| Library / Tipiṭaka / திபிடக • Tipiṭaka / ஸுத்தனிபாதபாளி • Suttanipātapāḷi |
12. முனிஸுத்தங்
12. Munisuttaṃ
209.
209.
அனிகேதமஸந்த²வங், ஏதங் வே முனித³ஸ்ஸனங்.
Aniketamasanthavaṃ, etaṃ ve munidassanaṃ.
210.
210.
யோ ஜாதமுச்சி²ஜ்ஜ ந ரோபயெய்ய, ஜாயந்தமஸ்ஸ நானுப்பவெச்சே²;
Yo jātamucchijja na ropayeyya, jāyantamassa nānuppavecche;
தமாஹு ஏகங் முனினங் சரந்தங், அத்³த³க்கி² ஸோ ஸந்திபத³ங் மஹேஸி.
Tamāhu ekaṃ muninaṃ carantaṃ, addakkhi so santipadaṃ mahesi.
211.
211.
ஸங்கா²ய வத்தூ²னி பமாய 3 பீ³ஜங், ஸினேஹமஸ்ஸ நானுப்பவெச்சே²;
Saṅkhāya vatthūni pamāya 4 bījaṃ, sinehamassa nānuppavecche;
ஸ வே முனீ ஜாதிக²யந்தத³ஸ்ஸீ, தக்கங் பஹாய ந உபேதி ஸங்க²ங்.
Sa ve munī jātikhayantadassī, takkaṃ pahāya na upeti saṅkhaṃ.
212.
212.
அஞ்ஞாய ஸப்³பா³னி நிவேஸனானி, அனிகாமயங் அஞ்ஞதரம்பி தேஸங்;
Aññāya sabbāni nivesanāni, anikāmayaṃ aññatarampi tesaṃ;
ஸ வே முனீ வீதகே³தோ⁴ அகி³த்³தோ⁴, நாயூஹதீ பாரக³தோ ஹி ஹோதி.
Sa ve munī vītagedho agiddho, nāyūhatī pāragato hi hoti.
213.
213.
ஸப்³பா³பி⁴பு⁴ங் ஸப்³ப³விது³ங் ஸுமேத⁴ங், ஸப்³பே³ஸு த⁴ம்மேஸு அனூபலித்தங்;
Sabbābhibhuṃ sabbaviduṃ sumedhaṃ, sabbesu dhammesu anūpalittaṃ;
ஸப்³ப³ஞ்ஜஹங் தண்ஹக்க²யே விமுத்தங், தங் வாபி தீ⁴ரா முனி 5 வேத³யந்தி.
Sabbañjahaṃ taṇhakkhaye vimuttaṃ, taṃ vāpi dhīrā muni 6 vedayanti.
214.
214.
பஞ்ஞாப³லங் ஸீலவதூபபன்னங், ஸமாஹிதங் ஜா²னரதங் ஸதீமங்;
Paññābalaṃ sīlavatūpapannaṃ, samāhitaṃ jhānarataṃ satīmaṃ;
ஸங்கா³ பமுத்தங் அகி²லங் அனாஸவங், தங் வாபி தீ⁴ரா முனி வேத³யந்தி.
Saṅgā pamuttaṃ akhilaṃ anāsavaṃ, taṃ vāpi dhīrā muni vedayanti.
215.
215.
ஏகங் சரந்தங் முனிமப்பமத்தங், நிந்தா³பஸங்ஸாஸு அவேத⁴மானங்;
Ekaṃ carantaṃ munimappamattaṃ, nindāpasaṃsāsu avedhamānaṃ;
ஸீஹங்வ ஸத்³தே³ஸு அஸந்தஸந்தங், வாதங்வ ஜாலம்ஹி அஸஜ்ஜமானங்;
Sīhaṃva saddesu asantasantaṃ, vātaṃva jālamhi asajjamānaṃ;
தங் வாபி தீ⁴ரா முனி வேத³யந்தி.
Taṃ vāpi dhīrā muni vedayanti.
216.
216.
யோ ஓக³ஹணே த²ம்போ⁴ரிவாபி⁴ஜாயதி, யஸ்மிங் பரே வாசாபரியந்தங் 11 வத³ந்தி;
Yo ogahaṇe thambhorivābhijāyati, yasmiṃ pare vācāpariyantaṃ 12 vadanti;
தங் வீதராக³ங் ஸுஸமாஹிதிந்த்³ரியங், தங் வாபி தீ⁴ரா முனி வேத³யந்தி.
Taṃ vītarāgaṃ susamāhitindriyaṃ, taṃ vāpi dhīrā muni vedayanti.
217.
217.
யோ வே டி²தத்தோ தஸரங்வ உஜ்ஜு, ஜிகு³ச்ச²தி கம்மேஹி பாபகேஹி;
Yo ve ṭhitatto tasaraṃva ujju, jigucchati kammehi pāpakehi;
வீமங்ஸமானோ விஸமங் ஸமஞ்ச, தங் வாபி தீ⁴ரா முனி வேத³யந்தி.
Vīmaṃsamāno visamaṃ samañca, taṃ vāpi dhīrā muni vedayanti.
218.
218.
யோ ஸஞ்ஞதத்தோ ந கரோதி பாபங், த³ஹரோ மஜ்ஜி²மோ ச முனி 13 யதத்தோ;
Yo saññatatto na karoti pāpaṃ, daharo majjhimo ca muni 14 yatatto;
அரோஸனெய்யோ ந ஸோ ரோஸேதி கஞ்சி 15, தங் வாபி தீ⁴ரா முனி வேத³யந்தி.
Arosaneyyo na so roseti kañci 16, taṃ vāpi dhīrā muni vedayanti.
219.
219.
யத³க்³க³தோ மஜ்ஜ²தோ ஸேஸதோ வா, பிண்ட³ங் லபே⁴த² பரத³த்தூபஜீவீ;
Yadaggato majjhato sesato vā, piṇḍaṃ labhetha paradattūpajīvī;
நாலங் து²துங் நோபி நிபச்சவாதீ³, தங் வாபி தீ⁴ரா முனி வேத³யந்தி.
Nālaṃ thutuṃ nopi nipaccavādī, taṃ vāpi dhīrā muni vedayanti.
220.
220.
முனிங் சரந்தங் விரதங் மேது²னஸ்மா, யோ யொப்³ப³னே நோபனிப³ஜ்ஜ²தே க்வசி;
Muniṃ carantaṃ virataṃ methunasmā, yo yobbane nopanibajjhate kvaci;
மத³ப்பமாதா³ விரதங் விப்பமுத்தங், தங் வாபி தீ⁴ரா முனி வேத³யந்தி.
Madappamādā virataṃ vippamuttaṃ, taṃ vāpi dhīrā muni vedayanti.
221.
221.
அஞ்ஞாய லோகங் பரமத்த²த³ஸ்ஸிங், ஓக⁴ங் ஸமுத்³த³ங் அதிதரிய தாதி³ங்;
Aññāya lokaṃ paramatthadassiṃ, oghaṃ samuddaṃ atitariya tādiṃ;
தங் சி²ன்னக³ந்த²ங் அஸிதங் அனாஸவங், தங் வாபி தீ⁴ரா முனி வேத³யந்தி.
Taṃ chinnaganthaṃ asitaṃ anāsavaṃ, taṃ vāpi dhīrā muni vedayanti.
222.
222.
அஸமா உபோ⁴ தூ³ரவிஹாரவுத்தினோ, கி³ஹீ 17 தா³ரபோஸீ அமமோ ச ஸுப்³ப³தோ;
Asamā ubho dūravihāravuttino, gihī 18 dāraposī amamo ca subbato;
பரபாணரோதா⁴ய கி³ஹீ அஸஞ்ஞதோ, நிச்சங் முனீ ரக்க²தி பாணினே 19 யதோ.
Parapāṇarodhāya gihī asaññato, niccaṃ munī rakkhati pāṇine 20 yato.
223.
223.
ஸிகீ² யதா² நீலகீ³வோ 21 விஹங்க³மோ, ஹங்ஸஸ்ஸ நோபேதி ஜவங் குதா³சனங்;
Sikhī yathā nīlagīvo 22 vihaṅgamo, haṃsassa nopeti javaṃ kudācanaṃ;
ஏவங் கி³ஹீ நானுகரோதி பி⁴க்கு²னோ, முனினோ விவித்தஸ்ஸ வனம்ஹி ஜா²யதோதி.
Evaṃ gihī nānukaroti bhikkhuno, munino vivittassa vanamhi jhāyatoti.
முனிஸுத்தங் த்³வாத³ஸமங் நிட்டி²தங்.உரக³வக்³கோ³ பட²மோ நிட்டி²தோ.
Munisuttaṃ dvādasamaṃ niṭṭhitaṃ.Uragavaggo paṭhamo niṭṭhito.
தஸ்ஸுத்³தா³னங் –
Tassuddānaṃ –
உரகோ³ த⁴னியோ சேவ, விஸாணஞ்ச ததா² கஸி;
Urago dhaniyo ceva, visāṇañca tathā kasi;
சுந்தோ³ பராப⁴வோ சேவ, வஸலோ மெத்தபா⁴வனா.
Cundo parābhavo ceva, vasalo mettabhāvanā.
ஸாதாகி³ரோ ஆளவகோ, விஜயோ ச ததா² முனி;
Sātāgiro āḷavako, vijayo ca tathā muni;
த்³வாத³ஸேதானி ஸுத்தானி, உரக³வக்³கோ³தி வுச்சதீதி.
Dvādasetāni suttāni, uragavaggoti vuccatīti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / ஸுத்தனிபாத-அட்ட²கதா² • Suttanipāta-aṭṭhakathā / 12. முனிஸுத்தவண்ணனா • 12. Munisuttavaṇṇanā
