| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
பாசித்தியகண்ட³ங்
Pācittiyakaṇḍaṃ
1. முஸாவாத³வக்³கோ³
1. Musāvādavaggo
1. முஸாவாத³ஸிக்கா²பத³வண்ணனா
1. Musāvādasikkhāpadavaṇṇanā
ஸம்பஜானமுஸாவாதே³தி எத்த² முஸாதி அபூ⁴தங் அதச்ச²ங் வத்து², வாதோ³தி தஸ்ஸ பூ⁴ததோ தச்ச²தோ விஞ்ஞாபனங், ஸம்பஜானஸ்ஸ முஸாவாதோ³ ஸம்பஜானமுஸாவாதோ³, தஸ்மிங் ஸம்பஜானமுஸாவாதே³தி அத்தோ². தேனாஹ ‘‘புப்³பே³’’திஆதி³. ஸோ ச பன முஸாவாதோ³ புப்³ப³பா⁴க³க்க²ணே, தங்க²ணே ச விஜானந்தஸ்ஸ ஹோதி ‘‘புப்³பே³வஸ்ஸ ஹோதி ‘முஸா ப⁴ணிஸ்ஸ’ந்தி, ப⁴ணந்தஸ்ஸ ஹோதி ‘முஸா ப⁴ணாமீ’’’தி (பாசி॰ 4) வுத்தத்தாதி ஆஹ ‘‘புப்³பே³பி ஜானித்வா வசனக்க²ணேபி ஜானந்தஸ்ஸா’’தி. ஏதஞ்ஹி த்³வயங் அங்க³பூ⁴தங், இதரங் பன ஹோது வா, மா வா, அகாரணமேதங். நனு சேதங் ப⁴ணனமேவ ஞாயதீதி ஆஹ ‘‘ப⁴ணனஞ்ச நாமா’’திஆதி³. அபூ⁴தஸ்ஸாதி அதச்ச²ஸ்ஸ.
Sampajānamusāvādeti ettha musāti abhūtaṃ atacchaṃ vatthu, vādoti tassa bhūtato tacchato viññāpanaṃ, sampajānassa musāvādo sampajānamusāvādo, tasmiṃ sampajānamusāvādeti attho. Tenāha ‘‘pubbe’’tiādi. So ca pana musāvādo pubbabhāgakkhaṇe, taṅkhaṇe ca vijānantassa hoti ‘‘pubbevassa hoti ‘musā bhaṇissa’nti, bhaṇantassa hoti ‘musā bhaṇāmī’’’ti (pāci. 4) vuttattāti āha ‘‘pubbepi jānitvā vacanakkhaṇepi jānantassā’’ti. Etañhi dvayaṃ aṅgabhūtaṃ, itaraṃ pana hotu vā, mā vā, akāraṇametaṃ. Nanu cetaṃ bhaṇanameva ñāyatīti āha ‘‘bhaṇanañca nāmā’’tiādi. Abhūtassāti atacchassa.
ஹத்த²கங் ஸக்யபுத்தந்தி எத்த² ஹத்த²கோதி தஸ்ஸ தே²ரஸ்ஸ நாமங். ஸக்யானங் புத்தோதி ஸக்யபுத்தோ. பு³த்³த⁴காலே கிர ஸக்யகுலதோ அஸீதி புரிஸஸஹஸ்ஸானி பப்³ப³ஜிங்ஸு, தேஸங் ஸோ அஞ்ஞதரோ. அவஜானித்வா படிஜானநாதி³வத்து²ஸ்மிந்தி எத்த² அவஜானித்வா படிஜானநங் நாம தித்தி²யேஹி ஸத்³தி⁴ங் கதெ²ந்தோ அத்தனோ வாதே³ கஞ்சி தோ³ஸங் ஸல்லக்கெ²ந்தோ ‘‘நாயங் மம வாதோ³’’தி அவஜானித்வா புன கதெ²ந்தோ கதெ²ந்தோ நித்³தோ³ஸதங் ஸல்லக்கெ²த்வா ‘‘மமேவ அயங் வாதோ³’’தி படிஜானாதி. ஆதி³ஸத்³தே³ன படிஜானித்வா அவஜானநங், அஞ்ஞேனஞ்ஞங் படிசரணங், ஸம்பஜானமுஸாபா⁴ஸனங், ஸங்கேதங் கத்வா விஸங்வாத³கரணஞ்ச ஸங்க³ண்ஹாதி. இதா³னி ஆபத்திபே⁴த³த³ஸ்ஸனத்த²ங் ‘‘உத்தரிமனுஸ்ஸத⁴ம்மாரோசனத்த²’’ந்திஆதி³ வுத்தங்.
Hatthakaṃ sakyaputtanti ettha hatthakoti tassa therassa nāmaṃ. Sakyānaṃ puttoti sakyaputto. Buddhakāle kira sakyakulato asīti purisasahassāni pabbajiṃsu, tesaṃ so aññataro. Avajānitvā paṭijānanādivatthusminti ettha avajānitvā paṭijānanaṃ nāma titthiyehi saddhiṃ kathento attano vāde kañci dosaṃ sallakkhento ‘‘nāyaṃ mama vādo’’ti avajānitvā puna kathento kathento niddosataṃ sallakkhetvā ‘‘mameva ayaṃ vādo’’ti paṭijānāti. Ādisaddena paṭijānitvā avajānanaṃ, aññenaññaṃ paṭicaraṇaṃ, sampajānamusābhāsanaṃ, saṅketaṃ katvā visaṃvādakaraṇañca saṅgaṇhāti. Idāni āpattibhedadassanatthaṃ ‘‘uttarimanussadhammārocanattha’’ntiādi vuttaṃ.
அனுபதா⁴ரெத்வா ஸஹஸா ப⁴ணந்தஸ்ஸாதி அவீமங்ஸித்வா வேகே³ன தி³ட்ட²ம்பி ‘‘அதி³ட்ட²ங் மே’’திஆதி³னா ப⁴ணந்தஸ்ஸ . ‘‘அஞ்ஞங் ப⁴ணிஸ்ஸாமீ’’தி அஞ்ஞங் ப⁴ணந்தஸ்ஸாதி யோ மந்த³த்தா மோமூஹத்தா பக்க²லந்தோ ‘‘சீவர’’ந்தி வத்தப்³பே³ ‘‘சீர’’ந்திஆதீ³னி ப⁴ணதி, அயங் ‘‘அஞ்ஞங் ப⁴ணிஸ்ஸாமீ’’தி அஞ்ஞங் ப⁴ணதி நாம. யோ பன ஸாமணேரேன ‘‘அபி, ப⁴ந்தே, மய்ஹங் உபஜ்ஜா²யங் பஸ்ஸித்தா²’’தி வுத்தோ கேளிங் குருமானோ ‘‘தவ உபஜ்ஜா²யோ தா³ருஸகடங் யோஜெத்வா க³தோ ப⁴விஸ்ஸதீ’’தி வா ஸிங்கா³லஸத்³த³ங் ஸுத்வா ‘‘கஸ்ஸாயங் ஸத்³தோ³’’தி வுத்தோ ‘‘மாதுயா தே யானேன க³ச்ச²ந்தியா கத்³த³மே லக்³க³சக்கங் உத்³த⁴ரந்தானங் அயங் ஸத்³தோ³’’தி வா ஏவங் நேவ த³வா, ந ரவா அஞ்ஞங் ப⁴ணதி, ஸோ ஆபத்திங் ஆபஜ்ஜதியேவ. அஞ்ஞா பூரணகதா² நாம ஹோதி – ஏகோ கா³மே தோ²கங் தேலங் லபி⁴த்வா விஹாரங் ஆக³தோ ஸாமணேரங் ப⁴ணதி ‘‘த்வங் அஜ்ஜ குஹிங் க³தோ, கா³மோ ஏகதேலோ அஹோஸீ’’தி வா, பச்சி²காய ட²பிதங் பூவக²ண்ட³ங் லபி⁴த்வா ‘‘அஜ்ஜ கா³மே பச்சி²காஹி பூவே சாரேஸு’’ந்தி வா, அயங் முஸாவாதோ³வ ஹோதி. விஸங்வாத³னபுரெக்கா²ரதாதி விஸங் வாதெ³ந்தி ஏதேனாதி விஸங்வாத³னங், வஞ்சனாதி⁴ப்பாயவஸப்பவத்தங் சித்தங், தஸ்ஸ புரெக்கா²ரதா விஸங்வாத³னபுரெக்கா²ரதா, விஸங்வாத³னசித்தஸ்ஸ புரதோ கரணந்தி அத்தோ².
Anupadhāretvā sahasā bhaṇantassāti avīmaṃsitvā vegena diṭṭhampi ‘‘adiṭṭhaṃ me’’tiādinā bhaṇantassa . ‘‘Aññaṃ bhaṇissāmī’’ti aññaṃ bhaṇantassāti yo mandattā momūhattā pakkhalanto ‘‘cīvara’’nti vattabbe ‘‘cīra’’ntiādīni bhaṇati, ayaṃ ‘‘aññaṃ bhaṇissāmī’’ti aññaṃ bhaṇati nāma. Yo pana sāmaṇerena ‘‘api, bhante, mayhaṃ upajjhāyaṃ passitthā’’ti vutto keḷiṃ kurumāno ‘‘tava upajjhāyo dārusakaṭaṃ yojetvā gato bhavissatī’’ti vā siṅgālasaddaṃ sutvā ‘‘kassāyaṃ saddo’’ti vutto ‘‘mātuyā te yānena gacchantiyā kaddame laggacakkaṃ uddharantānaṃ ayaṃ saddo’’ti vā evaṃ neva davā, na ravā aññaṃ bhaṇati, so āpattiṃ āpajjatiyeva. Aññā pūraṇakathā nāma hoti – eko gāme thokaṃ telaṃ labhitvā vihāraṃ āgato sāmaṇeraṃ bhaṇati ‘‘tvaṃ ajja kuhiṃ gato, gāmo ekatelo ahosī’’ti vā, pacchikāya ṭhapitaṃ pūvakhaṇḍaṃ labhitvā ‘‘ajja gāme pacchikāhi pūve cāresu’’nti vā, ayaṃ musāvādova hoti. Visaṃvādanapurekkhāratāti visaṃ vādenti etenāti visaṃvādanaṃ, vañcanādhippāyavasappavattaṃ cittaṃ, tassa purekkhāratā visaṃvādanapurekkhāratā, visaṃvādanacittassa purato karaṇanti attho.
முஸாவாத³ஸிக்கா²பத³வண்ணனா நிட்டி²தா.
Musāvādasikkhāpadavaṇṇanā niṭṭhitā.
