| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๕. โมฆราชเตฺถรอปทานํ
5. Mogharājattheraapadānaṃ
๖๔.
64.
‘‘อตฺถทสฺสี ตุ ภควา, สยมฺภู อปราชิโต;
‘‘Atthadassī tu bhagavā, sayambhū aparājito;
ภิกฺขุสงฺฆปริพฺยูโฬฺห, รถิยํ ปฎิปชฺชถฯ
Bhikkhusaṅghaparibyūḷho, rathiyaṃ paṭipajjatha.
๖๕.
65.
‘‘สิเสฺสหิ สมฺปริวุโต, ฆรมฺหา อภินิกฺขมิํ;
‘‘Sissehi samparivuto, gharamhā abhinikkhamiṃ;
นิกฺขมิตฺวานหํ ตตฺถ, อทฺทสํ โลกนายกํฯ
Nikkhamitvānahaṃ tattha, addasaṃ lokanāyakaṃ.
๖๖.
66.
‘‘อภิวาทิย สมฺพุทฺธํ, สิเร กตฺวาน อญฺชลิํ;
‘‘Abhivādiya sambuddhaṃ, sire katvāna añjaliṃ;
สกํ จิตฺตํ ปสาเทตฺวา, สนฺถวิํ โลกนายกํฯ
Sakaṃ cittaṃ pasādetvā, santhaviṃ lokanāyakaṃ.
๖๗.
67.
‘‘ยาวตา รูปิโน สตฺตา, อรูปี วา อสญฺญิโน;
‘‘Yāvatā rūpino sattā, arūpī vā asaññino;
สเพฺพ เต ตว ญาณมฺหิ, อโนฺต โหนฺติ สโมคธาฯ
Sabbe te tava ñāṇamhi, anto honti samogadhā.
๖๘.
68.
‘‘สุขุมจฺฉิกชาเลน , อุทกํ โย ปริกฺขิเป;
‘‘Sukhumacchikajālena , udakaṃ yo parikkhipe;
เย เกจิ อุทเก ปาณา, อโนฺตชาเล ภวนฺติ เตฯ
Ye keci udake pāṇā, antojāle bhavanti te.
๖๙.
69.
‘‘เยสญฺจ เจตนา อตฺถิ, รูปิโน จ อรูปิโน;
‘‘Yesañca cetanā atthi, rūpino ca arūpino;
สเพฺพ เต ตว ญาณมฺหิ, อโนฺต โหนฺติ สโมคธาฯ
Sabbe te tava ñāṇamhi, anto honti samogadhā.
๗๐.
70.
‘‘สมุทฺธรสิมํ โลกํ, อนฺธการสมากุลํ;
‘‘Samuddharasimaṃ lokaṃ, andhakārasamākulaṃ;
ตว ธมฺมํ สุณิตฺวาน, กงฺขาโสตํ ตรนฺติ เตฯ
Tava dhammaṃ suṇitvāna, kaṅkhāsotaṃ taranti te.
๗๑.
71.
‘‘อวิชฺชานิวุเต โลเก, อนฺธกาเรน โอตฺถเฎ;
‘‘Avijjānivute loke, andhakārena otthaṭe;
ตว ญาณมฺหิ โชตเนฺต, อนฺธการา ปธํสิตาฯ
Tava ñāṇamhi jotante, andhakārā padhaṃsitā.
๗๒.
72.
‘‘ตุวํ จกฺขูสิ สเพฺพสํ, มหาตมปนูทโน;
‘‘Tuvaṃ cakkhūsi sabbesaṃ, mahātamapanūdano;
ตว ธมฺมํ สุณิตฺวาน, นิพฺพายติ พหุชฺชโนฯ
Tava dhammaṃ suṇitvāna, nibbāyati bahujjano.
๗๓.
73.
อุโภ หเตฺถหิ ปคฺคยฺห, อุปเนสิํ มเหสิโนฯ
Ubho hatthehi paggayha, upanesiṃ mahesino.
๗๔.
74.
‘‘ปฎิคฺคณฺหิ มหาวีโร, สหเตฺถน มหา อิสี;
‘‘Paṭiggaṇhi mahāvīro, sahatthena mahā isī;
ภุญฺชิตฺวา ตญฺจ สพฺพญฺญู, เวหาสํ นภมุคฺคมิฯ
Bhuñjitvā tañca sabbaññū, vehāsaṃ nabhamuggami.
๗๕.
75.
‘‘อนฺตลิเกฺข ฐิโต สตฺถา, อตฺถทสฺสี นราสโภ;
‘‘Antalikkhe ṭhito satthā, atthadassī narāsabho;
มม จิตฺตํ ปสาเทโนฺต, อิมา คาถา อภาสถฯ
Mama cittaṃ pasādento, imā gāthā abhāsatha.
๗๖.
76.
‘‘‘เยนิทํ ถวิตํ ญาณํ, พุทฺธเสโฎฺฐ จ โถมิโต;
‘‘‘Yenidaṃ thavitaṃ ñāṇaṃ, buddhaseṭṭho ca thomito;
เตน จิตฺตปฺปสาเทน, ทุคฺคติํ โส น คจฺฉติฯ
Tena cittappasādena, duggatiṃ so na gacchati.
๗๗.
77.
ปถพฺยา รชฺชํ อฎฺฐสตํ, วสุธํ อาวสิสฺสติฯ
Pathabyā rajjaṃ aṭṭhasataṃ, vasudhaṃ āvasissati.
๗๘.
78.
ปเทสรชฺชํ อสเงฺขยฺยํ, มหิยา การยิสฺสติฯ
Padesarajjaṃ asaṅkheyyaṃ, mahiyā kārayissati.
๗๙.
79.
‘‘‘อชฺฌายโก มนฺตธโร, ติณฺณํ เวทาน ปารคู;
‘‘‘Ajjhāyako mantadharo, tiṇṇaṃ vedāna pāragū;
โคตมสฺส ภควโต, สาสเน ปพฺพชิสฺสติฯ
Gotamassa bhagavato, sāsane pabbajissati.
๘๐.
80.
‘‘‘คมฺภีรํ นิปุณํ อตฺถํ, ญาเณน วิจินิสฺสติ;
‘‘‘Gambhīraṃ nipuṇaṃ atthaṃ, ñāṇena vicinissati;
โมฆราชาติ นาเมน, เหสฺสติ สตฺถุ สาวโกฯ
Mogharājāti nāmena, hessati satthu sāvako.
๘๑.
81.
‘‘‘ตีหิ วิชฺชาหิ สมฺปนฺนํ, กตกิจฺจมนาสวํ;
‘‘‘Tīhi vijjāhi sampannaṃ, katakiccamanāsavaṃ;
โคตโม สตฺถวาหโคฺค, เอตทเคฺค ฐเปสฺสติ’ฯ
Gotamo satthavāhaggo, etadagge ṭhapessati’.
๘๒.
82.
‘‘หิตฺวา มานุสกํ โยคํ, เฉตฺวาน ภวพนฺธนํ;
‘‘Hitvā mānusakaṃ yogaṃ, chetvāna bhavabandhanaṃ;
สพฺพาสเว ปริญฺญาย, วิหรามิ อนาสโวฯ
Sabbāsave pariññāya, viharāmi anāsavo.
๘๓.
83.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา โมฆราโช เถโร อิมา คาถาโย อภาสิตฺถาติ;
Itthaṃ sudaṃ āyasmā mogharājo thero imā gāthāyo abhāsitthāti;
โมฆราชเตฺถรสฺสาปทานํ ปญฺจมํฯ
Mogharājattherassāpadānaṃ pañcamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๕. โมฆราชเตฺถรอปทานวณฺณนา • 5. Mogharājattheraapadānavaṇṇanā
