaṃ, madhukapānaṃ, muddikapānaṃ , sālukapānaṃ, phārusakapānaṃ, tena vata re vattabbe – ‘‘saṅgho bhuñjati pivati khādati sāyatī’’ti.
796. සඞ්ඝො භුඤ්ජති පිවති ඛාදති සායතීති? ආමන්තා. මග්ගො භුඤ්ජති පිවති ඛාදති සායති, ඵලං භුඤ්ජති පිවති ඛාදති සායතීති? න හෙවං වත්තබ්බෙ…පෙ.….
796. Saṅgho bhuñjati pivati khādati sāyatīti? Āmantā. Maggo bhuñjati pivati khādati sāyati, phalaṃ bhuñjati pivati khādati sāyatīti? Na hevaṃ vattabbe…pe….
න වත්තබ්බං සඞ්ඝො භුඤ්ජතීතිකථා නිට්ඨිතා.
Na vattabbaṃ saṅgho bhuñjatītikathā niṭṭhitā.
Footnotes:
Related texts:
අට්ඨකථා • Aṭṭhakathā / අභිධම්මපිටක (අට්ඨකථා) • Abhidhammapiṭaka (aṭṭhakathā) / පඤ්චපකරණ-අට්ඨකථා • Pañcapakaraṇa-aṭṭhakathā / 8. න වත්තබ්බං සඞ්ඝො භුඤ්ජතීතිකථාවණ්ණනා • 8. Na vattabbaṃ saṅgho bhuñjatītikathāvaṇṇanā
