| Library / Tipiṭaka / તિપિટક • Tipiṭaka / પરિવારપાળિ • Parivārapāḷi |
૪. પાચિત્તિયકણ્ડં
4. Pācittiyakaṇḍaṃ
૧. મુસાવાદવગ્ગો
1. Musāvādavaggo
૧૬૫. સમ્પજાનમુસાવાદં ભાસન્તો કતિ આપત્તિયો આપજ્જતિ? સમ્પજાનમુસાવાદં ભાસન્તો પઞ્ચ આપત્તિયો આપજ્જતિ. પાપિચ્છો ઇચ્છાપકતો અસન્તં અભૂતં ઉત્તરિમનુસ્સધમ્મં ઉલ્લપતિ, આપત્તિ પારાજિકસ્સ; ભિક્ખું અમૂલકેન પારાજિકેન ધમ્મેન અનુદ્ધંસેતિ, આપત્તિ સઙ્ઘાદિસેસસ્સ; ‘‘યો તે વિહારે વસતિ, સો ભિક્ખુ અરહા’’તિ ભણતિ, પટિવિજાનન્તસ્સ આપત્તિ થુલ્લચ્ચયસ્સ; ન પટિવિજાનન્તસ્સ આપત્તિ દુક્કટસ્સ; સમ્પજાનમુસાવાદે પાચિત્તિયં – સમ્પજાનમુસાવાદં ભાસન્તો ઇમા પઞ્ચ આપત્તિયો આપજ્જતિ.
165. Sampajānamusāvādaṃ bhāsanto kati āpattiyo āpajjati? Sampajānamusāvādaṃ bhāsanto pañca āpattiyo āpajjati. Pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa; bhikkhuṃ amūlakena pārājikena dhammena anuddhaṃseti, āpatti saṅghādisesassa; ‘‘yo te vihāre vasati, so bhikkhu arahā’’ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa; sampajānamusāvāde pācittiyaṃ – sampajānamusāvādaṃ bhāsanto imā pañca āpattiyo āpajjati.
ઓમસન્તો દ્વે આપત્તિયો આપજ્જતિ. ઉપસમ્પન્નં ઓમસતિ, આપત્તિ પાચિત્તિયસ્સ; અનુપસમ્પન્નં ઓમસતિ, આપત્તિ દુક્કટસ્સ.
Omasanto dve āpattiyo āpajjati. Upasampannaṃ omasati, āpatti pācittiyassa; anupasampannaṃ omasati, āpatti dukkaṭassa.
પેસુઞ્ઞં ઉપસંહરન્તો દ્વે આપત્તિયો આપજ્જતિ. ઉપસમ્પન્નસ્સ પેસુઞ્ઞં ઉપસંહરતિ, આપત્તિ પાચિત્તિયસ્સ; અનુપસમ્પન્નસ્સ પેસુઞ્ઞં ઉપસંહરતિ, આપત્તિ દુક્કટસ્સ.
Pesuññaṃ upasaṃharanto dve āpattiyo āpajjati. Upasampannassa pesuññaṃ upasaṃharati, āpatti pācittiyassa; anupasampannassa pesuññaṃ upasaṃharati, āpatti dukkaṭassa.
અનુપસમ્પન્નં પદસો ધમ્મં વાચેન્તો દ્વે આપત્તિયો આપજ્જતિ. વાચેતિ, પયોગે દુક્કટં; પદે પદે આપત્તિ પાચિત્તિયસ્સ.
Anupasampannaṃ padaso dhammaṃ vācento dve āpattiyo āpajjati. Vāceti, payoge dukkaṭaṃ; pade pade āpatti pācittiyassa.
અનુપસમ્પન્નેન ઉત્તરિદિરત્તતિરત્તં સહસેય્યં કપ્પેન્તો દ્વે આપત્તિયો આપજ્જતિ. નિપજ્જતિ, પયોગે દુક્કટં; નિપન્ને આપત્તિ પાચિત્તિયસ્સ.
Anupasampannena uttaridirattatirattaṃ sahaseyyaṃ kappento dve āpattiyo āpajjati. Nipajjati, payoge dukkaṭaṃ; nipanne āpatti pācittiyassa.
માતુગામેન સહસેય્યં કપ્પેન્તો દ્વે આપત્તિયો આપજ્જતિ. નિપજ્જતિ, પયોગે દુક્કટં; નિપન્ને આપત્તિ પાચિત્તિયસ્સ.
Mātugāmena sahaseyyaṃ kappento dve āpattiyo āpajjati. Nipajjati, payoge dukkaṭaṃ; nipanne āpatti pācittiyassa.
માતુગામસ્સ ઉત્તરિછપ્પઞ્ચવાચાહિ ધમ્મં દેસેન્તો દ્વે આપત્તિયો આપજ્જતિ. દેસેતિ, પયોગે દુક્કટં; પદે પદે આપત્તિ પાચિત્તિયસ્સ.
Mātugāmassa uttarichappañcavācāhi dhammaṃ desento dve āpattiyo āpajjati. Deseti, payoge dukkaṭaṃ; pade pade āpatti pācittiyassa.
અનુપસમ્પન્નસ્સ ઉત્તરિમનુસ્સધમ્મં ભૂતં આરોચેન્તો દ્વે આપત્તિયો આપજ્જતિ. આરોચેતિ, પયોગે દુક્કટં; આરોચિતે આપત્તિ પાચિત્તિયસ્સ.
Anupasampannassa uttarimanussadhammaṃ bhūtaṃ ārocento dve āpattiyo āpajjati. Āroceti, payoge dukkaṭaṃ; ārocite āpatti pācittiyassa.
ભિક્ખુસ્સ દુટ્ઠુલ્લં આપત્તિં અનુપસમ્પન્નસ્સ આરોચેન્તો દ્વે આપત્તિયો આપજ્જતિ. આરોચેતિ, પયોગે દુક્કટં; આરોચિતે આપત્તિ પાચિત્તિયસ્સ.
Bhikkhussa duṭṭhullaṃ āpattiṃ anupasampannassa ārocento dve āpattiyo āpajjati. Āroceti, payoge dukkaṭaṃ; ārocite āpatti pācittiyassa.
પથવિં ખણન્તો દ્વે આપત્તિયો આપજ્જતિ. ખણતિ, પયોગે દુક્કટં; પહારે પહારે આપત્તિ પાચિત્તિયસ્સ.
Pathaviṃ khaṇanto dve āpattiyo āpajjati. Khaṇati, payoge dukkaṭaṃ; pahāre pahāre āpatti pācittiyassa.
મુસાવાદવગ્ગો પઠમો.
Musāvādavaggo paṭhamo.
