| Library / Tipiṭaka / തിപിടക • Tipiṭaka / പരിവാരപാളി • Parivārapāḷi |
൪. പാചിത്തിയകണ്ഡം
4. Pācittiyakaṇḍaṃ
൧. മുസാവാദവഗ്ഗോ
1. Musāvādavaggo
൧൬൫. സമ്പജാനമുസാവാദം ഭാസന്തോ കതി ആപത്തിയോ ആപജ്ജതി? സമ്പജാനമുസാവാദം ഭാസന്തോ പഞ്ച ആപത്തിയോ ആപജ്ജതി. പാപിച്ഛോ ഇച്ഛാപകതോ അസന്തം അഭൂതം ഉത്തരിമനുസ്സധമ്മം ഉല്ലപതി, ആപത്തി പാരാജികസ്സ; ഭിക്ഖും അമൂലകേന പാരാജികേന ധമ്മേന അനുദ്ധംസേതി, ആപത്തി സങ്ഘാദിസേസസ്സ; ‘‘യോ തേ വിഹാരേ വസതി, സോ ഭിക്ഖു അരഹാ’’തി ഭണതി, പടിവിജാനന്തസ്സ ആപത്തി ഥുല്ലച്ചയസ്സ; ന പടിവിജാനന്തസ്സ ആപത്തി ദുക്കടസ്സ; സമ്പജാനമുസാവാദേ പാചിത്തിയം – സമ്പജാനമുസാവാദം ഭാസന്തോ ഇമാ പഞ്ച ആപത്തിയോ ആപജ്ജതി.
165. Sampajānamusāvādaṃ bhāsanto kati āpattiyo āpajjati? Sampajānamusāvādaṃ bhāsanto pañca āpattiyo āpajjati. Pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa; bhikkhuṃ amūlakena pārājikena dhammena anuddhaṃseti, āpatti saṅghādisesassa; ‘‘yo te vihāre vasati, so bhikkhu arahā’’ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa; sampajānamusāvāde pācittiyaṃ – sampajānamusāvādaṃ bhāsanto imā pañca āpattiyo āpajjati.
ഓമസന്തോ ദ്വേ ആപത്തിയോ ആപജ്ജതി. ഉപസമ്പന്നം ഓമസതി, ആപത്തി പാചിത്തിയസ്സ; അനുപസമ്പന്നം ഓമസതി, ആപത്തി ദുക്കടസ്സ.
Omasanto dve āpattiyo āpajjati. Upasampannaṃ omasati, āpatti pācittiyassa; anupasampannaṃ omasati, āpatti dukkaṭassa.
പേസുഞ്ഞം ഉപസംഹരന്തോ ദ്വേ ആപത്തിയോ ആപജ്ജതി. ഉപസമ്പന്നസ്സ പേസുഞ്ഞം ഉപസംഹരതി, ആപത്തി പാചിത്തിയസ്സ; അനുപസമ്പന്നസ്സ പേസുഞ്ഞം ഉപസംഹരതി, ആപത്തി ദുക്കടസ്സ.
Pesuññaṃ upasaṃharanto dve āpattiyo āpajjati. Upasampannassa pesuññaṃ upasaṃharati, āpatti pācittiyassa; anupasampannassa pesuññaṃ upasaṃharati, āpatti dukkaṭassa.
അനുപസമ്പന്നം പദസോ ധമ്മം വാചേന്തോ ദ്വേ ആപത്തിയോ ആപജ്ജതി. വാചേതി, പയോഗേ ദുക്കടം; പദേ പദേ ആപത്തി പാചിത്തിയസ്സ.
Anupasampannaṃ padaso dhammaṃ vācento dve āpattiyo āpajjati. Vāceti, payoge dukkaṭaṃ; pade pade āpatti pācittiyassa.
അനുപസമ്പന്നേന ഉത്തരിദിരത്തതിരത്തം സഹസേയ്യം കപ്പേന്തോ ദ്വേ ആപത്തിയോ ആപജ്ജതി. നിപജ്ജതി, പയോഗേ ദുക്കടം; നിപന്നേ ആപത്തി പാചിത്തിയസ്സ.
Anupasampannena uttaridirattatirattaṃ sahaseyyaṃ kappento dve āpattiyo āpajjati. Nipajjati, payoge dukkaṭaṃ; nipanne āpatti pācittiyassa.
മാതുഗാമേന സഹസേയ്യം കപ്പേന്തോ ദ്വേ ആപത്തിയോ ആപജ്ജതി. നിപജ്ജതി, പയോഗേ ദുക്കടം; നിപന്നേ ആപത്തി പാചിത്തിയസ്സ.
Mātugāmena sahaseyyaṃ kappento dve āpattiyo āpajjati. Nipajjati, payoge dukkaṭaṃ; nipanne āpatti pācittiyassa.
മാതുഗാമസ്സ ഉത്തരിഛപ്പഞ്ചവാചാഹി ധമ്മം ദേസേന്തോ ദ്വേ ആപത്തിയോ ആപജ്ജതി. ദേസേതി, പയോഗേ ദുക്കടം; പദേ പദേ ആപത്തി പാചിത്തിയസ്സ.
Mātugāmassa uttarichappañcavācāhi dhammaṃ desento dve āpattiyo āpajjati. Deseti, payoge dukkaṭaṃ; pade pade āpatti pācittiyassa.
അനുപസമ്പന്നസ്സ ഉത്തരിമനുസ്സധമ്മം ഭൂതം ആരോചേന്തോ ദ്വേ ആപത്തിയോ ആപജ്ജതി. ആരോചേതി, പയോഗേ ദുക്കടം; ആരോചിതേ ആപത്തി പാചിത്തിയസ്സ.
Anupasampannassa uttarimanussadhammaṃ bhūtaṃ ārocento dve āpattiyo āpajjati. Āroceti, payoge dukkaṭaṃ; ārocite āpatti pācittiyassa.
ഭിക്ഖുസ്സ ദുട്ഠുല്ലം ആപത്തിം അനുപസമ്പന്നസ്സ ആരോചേന്തോ ദ്വേ ആപത്തിയോ ആപജ്ജതി. ആരോചേതി, പയോഗേ ദുക്കടം; ആരോചിതേ ആപത്തി പാചിത്തിയസ്സ.
Bhikkhussa duṭṭhullaṃ āpattiṃ anupasampannassa ārocento dve āpattiyo āpajjati. Āroceti, payoge dukkaṭaṃ; ārocite āpatti pācittiyassa.
പഥവിം ഖണന്തോ ദ്വേ ആപത്തിയോ ആപജ്ജതി. ഖണതി, പയോഗേ ദുക്കടം; പഹാരേ പഹാരേ ആപത്തി പാചിത്തിയസ്സ.
Pathaviṃ khaṇanto dve āpattiyo āpajjati. Khaṇati, payoge dukkaṭaṃ; pahāre pahāre āpatti pācittiyassa.
മുസാവാദവഗ്ഗോ പഠമോ.
Musāvādavaggo paṭhamo.
