| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
១២. មុនិសុត្តំ
12. Munisuttaṃ
២០៩.
209.
អនិកេតមសន្ថវំ, ឯតំ វេ មុនិទស្សនំ។
Aniketamasanthavaṃ, etaṃ ve munidassanaṃ.
២១០.
210.
យោ ជាតមុច្ឆិជ្ជ ន រោបយេយ្យ, ជាយន្តមស្ស នានុប្បវេច្ឆេ;
Yo jātamucchijja na ropayeyya, jāyantamassa nānuppavecche;
តមាហុ ឯកំ មុនិនំ ចរន្តំ, អទ្ទក្ខិ សោ សន្តិបទំ មហេសិ។
Tamāhu ekaṃ muninaṃ carantaṃ, addakkhi so santipadaṃ mahesi.
២១១.
211.
សង្ខាយ វត្ថូនិ បមាយ 3 ពីជំ, សិនេហមស្ស នានុប្បវេច្ឆេ;
Saṅkhāya vatthūni pamāya 4 bījaṃ, sinehamassa nānuppavecche;
ស វេ មុនី ជាតិខយន្តទស្សី, តក្កំ បហាយ ន ឧបេតិ សង្ខំ។
Sa ve munī jātikhayantadassī, takkaṃ pahāya na upeti saṅkhaṃ.
២១២.
212.
អញ្ញាយ សព្ពានិ និវេសនានិ, អនិកាមយំ អញ្ញតរម្បិ តេសំ;
Aññāya sabbāni nivesanāni, anikāmayaṃ aññatarampi tesaṃ;
ស វេ មុនី វីតគេធោ អគិទ្ធោ, នាយូហតី បារគតោ ហិ ហោតិ។
Sa ve munī vītagedho agiddho, nāyūhatī pāragato hi hoti.
២១៣.
213.
សព្ពាភិភុំ សព្ពវិទុំ សុមេធំ, សព្ពេសុ ធម្មេសុ អនូបលិត្តំ;
Sabbābhibhuṃ sabbaviduṃ sumedhaṃ, sabbesu dhammesu anūpalittaṃ;
សព្ពញ្ជហំ តណ្ហក្ខយេ វិមុត្តំ, តំ វាបិ ធីរា មុនិ 5 វេទយន្តិ។
Sabbañjahaṃ taṇhakkhaye vimuttaṃ, taṃ vāpi dhīrā muni 6 vedayanti.
២១៤.
214.
បញ្ញាពលំ សីលវតូបបន្នំ, សមាហិតំ ឈានរតំ សតីមំ;
Paññābalaṃ sīlavatūpapannaṃ, samāhitaṃ jhānarataṃ satīmaṃ;
សង្គា បមុត្តំ អខិលំ អនាសវំ, តំ វាបិ ធីរា មុនិ វេទយន្តិ។
Saṅgā pamuttaṃ akhilaṃ anāsavaṃ, taṃ vāpi dhīrā muni vedayanti.
២១៥.
215.
ឯកំ ចរន្តំ មុនិមប្បមត្តំ, និន្ទាបសំសាសុ អវេធមានំ;
Ekaṃ carantaṃ munimappamattaṃ, nindāpasaṃsāsu avedhamānaṃ;
សីហំវ សទ្ទេសុ អសន្តសន្តំ, វាតំវ ជាលម្ហិ អសជ្ជមានំ;
Sīhaṃva saddesu asantasantaṃ, vātaṃva jālamhi asajjamānaṃ;
តំ វាបិ ធីរា មុនិ វេទយន្តិ។
Taṃ vāpi dhīrā muni vedayanti.
២១៦.
216.
យោ ឱគហណេ ថម្ភោរិវាភិជាយតិ, យស្មិំ បរេ វាចាបរិយន្តំ 11 វទន្តិ;
Yo ogahaṇe thambhorivābhijāyati, yasmiṃ pare vācāpariyantaṃ 12 vadanti;
តំ វីតរាគំ សុសមាហិតិន្ទ្រិយំ, តំ វាបិ ធីរា មុនិ វេទយន្តិ។
Taṃ vītarāgaṃ susamāhitindriyaṃ, taṃ vāpi dhīrā muni vedayanti.
២១៧.
217.
យោ វេ ឋិតត្តោ តសរំវ ឧជ្ជុ, ជិគុច្ឆតិ កម្មេហិ បាបកេហិ;
Yo ve ṭhitatto tasaraṃva ujju, jigucchati kammehi pāpakehi;
វីមំសមានោ វិសមំ សមញ្ច, តំ វាបិ ធីរា មុនិ វេទយន្តិ។
Vīmaṃsamāno visamaṃ samañca, taṃ vāpi dhīrā muni vedayanti.
២១៨.
218.
យោ សញ្ញតត្តោ ន ករោតិ បាបំ, ទហរោ មជ្ឈិមោ ច មុនិ 13 យតត្តោ;
Yo saññatatto na karoti pāpaṃ, daharo majjhimo ca muni 14 yatatto;
អរោសនេយ្យោ ន សោ រោសេតិ កញ្ចិ 15, តំ វាបិ ធីរា មុនិ វេទយន្តិ។
Arosaneyyo na so roseti kañci 16, taṃ vāpi dhīrā muni vedayanti.
២១៩.
219.
យទគ្គតោ មជ្ឈតោ សេសតោ វា, បិណ្ឌំ លភេថ បរទត្តូបជីវី;
Yadaggato majjhato sesato vā, piṇḍaṃ labhetha paradattūpajīvī;
នាលំ ថុតុំ នោបិ និបច្ចវាទី, តំ វាបិ ធីរា មុនិ វេទយន្តិ។
Nālaṃ thutuṃ nopi nipaccavādī, taṃ vāpi dhīrā muni vedayanti.
២២០.
220.
មុនិំ ចរន្តំ វិរតំ មេថុនស្មា, យោ យោព្ពនេ នោបនិពជ្ឈតេ ក្វចិ;
Muniṃ carantaṃ virataṃ methunasmā, yo yobbane nopanibajjhate kvaci;
មទប្បមាទា វិរតំ វិប្បមុត្តំ, តំ វាបិ ធីរា មុនិ វេទយន្តិ។
Madappamādā virataṃ vippamuttaṃ, taṃ vāpi dhīrā muni vedayanti.
២២១.
221.
អញ្ញាយ លោកំ បរមត្ថទស្សិំ, ឱឃំ សមុទ្ទំ អតិតរិយ តាទិំ;
Aññāya lokaṃ paramatthadassiṃ, oghaṃ samuddaṃ atitariya tādiṃ;
តំ ឆិន្នគន្ថំ អសិតំ អនាសវំ, តំ វាបិ ធីរា មុនិ វេទយន្តិ។
Taṃ chinnaganthaṃ asitaṃ anāsavaṃ, taṃ vāpi dhīrā muni vedayanti.
២២២.
222.
អសមា ឧភោ ទូរវិហារវុត្តិនោ, គិហី 17 ទារបោសី អមមោ ច សុព្ពតោ;
Asamā ubho dūravihāravuttino, gihī 18 dāraposī amamo ca subbato;
បរបាណរោធាយ គិហី អសញ្ញតោ, និច្ចំ មុនី រក្ខតិ បាណិនេ 19 យតោ។
Parapāṇarodhāya gihī asaññato, niccaṃ munī rakkhati pāṇine 20 yato.
២២៣.
223.
សិខី យថា នីលគីវោ 21 វិហង្គមោ, ហំសស្ស នោបេតិ ជវំ កុទាចនំ;
Sikhī yathā nīlagīvo 22 vihaṅgamo, haṃsassa nopeti javaṃ kudācanaṃ;
ឯវំ គិហី នានុករោតិ ភិក្ខុនោ, មុនិនោ វិវិត្តស្ស វនម្ហិ ឈាយតោតិ។
Evaṃ gihī nānukaroti bhikkhuno, munino vivittassa vanamhi jhāyatoti.
មុនិសុត្តំ ទ្វាទសមំ និដ្ឋិតំ។ឧរគវគ្គោ បឋមោ និដ្ឋិតោ។
Munisuttaṃ dvādasamaṃ niṭṭhitaṃ.Uragavaggo paṭhamo niṭṭhito.
តស្សុទ្ទានំ –
Tassuddānaṃ –
ឧរគោ ធនិយោ ចេវ, វិសាណញ្ច តថា កសិ;
Urago dhaniyo ceva, visāṇañca tathā kasi;
ចុន្ទោ បរាភវោ ចេវ, វសលោ មេត្តភាវនា។
Cundo parābhavo ceva, vasalo mettabhāvanā.
សាតាគិរោ អាឡវកោ, វិជយោ ច តថា មុនិ;
Sātāgiro āḷavako, vijayo ca tathā muni;
ទ្វាទសេតានិ សុត្តានិ, ឧរគវគ្គោតិ វុច្ចតីតិ។
Dvādasetāni suttāni, uragavaggoti vuccatīti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ១២. មុនិសុត្តវណ្ណនា • 12. Munisuttavaṇṇanā
